Lutani apo pali nkhani

OCTOBER 21, 2016
ITALY

Ŵakaboni ŵa Yehova Ŵakupeleka Uthenga Wakupembuzga ku Italy Kwati Kwachitika Chindindindi

ROME—Mu September 2016, Ŵakaboni ŵa Yehova ŵakatangwanika na ntchito yakugaŵira ŵanthu Gongwe la Mulinda ilo likaŵa na uthenga wakupembuzga chomene. Gongwe la Mulinda ili likaŵa na mutu wakuti “Kasi Chisangulusko Tingachisanga Nkhu?” ndipo Ŵakaboni ŵa Yehova ŵakagaŵiraso magazini iyi pa upharazgi wapadera wa pa charu chose. Ŵakaboni ŵa Yehova ŵakajipeleka chomene kuphalira ŵanthu uthenga wakupembuzga wa mu Baibolo mu chigaŵa cha pakati ku Italy, uko kukachitika chindindindi chikuru (6.2 pa Rickter Scale). Chindindindi ichi chikachitika pa August 24, 2016, ndipo chikakhwaska chigaŵa cha Lazio, Marche, na Umbria. Chikakoma ŵanthu pafupifupi 300, ndipo ŵanyake 2,000 ŵakasoŵa pakukhala.

Muyowoyeri wa Ŵakaboni ŵa Yehova ku Italy, Christian Di Blasio, wakati: “Upharazgi wapadera wa pa charu chose uwu ukanozgeka kuti tipembuzge ŵanthu pa charu chose. Magazini iyi nja panyengo yake, chomenechomene kuno ku Italy chifukwa cha chindindindi icho chachitika. Tili maso chomene na masuzgo gha ŵanthu wose awo ŵakhwaskika na chindindindi ichi, kusazgapo Ŵakaboni ŵa Yehova awo ŵajipeleka kovwira ŵanyawo pa nyengo iyi.”

Ŵakaboni ŵa Yehova ŵakupembuzga munthu mu tawuni ya Amatrice, uko ŵanthu ŵanandi ŵakakhwaskika na chindindindi.

Nangauli mu vigaŵa ivyo vyakhwaskika na chindindindi muli mipingo 15 ya Ŵakaboni ŵa Yehova, kweni palije yumoza wa Ŵakaboni ŵa Yehova uyo wali kufwa panji kupwetekeka chomene. Ndipouli nyumba zitatu za Ŵakaboni ŵa Yehova ndizo zili kuwa, zinyake zili kunangika waka. Di Blasio wakati Ŵakaboni ŵa Yehova ŵanyake awo nyumba zawo zili kuwa, nawo ŵakajipeleka chomene kupembuzga ŵazengezgani ŵawo mwakuŵagaŵira magazini. Kweniso Ŵakaboni ŵa Yehova awo ŵakapona pa chindindindi icho chikachitika kumasinda, nawo ŵakajipeleka kovwira na kupembuzga awo ŵakakhwaskika na chindindindi ichi. Di Blasio wakati: “Ŵakaboni ŵa Yehova awo ŵakajipeleka ŵakati uthenga wa mu Baibolo ukaŵapembuzga chomene, ntheura ŵakakhumbanga kuchita chilichose icho ŵangakwaniska kuti nawo ŵapembuzge ŵanthu ŵanyake awo ŵakasuzgikanga.”

Mungayowoya na:

International: David A. Semonian, Ofesi ya Chimanyisko, 1-718-560-5000

Italy: Christian Di Blasio, 39-06-872941