Bul ɓil ɓe

Bul kleere wããren wo

Bul kluuri wããren wo

Sedewa Jeofa wo

Toupouri

Wããre Ma De Cõõre Ma Ni Baa!

 HADGE 11

Jag Liŋgi Ma Ni Baa Kay Wo Naa Kayge La?

Jag Liŋgi Ma Ni Baa Kay Wo Naa Kayge La?

1. Naa de sãy kayge ti wer mayla?

Jag liŋgi ma ɓil Wããre Baa kay wo naa ma joŋ se naa de el kayge la?SIŊ WORA 36:9.

Baa jee joŋ naa no go de ko fẽẽren wo ɓuy. À da naa debaŋ do pããbe maga da weere ɓe wo debaŋ nono. De daŋ sen ɓuy pa so mono, à hay bay de ɗiggi ga naa mo ɗe wo go see se hã wa. (Jermi 10:23) Naa ɓuy de sãy maga Baa mo koɗ naa ti do pããbe maga koɗ weere ɓe wo de el nono. (Esayi 48:17, 18) Jag liŋgi ma ɓil Kefder Baa diŋ fen maga Baa hãn ne naa ma koɗ naa mono.Jaŋ ɓil 2 Timote 3:16.

Jag liŋgi mani Jeofa had wo naa de ɗeŋ maga naa mo joŋ naw naa de el ti tamsir la joŋge la, day naa joŋ joŋge ma da’ tenen ma tum la. Baa joŋ naa diŋ se, naa mo see diŋ wer jag liŋgi ɓe no.Jaŋ ɓil Siŋ Wora 19:7, 11; Naage Nene 4:11.

2. Wããre ma de yoŋre ɓil jag liŋgi mani Baa diŋ mayla?

Wããre ma de yoŋre ɓil jag liŋgi ma ni Baa diŋ cwãy wããre maga ale see jag liŋgi no. Jag liŋgi ti see ɓe lay so mono, diŋ wããre maga joŋre ɓe de ngaɓ ge ti ngeel po ta’ tawa. (Dogge Jag Liŋgi 22:8) Ma laa wer wããre ma de yoŋre ɓil jag liŋgi po ta’ mono, naa mo ɗig go de woore. (Jag Jõõ wo 2:10-12) Ko nen ɓo ɗa, Kefder Baa had naa ga hã naw ne naa diŋ Baa. Wããre ma de yoŋre ɓen diŋ ga jobo bay de kããge ma taw naw se ɓe go, noga naw kẽẽ go wa. Hayba ti ngeel joŋre naa wo, liŋ ni naa, noga ti raŋge laybla no, naa mo joŋ see naa de ele.Jaŋ ɓil Joŋre 17:28.

3. Jag liŋgi ma ɓog ma hun kluu de daŋ lan wo mo la?

Yeso ngaɓ jag liŋgi po wo ɓoge maga wo kluuri debaŋ de daŋ lan wo ɓuy mono. Ma taŋgun kaŋ nen naa ga naa ti  tamsir la ma mayla. À wãã ga naa mo—ko Baa, mo da ne, mo joŋ peele ne hen go de jiili naa ɓuy. Wããre ma de yoŋre ɓil jag liŋgi se ta’ koɗ naa nen joŋre naa wo ɓuy. (Jag Jõõ wo 3:6) Jar maga ɗiigi ɓaara de kaŋge ti jag liŋgi se kay joŋ wo barge de Baa, da’ wo ti desãy, da’ wo tenen ma tum yaŋ lay.Jaŋ ɓil Matiye 22:36-38.

Jag liŋgi ma de ɓog ɓen kay naa maga ti desãy mo hay ti holaŋ naa de jar tebeere wo. (1 Korente wo 13:4-7) Wããre ma de yoŋre ɓil jag liŋgi se ta’ kay naa soɗ jar tebeere do ga Baa soɗ ra no lay no.Jaŋ ɓil Matiye 7:12; 22:39, 40.

4. Jag liŋgi ma ni Baa kay wo naa kayge la?

Jag liŋgi ma ɓil Wããre Baa kay naa maga naa mo hay de el see kẽẽ liŋ ni naa hayge la. (Kolos wo 3:12-14) Wããre Baa kay jar tiŋ wo ga à mo bus wo kããra go wa.Jaŋ ɓil Tĩĩgi Were 2:24.

Hayga naa yaŋ hoo sug ti jag liŋgi ma ɓil Kefder Baa no, naa kay diŋ see naa yaw. Ko nen ɓo ɗa, jee joŋre maga co jag waŋ ɓen diŋ jee maga hoo sug ti jag liŋgi ma ɓil Wããre Baa no, ga wãã ga joŋ ree ti ngeel ɓe, joŋ cwããge ga. (Jag Jõõ wo 10:4, 26; Hebre wo 13:18) Wããre Baa had naa pa ga naa mo hãy se naa go ti hrog ma ti tamsir wo wa, naa mo kiɗ diŋ Twaywaŋ mani Baa taŋgu ɗa.Jaŋ ɓil Matiye 6:24, 25, 33; 1 Timote 6:8-10.

Hayga naa yaŋ seege ti faage Wããre Baa no, naa da’ jam ma ti mnãysee yaŋ lay. (Jag Jõõ wo 14:30; 22:24, 25) Ko nen ɓo ɗa, hayga ndo yaŋ hoo sug ti jag liŋgi Baa ga taɗ go de yii wa no, ndo go de yãge jag huli maga da’ wo jar wer wããre yii mo no. (Jag Jõõ wo 23:20) Jeofa ga bag jag ɓe ti yii me’e me’e, ama taa go de ɓe wa. (Siŋ Wora 104:15; 1 Korente wo 6:10) Jag liŋgi Baa kay wo naa nen ɗiggi naa wo, nen joŋre naa wo lay. (Siŋ Wora 119:97-100) Naa hoo sug ti jag liŋgi Baa diŋ ma kay see naa tawa ga, ama diŋ werga naa da Jeofa lay mono.Jaŋ ɓil Matiye 5:14-16.