«Зур максатлар киңәш-мәслихәт белән ныгытыла» (Гыйбрәтле сүзләр 20:18)

Гаиләгә үзләренә кирәклесен алу өчен акча кирәк (Гыйбрәтле сүзләр 30:8). «Көмеш кешегә калкан»,— дип әйтелә Аллаһы Сүзендә (Вәгазьче 7:12). Тормыш иптәшең белән акча мәсьәләсен хәл итү кайвакыт авыр булса да, акчага арагызга чөй кагарга юл куймагыз (Эфеслеләргә 4:32). Ир белән хатын бер-берсенә ышанырга, акчаны ничек һәм нәрсәгә тотарга икәнен бергә хәл итәргә тиеш.

 1 БАРЫСЫН ПЛАНЛАШТЫРЫГЫЗ

ИЗГЕ ЯЗМАЛАРНЫҢ КАРАШЫ. «Әйтик, берегез манара төзергә тели ди. Бу эшне башкарып чыгарлык акчасы бармы икәнен белү өчен, әллә ул иң башта утырып, манараның күпмегә төшәсен хисаплап чыкмасмы?» (Лүк 14:28) Акчаны ничек кулланырсыз? Бергә планлаштырыгыз (Амос 3:3). Шулай ук нәрсәне сатып алырга кирәк һәм моңа күпме акча тота аласыз икәнен карап чыгыгыз (Гыйбрәтле сүзләр 31:16). Берәр нәрсәне акчагыз булганга гына сатып алырга ашыкмагыз. Бурычка кермәскә тырышыгыз. Аякны юрганга карап сузалар (Гыйбрәтле сүзләр 21:5; 22:7).

КИҢӘШЛӘР

  • Ай азагында акча калса, аның белән нәрсә эшләргә икәнен бергәләп хәл итегез

  • Акча планлаштырганнан күбрәк тотылса, уйлап карагыз: чыгымнарыгызны киметер өчен нәрсә эшләп була. Бәлки, полуфабрикат сатып алганчы, ризыкны тулысынча үзегез генә әзерләргә булырсыз

 2 КИҢӘШЛӘШ ҺӘМ БУЛГАН АКЧАҢА КАРАП ЭШ ИТ

ИЗГЕ ЯЗМАЛАРНЫҢ КАРАШЫ. «Йәһвә каршында да, кешеләр алдында да бар нәрсә турында намус белән кайгыртабыз» (2 Көринтлеләргә 8:21). Тормыш иптәшеңә күпме хезмәт хакы алганың һәм күпме тотканың турында яшермичә сөйлә.

Акчага кагылышлы җитди мәсьәләләр хәл ителгәндә һәрвакыт тормыш иптәшең белән киңәшләш (Гыйбрәтле сүзләр 13:10). Акчага кагылышлы сораулар хәл ителгәндә ачык аралашу гаиләдә тынычлык сакларга булыша. Үз кесәңә кергән акчаны уртак акча дип сана (1 Тимутигә 5:8).

КИҢӘШЛӘР

  • Бер-берегезгә әйтмичә күпме акча тота аласыз? Моның турында алдан сөйләшеп куегыз

  • Акча белән бәйле мәсьәләләр турында сөйләшегез, аларга бәйле проблемаларның тууын көтеп тормагыз