Pa February 21, 2017, Unduna wa vya Malango ku Russia ukamangaliraso Ofesi ya Ŵakaboni ŵa Yehova. Unduna uwu ukukhumba kuti Ofesi ya Ŵakaboni ŵa Yehova ku Russia, yilongosore vyose vyakukhwaskana na mipingo yawo 2,277.

Unduna wa vya Malango wayowoya ivi apo ukachitanga chipikisheni ku ofesi ya Ŵakaboni ŵa Yehova. Ofesi ya mulara wakwimira boma pa nkhani za milandu ndiyo yikatuma Unduna uwu kuti uchite chipikisheni. Iwo ŵakakhumbanga kumanya mawupu agho ghakwimira Ŵakaboni ŵa Yehova, kusazgapo Ofesi ya Ŵakaboni ŵa Yehova. Ŵakaboni ŵa Yehova ku Russia ŵakugwiliskira ntchito mawupu agha pa kulembeska katundu wa mipingo yawo. Pa February 27, 2017, Unduna wa vya Malango ukati wasanga kuti Ofesi ya Ŵakaboni ŵa Yehova yikuswa malango chifukwa yikuchita “vinthu mwakutalulira chomene.”

Ŵakaboni ŵa Yehova pa charu chose ŵakudandawura chomene na ivyo vikuchitikira Ŵakhristu ŵanyawo ku Russia. Pasono Unduna wa vya Malango ukulimbana na mipingo ya Ŵakaboni ŵa Yehova. Ivi vikulongora kuti ŵakukhumba kumazga mawupu kweniso mipingo yose ya Ŵakaboni ŵa Yehova ku Russia.