Vya screen reader

Sankhani chiyowoyero

Lutani pa menyu yachiŵiri

Lutani apo pali nkhani

Ŵakaboni ŵa Yehova

Chitumbuka

Chifukwa Wuli Ŵakaboni ŵa Yehova Ŵakukana Ndopa?

Chifukwa Wuli Ŵakaboni ŵa Yehova Ŵakukana Ndopa?

Ivyo ŵanthu ŵakuyowoya

Utesi: Ŵakaboni ŵa Yehova ŵakukana munkhwala panji wovwiri uliwose ku chipatala.

Unenesko: Ŵakukhumba kuti ŵapokerenge wovwiri uwemi uwo ukusangika ku chipatala. Para ŵalwara ŵakuluta ku chipatala ndipo ŵakusanga madokotala agho ghakovwira munthu kwambura ndopa. Mazuŵa ghano, madokotala ghabowozga nthowa zinandi zakovwilira ŵalwari kwambura ndopa. Nthowa izi ŵakovwilira Ŵakaboni ŵa Yehova pera yayi. Mu vyaru vinandi, munthu wakusankha kuchizgika kwambura ndopa chifukwa cha kopa matenda na masuzgo ghanyake ghakuru agho ghakuŵapo para wapokera ndopa.

Utesi: Ŵakaboni ŵa Yehova ŵakuti para munthu wali na chigomezgo, mbwenu wachirenge.

Unenesko: Tikugomezga yayi kuti munthu wangachira na chigomezgo pera, kweni walute ku chipatala.

Utesi: Nthowa zakovwilira mulwari kwambura ndopa ni zakudura chomene.

Unenesko: Nthowa zakovwilira mulwari kwambura ndopa ni zakutchipa ndipo mulwari wakuchira makora. *

Utesi: Ŵakaboni ŵa Yehova ŵanandi, ŵalara na ŵana wuwo, ŵakufwa chaka chilichose chifukwa cha kukana ndopa.

Unenesko: Uwu mbutesi. Madokotala ghanandi ghakuchita maopareshoni gha mtima, gha viwangwa, na viŵaro vinyake kwambura ndopa. * Ŵapapi na ŵana wuwo awo ŵakukana kupokera ndopa kanandi ŵakuchira mwakuyana waka na awo ŵakupokera. Ndipo nyengo zinyake ndiwo ŵakuchira makora chomene. * Palije uyo wangayowoya mwakusimikizga kuti para munthu wakana ndopa ndikuti wafwenge, panji kuti para wapokera ndikuti waponenge.

Chifukwa icho Ŵakaboni ŵa Yehova ŵakukanira ndopa.

Ŵakaboni ŵa Yehova ŵakukana ndopa chifukwa cha chigomezgo chawo. Mu Phangano Lakale na Liphya wuwo, Baibolo likutiphalira kuti tiziŵizgenge ndopa. (Genesis 9:4; Leviticus 17:10; Duteronome 12:23; Milimo 15:28, 29) Chiuta wakuwona kuti ndopa zikwimira umoyo. (Leviticus 17:14) Ntheura tikukana kupokera ndopa kuti tipulikire Chiuta kweniso kuti timuchindike chifukwa cha umoyo uwo wali kutipa.

Ŵali kusintha maghanoghano

Maopareshoni ghakurughakuru ghakuchitika kwambura ndopa

Kale madokotala ghakawonanga kuti kovwira munthu kwambura ndopa ntchiwemi yayi, ndipo mbufwiti, kweni ghali kusintha. Mu 2004, nkhani ya mu magazini yinyake yikati “nthowa izo tikuchita pakovwira Ŵakaboni ŵa Yehova, kunthazi tizamovwiliranga waliyose.” * Mu 2010, nkhani ya mu magazini yinyake yikati “‘opareshoni zambura ndopa’ zichitikenge pakovwira Ŵakaboni ŵa Yehova pera yayi, kweni waliyose.”—Heart, Lung and Circulation.

Mazuŵa ghano, madokotala ghanandi ghakovwira ŵanthu kwambura ndopa. Nthowa izi ziliko na mu vyaru vikavu wuwo. Para Kaboni wa Yehova walwara, wakupempha nthowa zenezizi.

^ ndime 8 Wonani buku lakuti, Transfusion and Apheresis Science, Volume 33, No. 3, p. 349.

^ ndime 10 Wonani magazini agha, The Journal of Thoracic and Cardiovascular Surgery, Volume 134, No. 2, pp. 287-288; Texas Heart Institute Journal, Volume 38, No. 5, p. 563; Basics of Blood Management, p. 2; na Continuing Education in Anaesthesia, Critical Care & Pain, Volume 4, No. 2, p. 39.

^ ndime 10 Wonani magazini iyi, The Journal of Thoracic and Cardiovascular Surgery, Volume 89, No. 6, p. 918; and Heart, Lung and Circulation, Volume 19, p. 658.

^ ndime 14 Wonani magazini iyi, Continuing Education in Anaesthesia, Critical Care & Pain, Volume 4, No. 2, page 39.