Muwoli wakamanya ivyo mfumu wake wakachitanga kwayekha. Ndipo mfumu wakaphepiska chomene muwoli wake. Wakamulayizga kuti wawonelerengeso yayi vyamuziro, ndipo wakaleka nadi kwa kanyengo kachoko waka. Kweni pamanyuma wakawoneleraso, ntheura kakamba kuŵa kaluso kake.

 Kasi namwe muli na suzgo lakuyana waka? Usange mwazgora kuti enya, mukwenera kumanya kuti munyinu wa munthengwa vikumupweteka chomene na kaluso aka. Kweniso mukwenera kumanya ivyo mungachita kuti mumazgirethu suzgo ili. a

Mu nkhani iyi

•  Kasi ni vichi ivyo mukwenera kumanya?

•  Kasi ni vichi ivyo mungachita?

•  Usange mfumu winu wakuwonelera vyamuziro

 Kuwonelera vyamuziro kungananga nthengwa. Vingapangiska munyinu kukwiya na kuleka kumugomezgani. b

 Muwoli uyo mfumu wake wakuwonelera vyamuziro wangajipulika makora yayi, nga umo fundo zakulondezgapo izi zikuyowoyera:

•   Wangajipulika kuti mfumu wake wamwenda pasi. Sarah wakuti: “Nkhajipulikanga nga kuti mfumu wane wakuchita uleŵi mwakuwerezgawerezga.”

•   Kujipulika kuti ngwakupeleŵera. Mwanakazi munyake wakati chizgoŵi cha mfumu wake chakuwonelera vinthu vyamuziro “chikamukhozganga soni ndipo wakajiwonanga kuti ngwakutowa yayi.”

•   Kuleka kumugomezga. Helen wakuti: “Nkhumukayikira mfumu wane pa chilichose icho wakuchita.”

•   Kwenjerwa. Catherine wakuyowoya kuti: “Ivyo mfumu wane wakuchita kuwonelera vyamuziro, vikunikwenyerezga chomene nyengo zose.”

 Fundo yakuti mughanaghanirepo: Baibolo likuphalira mfumu kuti watemwenge muwoli wake. (Ŵaefeso 5:25) Kasi mfumu wangaŵa kuti wakumutemwa muwoli wake usange wakumukwenyerezga na kumupangiska kujipulika nga umo ŵayowoyera pachanya apa?

 Ntchipusu yayi kuleka chizgoŵi chakuwonelera vinthu vyamuziro. Stacey wakuti: “Mfumu wane wali kuleka kukhweŵa hona, vyamba, kweniso kumwa moŵa, kweni vikumusuzga kuti waleke chizgoŵi cha kuwonelera vinthu vyamuziro.”

 Usange muli mu suzgo la nga ni ili, masachizgo ghakulondezgapo agha ghangamovwirani kuti muleke chizgoŵi ichi na kuchimazgirathu.

•   Manyani chifukwa icho kuwonelera vinthu vyamuziro kuliri kuheni. Kuwonelera vinthu vyamuziro kukupangiska munthu kuŵa wakujighanaghanira yekha ndipo ivi vikupangiska kuti paŵavye chitemwa na kugomezgana ivyo ni vyakukhumbikwa chomene kuti ŵakutorana ŵaŵe ŵakukondwa. Kweniso munthu uyo wakuwonelera vyamuziro wakulongora kuti wakuchindika yayi uyo wakambiska nthengwa, Yehova Chiuta.

   Fundo ya mu Baibolo : “Nthengwa yiŵenge yakuchindikika.”—Ŵahebere 13:4.

•   Zomerani kuti ndimwe muli kubudiska. Lekani kuyowoya kuti, ‘Muwoli wane ŵawenge kuti wakunitemwa mphanyi nkhuwonelera yayi vithuzi vyamuziro.’ Ntchambura kwenelera kumwimba mulandu muwoli winu ndipo kuchita nthena vingapangiska waka kuti mwambireso kuwonelera vyamuziro.

   Fundo ya mu Baibolo: “Waliyose wakuyezgeka para wakopeka na kunyengeka na khumbiro lake.”—Yakobe 1:14.

•   Fwatukani na kuyowoya unenesko kwa munyinu wa munthengwa. Kevin wakuti: “Zuŵa lililose nkhumulongora muwoli wane vinthu ivyo nkhuwona. Nkhumuchema muwoli wane kuti wawone usange vinthu ivyo nkhuwonelera ni viwemi panji viheni. Ivi vyawovwira kuti muwoli wane wawonenge kuti palije icho nkhumubisira.”

   Fundo ya mu Baibolo: “Tikukhumba kuŵa ŵakugomezgeka mu vinthu vyose.”—Ŵahebere 13:18.

•   Lutilirani kuŵa maso. Munthu wangambiraso kuwonelera vinthu vyamuziro nanga pangajumpha vyaka vinandi chomene. Kevin, uyo tamuzunura kale pakwamba wakuti: “Nkhaleka kuwonelera vinthu vyamuziro kwa vyaka 10 ndipo nkhaghanaghananga kuti suzgo ili nili kumarana nalo. Kweni suzgo lane ili likaŵa kuti nichali nalo, ndipo likalindiliranga nyengo yakwenelera kuti liwonekereso.”

   Fundo ya mu Baibolo: “Uyo wakughanaghana kuti ngwakukhora wachenjere kuti waleke kuwa.”—1 Ŵakorinte 10:12.

•   Para mwayezgeka, zikirani. Nangauli mungaghakanizga yayi makhumbiro ghaheni kuti ghaleke kumwizirani, kweni mungachitapo kanthu kuti muleke kuthera. Khumbo lakuwonelera vyamuziro lingamara usange mungamba kughanaghanirapo pa vinthu vinyake viwemi.

   Fundo ya mu Baibolo: “Waliyose wamanye kujikora kuti waŵe mutuŵa ndiposo wakuchindikika. Muleke uryezi ndiposo makhumbiro ghambura kujikora ghakugonana.”—1 Ŵatesalonika 4:4, 5.

•   Gegani vinthu ivyo vingamupangiskani kuti mwambireso. Buku linyake likuyowoya kuti: “Para munthu wali na khumbo lakuwonelera vinthu vyamuziro, vikuŵa nga wabuska matchisa. Kweni moto ungabuka chomene . . . usange pangathilika mafuta nanga ghangaŵa ghachoko waka.”—Willpower’s Not Enough

   Fundo ya mu Baibolo: “Chinthu chiheni chileke kuŵa na mazaza pa ine.”—Salimo 119:133.

•   Kutaya chigomezgo yayi. Vingatora nyengo yitali panji vyaka vinandi kuti mwambeso kumugomezga munyinu wa munthengwa. Kweni kafukufuku wakulongora kuti ntchamachitiko.

  Fundo ya mu Baibolo: “Chitemwa chikuzikira.”—1 Ŵakorinte 13:4.