Еврейләргә 10:1—39
10 Канун киләчәк фатихаларның үзе түгел, ә аларның күләгәсе генә.+ Шуңа күрә ул,* ел саен бер үк корбаннар китерелсә дә, Аллаһыга якынлашучыларны беркайчан да камил итә алмый.+
2 Камил итә алса, корбаннар инде китерелмәс иде түгелме? Чөнки изге хезмәтне башкаручылар бер тапкыр һәм гомергә пакьләнгәч, гөнаһлары аркасында гаеп сизмәс иделәр.
3 Ләкин шул корбаннар ел саен гөнаһлар турында искә төшереп торалар,+
4 чөнки үгез каны белән кәҗә каны гөнаһларны юк итә алмый.
5 Шуңа күрә, дөньяга килгәч, Мәсих болай диде: «„Сиңа корбан да, бүләк тә кирәк булмады, ләкин син минем өчен тән әзерләдең.
6 Сине тулаем яндыру корбаннары да, гөнаһ йолу корбаннары да сөендермәде“.+
7 Шунда мин: „Әй Аллаһы, менә мин (язма төргәктә минем хакта язылган) синең ихтыярыңны үтәр өчен килдем!“ — дидем».+
8 Ул: «Сиңа корбаннар да, бүләкләр дә, тулаем яндыру корбаннары да, гөнаһ йолу корбаннары да кирәк булмады, алар сине сөендермәде»,— дигәч (ә бу корбаннар Канун буенча китерелә),
9 «Менә мин синең ихтыярыңны үтәр өчен килдем!»+ — ди. Ул яңа тәртипне гамәлгә кертер өчен, иске тәртипне гамәлдән чыгара.
10 Менә шул «ихтыяр»+ буенча без, Гайсә Мәсихнең тәне бер тапкыр һәм гомергә корбанга китерелгәнгә, изге ителдек тә.+
11 Һәр рухани көн саен үз урынына басып, хезмәт итә+ һәм күп тапкырлар бер үк корбаннар китерә,+ әмма алар кешене һичкайчан гөнаһлардан тулысынча арындыра алмаячак.+
12 Ләкин ул, гөнаһлар өчен бер тапкыр һәм мәңгегә корбан китергәч, Аллаһының уң ягына утырды.+
13 Шул вакыттан ул дошманнарының үз аяклары астына салынуын көтә.+
14 Бер корбан китереп, ул изге ителүчеләрне мәңгегә камил итте.+
15 Бу хакта безгә изге рух та шаһитлек бирә.
16 Ул: «„Шул көннәрдән соң,— ди Йәһвә*,— мин алар белән мондый килешү төзермен: канунымны аларның йөрәкләренә салырмын һәм акылларына язып куярмын“»+,— дигәч,
17 болай дип өсти: «Гөнаһларын һәм явыз эшләрен мин инде исемә төшермәм».+
18 Ә гөнаһлар кичерелгән икән, гөнаһ өчен корбанны бүтән китерәсе дә юк.
19 Шулай итеп, кардәшләр, без Гайсә каны ярдәмендә изге урынга+ кыюлык* белән керәбез.
20 Анда илтүче юлны ул безгә чаршау аша,+ ягъни үз тәне аша, үтеп ачты, һәм бу юл — тормышка алып баручы яңа юл.
21 Безнең шулай ук Аллаһы йортының башында торучы бөек руханиебыз бар,+ шуңа күрә,
22 әйдәгез, йөрәкләребезне һәм бозык вөҗданыбызны сафландырып,*+ шулай ук тәнебезне чиста су белән пакьләндереп,+ иман булдыра торган тулы ышаныч белән, ихлас күңелдән Аллаһыга якынлашыйк.
23 Өметебез турында бар кешеләргә икеләнмичә игълан итик,+ андый мөмкинлекне кулдан ычкындырмыйк, чөнки вәгъдә бирүче тугры.
24 Әйдәгез, бер-беребезне мәхәббәт һәм игелекле эшләргә дәртләндерер өчен, бер-беребезгә игътибарлы булыйк.+
25 Кайберәүләрнең гадәтләренә кереп киткән булса да, бергә үткәргән очрашуларыбызны калдырмыйк,+ киресенчә, бер-беребезне рухландырып торыйк+ һәм моның барысын шул көн якынлашкан саен тагы да тырышыбрак башкарыйк.+
26 Чөнки әгәр дә без, хакыйкатьне төгәл белгәннән соң, аңлы рәвештә гөнаһ кылып йөрибез икән,+ безгә гөнаһлар өчен китерелгән бернинди корбан да инде ярдәм итә алмый.+
27 Ул чакта каршы килүчеләрне юк итәргә әзер торучы ялкынлы ярсуны һәм куркыныч хөкемне көтеп торасы гына кала.+
28 Муса канунын санга сукмаучы ике яисә өч кеше шаһитлеге нигезендә һич кызганусыз үлемгә дучар ителә икән,+
29 Аллаһы Улын аяк астына салып таптаган, Аллаһы килешүенең каны+ белән изгеләндерелгән, әмма аның кадерен белмәгән һәм юмарт игелек рухын кимсетеп хурлаган кеше күпкә катырак җәзага лаек!+
30 «Үч алу — минем эш, үзем кайтарачакмын»,— диючене һәм: «Йәһвә* үз халкын хөкем итәр»+,— диючене без беләбез.
31 Тере Аллаһы кулына эләгү коточкыч нәрсә.
32 Сез Аллаһы яктылыгын+ күргәч, каты сынаулар аркасында газап чиктегез, шулай да нык калдыгыз. Шул көннәрне искә төшерегез.
33 Кайвакыт сезне бар халык алдында мәсхәрәләделәр, һәм сез хәсрәт чиктегез. Ә кайвакыт сез газапларны аларны үз башыннан кичергән кешеләр белән уртаклаштыгыз.*
34 Сез тоткынлыктагы кардәшләрнең хәленә кердегез, үзегезнең яхшырак, мәңгелек мирасыгызның барлыгын белеп,+ милкегез таланганда, моны шатлык белән кабул иттегез.+
35 Шуңа күрә олы әҗер китерәчәк кыюлыгыгызны* югалтмагыз.+
36 Аллаһы ихтыярын үтәп, вәгъдә ителгәнне алыр өчен, сезгә чыдамлык кирәк,+
37 чөнки «аз гына вакыт» калган+ һәм «килүче килеп җитәчәк, тоткарланмаячак».+
38 «Тәкъвам үз иманы белән яшәр»+ һәм «чигенсә, җаным аңардан канәгать булмас».+
39 Без исә һәлакәткә баручы чигенүчеләрдән түгел,+ ә үз җаннарын саклар өчен иманга ия булган кешеләрдән.
Искәрмәләр
^ Я, бәлки, «кешеләр».
^ А5 кушымт. к.
^ Яки «ышаныч».
^ Сүзгә-сүз «сибеп», Гайсә канын сибү мәгънәсендә.
^ А5 кушымт. к.
^ Яки «кешеләр янәшәсендә булдыгыз».
^ Сүзгә-сүз «сөйләү иреген».