Salimo 48:1-14

  • Ziyoni, msumba wa Themba Likuru

    • Chimwemwe cha charu chose chapasi (2)

    • Yenderani msumba na vigongwe vyake (11-13)

Salimo. Sumu ya ŵana ŵa Kora.+ 48  Yehova ni mukuru, ngwakwenelera chomene kulumbikaMu msumba wa Chiuta withu, mu phiri lake lituŵa.  2  Phiri la Ziyoni ilo lili kutali kumpoto,Kutumphuka kwake nkhwakutowa, chimwemwe cha charu chose chapasi,+Ndiwo msumba wa Themba Likuru.+  3  Mu vigongwe vyake vyakukhora,Chiuta walongora kuti ni malo ghakubisamamo.+  4  Pakuti wonani, mathemba ghawungana,*Ghose ghizira pamoza.  5  Ghati ghawuwona, ghakazizikika. Mahara ghakaŵamalira ndipo ŵakachimbira chifukwa cha wofi.  6  Ghakamba kumbwambwantha penepara,Ghakapulika ulwilwi nga ngwa mwanakazi uyo wakubaba.  7  Mukabwangasura ngalaŵa za ku Tarishishi na mphepo ya kumafumiro gha dazi.  8  Ivyo tikapulika, sono taviwona tekhaMu msumba wa Yehova wa mawumba, mu msumba wa Chiuta withu. Chiuta wawukhozgenge muyirayira.+ (Selah)  9  Tikughanaghanira pa lusungu* lwinu, A Chiuta,+Mukati mu tempile linu. 10  Nga umo zina linu liliri, A Chiuta, malumbo ghinu naghoGhakufika ku vigoti vya charu chapasi.+ Woko linu lamalyero lazura na urunji.+ 11  Phiri la Ziyoni+ lisekelere,Misumba* ya Yuda yikondwe, chifukwa cha vyeruzgo vinu.+ 12  Yendani, muzingilire Ziyoni yose,Mupende vigongwe vyake.+ 13  Ŵanikani viliŵa vyake vyakukhora.*+ Mwendere vigongwe vyake vyakukhora,Mwakuti muphalire miwiro yakunthazi. 14  Pakuti Chiuta uyu ni Chiuta+ withu muyirayira swii. Watilongozgenge nyengo zose.*+

Mazgu Ghamusi

^ Panji kuti, “ghapangana na kukumana.”
^ Panji kuti, “chitemwa chakugomezgeka.”
^ Mazgu gheneko, “ŵana ŵanakazi.”
^ Panji kuti, “malinga ghake ghakukhora.”
^ Pangayowoyekaso kuti, “m’paka tifwe.”