Para tikusambira Baibolo, tikukhumba kuti maghanoghano gha Yehova ghatifikenge pa mtima, panji kuti kukhwaska wunthu withu wamukati. Ezira wakalongora chiyelezgero chiwemi pa nkhani iyi, apo “wakanozgeka mu mtima wake kupenja Dango la Yehova.” (Ezir. 7:10) Kasi tinganozgekereska wuli ­mtima withu?

Lombani. Yambani sambiro lililose na lurombo. Muphalirani Yehova kuti wamovwirani kupulikiska na kugwiliskira ntchito ivyo musambirenge.​—⁠Sal. 119:​18, 34.

Muŵe ŵakujiyuyura. Chiuta wakubisa unenesko ku awo mbakujikuzga ndipo ŵakuthemba kaghanaghaniro kawo. (Luka 10:21) Gegani kusambira na chilato chakuti mujilongore waka ku ŵanji kuti mukumanya vinandi. Jiyuyurani na kusintha kaghanaghaniro kinu usange kakuleka kukolerana na Chiuta.

Yezgani kutegherezga yimoza mwa sumu zithu za Ufumu. Sumu zingakhwaska kaghanaghaniro kithu. Ntheura usange mungategherezga sumu pambere mundambe kusambira, vingamovwirani kunozgekereska mtima winu.