Bul ɓil ɓe

Bul kleere wããren wo

Bul kluuri wããren wo

Sedewa Jeofa wo

Toupouri

Wããre Ma De Cõõre Ma Ni Baa!

 HADGE 7

Twaywaŋ Ma Ni Baa Diŋ Mayla?

Twaywaŋ Ma Ni Baa Diŋ Mayla?

1. Twaywaŋ ma ni Baa diŋ mayla?

Yeso diŋ Waŋ ma ti tu ɓen wer mayla?MARK 1:40-42.

Twaywaŋ mani Baa diŋ ngeel maga Baa de hayle waŋ le ciŋ ni mono. À coo ge waŋre ma ti tamsir lan yaŋ wo go ɓuy day se joŋge diŋ fen ma bag jag ɗiggi Baa go ti tu ɓe ɓuy le ciŋ lay gesiŋ la lay. Wããre ma ti Twaywaŋ ma ni Baa diŋ wããre ma de cõõre.Twaywaŋ mani Baa bagge jag ɗiggi jar tebeere maga wo nen coocoo do waŋre ma ti tamsir la wo yaŋ go ɓuy. À tayge jag fẽẽre ma tenen ti tamsirn lan yaŋ go boŋ ɓuy.Jaŋ ɓil Danyel 2:44; Matiye 6:9, 10; 24:14.

Twaywaŋ ma hunla ɓuy de waŋ ɓe. Day Jeofa hay Yeso Kris diŋ waŋ Twaywaŋ ɓe no.Jaŋ ɓil Naage Nene 11:15.

2. Yeso diŋ waŋ ma ti tu ɓen wer mayla?

Yeso diŋ waŋ ma ti tu ɓen werga à de ele day se cag kiida ti tu ɓe lay. (Jaŋ 1:14) Dayge pa so mono, à de kããge de eegre ma kay jar tebeere wo werga à wãã ge wããre tamsir le ciŋ ɓaa. Blam maga Yeso bir go mono, à kal rawge hayge gorge ciŋ ti ɓaŋ war Baa. (Hebre wo 10:12, 13) Baa kal hayge ɓe tipaale waŋ ɓe no.Jaŋ ɓil Danyel 7:13, 14.

3. Yeso hayge waŋ ɓen de wose wo la?

Jar maga kefder Baa ɗe ra ga “jar ma bay ɗag” lagge wo yaŋ le ciŋ ɓiŋ Yeso ni. (Danyel 7:27) Jar se bay ɗag wo, Yeso tĩĩ wer hoora ge diŋ yoo bar ɓe ma hwal ti ɓog wo no. Blam sen Jeofa hoo jar ma tigriŋ yoo ɓaara ni hãã nen wur ma patala no. Jar sen bir wo le diŋ nenterse do Yeso no lay no.Jaŋ ɓil Jaŋ 14:1-3; 1 Korente wo 15:42-44.

 Jar ma woge ciŋ wo gãyla? Yeso ɗe ra ga “horog ma mbagno. (Lug 12:32) Keege ɓaara joŋge ɓuy ndar kis ti ɓe hwal hwal naa ti naa lay (144 000). À lagge wo waŋre tamsirn de Yeso.Jaŋ ɓil Naage Nene 14:1.

4. De maga Yeso tĩĩ wer waŋ ɓen mono ree mayse joŋ la?

Yeso hay waŋ ti Twaywaŋ mani Baa nen kiŋgi ma ndar ti ɓe kis kis kaawa’ de hwal ti naa (1914) no. * De maga Yeso tĩĩ wer joŋre Waŋ ɓen mo kay, se srog Manhuli de sõõre ma wer ɓen wo ɓuy le go gesiŋ laa. Ɓil Manhuli kal sõõge debaŋ, se kal ɓo’ ree ne tamsirn ti krub ɓuy. (Naage Nene 12:7-10, 12) Tĩĩ wer le ti wur sen ni hãã so mono, ree ma ti jar tebeeren ya’ wo ciŋ de pel ni debaŋ. Durgi wo, koŋne wo, ceege ma kluuri wo, daɗge tamsir wo mo deŋ ɓuy diŋ “fẽẽre” ma kaŋ nen naa ga Twaywaŋ mani Baa ndu ge yaŋ wãã ree tamsir la ɓaŋ so.Jaŋ ɓil Lug 21:7, 10, 11, 31.

5. Twaywaŋ mani Baa Joŋ ge diŋ mayse la?

Siigi wããre ma ti Twaywaŋ ma ni Baa de tay ti jar ma ti wer sir genla ɓuy wara see kããra. Jar milyoŋ puri maga wo de fer ti se ɓaara gesiŋ wo wara diŋ jar lagge ɓil Twaywaŋ mani Baa gesiŋ la. À joŋ ge wo yaŋ go de yããge ti wur maga Twaywaŋ mani Baa caage wer jar ma de ɓlagge ti tamsir lan go mono. Wersen, jar maga wo de sãy lagge ɓil Twaywaŋ mani Baa ɓuy mo yã wo wããre Yeso.Jaŋ ɓil Naage Nene 7:9, 14, 16, 17.

Nen kiŋgi ma ndar mono (1000), Twaywaŋ mani Baa bagge jag ɗiggi Baa maga le ti tĩĩgi wer jee tabay go ɓuy so. Tamsir la ɓuy kol ge diŋ paradis. Blam sen so mono, Yeso ferge hã Waŋn ne Pan ɓe. (1 Korente wo 15:24-26) Ndo yaŋ de ko jobo maga ndo de sãy sii wããre ma ti Twaywaŋ ma ni Baa ne hen ti we yawla?Jaŋ ɓil Siŋ Wora 37:10, 11, 29.

 

^ Caage ɓil yerge 6 Ma laa wer hadge Wããre Baa ti kiŋgi ma 1914, jaŋ paaje 215-218 ɓil Kefder Qu’enseigne réellement la Bible?