Lutani apo pali nkhani

Lutani pa menyu yachiŵiri

Ŵakaboni ŵa Yehova

Chitumbuka

Ŵanthu Ŵanandi Ŵakuwona Ofesi ya Central America

Ŵanthu Ŵanandi Ŵakuwona Ofesi ya Central America

Mu 2015, ŵanthu pafupifupi 175,000 ŵakaluta kukawona ofesi ya Ŵakaboni ŵa Yehova ya Central America ku Mexico. Zuŵa lililose, pa avereji ŵanthu 670 ŵakalutanga kukawona ofesi iyi! Ŵanandi ŵakulutanga mu magulu ndipo ŵakendanga mazuŵa ghanandi pa mabasi ghahayara. Ŵanyake ŵakanozgekera kwa myezi yinandi kuti ŵakawone ofesi iyi.

“Ulendo wa ku Beteli”

Ŵanthu ŵanyake kuti ŵakawone ofesi ya Ŵakaboni ŵa Yehova iyo yikuchemeka kuti Beteli, ŵakakhumbikwiranga kujipeleka chomene. Mwachiyelezgero, Ŵakaboni ŵa Yehova ku Veracruz ŵakakhumbanga kukawona ofesi, kweni ŵakaŵavya ndalama zakwendera mtundu wa makilomita 550 (mamayilosi 340). Ŵakakhazikiska thumba ilo ŵakalichema kuti “Ulendo wa ku Beteli.” Ŵakaphikanga vyakurya kweniso wakawunjikanga mabotolo gha pulasitiki, kughanozga na kughaguliska. Pakati pajumpha myezi yitatu ŵakasanga ndalama ya thirasipoti.

Kasi ivyo ŵakachita vikawovwira? Enya. Mwachiyelezgero, munyamata munyake zina lake Lucio, uyo nayo wakaŵapo pa gulu ili, wakalemba kuti: “Kuwona ku Beteli kwanovwira chomene pakuteŵetera Yehova. Sono nkhuchita vinandi mu mpingo.” Elizabeth uyo wali na vyaka 18, nayo wakayowoya kuti: “Nkhawona kuti awo ŵakuteŵetera Yehova pa Beteli ŵali na chitemwa chanadi, ndipo vikanovwira kuti nichite vinandi pakuteŵetera Chiuta.”

Ŵanandi Ŵakizanga pa Nyengo Yimoza

Nyengo zinyake pa zuŵa, kukizanga ŵalendo ŵanandi kuti ŵazakawone malo. Awo ŵakupokelera ŵalendo pa Beteli ŵakaŵapokeleranga makora ŵanthu awo ŵakizanga. Mwanakazi munyake zina lake Lizzy wakati: “Para nawona ŵanthu ŵanandi ŵakwiza kuzakawona malo nkhukhozgeka chomene. Chipulikano chane chikukhozgeka chomene chifukwa cha ivyo ŵalendo aŵa ŵakuyowoya para wawona malo, kweniso kupulika ivyo ŵakachita kuti ŵazakawone ofesi.”

Para kwiza ŵanthu ŵanandi kuti ŵazakawone ofesi, awo ŵakugwira ntchito zinyake pa Beteli ŵakuleka dankha ntchito zawo na kuŵalongora malo. Nangauli ivi vikuŵapangiska kuti ŵatangwanike chomene, kweni ŵakukondwa kupokelera ŵalendo. Mwanalume munyake zina lake Juan, wakati: “Para namara kulongora ŵalendo malo, nkhuwona kuti ŵakukondwa chomene, ndipo nkhumanya kuti nyengo yane yindamalire pawaka.”

“Ŵana Ŵakuvitemwa Chomene”

Ŵana nawo ŵakukondwa chomene para ŵaluta ku Beteli. Mwanakazi munyake zina lake Noriko, uyo wakugwira ntchito ku Dipatimenti ya Makompyuta wakati: “Para ŵana ŵiza kuzakawona malo, nkhuŵafumba usange ŵangatemwa kuzakagwira ntchito pa Beteli. Wose ŵakunizgora kuti, ‘Enya tikukhumba!’” Ŵana ŵanandi ŵakutemwa kuluta apo pali chidoli cha Kalebi na Sofiya. Iwo ŵakutemwa kujambuliska na vidoli ivi, ivyo vikusangika mu mavidiyo gha Ŵani Ŵabwezi ŵa Yehova. Noriko wakati: “Ŵana ŵakuvitemwa chomene.”

Ŵana ŵanandi ŵakuwonga chomene ntchito iyo yikuchitika pa Beteli. Kamunyamata kanyake ka ku Mexico, zina lake Henry, kakasunganga ndalama mu kabokosi kuti kakapeleke ku Beteli. Mu kalata yake iyo kakapelekera lumoza na ndalama ku Beteli kakalembamo kuti: “Gwiliskirani ntchito ndalama izi kuti mulutilire kupanga mabuku ghanandi. Nkhuwonga chomene kuti mukugwira ntchito ya Yehova.”

Zani Muzakawone Malo

Ŵakaboni ŵa Yehova ku maofesi ghawo pa charu chose ŵakulongora malo kwaulere. Usange mungatemwa, ndimwe ŵakupokelereka. Muzamukondwa chomene para mwiza. Kuti mumanye vinandi vya maofesi na kuwona malo, lutani pa MANYANI VYA ISE > MAOFESI NA KUWONA MALO.