Lutani apo pali nkhani

Lutani pa menyu yachiŵiri

Ŵakaboni ŵa Yehova

Chitumbuka

MAY 30, 2017
RUSSIA

Pa July 17, 2017, Khoti Likuru Chomene la Russia Lipulikizgenge Mulandu Uwo Ŵakaboni ŵa Yehova Ŵachita Apilu

Pa July 17, 2017, Khoti Likuru Chomene la Russia Lipulikizgenge Mulandu Uwo Ŵakaboni ŵa Yehova Ŵachita Apilu

Ŵakaboni ŵa Yehova ku Russia ŵakachita apilu ivyo Khoti Likuru Chomene la Russia lili kudumura. Khoti ili lili kukanizga Ŵakaboni ŵa Yehova kusopa. Pa April 20, Jaji Yuriy Ivanenko, wakadumura kuti ntchito, na mawupu ghose gha Ŵakaboni ŵa Yehova mu Russia vijalike. Khoti la Apilu lipulikizgenge mulandu uwu pa July 17, 2017.

Ŵakaboni ŵa Yehova ku Russia ŵachita apilu kuti mulandu uwu ŵeruzge makora, chifukwa maukaboni agho ghali kupelekeka mu khoti ngautesi. Iwo ŵalije mulandu wakuchita vinthu mwakutalulira. Ŵakadandaura kuti mulandu uwo ŵakuŵazenga sono, ukuyana waka na mulandu uwo ŵakaŵazenga mu nyengo ya boma la Soviet ilo likatambuzganga Ŵakaboni ŵa Yehova. Paumaliro, ŵakasangika kuti ŵalije mulandu. Ŵachita apilu chifukwa ivyo khoti ladumura vikususkana na Malango gha Russia na ivyo vyaru vili kukolerana.

Kufuma apo khoti likadumulira mulandu uwu, Ŵakaboni ŵa Yehova ŵakusuzgika ndipo ŵanthu ŵakuŵachitira nkhaza nga umo vikaŵira mu ulamuliro wa Chikomyunizimu. Ŵalara ŵa boma ŵakuyuzga Ŵakaboni ŵa Yehova chifukwa ŵakuti iwo ŵakuchita vinthu mwakutalulira. Ŵakaboni ŵa Yehova ŵanyake ntchito zaŵamalira, ŵasambizgi ŵakofya ŵana awo Mbakaboni ŵa Yehova pamaso pa ŵanyawo mu kilasi. Ŵanthu ŵanyake ŵananga Nyumba za Ufumu za Ŵakaboni ŵa Yehova, ndipo nyumba ziŵiri za Ŵakaboni ŵa Yehova ŵanyake zili kotcheka.

Ŵakaboni ŵa Yehova pa charu chose ŵakugomezga kuti Khoti la Apilu lidumurenge makora mulandu uwu, ndipo viwovwirenge Ŵakaboni ŵa Yehova kuti ŵaŵe na wanangwa wakusopa kweniso kuti ŵaŵe ŵakuvikilirika.