Bul ɓil ɓe

Bul kleere wããren wo

Bul kluuri wããren wo

Sedewa Jeofa wo

Toupouri

Wããre Ma De Cõõre Ma Ni Baa!

 HADGE 4

Yeso Kris Diŋ Wosela?

Yeso Kris Diŋ Wosela?

1. Yeso tĩĩ wer tĩĩgi la?

Joŋre Yeso ma hun coo jag jar la?MATIYE 11:29; MARK 10:13-16.

Tĩĩgi wer Yeso bay do jar tebeere ma ɓuy wo wa, à tĩĩ wer le ciŋ diŋ je peele Baa blam sen se kal age biŋgi gesiŋ la. (Jaŋ 8:23) Baa joŋ Yeso go taŋgu fẽẽren wo ɓuy, blam ɓe se kay Baa ma joŋ fẽẽre ma lan wo mo ɓuy lay no. À diŋ Jee maga Baa joŋ de do ɓe ni no boŋ no, wersen à ɗen ga “Weel ma boŋ” ma ni Baa no. (Jaŋ 1:14) Yeso ndu de wããre ma jag Baa ne naa, à kal ɗe ge ɓe ga “Wããre.”Jaŋ ɓil Jag Jõõ wo 8:22, 23, 30; Kolos wo 1:15, 16.

2. Yeso nduu ti tamsir ma joŋ mayla?

Baa ɓo’ Weel ɓen le ti tamsir diŋ ɓil may ma twãy po ga suu de jee twar ti boŋ ga ɗa. May jar Jwif sen à ɗen ga Mari. Wersen Pan Yeso bay diŋ jee tabay po wa, Pan ɓe diŋ Baa tu. (Lug 1:30-35) Yeso ndu ti tamsir la (1) Ma had cwãy ti Baa, (2) Ma kaŋ nen ti faage ma hoo sug ti jag liŋgi Baa, hayba nen gayri wo maala (3) ma hã se ɓe go wer Naa ma “coo jare.”Jaŋ ɓil Matiye 20:28.

3. Naa de sãy cooge le ti wer mayla?

À coo jobo le diŋ ga jar po ba wo ne day kiɗ wo ga saara ‘war go. (Laage Go 21:29, 30) Baa hay joŋ jee tabay bay ma hugi wa bay ma taw tããbe wa lay. Naa ko sen koge la? Baa wii Adam jee tabay ma taŋgun ga, hayga à joŋ ɓlagge we no, à hugi go. Wersen so hayga Adam hay joŋ ɓlagge we ga no, à hay hu ti boŋ ga has. (Tĩĩgi Were 2:16, 17; 5:5) Naa da’ ɓil Wããre Baa ga hulin kal le ti tamsir la diŋ wer Adam. Wersen Adam ya’ huli de ɓlaggen ne jar ni ɓe wo de mõõre ɓe  wo. Jar tebeere wo ɓuy diŋ ma cooge le go jag huli maga mõõ naa Adam kaŋ ne naa ti mo no.Jaŋ ɓil Rom wo 5:12; 6:23.

Wose de kããge ma coo naa le go jag hulin la? Jee tabay po boŋ bay de kããge ma poɗge ti ɓlagge jar tebeere ma lan wo wa, de maga naa hu mono, naa poɗ go ti ɓlagge naa wo no.Jaŋ ɓil Siŋ Wora 49:8-10.

4. Yeso hu go wer mayla?

Yeso bay do naa jar tebeere ma lan wo wa, à bay de ɓlagge se wa has. Wersen, à hu wer ɓlagge ɓe ga—werga à joŋ ɓlagge ti boŋ ga. Yeso hu go diŋ wer ɓlagge jar tebeere wo. Baa da jar ma ti tamsir la wo debaŋ werga à hã Weel ɓen le go hugi wer naa. Yeso ti se ɓe da naa debaŋ lay ti maga à yã jag Pan ɓe day hã se go hugi wer ɓlagge naa no.Jaŋ ɓil Jaŋ 3:16; Rom wo 5:18, 19.

5. Yeso de joŋ mayse patala la?

De maga à hay gesiŋ la mono, Yeso pẽɗ jar ceege wo, bir jar huli wo, yã jar go jag ree wo. Wersen so à kaŋ nen naa ti fẽẽre maga se joŋ ra yaŋ ne jar ma yã jag ɓen nen naw ma pel wo no. (Matiye 15:30, 31; Jaŋ 5:28) Blam maga Yeso hu go mono, Baa kal birgi ɓe go kal kolge ɓe Jee Peele ɓe ma de eegre ciŋ. (1 Piyer 3:18) Yeso kal hayge ti ɓaŋ war Baa ma gorge ga à mo hay see ti waŋ ma wãã ree tamsir no. (Hebre wo 10:12, 13) Patala mono,à diŋ waŋ ma kluu le ciŋ, day jar ma wer ɓen wo go de sii wããre ma de cõõre sen mo kay go ti tamsir krub ɓuy.Jaŋ ɓil Danyel 7:13, 14; Matiye 24:14.

Wur kos we go, maga Yeso caage wer gayri ma ti naa go de jar ma joŋ debaycõõren wo ɓuy. Jar maga hã wo ɓil ɓaara go ne Yeso day yã wo jag ɓe we joŋge wo yaŋ ti paradis gesiŋ ma tum.Jaŋ ɓil Siŋ Wora 37:9-11.