Zintharika 11:1-31
11 Sikelo zaupusikizgi mbukazuzi kwa Yehova,Kweni chakupimira uzito chiwemi ndicho wakukondwa nacho.+
2 Para kujiŵikamo kwiza, soni nazo zilondezgenge,+Kweni vinjeru vili na ŵakujiyuyura.+
3 Mtima wakufikapo wa ŵakunyoloka ndiwo ukuŵalongozga,+Kweni uheni wa ŵaryarya uŵaparanyenge.+
4 Chuma* chilije chandulo mu zuŵa la ukali,+Kweni urunji ndiwo ukuthaska ku nyifwa.+
5 Urunji wa munthu wambura kafukwa ukunyoloska nthowa zake,Kweni muheni wawenge chifukwa cha uheni wake.+
6 Urunji wa ŵakunyoloka uŵathaskenge,+Kweni ŵaryarya ŵakolekenge na makhumbiro ghawo.+
7 Para munthu muheni wafwa, chigomezgo chake chikumara.Ivyo wakhazganga chifukwa cha nkhongono zake navyo vikumara.+
8 Murunji wakuthaskika ku suzgo,Ndipo muheni ndiyo wakutora malo ghake.+
9 Na mulomo wake, munthu wakugaluka* wakuparanya mzengezgani wake,Kweni ŵarunji ŵakuthaskika chifukwa cha kumanya vinthu.+
10 Uwemi wa ŵarunji ukukondweska msumba,Ndipo para ŵaheni ŵamara, ŵanthu ŵakuchemerezga mwachimwemwe.+
11 Msumba ukukwezgeka chifukwa cha thumbiko la ŵakunyoloka,+Kweni mulomo wa ŵaheni ukuwubwangandura.+
12 Uyo walije mahara* wakuyuyura* mzengezgani wake,Kweni uyo wali na umanyi wenecho wakukhala chete.+
13 Munthu wakusesa wakwendendeka na kuvumbura vinthu vya ku udesi,+Kweni munthu wakugomezgeka* wakusunga chisisi.*
14 Usange fundo zavinjeru* palije, ŵanthu ŵakuwa,Kweni vinthu vikwenda makora* para pali ŵakupeleka fundo ŵanandi.+
15 Uyo wakwimira* mulendo pa ngongoli wapwetekekenge,+Kweni uyo wakugega* kukorako chasa kumwimira wakhalenge mwakufwasa.
16 Mwanakazi wankharo* wakusanga uchindami,+Kweni ŵanalume ŵankhaza ŵakuphanga usambazi.
17 Munthu walusungu wakusanga chandulo,*+Kweni munthu wankhaza wakujichemera suzgo.*+
18 Muheni wakusanga malipiro ghaupusikizgi,+Kweni uyo wakuseŵa urunji wakupokera njombe yeneko.+
19 Uyo wakwima pa urunji nganganga wasangenge umoyo,+Kweni uyo wakulondezga uheni wasangenge nyifwa.
20 Awo mbakhuluku mu mtima mbanyankhasi kwa Yehova,+Kweni awo mendero ghawo ngambura kafukwa wakukondwa nawo.+
21 Manyani ichi:* Munthu muheni walekenge yayi kulangika,+Kweni ŵana ŵa murunji ŵaponenge.
22 Nga ni mphete yagolide pamphuno ya nkhumbaNdimo waliri mwanakazi wakutowa uyo wakukana mahara.
23 Khumbo la ŵarunji likulongozgera ku uwemi,+Kweni chigomezgo cha ŵaheni chikulongozgera ku ukali.
24 Munthu munyake wakupeleka mwawanangwa* ndipo wakusanga vinthu vinandi.+Munyake wakukanilira ivyo wakwenera kupeleka, kweni wakukavuka.+
25 Uyo wakupa mwawanangwa vimwenderenge makora,*+Ndipo uyo wakusamphuska ŵanji,* nayo wasamphuskikenge.+
26 Ŵanthu ŵatembenge uyo wakukanilira vyakurya,Kweni ŵatumbikenge uyo wakuviguliska.
27 Uyo wakulimbikira kuti wachite uwemi wakupenja lusungu,+Kweni uyo wakupenja viheni, ndivyo vizenge pa iyo.+
28 Uyo wakuthemba usambazi wake wawenge,+Kweni murunji watikitirenge nga ni hamba liŵisi.+
29 Waliyose uyo wakuchemera suzgo* pa nyumba yake waharenge mphepo.+Ndipo chindere chiŵenge muteŵeti wa munthu wa mtima wavinjeru.
30 Chipambi cha murunji ni khuni la umoyo,+Ndipo uyo wakuwoja umoyo* ngwavinjeru.+
31 Usange murunji wakupokera nadi njombe pa charu chapasi,Ipo vizamuŵa wuli kwa muheni na wakwananga!+
Mazgu Ghamusi
^ Panji kuti, “Vinthu vyakuzirwa vilije.”
^ Panji kuti, “wambura kopa Chiuta.”
^ Panji kuti, “ngwakupeleŵera mu mtima.”
^ Panji kuti, “wakupepura.”
^ Mazgu gheneko, “wakugomezgeka mu mzimu.”
^ Mazgu gheneko, “wakubenekelera nkhani.”
^ Panji kuti, “ulongozgi wavinjeru.”
^ Panji kuti, “pakuŵa chiponosko.”
^ Panji kuti, “wakhalira ukaboni.”
^ Mazgu gheneko, “wakutinkha.”
^ Panji kuti, “wamasangulusko.”
^ Panji kuti, “wakuchitira uwemi umoyo wake.”
^ Panji kuti, “soni.”
^ Mazgu gheneko, “Woko ku woko.”
^ Mazgu gheneko, “wakugaŵizga.”
^ Mazgu gheneko, “watutuŵenge.”
^ Mazgu gheneko, “wakupa maji kwawanangwa.”
^ Panji kuti, “soni.”
^ Wonani Mang’anamuro gha Mazgu.
