Baibolo likuti ŵanthu awo ŵali mu chisopa chaunenesko ŵakupambana na awo ŵali mu chisopa chautesi. Ilo likuti: “Muŵamanyenge na vipambi vyawo. Kasi ŵanthu ŵakutonthora mpheska mu minga panji vikuyu mu nthura?” (Mateyu 7:16) Nga umo mungapambaniskira vipambi vya khuni la mpheska na la minga, ndimo mungapambaniskiraso chisopa chaunenesko na chautesi. Wonani umo chisopa chaunenesko chikupambanirana na chisopa chautesi:

1.   Chisopa chaunenesko chikusambizga fundo za ŵanthu yayi, kweni fundo za mu Baibolo. (Yohane 4:24; 17:17) Chikusambizga ivyo Baibolo likulongosora pa nkhani ya mzimu kweniso umoyo wamuyirayira mu paradiso. (Salimo 37:29; Yesaya 35:5, 6; Ezekiyeli 18:4) Chikuvumburaso fundo zautesi izo chisopa chautesi chikusambizga.—Mateyu 15:9; 23:27, 28.

2.   Chisopa chaunenesko chikovwira ŵanthu kumanya makora Chiuta, nga nkhuŵasambizga zina lake, lakuti Yehova. (Salimo 83:18; Yesaya 42:8; Yohane 17:3, 6) Chisopa chaunenesko chikususka fundo yakuti Chiuta tingamupulikiska yayi. M’malo mwake, chikusambizga kuti Chiuta wakukhumba kuti tiŵe nayo paubwezi.—Yakobe 4:8.

3.   Chisopa chaunenesko chikusambizga kuti Chiuta wali kupeleka Yesu Khristu kuti tizakaponoskeke. (Milimo 4:10, 12) Awo ŵali mu chisopa chaunenesko ŵakupulikira Yesu, ndipo ŵakuŵikapo mtima kuchita ivyo iyo wakachitanga.—Yohane 13:15; 15:14.

4.   Chisopa chaunenesko chikugomezga kuti Ufumu wa Chiuta pera ndiwo uzamumazga masuzgo gha ŵanthu. Awo ŵali mu chisopa chaunenesko ŵakusambizga ŵanyawo vya Ufumu uwu.—Mateyu 10:7; 24:14.

5.   Chisopa chaunenesko chikusambizga ŵanthu kuti ŵatemwenge waliyose kwambura kulindizga kalikose. (Yohane 13:35) Chikuŵasambizgaso kuti ŵakwenera kuchindika ŵanthu ŵa mitundu yose, mitheto, na viyowoyero vyose kwambura kusankha. (Milimo 10:34, 35) Awo ŵali mu chisopa chaunenesko ŵakuchitako yayi nkhondo chifukwa ŵakutemwa ŵanyawo.—Mika 4:3; 1 Yohane 3:11, 12.

6.   Chisopa chaunenesko chilije ŵaliska awo ŵakupokera malipiro, ndipo chikupeleka mazina gha udindo kwa waliyose yayi.—Mateyu 23:8-12; 1 Petrosi 5:2, 3.

7.   Chisopa chaunenesko chikuchitako yayi ndyali. (Yohane 17:16; 18:36) Ndipouli, awo ŵali mu chisopa chaunenesko ŵakuchindika na kupulikira boma. Iwo ŵakulondezga dango la mu Baibolo lakuti: “Pelekani vinthu vya Kesare kwa Kesare [kung’anamura ŵalara ŵa boma], ndipo vya Chiuta kwa Chiuta.”—Mariko 12:17; Ŵaroma 13:1, 2.

8.   Awo ŵali mu chisopa chaunenesko ŵakuchita ivyo ŵakusambizga. Nyengo zose ŵakuŵikapo mtima kulondezga fundo za mu Baibolo. (Ŵaefeso 5:3-5; 1 Yohane 3:18) M’malo mwa kuchichizgika waka, iwo ŵakukondwa kusopa “Chiuta wakukondwa.”—1 Timote 1:11.

9.   Chisopa chaunenesko chili na ŵanthu ŵachoko. (Mateyu 7:13, 14) Awo ŵali mu chisopa chaunenesko, ŵanthu ŵakuŵawona kuti mbawakawaka, ŵakuŵanyoza, na kuŵatambuzga chifukwa cha kuchita khumbo la Chiuta.—Mateyu 5:10-12.

Munthu wangamanya yayi chisopa chaunenesko usange wakwendera waka ivyo iyo wakukhumba.

 Pangaŵa ngozi usange tingendera waka ivyo mtima withu ukukhumba para tikusankha chisopa. Baibolo likayowoyerathu kuti ŵanthu “ŵazamujiwunjikira ŵasambizgi [ŵa visopa] kuti ŵapulike ivyo vikukondweska makutu ghawo.” (2 Timote 4:3) Kweni, Baibolo likutichiska kuti tilondezgenge chisopa icho ntchakutowa na chambura kufipiskika “panthazi pa Chiuta, Dada withu,” nanga kungaŵa kuti chisopa icho ntchakutchuka yayi.—Yakobe 1:27; Yohane 15:18, 19.