Төп мәгълуматка күчү

Эчтәлеккә күчү

Йәһвә Шаһитләре

Телне сайлагыз татар

2 Көринтлеләргә 2:1—17

2  Чираттагы килеп китүемдә сезне кайгыга төшерәсем килми. 2  Чөнки мин сезне, үземне сөендерүчеләрне, кайгыга төшерсәм, үземне сөендерүче кеше калмас бит. 3  Нәкъ шулар турында мин сезгә язган идем дә. Мин моны, килгәч, мине куандырырга тиешлеләр мине боектырмасыннар өчен яздым; чөнки ышанам ки, мине сөендергән нәрсә сезнең дә һәммәгезне сөендерә. 4  Йөрәгем бик нык сызлап телгәләнде, шуңа күрә сезгә күз яшьләремне түгә-түгә, сезне боектырыр өчен түгел, ә сез мәхәббәтемнең тирәнлеген белсен өчен яздым. 5  Берәрсе боектырса да, ул мине түгел, ә сезнең барыгызны боектырды (туры язганым өчен гафу итегез инде), 6  һәм сезнең күпчелегегездән алган шелтә аның өчен җитәрлек. 7  Шуңа күрә сез аны, ул кайгыга батып йөрмәсен өчен, ихлас күңелдән кичереп, юатыгыз. 8  Үтенәм: аңа аны яратканыгызны күрсәтегез. 9  Сез һәрнәрсәдә дә тыңлаучанмы икәнен белер өчен сезгә бер язган идем инде. 10  Сез берәр кемне берәр нәрсә өчен кичерсәгез, мин дә аны кичерәм. Мин берәр нәрсәне кичергән булсам, Мәсих алдында сезнең хакка кичердем. 11  Мин моны Шайтан безне хәйләләп җиңмәсен өчен эшләдем, безгә аның алымнары билгеле бит. 12  Троаска Мәсих турындагы яхшы хәбәрне игълан итәргә дип килгәч һәм Хуҗабыз эшенә ишек ачылгач, 13  кардәшем Титусны таба алмадым, шуңа күрә йөрәгем урынында түгел иде. Һәм мин, андагы кардәшләр белән хушлашып, Македониягә киттем. 14  Әмма безне җиңү тантанасында һәрвакыт Мәсих белән бергә йөртүче һәм безнең аша һәр җирдә үзе турында белемнең хуш исен таратучы Аллаһыга рәхмәт яусын! 15  Чөнки без Аллаһы өчен Мәсих турындагы хәбәрнең тәмле хуш исе; бу исне котылуга баручылар да, һәлакәткә баручылар да сизә; 16  соңгылары өчен бу — үлемгә илтүче үлем исе, ә беренчеләре өчен — яшәүгә илтүче тормышның хуш исе. Мондый хезмәткә кем яраклы соң? 17  Без. Чөнки без, күпләрдән аермалы буларак, Аллаһы сүзен сатып йөрмибез, ә Мәсихнең шәкертләре, Аллаһы җибәргән хезмәтчеләр буларак, эчкерсез сөйлибез һәм бу хезмәтне Аллаһы каршында башкарабыз.

Искәрмәләр