Wupu Wakulongozga ni gulu la Ŵanalume ŵachoko waka ŵa Chikhristu awo mbakukhwima mwauzimu, ndipo ŵakupeleka ulongozgi ku Ŵakaboni ŵa Yehova. Ŵakovwira pa ntchito izi:

•   Ŵakupeleka ulongozgi wa mu Baibolo kwizira mu mabuku, maungano, na masukulu gha Ŵakaboni ŵa Yehova.—Luka 12:42.

•   Ŵakulongozga ntchito yakupharazga ya Ŵakaboni ŵa Yehova pacharu chose, kweniso ŵakuwoneseska kuti vyawanangwa ivyo ŵanthu ŵakupeleka vikugwira ntchito yake.

 Ŵakulongozga ntchito yakupharazga ya Ŵakaboni ŵa Yehova pacharu chose, kweniso ŵakuwoneseska kuti vyawanangwa ivyo ŵanthu ŵakupeleka vikugwira ntchito yake. (Milimo 15:2) Nga umo vikaŵira na ŵanalume ŵakugomezgeka aŵa, Ŵabali ŵa Muwupu Wakulongozga ndiwo mbalongozgi ŵa gulu lithu yayi. Wupu uwu ukupambana chomene na ŵalongozgi ŵa matchalitchi ghanyake. Wupu Wakulongozga ukwendera fundo za mu Baibolo, ndipo ukumanya kuti Yehova wali kwimika Yesu kuŵa Mutu wa mpingo.—1 Ŵakorinte 11:3; Ŵaefeso 5:23.

Kasi mbanjani awo ŵali mu Wupu Wakulongozga?

 Ŵabali ŵa Muwupu Wakulongozga ni aŵa: Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, na Jeffrey Winder. Ŵabali aŵa ŵakuteŵetera pa ofesi yikuru ya Ŵakaboni ŵa Yehova ku Warwick, New York, U.S.A.

Kasi Wupu Wakulongozga ukuchita wuli ntchito zake?

 Wupu wakulongozga uli na makomiti 6 agho ghakulaŵilira ntchito zakupambanapambana. Waliyose wa mu Wupu Wakulongozga wakuteŵetera mu komiti yimoza panji kujumphirapo.

•   Komiti Yakulongozga: Yikuwona nkhani za malango na masoka gha chilengiwa, kweniso yikovwira Ŵakaboni ŵa Yehova para ŵakutambuzgika chifukwa cha vigomezgo vyawo, na chilichose icho chikukhumbikwira wovwiri waluŵiro chakukhwaska na Ŵakaboni ŵa Yehova.

•   Komiti Yakulaŵilira Ŵateŵeti ŵa pa Beteli: Yikulaŵilira awo ŵakuteŵetera pa Beteli, panji kuti pa maofesi gha Ŵakaboni ŵa Yehova.

•   Komiti Yakusindikizga: Yikulaŵilira ntchito ya kupanga na kutumizga mabuku ghakulongosora Baibolo, kuzenga malo ghakusoperapo, na maofesi.

•   Komiti Yauteŵeti: Yikulaŵilira ntchito yakupharazga makani “ghawemi gha Ufumu.”—Mateyu 24:14.

•   Komiti Yakusambizga: Yikupeleka ulongozgi wa mu Baibolo uwo tikupokera pa maungano, na masukulu. Kweniso kupanga mavidiyo na vinyake ivyo tikuchita kupulikizga.

•   Komiti Yakulemba: Yikupeleka ulongozgi wa mu Baibolo kwizira mu mabuku ghakupambanapambana, kweniso pa webusayiti yithu. Komiti iyi ndiyo yikulaŵilira mulimo wakung’anamura mabuku.

 Padera pa wovwiri uwo makomiti agha ghakupereka, Wupu Wakulongozga ukukumana sabata yiliyose kuti uwone ivyo vikukhumbikwa. Pa maungano agha, ivyo ŵakudumbiskana vikufuma mu Baibolo, ndipo mzimu utuŵa wa Chiuta ukuŵawovwira kuti ŵakolerane fundo yimoza.—Milimo 15:25.

Kasi mbanjani awo ŵakovwira Wupu Wakulongozga?

 Aŵa mba Khristu ŵakugomezgeka awo ŵakovwira makomiti gha Wupu Wakulongozga. (1 Ŵakorinte 4:2) Waliyose wakuyimanya makora milimo ya komiti iyo wakuteŵeteramo, ndipo wakuŵapo para komiti yake yikukumana sabata yiliyose. Nangauli ŵakukakako yayi fundo, kweni ŵakuyowoyapo maghanoghano ghawo, ndipo iwo ŵakulondezga ivyo komiti yakolerana, na kuwoneseska umo ivyo ŵakakolerana vikugwilira ntchito. Wupu Wakulongozga ukutumaso ŵanalume aŵa mu vyaru vyakupambanapambana kuti ŵakakhozge Ŵakaboni ŵa Yehova ndipo nyengo zinyake ŵakuyowoya nkhani za mu Baibolo pa maungano, nga ni maungano ghapachaka na gha awo ŵamalizga sukulu yakusambizga Baibolo ya Giliyadi.