MUTU 25

Kasi Mungachita Wuli Kuti Muleke Chizgoŵi Chakunyenyenkha Nkhuli?

“Nkhamba chizgoŵi chakunyenyenkha nkhuli apo nkhaŵa na vyaka 8. Pamanyuma nkhamanya umo Chiuta wakuyiwonera nkhani ya kunyenyenkha nkhuli. Nkhatondekanga kujikora para nayezgeka kuchita chizgoŵi ichi. Nyengo zose nkhajifumbanga kuti, ‘Kasi Chiuta wangatemwa wuli munthu nga ndine?’”—Luiz

PARA munthu wamba kujizizwa pa thupi lako, makhumbiro ghakugonana nagho ghakukura chomene. Ndipo kanandi ukuyezgeka na kwamba kuŵa na chizgoŵi chakunyenyenkha nkhuli. * Ŵanthu ŵanandi ŵangayowoya kuti kunyenyenkha nkhuli ni nkhani yikuru viŵi yayi. Iwo ŵakuti: “Palije uyo wangadandawura navyo.” Kweni pali chifukwa chakupulikikwa cha kulekera chizgoŵi chakunyenyenkha nkhuli. Mpositole Paulosi wakalemba kuti: “Zgorani viŵaro vya thupi linu . . . kuŵa vyakufwa ku . . . makhumbiro ghakugonana kwambura kujikora.” (Ŵakolose 3:5) Kunyenyenkha nkhuli kukumazga khumbiro lakugonana yayi, kweni kukupangiska kuti makhumbiro ghakugonana ghakure chomene. Mwachiyelezgero, ghanaghaniranipo fundo zakulondezgapo izi:

● Munthu uyo wali na chizgoŵi chakunyenyenkha nkhuli kanandi wakujighanaghanira waka yekha. Mwachiyelezgero, para munthu wamba kunyenyenkha nkhuli wakuŵika waka maghanoghano pa ivyo thupi lake likukhumba.

● Para munthu uyo wali na chizgoŵi chakunyenyenkha nkhuli wawona munthu uyo ni mwanalume panji mwanakazi munyake yayi, wakuwona nga kuti wangagonana nayo waka.

● Munthu uyo wali na chizgoŵi chakunyenyenkha nkhuli, wakukhorwa yayi para wakugonana na munyake wa mu nthengwa.

Mukwenera kujisambizga kujikora m’malo mwakunyenyenkha nkhuli kuti mukhorweske makhumbiro ghakugonana pa nyengo yichoko waka. (1 Ŵatesalonika 4:4, 5) Baibolo likutichiska kuti tikwenera kugega kuchita vinthu ivyo vingawuska makhumbiro ghakugonana, para tachita nthena mbwenu chiŵenge chipusu kujikora. (Zintharika 5:8, 9) Kweni wuli para ndimwe ŵazga ŵa chizgoŵi chakunyenyenkha nkhuli? Panji mwayezgapo kuleka kanandi waka kweni vikumutondani. Chingaŵa chipusu kuyowoya kuti ine kwamara ningasinthaso yayi chifukwa nkhutondeka kulondezga fundo za Chiuta pa nkhani iyi. Umu ndimo wakajiwoneranga munyamata munyake zina lake Pedro, iyo wakati: “Nkhajiyimbanga mulandu chomene para nayambiraso kunyenyenkha nkhuli. Nkhatenge Chiuta wanganigowokeraso yayi. Ntheura vikanisuzganga chomene kulomba.”

Usange ndimo namwe mukujipulikira, mbwenu mukwenera kuŵa na chikanga. Mungakwaniska kuleka chizgoŵi ichi. Pali ŵawukirano na ŵalara ŵanandi awo ŵali kuleka chizgoŵi chakunyenyenkha nkhuli. Namwe mungakwaniska!

Kasi Mungachita Wuli Kuti Muleke Kujiyimba Mulandu?

Nga umo tawonera kale, ŵanthu awo ŵali na chizgoŵi chakunyenyenkha nkhuli ŵakujiyimba chomene mulandu. Kwambura kukayika, para muli na “chitima icho chikukolerana na khumbo la Chiuta” chimovwiraninge kuti muleke chizgoŵi chakunyenyenkha nkhuli. (2 Ŵakorinte 7:11) Kweni munthu uyo wakukhalira waka kujiyimba chomene mulandu, wanganangirathu vinthu. Wangagongowa chomene ndipo wangawona kuti wangakwaniska yayi kumazga chizgoŵi ichi.—Zintharika 24:10.

Ntheura mukwenera kuwona vinthu mwakwenelera. Kunyenyenkha nkhuli kuli mu gulu la vinthu vyaukazuzi. Kukupangiska munthu kuti waŵe ‘muzga wa makhumbiro ghakupambanapambana na vyakusanguluska,’ ndipo wakuŵa na maghanoghano ghambura kwenelera. (Tito 3:3) Kunyenyenkha nkhuli kuli mu gulu la uzaghali uheni chomene yayi. (Yuda 7) Usange muli kunyenyenkhapo nkhuli, lekani kughanaghana kuti muli kuchita zakwananga zambura kugowokereka. Chisisi chagona pa kuzizipizga na kuleka kuwelera nyuma!

Kanandi nkhongono zikumara nadi para munthu wambiraso kunyenyenkha nkhuli uku ukaleka. Usange vyanthena vyamuchitikirani, kumbukani mazgu gha pa Zintharika 24:16, apo pakuti: “Murunji wangawa kankhondi na kaŵiri ndipo wawukengeso; kweni muheni wakhuŵarenge na soka.” Para munthu wachitaso chikung’anamura kuti ngwakutondeka yayi. Ntheura kuthera yayi. M’malo mwake, wonani ivyo vikamupangiskani kuti mwambireso, na kuwona ivyo mungachita kuti muleke kuwerezgaso.

Patulani nyengo ya kughanaghanirapo za chitemwa na lusungu lwa Chiuta. Wamasalimo Davide uyo nayo wakanangapo, wakalemba kuti: “Umo dada wakulongolera lusungu ku ŵana ŵake, ndimo Yehova wakulongolera lusungu ku awo ŵakumopa. Pakuti wakumanya makora umo tili kupangikira, wakukumbuka kuti tili fuvu.” (Salimo 103:13, 14) Enya, Yehova wakumanya kuti ndise ŵambura kufikapo ndipo ‘ngwakunozgeka kutigowokera.’ (Salimo 86:5) Kweni wakukhumba kuti nase tiŵikengepo mtima kuti tisinthe. Kasi ni vinthu wuli ivyo mungachita kuti mumazge chizgoŵi chakunyenyenkha nkhuli?

Ghanaghaniranipo chomene vyakusanguluska ivyo mukutemwa. Kasi mukuwonelera mafilimu panji mapulogiramu gha pa TV panji kunjira pa mawebusayiti agho ghakukhuŵirizga vya kugonana? Wamasalimo wakalomba kwa Chiuta kuti: “Zgorani maso ghane kuti ghaleke kulaŵiska vyawaka.” *—Salimo 119:37.

Mughanaghanenge vinthu vinyake. Mkhristu munyake zina lake William wakati: “Pambere undagone, uŵazgengepo vinthu vinyake vyakukhwaskana na Baibolo. Ntchakuzirwa chomene kuti munthu wamalizge zuŵa na kughanaghanirapo vinthu vyauzimu.”—Ŵafilipi 4:8.

Phaliraniko munyinu suzgo linu. Ŵanthu ŵanandi ŵakuchita soni kuti ŵaphalireko ŵanyawo kuti ŵali na suzgo la kunyenyenkha nkhuli. Kweni para mungaphalirako ŵanyinu vya suzgo linu, vingamovwirani kuti muleke chizgoŵi chakunyenyenkha nkhuli! Mkhristu munyake zina lake David wakayowoya kuti, “Nkhaŵaphalira adada. Nizamuluwa yayi ivyo ŵakayowoya. Uku ŵakumwemwetera, ŵakaniphalira kuti, ‘Waninotheska chomene mwana wane.’ Iwo ŵakamanyanga kuti nkhwenera kuŵa na chikanga kuti niŵaphalire nkhani iyi. Mazgu agha ghakanikhozga chomene ndipo ghakanipa chikanga kuti nilutilire kumarana na chizgoŵi chakunyenyenkha nkhuli.

“Kufuma apo, adada ŵakanilongora lemba ilo likanovwira kumanya kuti ndine wakutondeka chomene yayi, paumaliro ŵakanijuliraso malemba agho ghakanovwira kumanya kuti ivyo nkhachitanga vikaŵa viheni nadi. Ŵakaniphalira kuti niyezge kuleka chizgoŵi ichi, ndipo para pajumpha nyengo tizadumbiskaneso nkhani iyi. Ŵakaniphalira kuti ningagongowanga yayi para vikunisuzga kuleka, nkhwenera kuyezgayezga ndipo para pajumpha nyengo nizamurekerathu.” Kasi David wakati wuli paumaliro? Iyo wakati: “Nkhuwona kuti ni thumbiko likuru chomene kuŵa na munthu uyo wakumanya suzgo lane, na kunovwira kuti nisinthe.” *

MU MUTU WAKULONDEZGAPO

Ŵanthu ŵanyake ŵakugonana kuti ŵawovwirane waka. Wonani chifukwa icho kuchita nthena kuliri kuheni.

[Mazgu Ghamusi]

LEMBA

“Ntheura chimbirako ku makhumbiro ghauwukirano, kweni londezga urunji, chipulikano, chitemwa, mtende pamoza na awo ŵakuchema Fumu na mtima wakutowa.”—2 Timote 2:22.

VYAKUTI MUCHITE

Lombani pambere makhumbiro ghaheni ghandakure. Pemphani Yehova Chiuta kuti wamupani “nkhongono zakuluska zakawiro” kuti muzizipizge viyezgo.—2 Ŵakorinte 4:7.

KASI MUKUMANYA . . . ?

Munthu uyo wakutondeka kujikora wangakaŵa yayi kuchita uzaghali panji uleŵi. Kweni munthu uyo wakumanya kujikora, mulimose umo vingaŵira wangachita yayi uzaghali panji uleŵi nanga wangaŵa kwayekha.

IVYO NINGACHITA!

Ningaŵika maghanoghano pa vinthu viwemi para ․․․․․

M’malo mwa kuthera, nichitenge ․․․․․

Ivyo ningafumba ŵapapi ŵane pa nkhani iyi ni ․․․․․

KASI MUKUWONA WULI?

● Chifukwa wuli ntchakuzirwa kukumbuka kuti Yehova ‘ngwakunozgeka kugowokera’?—Salimo 86:5.

● Chiuta ndiyo wakatilenga na makhumbiro ghakugonana, ntheura wakutiphalira kuti tikwenera kujikora chifukwa wakugomezga kuti tingakwaniska.

[Mazgu Ghakukhozgera pa peji 182]

“Kufuma waka apo nkhatondera suzgo la kunyenyenkha nkhuli, nili na njuŵi yituŵa pamaso pa Yehova nakuti ichi ndicho ntchinthu chakuzirwa chomene kuluska chilichose!”​—Sarah

[Chithuzithuzi pa peji 180]

Munthu uyo wawa pa chiphalizgano chakuchimbira, wakukayambiraso kukwambilira yayi. Mwakuyana waka munthu uyo wakaleka chizgoŵi chakunyenyenkha nkhuli, mbwenu zuŵa linyake wachitaso chikung’anamura kuti ngwakutondeka yayi