Bul ɓil ɓe

Bul kleere wããren wo

Bul kluuri wããren wo

Sedewa Jeofa wo

Toupouri

Wããre Ma De Cõõre Ma Ni Baa!

 HADGE 5

Ɗiggi Baa Ti Tamsir Ga Hãyla?

Ɗiggi Baa Ti Tamsir Ga Hãyla?

1. Baa joŋ tamsir ma mayla?

Jeofa joŋ tamsir ne jar tebeere wo. À diŋ ngeel lagge ɓaara. Baa joŋ Adam wo de wãy ɓe bay diŋ ma ɓo’ ɓeere wo go ciŋ wa. Ngeel ma ciŋ diŋ ma jar peele Baa wo, à joŋra go taŋgu jar tebeere wo. (Job 38:4, 7) Baa joŋ jee tabay ma taŋgun kal kaŋge ɓe ɓil pay sugnee de woore ɓil sir Eden ga à ɗen ga Paradis mono. (Tĩĩgi Were 2:15-17) Baa hay de ɗiggi ga jee tabay mo joŋ tenen caw ti tamsir la tum, à mo hu wa has.Jaŋ ɓil Siŋ Wora 37:29; 115:16.

Le ti tĩĩgi wer mono, paradis hay diŋ ɓil pay sugnee ma Eden tawa. Baa kal ga Adam wo de wãy ɓe mo tes wo, mo baa wo tamsir go. À mo wãã wo wããre tamsir no, mo kol wo ne go diŋ paradis. (Tĩĩgi Were 1:28) Tamsir la taw go ti boŋ ga has. À joŋge ɓe yaŋ ti’ tum ngeel lagge jar tebeere wo.Jaŋ ɓil Siŋ Wora 104:5.

2. Tamsir bay diŋ paradis wara wa wer mayla?

Adam wo de wãy ɓe Efa yã wo jag Baa ga, wersen Jeofa kal nĩĩ ra ge go ɓil pay sugnee no, Paradis kal yee nen go, jee tabay po boŋ kã ma joŋ paradis ma tigriŋ ti ngeel ɓe ni ga so. Wããre Baa ga: “À hã tamsir go ne jar hãã wo do.”Job 9:24.Jaŋ ɓil Tĩĩgi Were 3:23, 24.

Ɗiggi Baa ma taŋgu ti Jee tabay coo yawla? Bay wa! À diŋ Baa ma de Eegre ɓuy no. Mopo ẽg ne ga hase. (Esayi 45:18) À de kãã ma bag jag ɗiggi ɓe ma taŋgu ti jee tabay go ti ngeel ɓe.Jaŋ ɓil Siŋ Wora 37:11, 34.

3. Baa fer kne’ Paradis ti ngeel ɓe gesiŋ la kne’ ge la?

De maga Yeso hayge waŋ mani Baa mono, Baa fer kne’ Paradis ge gesiŋ la. Ti durgi maga à ɗen ga Harmagedoŋ mono, Yeso kal yaŋ pel jar Peele Baa wo ma joŋ durgi de jar  hẽẽ Baa wo, dayge à caa wer ɓaara yaŋ go ɓuy. Blam sen Yeso kal ma’ jag Manhulin ti daŋgay nen kiŋgi ndare (1000). Jar mani Baa joŋ wo yaŋ go de yãge nen durgi seno, werga Yeso yã ra go diŋ se. À joŋ wo yaŋ ti’ nen fruygi ti tamsir la ma tum.Jaŋ ɓil Naage Nene 20:1-3; 21:3, 4.

4. Gayri ma se naa taw ge go na hunla?

Baa caa ge wer debaycõõre ma ti tamsir go na hunla? Yeso wãã ti fẽẽre maga kaŋ wo nen naa ga tawge tamsir kos we go. Ree ma ti tamsir wo ti’ wara kaŋ wo nen naa ga “taw ge tamsir” kos we go.Jaŋ ɓil Matiye 24:3, 7-14, 21, 22.

Nen kiŋgi ma ndar (1000) ga Yeso hayge waŋ tamsir le ciŋ mono, à caa wer gayrin wo go ɓuy. (Esayi 9:5, 6; 11:9) Ti joŋre waŋ ɓen mono, Yeso joŋ ge diŋ jee Sii jag ma kluu ni pa, se fãã ge ɓlagge ma se jar maga da wo Baa mo ɓuy go. Baa ɓo’ Yeso maga à mo caa wer ceege no, tããbe wo de hulin go.Jaŋ ɓil Esayi 25:8; 33:24.

5. Wose hay ge ɓil Paradis maga de age mo la?

Ɓil tiŋ Twaywaŋ mono, ndo da’ jar maga da wo Baa wo ni, day kiɗ wo diŋ fen maga coo wo jag ɓe mono

Jar maga joŋ wo fẽẽre maga ɓil Baa dane lag wo yaŋ ɓil Paradis no. (1 Jaŋ 2:17) Yeso laa jar ma wer ɓen wo kiɗ jar maga wo de fer ti ɓaara gesiŋ ma had ra ge ga à mo coo wo jag Baa. Patala mono Jeofa go de kne’ jar milyoŋ puri ma lagge ɓil paradis gesiŋ la. (Sofoni 2:3) Ɓil Tiŋ Twaywaŋ Sedewa Jeofa wo mono, jar had wo maga saara mo hay diŋ war ma de ele wo, nããre ma de el wo, pããre ma de el wo noga mããre ma de el wo. Pããre tos wo Baa de weere ɓaara wo day had wo maga saara mo joŋ naw saara nen wããre ma de cõõre tum.Jaŋ ɓil Mise 4:1-4.