Salimo 98:1-9
-
Yehova ni Mponoski na Mweruzgi waurunji
-
Chiponosko cha Yehova chamanyikwa (2, 3)
-
Sumu.
98 Yimbirani Yehova sumu yiphya,+Pakuti wachita vinthu vyakuzizwiska.+
Woko lake lamalyero, mkono wake wakupatulika, viza na chiponosko.*+
2 Yehova wamanyiska ŵanthu chiponosko chake.+Wavumbura urunji wake pamaso pa ŵamitundu.+
3 Wakumbuka lusungu* lwake na kugomezgeka kwake pa nyumba ya Israyeli.+
Vigoti vyose vya charu chapasi vyawona chiponosko cha Chiuta withu.*+
4 Chemerezgani mwakukondwa kwa Yehova, imwe charu chose chapasi.
Sangwani na kuchemerezga mwachimwemwe, yimbani malumbo.+
5 Yimbirani Yehova malumbo na kulizga bango,Lizgani bango na kwimba sumu yakunozga.
6 Chemerezgani mwakukondwa pamaso pa Themba, Yehova,Pamoza na zimbata na kulira kwa veve.*+
7 Nyanja yidume, na vyose ivyo vilimo,Charu chapasi na wose awo ŵakukhalamo.
8 Milonga yikuŵe mapi.Mapiri ghachemerezge pamoza mwachimwemwe+
9 Pamaso pa Yehova, chifukwa wakwiza* kuzakeruzga charu chapasi.
Weruzgenge charu icho mukukhala ŵanthu mwaurunji+Na ŵanthu mwakunyoloka.+
