Salimo 119:1-176
-
Kuwonga Chiuta chifukwa cha mazgu ghake ghakuzirwa
-
“Muwukirano wangatozga wuli mendero ghake?” (9)
-
“Nkhukondwa na vikumbusko vinu” (24)
-
“Dango linu nkhulitemwa nadi!” (97)
-
“Nili na mahara chomene kuluska ŵasambizgi ŵane” (99)
-
“Mazgu ghinu ni nyali ku malundi ghane” (105)
-
‘Mazgu ghinu mbunenesko’ (160)
-
Awo ŵakutemwa dango la Chiuta ŵakuŵa na mtende (165)
-
א [Aleph]
119 Mbakukondwa awo mbambura kafukwa* mu mendero ghawo,Awo ŵakwenda mu dango la Yehova.+
2 Mbakukondwa awo ŵakusunga vikumbusko vyake,+Awo ŵakumupenja na mtima wawo wose.+
3 Ŵakuchita ubendezi chara,Ŵakwenda mu nthowa zake.+
4 Imwe mwalanguraKuti ŵasungilire mwakupwelelera malanguro ghinu.+
5 Mphanyi naŵa wakukhazikika*+Kuti nisungilire ulongozgi winu.
6 Penepapo nikhozgekenge soni chara,+Para nkhughanaghanira malango ghinu ghose.
7 Nimulumbaninge na mtima wakunyoloka,Para nasambira vyeruzgo vinu vyaurunji.
8 Nisungilirenge ulongozgi winu,
Munganisidirangathu yayi.
ב [Beth]
9 Kasi muwukirano wangatozga wuli mendero ghake?
Wajisungilire kuyana na mazgu ghinu.+
10 Nkhumupenjani na mtima wane wose.
Mungazomerezganga yayi kuti nipulukeko ku malango ghinu.+
11 Nkhusungilira ivyo mwayowoya mu mtima wane,+Mwakuti nileke kumunangirani.+
12 Mwe Yehova, mulumbike.Nisambizgani ulongozgi winu.
13 Nkhupharazga na milomo yaneVyeruzgo vinu vyose ivyo mwayowoya.
14 Nkhusekelera na vikumbusko vinu+Kuluska vinthu vinyake vyose vyakuzirwa.+
15 Nighanaghanirenge* pa malanguro ghinu,+Na kuŵika maso ghane pa nthowa zinu.+
16 Nkhukondwa na fundo zinu.
Niluwenge yayi mazgu ghinu.+
ג [Gimel]
17 Muchitirani makora muteŵeti winu,Mwakuti niŵe wamoyo na kusungilira mazgu ghinu.+
18 Julani maso ghane kuti niwone makoraVinthu vyakuzizwiska vya mu dango linu.
19 Ndine mulendo mu charu,+
Munganibisiranga chara malango ghinu.
20 Namalizgika* chifukwa cha kunwekeraVyeruzgo vinu nyengo zose.
21 Mukuchenya ŵanthu ŵakujiŵikamo,Ŵakutembeka awo ŵakupulukako ku malango ghinu.+
22 Wuskaniko kwa ine* msinjiro na muyuyuro,Pakuti nkhusunga vikumbusko vinu.
23 Nanga ŵakaronga ŵakukhala pasi na kuninena,Muteŵeti winu wakughanaghanira* pa ulongozgi winu.
24 Nkhukondwa na vikumbusko vinu,+Ndivyo vikunipa fundo.+
ד [Daleth]
25 Nagona mu fuvu thafya.+
Nisungilirani wamoyo kuyana na mazgu ghinu.+
26 Nkhamuphalirani mendero ghane, ndipo mukanizgora.Nisambizgani ulongozgi winu.+
27 Novwirani kuti nipulikiske ng’anamuro* la malanguro ghinu,Mwakuti nighanaghanire* pa milimo yinu yakuzizwiska.+
28 Natondeka kugona chifukwa cha chitima.
Nikhozgani kuyana na mazgu ghinu.
29 Wuskaniko nthowa ya upusikizgi kwa ine,+Munichitire lusungu kuyana na dango linu.
30 Nasankha nthowa yakugomezgeka.+
Nkhumanya kuti vyeruzgo vinu ni vyakwenelera.
31 Nkhudemelera ku vikumbusko vinu.+
A Yehova, mungazomerezganga yayi kuti nikhuŵare.*+
32 Nilondezgenge na mtima wose* nthowa ya malango ghinu,Chifukwa mwaghanozgera malo mu mtima wane.*
ה [He]
33 Nisambizgani, A Yehova,+ nthowa ya ulongozgi winu,Ndipo nendengemo m’paka kuumaliro.+
34 Novwirani kuti nipulikiske vinthu,Mwakuti nisungilire dango linuNa kulichita na mtima wane wose.
35 Nilongozgani* mu nthowa ya malango ghinu,+Pakuti nkhukondwa nayo.
36 Lazgiskani mtima wane ku vikumbusko vinu,Ku vyandulo vyauryarya chara.+
37 Zgorani maso ghane kuti ghaleke kulaŵiska vyawaka.+Nisungilirani wamoyo mu nthowa yinu.
38 Fiskani layizgo linu* kwa muteŵeti winu,Mwakuti muwopeke.*
39 Wuskaniko soni izo nkhopa,Pakuti vyeruzgo vinu ni viwemi.+
40 Wonani umo nkhunwekera malanguro ghinu.
Nisungilirani wamoyo mu urunji winu.
ו [Waw]
41 Mphanyi nawona chitemwa* chinu, A Yehova,+Chiponosko chinu kuyana na layizgo linu,*+
42 Penepapo nimuzgorenge uyo wakuninena,Pakuti nkhuthemba mazgu ghinu.
43 Lekani kuwuskiramothu mazgu ghinu gha unenesko mu mulomo wane,Pakuti nkhugomezga* cheruzgo chinu.
44 Nisungenge dango linu nyengo zose,Muyirayira swii.+
45 Nendendekenge mu malo gha chivikiliro,*+Pakuti nkhupenja malanguro ghinu.
46 Niyowoyenge za vikumbusko vinu pamaso pa mathemba,Ndipo nikhozgekenge soni chara.+
47 Nkhukondwa na malango ghinu,Enya, nkhughatemwa.+
48 Nitumphuskirenge mawoko ghane ku malango ghinu, agho nkhughatemwa,+Ndipo nighanaghanirenge* pa ulongozgi winu.+
ז [Zayin]
49 Kumbukani mazgu ghinu* kwa muteŵeti winu,Agho mukunipiramo chigomezgo.*
50 Ichi ntchisangulusko chane mu visuzgo vyane,+Pakuti mazgu ghinu ghanisungilira wamoyo.
51 Ŵakujiŵikamo ŵakuninena uheni chomene,Kweni nkhupatukako yayi ku dango linu.+
52 Nkhukumbuka vyeruzgo vinu vyakale,+ A Yehova,Ndimo nkhusanga chisangulusko.+
53 Nagolera na ukali chifukwa cha ŵaheni,Awo ŵakusida dango linu.+
54 Ulongozgi winu ni sumu kwa ineKulikose uko nkhukhala.*
55 Usiku nkhukumbuka zina linu, A Yehova.+Mwakuti nisunge dango linu.
56 Vinthu ivi ndivyo nkhuchitaChifukwa nasungilira malanguro ghinu.
ח [Heth]
57 Yehova ntchigaŵa chane.+Nalayizga kuti nisungenge mazgu ghinu.+
58 Nkhuŵeya kwa imwe na mtima wane wose,+Nilongorani lusungu+ kuyana na layizgo linu.*
59 Nasanda mendero ghane,Mwakuti niwezgere malundi ghane ku vikumbusko vinu.+
60 Nkhuchita luŵiro, nkhuziwulika yayiKuti nisunge malango ghinu.+
61 Vingwe vya muheni vyanipombezga,Kweni nkhuluwa yayi dango linu.+
62 Nkhuwuka usiku pakati kuti nimuwongani+Chifukwa cha vyeruzgo vinu vyaurunji.
63 Nili mubwezi wa wose awo ŵakumopani,Na awo ŵakusunga malanguro ghinu.+
64 Chitemwa* chinu, A Yehova, chikuzura charu chapasi.+Nisambizgani ulongozgi winu.
ט [Teth]
65 Mwamuchitira makora muteŵeti winu,A Yehova, kuyana na mazgu ghinu.
66 Nisambizgani mahara na umanyi,+Pakuti nkhuthemba malango ghinu.
67 Pambere nindasuzgike, nkhatemwanga kupuluka,*Kweni sono nkhusunga ivyo mwayowoya.+
68 Ndimwe muwemi,+ milimo yinu nayo njiwemi.
Nisambizgani ulongozgi winu.+
69 Ŵakujiŵikamo ŵakuniphaka mautesi,Kweni ine nkhusungilira malanguro ghinu na mtima wane wose.
70 Mtima wawo ngwakukulungara,+Kweni ine nkhukondwa na dango linu.+
71 Mbuwemi kuti nasuzgika,+Mwakuti nisambire ulongozgi winu.
72 Dango ilo mwapharazga ndiwemi kwa ine,+Ndiwemi chomene kuluska vikwi na vikwi vya golide na siliva.+
י [Yod]
73 Mawoko ghinu ndigho ghakanipanga na kuniwumba.
Novwirani kuti nipulikiske,Mwakuti nisambire malango ghinu.+
74 Awo ŵakumopani ŵakuniwona na kusekelera,Pakuti mazgu ghinu ntchigomezgo chane.*+
75 Nkhumanya, A Yehova, kuti vyeruzgo vinu ni vyaurunji+Kuti mwanisuzga mu kugomezgeka kwinu.+
76 Mphanyi chitemwa*+ chinu chanisanguluska,Kuyana na layizgo* ilo mukapeleka kwa muteŵeti winu.
77 Nilongorani lusungu, mwakuti niŵe wamoyo,+Pakuti nkhukondwa na dango linu.+
78 Ŵakujiŵikamo ŵakhozgeke soni,Pakuti ŵakunibudira kwambura chifukwa.
Kweni ine nighanaghanirenge* pa malanguro ghinu.+
79 Awo ŵakumopani ŵawelere kwa ine,Awo ŵakumanya vikumbusko vinu.
80 Mtima wane uŵe wambura kafukwa pakulondezga ulongozgi winu,+Mwakuti nileke kulengeskeka.+
כ [Kaph]
81 Nkhunwekera chiponosko chinu,+Pakuti mazgu ghinu ntchigomezgo chane.*
82 Maso ghane ghakunwekera mazgu ghinu+Apo nkhuti: “Kasi munisanguluskenge pawuli?”+
83 Pakuti nili nga ni thumba lachikumba ilo labinkha* na josi,Kweni nkhuluwa yayi ulongozgi winu.+
84 Kasi muteŵeti winu walindilirenge mazuŵa ghalinga?
Kasi mweruzgenge pawuli awo ŵakunitambuzga?+
85 Ŵakujiŵikamo ŵakunijimira mbuna zinandi,Awo ŵakuzerezga dango linu.
86 Malango ghinu ghose ngakugomezgeka.
Ŵanthu ŵakunitambuzga kwambura chifukwa, novwirani!+
87 Ŵakakhala pachoko kuti ŵaniphyerepo pa charu chapasi,Kweni nkhasida chara malanguro ghinu.
88 Nisungilirani wamoyo chifukwa cha chitemwa* chinu,Mwakuti nisunge vikumbusko ivyo mwayowoya.
ל [Lamed]
89 Mazgu ghinu ghakhalilirenge kuchanyaM’paka muyirayira, A Yehova.+
90 Kugomezgeka kwinu kukufika ku miwiro yose.+
Mwakhozga chomene charu chapasi, mwakuti chichali kwimilira nganganga.+
91 Na vyeruzgo vinu, vichali* m’paka muhanya uno,Pakuti vyose mbateŵeti ŵinu.
92 Niŵenge kuti nkhukondwa yayi na dango linu,Mphanyi nkhamalira mu suzgo yane.+
93 Niluwengepo yayi malanguro ghinu,Chifukwa mwanisungilira wamoyo mwa igho.+
94 Nili winu, niponoskani,+Chifukwa nkhupenja malanguro ghinu.+
95 Ŵaheni ŵakukhazga kuti ŵaniparanye,Kweni nkhuŵika chomene mahara ku vikumbusko vinu.
96 Nawona kuti chose icho ntchakufikapo chili na chigoti,Kweni dango linu lilije chigoti.*
מ [Mem]
97 Dango linu nkhulitemwa nadi.+
Ndilo nkhughanaghanirapo* zuŵa lose.+
98 Dango linu likunizgora wavinjeru kuluska ŵalwani ŵane,+Chifukwa lili nane muyirayira.
99 Nili na mahara chomene kuluska ŵasambizgi ŵane wose,+Pakuti nkhughanaghanira* vikumbusko vinu.
100 Nkhupulikiska makora vinthu kuluska ŵanalume ŵalara,Chifukwa chakuti nkhusungilira malanguro ghinu.
101 Nkhukana kwenda mu nthowa yiliyose yiheni,+Mwakuti nisunge mazgu ghinu.
102 Nkhuzgokako yayi ku vyeruzgo vinu,Pakuti mwanisambizga.
103 Ivyo mukuyowoya vikunong’omera para nkhuvicheta,Vikuluska uchi mu mulomo wane.+
104 Nkhupulikiska vinthu chifukwa cha malanguro ghinu.+
Lekani nkhutinkha nthowa yiliyose yautesi.+
נ [Nun]
105 Mazgu ghinu ni nyali ku malundi ghane,Na ungweru mu nthowa yane.+
106 Nalapa chilapo, ndipo nichifiskenge,Kuti nisungilirenge vyeruzgo vinu vyaurunji.
107 Nasuzgika chomene.+
A Yehova, nisungilirani wamoyo kuyana na mazgu ghinu.+
108 A Yehova naŵeya, kondwani na sembe zane zawanangwa za malumbo,*+Ndipo nisambizgani vyeruzgo vinu.+
109 Umoyo wane uli pangozi nyengo zose,*Kweni ine nindaluwe dango linu.+
110 Ŵaheni ŵakunithya chipingo,Kweni ine nindapulukeko ku malanguro ghinu.+
111 Vikumbusko vinu nkhuvitora nga ni katundu wane wamuyirayira,*Pakuti ndivyo chimwemwe cha mtima wane.+
112 Nadumura* kuti nipulikirenge ulongozgi winuNyengo zose, m’paka umaliro.
ס [Samekh]
113 Nkhutinkha awo ŵali na mtima wapaŵiri,*+Kweni nkhutemwa dango linu.+
114 Ndimwe chigongwe chane na chiskango chane.+Pakuti mazgu ghinu ntchigomezgo chane.*+
115 Khalani kutali na ine, imwe ŵanthu ŵaheni,+Mwakuti nisungilire malango gha Chiuta wane.
116 Nifighilirani nga umo mwalayizgira,*+Mwakuti nilutilire kuŵa wamoyo,Mungazomerezganga chara kuti chigomezgo chane chizgoke chikhuŵazgo.*+
117 Nifighilirani kuti niponoskeke,+Apo ndipo niŵikenge mahara ku ulongozgi winu nyengo zose.+
118 Mukukana wose awo ŵakupatuka ku ulongozgi winu,+Pakuti mbatesi na ŵapusikizgi.
119 Ŵaheni wose pa charu chapasi mukuŵataya nga ni makhalang’anjo.*+
Lekani ine nkhutemwa vikumbusko vinu.
120 Thupi lane likumbwambwantha chifukwa cha kutenthema na imwe.Nkhopa vyeruzgo vinu.
ע [Ayin]
121 Nachita icho ntchakwenelera na chaurunji.
Munganipelekanga yayi ku awo ŵakuniyuzga.
122 Simikizgirani muteŵeti winu kuti vimwenderenge makora.Ŵakujiŵikamo ŵaleke kuniyuzga.
123 Maso ghane ghafuŵilira chifukwa cha kulindilira chiponosko chinu+Na layizgo linu laurunji.+
124 Longorani chitemwa* chinu kwa muteŵeti winu,+Ndipo nisambizgani ulongozgi winu.+
125 Ndine muteŵeti winu. Novwirani kuti nipulikiske vinthu,+Mwakuti nimanye vikumbusko vinu.
126 Nyengo yakwana kuti Yehova wachitepo kanthu,+Pakuti ŵaswa dango linu.
127 Lekani nkhutemwa malango ghinuKuluska golide, enya, golide liwemi.*+
128 Ntheura, nkhuwona chilichose icho mukunisambizga kuŵa chakwenelera.+Nkhutinkha nthowa yiliyose yautesi.+
פ [Pe]
129 Vikumbusko vinu ni vyapachanya.
Lekani nkhuvisungilira.
130 Para mazgu ghinu ghajulika, ungweru ukuwoneka,+Kovwira munthu wambura mahara kupulikiska vinthu.+
131 Nkhuyasamura mulomo wane na kuŵeŵefuka,Chifukwa nkhunwekera malango ghinu.+
132 Zgokerani kwa ine na kunilongora lusungu,+Kuyana na cheruzgo chinu ku awo ŵakutemwa zina linu.+
133 Longozgani makora mendero ghane* kuyana na ivyo mwayowoya,Chinthu chiheni chileke kuŵa na mazaza pa ine.+
134 Nithaskani* ku ŵanthu ŵakuyuzga,Ndipo nisungenge malanguro ghinu.
135 Ŵaliskani chisko chinu pa muteŵeti winu,+Ndipo nisambizgani ulongozgi winu.
136 Masozi ghakukhira geregere mu maso ghaneChifukwa chakuti ŵanthu ŵakusunga yayi dango linu.+
צ [Tsade]
137 Ndimwe ŵarunji, A Yehova,+Ndipo vyeruzgo vinu ni vyakunyoloka.+
138 Vikumbusko ivyo mukupeleka ni vyaurunjiNa vyakugomezgeka nkhanira.
139 Mwamphu wane wanirya,+Chifukwa awo ŵakupindikana nane ŵaluwa mazgu ghinu.
140 Ivyo mukuyowoya ni vyakwengeka makora,+Ndipo muteŵeti winu wakuvitemwa.+
141 Nili muchoko na wakupepulika.+Kweni nindaluwe malanguro ghinu.
142 Urunji winu ni urunji wamuyirayira,+Ndipo dango linu mbunenesko.+
143 Nangauli suzgo na unonono vyaniwira,Kweni nkhulutilira kukondwa na malango ghinu.
144 Urunji wa vikumbusko vinu ngwamuyirayira.
Novwirani kuti niŵe wakupulikiska,+ mwakuti niŵe wamoyo.
ק [Qoph]
145 Nkhuchema na mtima wane wose. Nizgorani, A Yehova.
Nisungilirenge ulongozgi winu.
146 Nkhuchema imwe, niponoskani.
Nisungenge vikumbusko vinu.
147 Nawuka usikusiku kundache kuti nipemphe wovwiri,+Pakuti mazgu ghinu ntchigomezgo chane.*
148 Nkhuŵa maso pambere maulinda ghausiku ghandafike,Mwakuti nighanaghanire pa ivyo mukuyowoya.+
149 Pulikani lizgu lane chifukwa cha lusungu* lwinu.+
A Yehova, nisungilirani wamoyo kuyana na urunji winu.
150 Awo ŵali na nkharo yakulengeska* ŵakwiza kufupi.Ŵali kutali chomene na dango linu.
151 Imwe muli pafupi, A Yehova,+Ndipo malango ghinu ghose mbunenesko.+
152 Nkhasambira nikale za vikumbusko vinu,Kuti muli kuviŵika kuti viŵeko muyirayira.+
ר [Resh]
153 Laŵiskani pa suzgo yane, ndipo munithaske,+Pakuti nindaluwe dango linu.
154 Nivikilirani* na kunithaska.+Nisungilirani wamoyo kuyana na layizgo linu.*
155 Chiponosko chili kutali chomene na ŵaheni,Pakuti ŵakupenja yayi ulongozgi winu.+
156 Lusungu lwinu ndukuru, A Yehova.+
Nisungilirani wamoyo kuyana na urunji winu.
157 Awo ŵakunitambuzga na kupindikana nane mbanandi,+Kweni ine nindapatukeko ku vikumbusko vinu.
158 Nkhulaŵiska ŵaryarya na kuseluka,Chifukwa ŵakusunga yayi ivyo mukuyowoya.+
159 Wonani umo nkhutemwera malanguro ghinu.
A Yehova, nisungilirani wamoyo chifukwa cha lusungu* lwinu.+
160 Mazgu ghinu ghose mbunenesko,+Ndipo vyeruzgo vinu vyose vikukhalilira muyirayira.
ש [Sin] panji [Shin]
161 Ŵakaronga ŵakunitambuzga+ kwambura chifukwa,Kweni mtima wane ukopa mazgu ghinu.+
162 Nkhusekelera na ivyo mukuyowoya+Nga ni munthu uyo wasanga vinthu vinandi.
163 Nkhutinkha utesi, nkhuseluka nawo,+Nkhutemwa dango linu.+
164 Nkhumulumbani kankhondi na kaŵiri pa zuŵaChifukwa cha vyeruzgo vinu vyaurunji.
165 Awo ŵakutemwa dango linu ŵakuŵa na mtende ukuru,+Palije icho chingaŵakhuŵazga.*
166 Nkhugomezga chiponosko chinu, A Yehova,Ndipo nkhusungilira malango ghinu.
167 Nkhusunga vikumbusko vinu,Ndipo nkhuvitemwa chomene.+
168 Nkhusungilira malanguro ghinu na vikumbusko vinu,Pakuti mukumanya vyose ivyo nkhuchita.+
ת [Taw]
169 Mphanyi kulira kwane kuti munovwire kwafika kwa imwe, A Yehova.+
Novwirani kuti nipulikiske kuyana na mazgu ghinu.+
170 Kuŵeya kwane kuti munichitire lusungu kwize pamaso pinu.
Niponoskani, nga umo mwalayizgira.*
171 Milomo yane yizure na malumbo,+Pakuti mukunisambizga ulongozgi winu.
172 Lulimi lwane luyimbe vya mazgu ghinu,+Pakuti malango ghinu ghose ngaurunji.
173 Woko linu liŵe lakunozgeka kunovwira,+Chifukwa nasankha kupulikira malanguro ghinu.+
174 Nkhunwekera chiponosko chinu, A Yehova,Ndipo nkhukondwa na dango linu.+
175 Nizomerezgani kuŵa wamoyo kuti nimulumbani,+Vyeruzgo vinu vinovwire.
176 Napuluka nga ni mberere yakuzgeŵa.+ Penjani muteŵeti winu,Pakuti nindaluwe malango ghinu.+
Mazgu Ghamusi
^ Panji kuti, “mbamtima wakufikapo.”
^ Mazgu gheneko, “Mphanyi nthowa zane zakhozgeka chomene.”
^ Panji kuti, “Nisambirenge.”
^ Panji kuti, “Umoyo wane ukumara.”
^ Mazgu gheneko, “Mukunkhuzgire kutali nane.”
^ Panji kuti, “wakusambira.”
^ Mazgu gheneko, “nthowa ya.”
^ Panji kuti, “nisambire.”
^ Panji kuti, “nikhozgeke soni.”
^ Mazgu gheneko, “Nichimbirenge mu.”
^ Pangayowoyekaso kuti, “Chifukwa mwapeleka chigomezgo mu mtima wane.”
^ Panji kuti, “Nendeskani.”
^ Panji kuti, “ivyo mwayowoya.”
^ Pangayowoyekaso kuti, “Ilo mwapeleka ku awo ŵakumopani.”
^ Panji kuti, “chitemwa chakugomezgeka.”
^ Panji kuti, “ivyo mwayowoya.”
^ Panji kuti, “nkhulindilira.”
^ Panji kuti, “malo ghasani.”
^ Panji kuti, “nisambirenge.”
^ Panji kuti, “layizgo linu.”
^ Panji kuti, “Layizgo ilo mwanipa kuti nilindilire.”
^ Panji kuti, “Mu nyumba iyo nkhukhala nga ni mulendo.”
^ Panji kuti, “ivyo mwayowoya.”
^ Panji kuti, “Chitemwa chakugomezgeka.”
^ Panji kuti, “nkhamanyanga yayi kuti nkhunanga.”
^ Panji kuti, “ine nkhulindilira mazgu ghinu.”
^ Panji kuti, “chitemwa chakugomezgeka.”
^ Panji kuti, “ivyo mukayowoya kwa.”
^ Panji kuti, “nisambirenge.”
^ Panji kuti, “ine nkhulindilira mazgu ghinu.”
^ Mazgu ghanyake, “lasukira.”
^ Panji kuti, “chitemwa chakugomezgeka.”
^ Ndiko kuti, vyose ivyo wali kulenga.
^ Mazgu gheneko, “ndisani chomene.”
^ Panji kuti, “nkhusambira.”
^ Panji kuti, “nkhusambira.”
^ Mazgu gheneko, “sembe zawanangwa za mulomo wane.”
^ Panji kuti, “Umoyo wane uli mu woko lane nyengo zose.”
^ Panji kuti, “chiharo chane chamuyirayira.”
^ Mazgu gheneko, “Nalazga mtima wane.”
^ Panji kuti, “ŵanthu ŵa mtima wakugaŵikana.”
^ Panji kuti, “ine nkhulindilira mazgu ghinu.”
^ Panji kuti, “kuyana na ivyo mwayowoya.”
^ Panji kuti, “nikhozgeke soni.”
^ “Makhalang’anjo,” ni vinthu ivyo vyakhalira para ŵenga visulo. Panji kuti, “vinthu vyawakawaka.”
^ Panji kuti, “chitemwa chakugomezgeka.”
^ Panji kuti, “lakwengeka makora.”
^ Panji kuti, “Khozgani mendero ghane.”
^ Mazgu gheneko, “Niwomborani.”
^ Panji kuti, “Pakuti nkhulindilira mazgu ghinu.”
^ Panji kuti, “chitemwa chakugomezgeka.”
^ Panji kuti, “Awo ŵakuchita vyamziro.”
^ Panji kuti, “Munendeskere mulandu wane.”
^ Panji kuti, “ivyo mwayowoya.”
^ Panji kuti, “chitemwa chakugomezgeka.”
^ Panji kuti, “Kwa iwo kulije chakuŵakhuŵazga.”
^ Panji kuti, “mwayowoyera.”
