Mika 4:1-13
4 Mu mazuŵa ghaumaliro,Phiri la nyumba ya Yehova+Lizamukhazikika pachanya chomene pa mapiri,Ndipo lizamutumphuskika pachanya pa tumapiri,Ŵanthu ŵazamuthilimukira kwenekuko.+
2 Mitundu yinandi yizamuluta na kuyowoya kuti:
“Zaninge, tiyeni tikwelere ku phiri la Yehova,Na ku nyumba ya Chiuta wa Yakhobe.+
Iyo wamutisambizga nthowa zake,Ndipo ise tamwenda mu nthowa zake.”
Pakuti dango lizamufuma ku Ziyoni,Ndipo mazgu gha Yehova ghazamufuma ku Yerusalemu.
3 Wazamweruzga pakati pa ŵanthu ŵanandi,+Na kunyoloskera vinthu mitundu yankhongono yakutali.
Ŵanthu ŵazamuskana* malupanga ghawo kuŵa vyakulimira,Mikondo yawo kuŵa vyakuphatilira makuni.+
Mtundu uzamuwuskira lupanga mtundu unyake chara,Ndipo ŵanthu ŵazamusambiraso nkhondo chara.+
4 Waliyose wazamukhala musi mwa khuni lake la mpheska na musi mwa khuni lake la mkuyu,+Ndipo palije na yumoza uyo wazamuŵawofya,+Pakuti mulomo wa Yehova wa mawumba wayowoya.
5 Pakuti mitundu yose, uliwose ukwenda mu zina la chiuta wake,Kweni ise tendenge mu zina la Yehova Chiuta withu+ muyirayira swii.
6 “Mu zuŵa ilo,” ndimo wayowoyera Yehova,“Nizamuwunjika uyo wakagonthanga,Na kuwunjika awo ŵakambininiskika,+Pamoza na awo nkhaŵasuzganga.
7 Uyo wakagonthanga nizamumuzgora wakukhalako,+Ndipo uyo wakatolekera kutali nizamumuzgora mtundu wankhongono.+Yehova wazamuŵawusa nga ni themba mu Phiri la Ziyoni,Kwamba sono m’paka muyirayira.
8 Kweni iwe, chigongwe cha mskambo,Chibumira cha mwana mwanakazi wa Ziyoni,+Muwuso uzamwiza kwa iwe, enya, muwuso wakwamba wizenge,+Ufumu uwo ngwa mwana mwanakazi wa Yerusalemu.+
9 Kasi sono ukukolomokerachi?
Kasi ulije themba,Panji wakupeleka fundo wako wafwa,Mwakuti ukupulika vyakuŵinya nga ni vya mwanakazi para wakubaba?+
10 Iwe mwana mwanakazi wa Ziyoni, salanthuka na kutampha,Nga ni mwanakazi para wakubaba,Pakuti sono ufumenge mu msumba na kukakhala kuthondo,
Uzamuluta kutali ku Babuloni,+Ndipo kwenekura ndiko wamuthaskikira.+Kwenekura, Yehova wamukuwombora mu woko la ŵalwani ŵako.+
11 Sono mitundu yinandi yizamuwungana kuti yikuwukire;Yizamuyowoya kuti: ‘Mulekani wafipiskike,Ndipo maso ghithu ghawone ivi vikuchitikira Ziyoni.’
12 Kweni ŵakumanya chara maghanoghano gha Yehova,Ŵakupulikiska chara chilato chake;*Pakuti wazamuŵawunjika nga ni tirigu uyo wavunika waka, uyo wakuluta pa malo ghakupwanthirapo.
13 Iwe mwana mwanakazi wa Ziyoni, wuka na kupwantha.+Pakuti masengwe ghako nizamughazgora chisulo,Vikandiro vyako nizamuvizgora mkuŵa,Ndipo uzamuteketa ŵanthu ŵanandi.+
Ivyo ŵavisanga mwaupusikizgi uzamuvipeleka kwa Yehova,Ndipo chuma chawo uzamuchipeleka kwa Fumu yaunenesko ya charu chose chapasi.”+
