Genizesi 16:1-16
-
Hagara na Ishimayeli (1-16)
16 Sarayi muwoli wa Abramu, wakaŵa kuti wandamubabire ŵana mfumu wake.+ Kweni wakaŵa na muteŵeti mwanakazi wa ku Eguputo zina lake Hagara.+
2 Ntheura Sarayi wakati kwa Abramu: “Wona sono, Yehova wanikanizga kubaba ŵana. Naŵeya, gona na muteŵeti wane, panji ningaŵa na ŵana kwizira mwa iyo.”+ Abramu wakapulikira ivyo Sarayi wakayowoya.
3 Abramu wakati wakhala vyaka 10 mu charu cha Kenani, muwoli wake Sarayi wakatora Hagara, muteŵeti wake wa ku Eguputo, na kumupeleka kwa mfumu wake Abramu kuti waŵe muwoli wake.
4 Ntheura wakagona na Hagara, ndipo Hagara wakatora nthumbo. Wakati wamanya kuti wali na nthumbo, wakamba kuyuyura fumukazi yake.
5 Pa chifukwa ichi, Sarayi wakati kwa Abramu: “Nasuzgika chifukwa cha iwe. Ndine nkhaŵika muteŵeti wane mu mawoko ghako,* ndipo iyo wati wamanya kuti wali na nthumbo wamba kuniyuyura. Yehova weruzge pakati pa iwe na ine.”
6 Abramu wakati kwa Sarayi: “Wona, muteŵeti wako wali mu mawoko ghako. Muchitira chilichose icho ukuwona kuti ntchakwenelera.” Ndipo Sarayi wakamba kumusuzga, ntheura Hagara wakachimbira.
7 Mungelo wa Yehova wakasanga Hagara pa chisimi cha maji mu mapopa, pa chisimi cha ku nthowa ya Shura.+
8 Wakati kwa iyo: “Hagara, muteŵeti wa Sarayi, kasi wafuma nkhu ndipo ukuya nkhu?” Hagara wakati: “Nkhuchimbira Sarayi fumukazi yane.”
9 Mungelo wa Yehova wakati kwa iyo: “Welera kwa fumukazi yako, ndipo ukajiyuyure mu woko lake.”
10 Mungelo wa Yehova wakatiso: “Nizamwandaniska chomene mphapu* yako, ndipo yizamupendeka yayi chifukwa yizamuŵa yinandi chomene.”+
11 Mungelo wa Yehova wakatiso kwa iyo: “Wona, uli na nthumbo, ubabenge mwana mwanalume ndipo uzakamuthye Ishimayeli,* pakuti Yehova wapulika suzgo yako.
12 Mwana uyu wazamuŵa nga ni mbunda yamuthengere.* Woko lake lizamwimikana na waliyose, ndipo woko la munthu waliyose lizamwimikana nayo. Ndipo wazamukhala mwakupindikana na ŵabali ŵake wose.”*
13 Ntheura wakachema pa zina la Yehova, uyo wakayowoyanga nayo, wakati: “Ndimwe Chiuta uyo wakuwona vyose,”+ pakuti wakati: “Kasi namuwona nadi uyo wakuniwona?”
14 Lekani chisimi ichi chikathyika Beyere-lahayi-royi.* (Chili pakati pa Kadeshi na Beredi.)
15 Ntheura Hagara wakababira Abramu mwana mwanalume. Abramu wakamuthya mwana uyo Hagara wakamubabira zina lakuti Ishimayeli.+
16 Abramu wakaŵa na vyaka 86 apo Hagara wakamubabira Ishimayeli.
Mazgu Ghamusi
^ Mazgu gheneko, “mu chifuŵa chako.”
^ Mazgu gheneko, “mbuto.”
^ Kung’anamura kuti, “Chiuta Wakupulika.”
^ Chinyama icho chili mu gulu la mbunda, ndipo ŵanyake ŵakughanaghana kuti ni boli. Kweni apa zina ili likung’anamura mtima wakujiyimira.
^ Pangayowoyekaso kuti, “wazamukhala mwambura kukolerana na ŵabali ŵake.”
^ Kung’anamura kuti, “Chisimi cha Wamoyo Uyo Wakuniwona.”
