Vya screen reader

Sankhani chiyowoyero

Lutani pa menyu yachiŵiri

Lutani apo pali nkhani

Ŵakaboni ŵa Yehova

Chitumbuka

MAY 6, 2016
UNITED STATES

Ŵakaboni ŵa Yehova Ŵaguliska Nyumba Iyo Ŵagwiliskira Ntchito Vyaka Vinandi ku Brooklyn Heights

Ŵakaboni ŵa Yehova Ŵaguliska Nyumba Iyo Ŵagwiliskira Ntchito Vyaka Vinandi ku Brooklyn Heights

NEW YORK—Pachiŵiri, 26 April, 2016, Ŵakaboni ŵa Yehova wakamalizga kuguliska nyumba yawo ya 124 Columbia Heights ku Brooklyn, New York. Nyumba yili pa malo ghakukwana masweya mita 14,121 (ghakujumpha 152,000-square-foot), ndipo pachanya pake pali chikhwangwani cha watchtower. Nyumba iyi yili kumpoto kwa msewu wakuchemeka Brooklyn Heights Promenade. Mu December 2015, ŵanthu ŵakamba kubida panji kupeleka mtengo uwo waliyose wakakukhumbanga kugulira nyumba iyi. Paumaliro, munthu wakwamba wakasankhika kuti wagure nyumba iyi.

Nyumba ya 122-124 Columbia Heights pambere Ŵakaboni ŵa Yehova ŵandayinozge.

Nyumba ya 124 Columbia Heights, iyo pakwamba yikaŵa na nyumba zakudikanya 4 (four-story), pakwamba yikaŵa ya Henry Ward Beecher. Beecher wakaŵa munthu wakutchuka pa nkhani yakususka boma kweniso wakaŵa muliska wa tchalitchi la Plymouth kufuma mu 1856 m’paka mu 1881. Pakulongosora za mbiri ya nyumba iyi, nyuzipepara ya The New York Times yikati “vikuwoneka kuti mukaŵa mu nyumba yeneyiyi umo Pulezidenti Lincoln wakakumana na Mr. Beecher pambere wandasayinire dango lakumazga wuzga.” Mu May 1909, Ŵakaboni ŵa Yehova ŵakagura nyumba iyi na zinyakeso izo zikaŵa pafupi na nyumba iyi ndipo pasono nyumba iyi yili na nyumba zakudikanya 10.

Muyowoyeri wa Ŵakaboni ŵa Yehova, Richard Devine, wakati: “Nyumba ya 124 Columbia Heights njimoza mwa nyumba izo gulu lithu lagwiliskira ntchito kwa vyaka vinandi. Kwambira mu 1909, nyumba iyi mwakhalanga ŵanthu awo ŵakugwira ntchito ku ofesi yithu yikuru ya pa charu chose. Kufuma mu 1929 m’paka mu 1957, kuwuskako vyaka 4 pera, mu nyumba iyi mukaŵa wayilesi yithu ya WBBR iyo yikapharazganga nkhani na mapulogiramu ghanyake gha mu Baibolo.”

Situdiyo iyo mukaŵa wayilesi ya Ŵakaboni ŵa Yehova ya WBBR, mu nyumba ya 124 Columbia Heights mu 1950.

Nangauli Ŵakaboni ŵa Yehova ŵakhala ku Brooklyn Heights kwa vyaka vyakujumpha 100, kweni wupu uwo ŵakugwiliskira ntchito wa Watch Tower Bible and Tract Society ukakhazikiskika m’ma 1880 ku Allegheny, (chigaŵa icho pasono chili mu Pittsburgh) Pennsylvania. David A. Semonian, muyowoyeri wa Ŵakaboni ŵa Yehova pa ofesi yawo yikuru, wakayowoya kuti: “Kusama uko kukachitika mu 1909 kuluta mu tawuni ya Brooklyn uko kuli dowoko, kukaŵa kwakuzirwa chifukwa ntchito yithu yakusambizga ŵanthu Baibolo pa charu chose yikuluta panthazi chomene.”

Kuguliska nyumba ya 124 Columbia Heights mbukaboni wakulongora kuti Ŵakaboni ŵakusamuka nadi. Iwo ŵasamuskira maofesi ghawo ku malo gha maekara pafupifupi 50, ku Warwick, New York. Ofesi yikuru yasono iyi yili mukati kuzenga ndipo yili pafupi kumara. Semonian wakayowoyaso kuti: “Tikakhumbanga nadi kusama na kuŵa na maofesi ghakuzengeka umo ise tikakhumbiranga. Ku Brooklyn ndiko takhala kwa vyaka vyakujumpha 100, kweni sono ku Warwick ndiko kuŵenge chikaya chithu.”

Mungayowoya na:

David A. Semonian, Ofesi ya Chimanyisko, tel. +1 718 560 5000