Kasi Ŵapapi Ŵangasambizga Wuli Ŵana Ŵawo Nkhani za Kugonana?

JULANI

Ivyo Baibolo likuyowoya

Kasi ni njani uyo wali na udindo wakusambizga ŵana nkhani za kugonana? Baibolo likuti uwu ni udindo wa ŵapapi, ndipo ŵapapi ŵanandi ŵawona kuti fundo izo zili musi umu ni zakovwira:

Kuchita soni yayi. Baibolo likubisa yayi para likuyowoya nkhani za kugonana na viŵaro vyakubisika. Chiuta wakaphalira Ŵaisrayeli kuti ŵasambizgenge “ŵana” ŵawo nkhani zanthena izi. (Dotoronome 31:12; Levitiko 15:2, 16-19) Mukwenera kuyowoya mwantchindi para mukusambizga mwana winu.
Mumusambizgenge pachokopachoko. Kumusambizga vyose nyengo yimoza yayi, kweni pachokopachoko kuyana na ivyo wangapulikiska.—1 Ŵakorinte 13:11.
Ŵasambizgani nkharo yiwemi. Ku sukulu ŵana ŵangasambira nkhani za kugonana, kweni Baibolo likuti ŵapapi ndiwo ŵali na udindo wakuŵasambizga. Kweniso kuŵawovwira kuti ŵayiwonenge mwakwenelera nkhani ya kugonana.—Zintharika 5:1-23.
Tegherezgani para mwana wakuyowoya. Para mwana wamufumbani vya kugonana, kumukalipira yayi. Kweni ‘mupulikenge luŵiro, muzikirenge pakuyowoya.’—Yakobe 1:19.

Kasi mungavikilira wuli mwana winu ku ŵanthu awo ŵakugona ŵana?

Sambizgani mwana winu kukana para munthu wakukhumba kumukolelera

Manyani makora ivyo ŵanthu aŵa ŵakuchita. Manyani ivyo ŵakuchita kuti ŵapusike ŵana.—Zintharika 18:15; wonani mutu 32 mu buku la Mayankho a Zimene Achinyamata Akufunsa—Buku Loyamba.
Kulekera munthu bweka yayi mwana winu. Usange mulekerenge munthu munyake mwana winu, woneseskani kuti mwalekera munthu uyo mukumugomezga nadi. Kweniso lekani ‘kulekelera’ mwana winu.—Zintharika 29:15.
Ŵasambizgani kuti ŵaleke kupulikira waka vilivyose. Ŵana ŵakwenera kusambizgika kuti ŵapulikirenge ŵapapi. (Ŵakolose 3:20) Kweni para musambizgenge mwana winu kuti wapulikirenge munthu mulara waliyose, waŵenge pa ngozi. Ŵapapi ŵangaphalira mwana wawo kuti, “Para munthu wakuti uchite chinthu icho Chiuta wakukana, ukanenge.”—Milimo 5:29.
Muphalirani ivyo wakwera kuchita kuti wajivikilire. Phalirani mwana winu ivyo wakwenera kuchita para munthu wakukhumba kuchita nayo vinthu viheni. Mungayezgelera nayo umo wangazgolera mwachikanga kuti “Nakana! Namukuphara!” na kuwukapo luŵiro. Mukwenera kumukumbuska mwakuwerezgawerezga kuti waleke kuluwa.—Dotoronome 6:7.