Lutani apo pali nkhani

Lutani pa menyu yachiŵiri

Ŵakaboni ŵa Yehova

Chitumbuka

Kasi Baibolo Likuti Wuli pa Nkhani ya Kujilembalemba mu Thupi (Tattoo)?

Kasi Baibolo Likuti Wuli pa Nkhani ya Kujilembalemba mu Thupi (Tattoo)?

Ivyo Baibolo likuyowoya

Mu Baibolo lemba la Levitiko 19:28 ndilo lekha likuzunura vya kujilembalemba. Lemba ili likuti: ‘Kujilembalemba chara mu thupi linu.’ Chiuta wakapeleka dango ili ku Ŵaisrayeli kuti ŵaleke kutolera ivyo ŵanthu ŵa mitundu yinyake ŵakachitanga, awo ŵakalembanga mazina panji vimanyikwiro vya ŵachiuta ŵawo mu mathupi ghawo. (Dotoronome 14:2) Nangauli mazuŵa ghano Ŵakhristu ŵakwendera Dango ilo likapelekeka ku Ŵaisrayeli yayi, kweni ntchakuzirwa kughanaghanirapo fundo yikuru ya dango ili.

Kasi Mkhristu wakwenera kujilembalemba panji kujijambura vinthu mu thupi?

Mavesi gha mu Baibolo agha, ghangamovwirani pa nkhani iyi:

  • “Ŵanakazi ŵajitozgenge . . . mwasoni.” (1 Timote 2:9) Fundo iyi yikugwira ntchito kwa waliyose, ŵanakazi na ŵanalume wuwo. Tikwenera kughanaghanira ŵanyithu pa ivyo tikusankha kuchita, m’malo mwakujikondweska waka tekha.

  • Ŵanthu ŵanyake ŵakujilembalemba kuti ŵatchuke, apo ŵanyake ŵakukhumba kulongora kuti ŵangachita chilichose na thupi lawo. Kweni Baibolo likuchiska Ŵakhristu kuti: “Mupeleke mathupi ghinu kuŵa sembe yamoyo, yituŵa, na yakuzomerezgeka kwa Chiuta, uwo mbuteŵeti wakupatulika pamoza na nkhongono yinu ya kughanaghana.” (Ŵaroma 12:1) Gwiliskirani ntchito “nkhongono yinu ya kughanaghana” kuti mumanye chifukwa icho mukukhumbira kujilembalemba panji kujijambura mu thupi linu. Para mukujilemba na chilato chakukhumba kutchuka panji chilongolero chakuti muli mugulu linyake, manyani kuti nyengo yinyake, mungazakasintha maghanoghano, kweni icho mwajijambura chizamuwukapo yayi. Kusanda chomene ivyo mukukhumba, kungamovwirani kuchita mwavinjeru pa nkhani iyi.—Zintharika 4:7.

  • “Maghanoghano gha munthu wachitatata ghakovwira kuti vinthu vyende makora, kweni wose awo ŵakuchimbilira pakuchita vinthu ŵakavukenge.” (Zintharika 21:5) Ŵanthu awo ŵakusankha kujilembalemba mu thupi, ŵakughanaghanirapo chomene yayi uheni wakuchita nthena. Kanandi ntchito kweniso ubwezi na ŵanyawo vikutimbanizgika. Kweniso vikuŵinya chomene pakusisita, ndipo pakukhumbikwa ndalama zinandi. Kafukufuku kweniso awo ŵakuchita malonda ghakusisita ivyo ŵanthu ŵakujilembalemba, wakulongora kuti awo ŵakuchita ivi, kunthazi ŵakuzakadandawura navyo.