Lutani apo pali nkhani

Lutani pa menyu yachiŵiri

Ŵakaboni ŵa Yehova

Chitumbuka

NOVEMBER 1, 2016
ITALY

Chindindindi ku Italy

Chindindindi ku Italy

Pa October 30, 2016, mulenji, chindindindi chikuru chomene (6.6 pa Rickter Scale) chikachitika mu chigaŵa cha pakati cha Italy. Chikaŵa chankhongono chomene kuluska vindindindi vyose ivyo vyachitikapo mu charu cha Italy kwambira mu 1980. Nangauli ŵanthu pafupifupi 20 ŵakapwetekeka, kweni malipoti ghakulongora kuti palije uyo wakafwapo.

Chindindindi ichi chikambira mu tawuni ya Norcia, ndipo chikachitika pati pajumpha mazuŵa ghachoko waka kufuma apo vindindindi vinyake viŵiri vikachitika mu tawuni iyi. Namise, pa October 26, 2016, mu tawuni ya Norcia, mukachitika chindindindi chankhongono (5.5 pa Rickter Scale) ndipo pati pajumpha maora ghaŵiri, mukachitikaso chinyake (6.1 pa Rickter Scale).

Vindindindi ivi vikachitika kufupi na uko chindindindi cha pa August 24 chikachitikira, icho chikakoma ŵanthu pafupifupi 300.

Ofesi ya Ŵakaboni ŵa Yehova ku Italy yikati palije Kaboni uyo wakafwa panji kupwetekeka chomene. Nyumba za mabanja ghaŵiri pera gha Ŵakaboni ŵa Yehova ndizo zikawa na chindindindi icho chikachitika pa October 26, ndipo nyumba za Ŵakaboni ŵanandi zikanangika waka. Ŵalara ŵa mpingo ŵachali kudumbiskana na Ŵakaboni awo ŵakukhala ku malo agho ghakasakazika na chindindindi kuti ŵawone ivyo ŵakukhumbikwira kweniso ivyo vili kunangika. Vili nthena chifukwa ŵanyake ŵachali ŵandakhazikike kufuma waka apo chindindindi cha mu August chikachitikira. Nga umo viliri na ŵanthu ŵanandi awo ŵakhwaskika na suzgo la chindindindi, Ŵakaboni ŵanandi ŵakugona mu nyumba zawo yayi kopa kuti zingaŵawira. Ntheura ŵakugona waka mu magalimoto, na mu matenti (campers) ndipo ŵanyake ŵakugona mu Nyumba za Ufumu panji kuti malo ghakusoperamo gha Ŵakaboni ŵa Yehova.

Wupu Wakulongozga wa Ŵakaboni ŵa Yehova ku ofesi yawo yikuru ndiwo ukwendeska ntchito yakovwira ŵanthu para kwachitika masoka, ndipo ukugwiliskira ntchito ndalama zakovwira pa ntchito yakupharazga ya pa charu chose. Ku Italy, kuli Ŵakaboni ŵa Yehova ŵakujumpha 251,000.

Mungayowoya na:

International: David A. Semonian, Ofesi ya Chimanyisko, 1-718-560-5000

Italy: Christian Di Blasio, 39-06-872941