Lutani apo pali nkhani

Lutani pa menyu yachiŵiri

Ŵakaboni ŵa Yehova

Chitumbuka

Munthu wawotcha nyumba ya Kaboni wa Yehova ku Lutsino, Moscow

JUNE 16, 2017
RUSSIA

Ivyo Khoti Likuru Chomene ku Russia Likadumura Vyapangiska Kuti Ŵakaboni ŵa Yehova Ŵasuzgike Chomene

Ivyo Khoti Likuru Chomene ku Russia Likadumura Vyapangiska Kuti Ŵakaboni ŵa Yehova Ŵasuzgike Chomene

Ŵakaboni ŵa Yehova ku Russia ŵakusuzgika chomene chifukwa cha ivyo khoti likadumura pa April 20, 2017. Ŵalara ŵa boma ŵakuswa wanangwa wa Ŵakaboni ŵa Yehova kweniso kuŵazenga mulandu chifukwa cha kusopa. Ŵanthu ŵanyake ku Russia ŵakusuzga na kuchitira nkhaza Ŵakaboni ŵa Yehova chifukwa cha sankho. Iwo ŵakusangirapo mwaŵi pa ivyo khoti likadumura.

Nkhaza Izo Boma la Russia Likuchita Kweniso Kuswa Wanangwa wa Ŵanthu

Dennis Christensen

Kuzenga Milandu Ŵakaboni ŵa Yehova

  • Pa May 25, ŵapolisi ŵakatimbanizga mapemphero gha Ŵakaboni ŵa Yehova ku Oryol. Ŵapolisi ŵakaka a Dennis Christensen ŵa ku Denmark, awo ni mulara wa mpingo wa Oryol. A Christensen ŵali kuŵajalira dankha mu jele m’paka pa July 23 apo ŵazamuŵazenga mulandu wakuŵaghanaghanira kuti ŵakuchita vinthu mwakutalulira. Para ŵazakasangika na mulandu, ndikuti a Christensen ŵazamukhala mu jele kwa vyaka vyapakati pa 6 na 10.

Kofya Mawupu gha Ŵakaboni ŵa Yehova

  • Pa May 4, boma likapeleka chikalata kwa cheyamani wa wupu wa Ŵakaboni ŵa Yehova wa Krymsk chakuchenjezga kuti ŵaleke kwendeska wupu uwu. Kweniso chikati para ŵalutilirenge kusopa, ŵaŵenge na mulandu.

  • Boma lili kutumiraso mawupu ghanyake 5 gha Ŵakaboni ŵa Yehova chikalata chakuchenjezga.

Ŵapolisi Ŵakatimbanizga Mapemphero

  • Pa April 22, ŵapolisi ŵakanjira mu nyumba iyo Ŵakaboni ŵa Yehova ŵakasoperangamo ku Dzhankoy, Republic of Crimea panyengo iyo ŵakaŵa pafupi kumalizga mapemphero ghawo. Ŵapolisi aŵa ŵakati kufuma waka apo khoti lili kudumulira mulandu, Ŵakaboni ŵa Yehova ŵalije wanangwa wakusopa. Ŵakachita chipikisheni nyumba iyo ŵakasoperangamo, na kuyijara kuti Ŵakaboni ŵa Yehova ŵaleke kusoperamo.

  • Kufuma waka apo khoti likadumulira mulandu uwu, ŵapolisi ŵatimbanizga mapemphero gha Ŵakaboni ŵa Yehova mu malo ghanyake 5 ndipo ghanyake mwa malo agha mukaŵa mu nyumba.

“Ŵakaboni ŵa Yehova ŵakuchita vinthu mwamtende. Ntheura nili na chitima chomene chifukwa cha nkhaza izo ŵanthu ŵa ku Russia ŵakuŵachitira . . . Nkhupempha ŵalara ŵa boma la Russia kuti ŵapeleke ku Ŵakaboni ŵa Yehova wanangwa wakusopa, wakuyowoya maghanoghano na kusankha, wakuwungana mwamtende na kuchezga na ŵanyawo kuyana na malango gha charu ichi ndiposo ivyo vyaru vili kukolerana pa nkhani ya wanangwa wa ŵanthu kweniso ivyo wupu wa OSCE [Organization for Security and Cooperation in Europe] ukuyowoya.”—Michael Georg Link, Director of the OSCE Office for Democratic Institutions and Human Rights.

Kusuzga Ŵana ŵa Sukulu ŵa Ŵakaboni ŵa Yehova

  • Pa April 24, mu msumba wa Bezvodnoye, ku Kirov, msambizgi wakalengeska ŵana ŵa sukulu ŵaŵiri awo amama ŵawo ni Kaboni wa Yehova. Msambizgi uyu wakati wachita nthena chifukwa chakuti Ŵakaboni ŵa Yehova mbakukanizgika mu charu cha Russia.

  • Pa May 17, ku Moscow, mulara wa sukulu yinyake wakalemba kalata yakuchenjezga ŵapapi ŵa mwana wa vyaka 8 uyo wakaphalirako munyake vya Chiuta. Iyo wakati kuyana na ivyo khoti likadumura, “ntchakukanizgika kuchita chilichose pa sukulu icho chikukolerana yayi na masambiro.” Mulara wakawofya ŵapapi ŵa mwana uyu kuti wamuŵaphara ku polisi kweniso kuti mwana wawo ŵamufumiskengepo pa sukulu yawo.

Ŵanalume Ŵanyake Awo Mbakaboni ŵa Yehova Ŵakuŵakanira Ntchito Zinyake M’malo mwa Usilikari

  • Pa April 28, wupu wakulemba na kusambizga ŵanthu usilikari wa Conscription Commission ku Cheboksary na Marposadskiy ukakana kupeleka ntchito ya mtundu unyake kwa Kaboni wa Yehova uyo wakakana usilikari. Wupu uwu ukati Ŵakaboni ŵa Yehova ŵakuchita vinthu mwakutalulira chomene lekani ŵangapika yayi ntchito zinyake.

  • Ŵanalume ŵanyake ŵaŵiri awo Mbakaboni ŵa Yehova nawo ŵakaŵakanira kuŵapa ntchito zinyake.

A Philip Brumley, awo ni loya wa Ŵakaboni ŵa Yehova ŵakawona kuti boma la Russia likujisuska: Iwo ŵakati, “boma likukana kupeleka ntchito zinyake ku ŵachinyamata awo Mbakaboni ŵa Yehova chifukwa chakuti ŵakuchita vinthu mwakutalulira, kweni chakuzizika ntchakuti likukhumba kuti ŵanjire usilikari. So kasi ntchakupulikikwa nthena kuti ŵanthu awo ŵakuti ŵakuchita vinthu mwakutalulira ŵaŵeso ŵasilikari?”

Nkhaza na Sankho

Nkhaza izo Ŵakaboni ŵa Yehova Ŵakukumana nazo

  • Pa April 30, ku Lutsino, Moscow, munthu wakawotcha nyumba ya banja linyake la Ŵakaboni ŵa Yehova kweniso ya ŵapapi ŵawo awo mbachekuru. Pambere wandawotche nyumba izi, munthu uyu wakayowoyerathu kuti wakutinkha Ŵakaboni ŵa Yehova.

  • Pa May 24, ku Zheshart, Komi Republic, ŵanthu ŵakawotcha nyumba iyo Ŵakaboni ŵa Yehova ŵakasoperangamo.

    Nyumba ya Ufumu ya Ŵakaboni ŵa Yehova ku Zheshart iyo munthu wali kotcha

  • Ŵali kuwiskaso nyumba zinyake 9 zakusoperamo za Ŵakaboni ŵa Yehova kufuma waka apo khoti likadumulira mulandu pa April 20, 2017.

  • Pa April 26, apo Kaboni wa Yehova munyake ku Belgorod wakafumanga ku nyumba yake, munthu munyake wakamba kumunena na kuchemerezga kuti, “Muli kukanizgika imwe!” ndipo paumaliro wakamutimba.

  • Pa May 11, ku Tyumen, gulu la ŵanalume ŵanyake likatimbanizga Ŵakaboni ŵa Yehova apo ŵakachitanga mapemphero ghawo, ndipo likaŵatuka na kuŵawofya kuti liŵapwetekenge.

Sankho Ilo Ŵakaboni ŵa Yehova Ŵakukumana Nalo

  • Pa May 15, kampani yakupanga munkhwala ku Dorogobuzh, Smolensk, yikalekeska ŵantchito ŵake wose awo Mbakaboni ŵa Yehova. Kampani iyi yikati ŵapolisi ŵa FSB ndiwo ŵakayiphalira kuti Ŵakaboni ŵa Yehova mbakwenelera yayi kugwira ntchito pa kampani iyi chifukwa ŵakuchita vinthu mwakutalulira.

  • Kufuma waka apo khoti likadumulira mulandu, makampani ghanyake ghatatu ghakawofya Ŵakaboni ŵa Yehova kuti ŵaŵalekeskenge ntchito chifukwa ŵakuti chisopa chawo chikuchita vinthu mwakutalulira. Mu msumba wa Yashkino, ku Kemerovo, mpolisi wakachichizga Kaboni wa Yehova kuti wawulure vya Ŵakaboni ŵa Yehova ŵanyake, kweni wakakana. Ŵalara ŵa boma ŵakati ntchakuzomerezgeka yayi kuŵa mu chisopa chakukanizgika, ndipo ŵakati Ŵakaboni ŵa Yehova ŵakuyana waka na vigeŵenga vya ISIS.

Kufipira Mtima Ŵakaboni ŵa Yehova ku Russia

Mu vyaka 10 ivyo vyajumpha pambere Khoti Likuru Chomene lindadumure mulandu, boma la Russia likatumanga ŵanthu kuti ŵasuzgenge Ŵakaboni ŵa Yehova. Kufuma waka apo khoti likadumulira mulandu, Ŵakaboni ŵa Yehova sono ŵali pangozi chomene. Ivyo khoti likadumura vyapangiska kuti ŵalara ŵa boma kweniso ŵanthu ŵanyake ŵasuzgenge Ŵakaboni ŵa Yehova nga umo nkhani iyi yalongosolera. Ŵakaboni ŵa Yehova pa charu chose ŵakufipa chomene mtima na ivyo vichitikirenge ŵanyawo ku Russia usange Khoti Likuru Chomene la Apilu lingadumura uheni mulandu uwu pa July 17, 2017.

A Brumley ŵakati: “Palije uyo wali kupelekapo ukaboni wakuti Ŵakaboni ŵa Yehova ŵakuchita vinthu mwakutalulira. Nangauli ŵakuti Ŵakaboni ŵa Yehova mbanthu ŵakofya mu charu ichi, kweni vingayana yayi na nkhaza izo boma ili likuchitira Ŵakaboni ŵa Yehova. Boma la Russia likwenera kughanaghaniraso usange ivyo likuchitira Ŵakaboni ŵa Yehova vikukolerana na malango gha charu ichi kweniso ivyo vyaru vili kukolerana pa nkhani ya wanangwa wakusopa.”