Vya screen reader

Sankhani chiyowoyero

Lutani pa menyu yachiŵiri

Lutani apo pali nkhani

Ŵakaboni ŵa Yehova

Chitumbuka

NOVEMBER 18, 2013
CHARU CHOSE

Mukumbukenge Awo Ŵali mu Jele

Mukumbukenge Awo Ŵali mu Jele

Fundo ya nambara 18 ya International Covenant on Civil and Political Rights yikuti, “munthu waliyose wali na wanangwa wakuyowoya maghanoghano ghake, kulondezga njuŵi yake kweniso wanangwa wa kusopa.” * Kweni mu vyaru vinyake para Ŵakaboni ŵa Yehova ŵakulondezga wanangwa uwu, ŵakukakika na kuŵikika mu jeIe kweniso ŵakuchitirika nkhaza. Ŵanandi awo ŵakukakika mbawukirano awo ŵakukana kunjira usilikari chifukwa cha ivyo ŵakugomezga. Ŵanyake ŵakukakika chifukwa chakulondezga ivyo ŵakusambira mu Baibolo.

Nangauli Ŵakaboni ŵa Yehova ŵakuŵachitira nkhaza, kweni iwo ŵakulutilira kugomezgeka. Vyaru ivyo vikuŵachitira nkhaza vikujinangira waka mbiri chifukwa vikutondeka kuchindika wanangwa wa ŵanthu. Bokosi ilo lili pasi apa, likulongora vyaru ivyo vikukaka Ŵakaboni ŵa Yehova kweniso chiŵerengero cha awo ŵakukakika.

CHARU

AWO ŴALI KUKAKIKA

Eritrea

52

Korea, South

599

Nagorno-Karabakh

1

Singapore

18

Turkmenistan

9

Wose Pamoza

679

Awo ŵakakika kufika pa November 12, 2013

ERITREA

Lipoti lasonosono apa likati, Ŵakaboni ŵa Yehova 52, ŵanalume na ŵanakazi wuwo, ŵali kukakika ndipo ŵakukhala mwakusuzgika chomene. Nangauli milandu yawo yindadumulike, kweni ŵali kukakika chifukwa chakulondezga ivyo ŵakusambira mu Baibolo, kuchita ntchito zakovwira chisopa chawo, ndipo ŵanyake pa vifukwa vyambura kumanyikwa makora. Ŵanyake mwa ŵanthu aŵa Mbakaboni ŵatatu, Paulos Eyassu, Isaac Mogos, na Negede Teklemariam, awo ŵakhala mu jele kwa vyaka vyakujumpha 20, chifukwa chakukana ntchito zausilikari. Iwo ŵakakakika pa September 24, 1994. Ŵakaboni ŵa Yehova ŵanyake ŵa vyaka vyakujumpha 60, Misghina Gebretinsae na Yohannes Haile, ŵali kufwira mu jele. Kufuma waka apo charu cha Eritrea chikamba kujilamulira mu 1993, chalutilira kukaka Ŵakaboni ŵa Yehova na kuŵachitira nkhaza zinandi.

SOUTH KOREA

Pasono, Ŵakaboni ŵa Yehova ŵachinyamata 599 ŵali kukakika ndipo ŵali kweruzgika kuti ŵakhale mu jele myezi 18 waliyose chifukwa chakukana ntchito zausilikari. Kufumira waka apo ku Korean kukaŵira nkhondo m’paka sono, charu cha South Korea chikulutilira kutambuzga ŵanyamata wose awo ŵakukana kunjira usilikari chifukwa cha ivyo ŵakugomezga. Charu ichi chindambeso kupeleka ntchito zinyake ku awo ŵakukana ntchito zausilikari. Pa nyengo yose iyi, charu cha South Korea chakaka Ŵakaboni 17,549 ndipo para tasazga vyaka vyawo vyose vyakukhalira mu jele vikukwana 34,100. Charu cha South Korea chatondeka kulondezga ivyo chikakolerana na vyaru vinyake pa nkhani ya wanangwa wa ŵanthu wakulondezga ivyo ŵakugomezga. Kuti mumanye vinandi ŵerengani nkhani yakuti, ‘Vyaru na Mawupu Vyasuska Ivyo Boma la South Korea Likuchita.’

NAGORNO-KARABAKH

Kaboni munyake wa vyaka 20 ku Nagorno-Karabakh wali mu jele chifukwa chakukana usilikari ndipo wakulondezga ivyo wakusambira mu Baibolo. Charu cha Nagorno-Karabakh chindambe kupeleka ntchito zinyake kwa awo ŵakukana kunjira usilikari. Pa December 30, 2011, ŵakadumura kuti wakakhale mu jele myezi 30, ndipo pa January 29, 2013, wakapempha belo kweni ŵakamukanira. Iyo wakapempha belo chifukwa wakulwaralwara, kweni ŵalara ŵa jele ŵakamukanira.

SINGAPORE

Boma la Singapore likuchichizga ŵanthu kuti ŵagwirenge ntchito zausilikari ndipo likuchindika yayi wanangwa wa ŵanthu wakulondezga ivyo ŵakugomezga. Ŵanyamata ŵanyake ŵakukwana 18 awo ŵakusopera lumoza na Ŵakaboni ŵa Yehova ŵali kuŵakaka na kudumura kuti ŵakhale myezi 39 waliyose mu majele gha ku malo gha ŵasilikari. Kaboni munyake wakafuma mu August 2013 pamanyuma pakukhala chaka chimoza mu jele.

TURKMENISTAN

Ŵakaboni ŵa Yehova 9 ŵali mu jele ku Turkmenistan. Pa Ŵakaboni aŵa 8 ŵali kuŵakaka chifukwa chakulondezga ivyo ŵakusambira mu Baibolo ndipo yumoza ŵali kumupusikizgira waka mulandu. Ŵanalume aŵa ŵali kuŵeruzga kuti ŵakhale mu jele kwa myezi yapakati pa 12 na 24 ndipo kanandi magadi na ŵasilikari ŵakuŵatimba chomene. Para ŵaŵafumiska mu jele, nyengo zinyake ŵakuŵazengaso mulandu na kuŵajaliraso chifukwa ŵakuŵatora nga ni ŵanthu awo ŵakusuzga chomene ndipo ŵakutambuzgika kwa zanimuwone.

^ ndime 2 Wonaniso fundo nambara 18 ya United Nations Universal Declaration of Human Rights, kweniso fundo nambara 9 ya European Convention on Human Rights.