Bul ɓil ɓe

Bul kleere wããren wo

Bul kluuri wããren wo

Sedewa Jeofa wo

Toupouri

Wããre Ma De Cõõre Ma Ni Baa!

 HADGE 14

Baa Daga Jar Ma Wer Sen Mo Tay Wo Wer Mayla?

Baa Daga Jar Ma Wer Sen Mo Tay Wo Wer Mayla?

1. Baa tay jar Israyel ma ɓaa wo wer mayla?

Baa tay mõõre Abraham wo maga à mo lag wo ɓil sir po boŋ, day se hã jag liŋgi ne hara ni lay. Á kaŋ ɗu sir sen ga “Israyel,” sir sen kol diŋ ngeel goŋ Baa ma cwãy no, diŋ ngeel maga wããre Baa tĩĩ wer ni mo lay no. (Siŋ Wora 147:19, 20) Wersen so jar ma wer sir genla ɓuy da’ wo wããre Baa do jar Israyel wo.Jaŋ ɓil Tĩĩgi Were 22:18.

Baa hoo jar Israyel maga à mo hay wo diŋ sedewa se. Joŋre ɓaara ma ɓaaɓaa ɓuy kaŋ wo nen naa ga Baa kaŋ bosa’ ne jar maga hoo wo sug ti jag liŋgi ɓen mo no. (Dogge Jag Liŋgi 4:6) Jar tebeere ma lan ko wo Baa ma cwãy mo deŋ ɓuy diŋ wer jar Israyel wo.Jaŋ ɓil Esayi 43:10, 12.

2. Jar Kretiyẽẽ ma cwãy tay wo wer mayla?

Ti kal mapo so mono, Baa tob jar Israyel wo go, Jeofa kal coo ra ge de tayge Kretiyẽẽ wo. (Matiye 21:43; 23:37, 38) Patala mono, kretiyẽẽ ma cwãy kol wo joŋ Sedewa ti ɗu Jeofa ti ngeel jar Israyel wo.Jaŋ ɓil Joŋre 15:14, 17.

Yeso tay jar ma wer ɓen wo maga à mo see wo sii wããren go ne jar, mo kol ra go jar ma wer se. (Matiye 10:7, 11; 24:14; 28:19, 20) Joŋre sen go de bag jag patala nen naw ma blam taw wo no. Jeofa tay jar wara milyoŋ pur ti wer sir krub ɓuy ma goŋge ɓe, sen joŋ ti boŋ ga ɗa has. (Naage Nene 7:9, 10) Kretiyẽẽ ma cwãy tay wo ma coɓ nen kẽẽ, ma kay kẽẽ lay. Ti tamsir krub ɓuy mono, à had wo diŋ wããre Baa sen boŋ ti tayge ti ɓaaran wo ɓuy.Jaŋ ɓil Hebre wo 10:24, 25.

 3. Tayge Sedewa Jeofa tĩĩ wo wer tĩĩgi la?

Nen kiŋgi ma 1870 no, jar po tay wo ɓag ma fleg nen Wããre Baa. À hay wo de koge ga Yeso hay tay jar ma wer ɓen wo ma sii wããre, wersen so saara tĩĩ wer sii wããre go ti Twaywaŋ mani Baa go ti tamsir ɓuy. Nen kiŋgi ma 1931 mo so no, saara kal yã ɗu Sedewa Jeofa wo so.Jaŋ ɓil Joŋre 1:8; 2:1, 4; 5:42.

4. Sedewa Jeofa wo de tayge tayge la?

Le ti tĩĩgi wer tayge Kretiyẽẽ ma taŋgun wo le mono, ngeel kluu ɓaaran ɓuy hay ka’ boŋ, ngeel sen hay Jerusalem. Jar ma wer Kris hay laage diŋ jag jar Kluuri ma Jerusalem wo no, day waŋ taygen ɓuy hay diŋ Yeso. (Joŋre 16:4, 5) Do sen no lay so no, wara ngeel kluu Sedewa Jeofa wo ka’ boŋ, saara ɓuy co’ wo diŋ sug wããre maga ale jag Jar Ma Ti Ngeel Kluu no. Jar Ma Ti Ngeel Kluu, wãã wo ree joŋre maga à joŋra ti ngeel kluuri Sedewa Jeofa ma me’me’ ɓil sir wo mo deŋ ɓuy. Ti ngeel kluuri ma me’me’ wo mono, à caa kefder wo ni, à kol kefder wo go ɓil jag ma tigriŋ wo, à dus kefder go ne jar ti wer jag sar sar kis kis hiira’ (600) de ti. Wersen so Jar Ma Ti Ngeel Kluu coɓ wo nenTayge jar ma ɓil tiŋ Baa ma ndar kis (100 000) de ti ma wer sir wo ɓuy. Ti tayge ti jar ma ɓil tiŋ Baa wo ɓuy mono, jar mapo wo diŋ Jar Ma Pel Tayge tiŋ Baa wo, mapo wo diŋ Jar Ma Raŋ Tiŋ Baa wo. Jar sen koɗ wo horog mani Baa de dage.Jaŋ ɓil 1 Piyer 5:2, 3.

Sedewa Jeofa tay wo ma sii wããre ma de cõõren go ne jare, ma kol ra ge go jar ma wer Krisi. Wuur sii wããren go liŋ ni jare do maga jar peele Yeso hay wo joŋge nono. (Joŋre 20:20) Wuur had jar maga da wo cwãy ɓil Bible. Ama Sedewa Jeofa bay wo diŋ tayge jar tawa wa. Wuur diŋ hẽẽrebe jar ni pããbe boŋ. Wuur coɓ nen kããra jag ree maga daɗ wo wuur mo lay no. (2 Tesalonig wo 1:3) Werga wuur joŋ joŋre ma de el nen Baa, wuur kay jar tebeere wo lay, Sedewa Jeofa wo de fruygi nen naw ɓaaran ti tamsir la debaŋ.Jaŋ ɓil Siŋ Wora 33:12; Joŋre 20:35.