Kasi nyifwa yili na nkhongono comene kuluska Ciuta? Yayi. Vingacitika wuli kuti nyifwa panji “mulwani” waliyose waŵe na nkhongono kuluska “Ciuta Wankhongonozose”? (1 Ŵakorinte 15:26; Exodus 6:3) Ciuta wali na nkhongono zakumazgira nyifwa kwizira mu ciwuka ndipo walayizga kuti ndivyo wazamucita mu caru ciphya. * Kasi tingagomezga wuli? Yesu Mwana wa Ciuta wakayowoya mazgu agho ghakutipa cigomezgo.—Ŵazgani Mateyu 22:31, 32.

Apo wakayowoyanga na Ŵasaduki awo ŵakagomezganga yayi za ciwuka, Yesu wakati: “Pa nkhani ya ciwuka ca ŵakufwa, kasi mundaŵazge ico cikayowoyeka kwa imwe na Ciuta, kuti, ‘Ndine Ciuta wa Abrahamu na Ciuta wa Yisake na Ciuta wa Yakobe’? Iyo ni Ciuta, wa ŵakufwa cara, kweni wa ŵamoyo.” Apa Yesu wakayowoyanga za phangano ilo Ciuta wakapangana na Mozesi pa civwati ico cikagoleranga moto mu 1514 B.C.E. (Exodus 3:1-6) Mwakuyana na Yesu, mazgu agho Yehova wakayowoya kwa Mozesi, agho ghakuti “Ndine Ciuta wa Abrahamu na Ciuta wa Yisake na Ciuta wa Yakobe,” ghakulongora kuti ciwuka cizamucitika nadi kwambura kutondeka. Mwawuli?

Cakwamba wonani dankha nkhani yose. Pa nyengo iyo Yehova wakayowoyanga na Mozesi, ŵanthu nga Abrahamu, Yisake kweniso Yakobe ŵakaŵa kuti ŵafwa kale. Pakaŵa kuti pajumpha vyaka 329 kufuma apo Abrahamu wakafwira, Yisake 224, ndipo Yakobe pakaŵa kuti pajumpha vyaka 197. Ndipouli, Yehova wakayowoya kuti “Ndine Ciuta wa Abrahamu na Ciuta wa Yisake na Ciuta wa Yakobe.” Kuti wakayowoya kuti “Nkhaŵa Ciuta wawo” yayi. Yehova wakayowoyanga vya ŵanthu ŵatatu aŵa nga ni para ŵacali ŵamoyo. Cifukwa wuli?

Yesu wakalongosora kuti: “[Yehova] ni Ciuta, wa ŵakufwa cara, kweni wa ŵamoyo.” Kasi mukughanaghana kuti mazgu agha ghakung’anamuraci? Usange ciwuka kuŵavyenge mphanyi tikuti Abrahamu, Yisake, na Yakobe ŵakhalenge mu malaro kwamuyirayira. Viŵenge nthena mphanyi Yehova wakucemeka Ciuta wa ŵakufwa. Ici mphanyi cikulongora kuti nyifwa njankhongono zikuru kuluska Ciuta, kulongora kuti Ciuta walije nkhongono za kufwatulira ŵateŵeti ŵake ku wuzga wa nyifwa.

Ipo tingayowoyaci za Abrahamu, Yisake, Yakobe kweniso ŵateŵeti ŵakugomezgeka wose ŵa Yehova awo ŵali kufwa? Yesu wakayowoya mwakusimikizga kuti: “Wose mbamoyo kwa iyo.” (Luka 20:38) Khumbo la Yehova lakuwuska ŵateŵeti ŵake ŵakugomezgeka awo ŵali kufwa lifiskikenge nadi ndipo wakuŵawona kuti mbamoyo. (Ŵaroma 4:16, 17) Yehova wakulutilira kuŵakumbukira ŵanthu aŵa mpaka apo wazamuŵawuskira kuti ŵaŵe ŵamoyo.

Kasi cigomezgo cakuzakawonanaso na ŵabali ŵinu awo ŵali kufwa cikumukondweskani yayi? Usange ni nthena, kumbukani kuti Yehova wali na nkhongono zikuru comene kuluska nyifwa. Ndipo palije ico cingatondeska kuti khumbo lake lakuwuska ŵakufwa lileke kufiskika. Ipo mungacita makora kusambira vinandi vyakukhwaskana na layizgo la ciwuka kweniso Ciuta. Para mungacita nthena musendelerenge kwa “Ciuta wa . . . ŵamoyo.”