Төп мәгълуматка күчү

Эчтәлеккә күчү

Йәһвә Шаһитләре

Телне сайлагыз татар

Эфеслеләргә 1:1—23

1  Бу хатны Аллаһының ихтыяры буенча Мәсих Гайсәнең рәсүле Паул Гайсә Мәсих белән бердәмлектә тугры торучы Эфестәге изгеләргә яза. 2  Күктәге Атабыз Аллаһыдан һәм Хуҗабыз Гайсә Мәсихтән юмарт игелек һәм иминлек сезгә. 3  Хуҗабыз Гайсә Мәсихнең Аллаһысы һәм Атасы макталсын, чөнки ул безгә Мәсих белән бердәмлектә торуыбыз өчен үз рухы белән күкләрдә төрле рухи фатихалар бирде 4  һәм без аның үзе белән бердәмлектә торсын өчен, безне дөнья яратылганга кадәр сайлады. Ул моны без ярату күрсәтсен өчен һәм үзе каршында изге һәм кимчелексез булсын өчен эшләде. 5  Ул безне Гайсә Мәсих аркылы үз балалары итеп сайлады һәм, үзе хуп күргәнчә һәм үз ихтыяры буенча, моны алдан ук билгеләп куйган, 6  моны кешеләр Аллаһыны шөһрәтле юмарт игелеге өчен мактасын дип эшләгән, ә бу сыйфатны ул безгә үзенең Яраткан Улы аша күрсәтте. 7  Без аның каны ярдәмендә йолым аша азат ителәбез, ягъни ялгышлыкларыбыз Аллаһының юмарт игелеге бөек булганга кичерелә. 8  Аллаһы безгә шул юмарт игелеген бар зирәклек һәм бар аңлау сәләте белән бергә мул итеп бирде 9  һәм безгә үз ихтыярының изге серен ачты. Бу изге сер — ул үзе хуп күргән һәм үзе алдан ниятләгән нәрсәләр. 10  Бу изге сер эшләр белән идарә итүне, ягъни барысын — күктәгеләрне дә, җирдәгеләрне дә — Мәсихкә буйсындырып бергә җыюны үз эченә ала, һәм бу билгеләнгән вакыт тәмамланып барганда булачак. Әйе, бар нәрсә Мәсихкә буйсындырылып җыелачак. 11  Без аның белән бердәмлектә торабыз, һәм мирасчылар итеп билгеләнгәнбез. Аллаһы безне үз нияте буенча алдан билгеләп куйган, чөнки ул бар нәрсәне үз ихтыяры буенча башкара 12  һәм моны безнең аша, Мәсихкә өмет баглаган беренчеләр аша, үзенә мактау һәм дан булсын өчен эшли. 13  Сез дә хакыйкать сүзен, ягъни үзегезне коткару турында яхшы хәбәрне ишеткәч, аңа өмет багладыгыз. Иман иткәч, сез дә Аллаһы вәгъдә иткән изге рух белән Мәсих аша мөһерләндегез, 14  һәм шул рух мирасны алачагыбызга дәлил булып тора. Ә мөһер сезгә Аллаһының милке йолым ярдәмендә азат ителсен өчен һәм аңа шөһрәтле мактау булсын өчен куелды. 15  Шуңа күрә мин дә сезнең бар изгеләр белән мөгамәлә итүегездән күренеп торган Хуҗабыз Гайсәгә иманыгыз турында ишетеп, 16  сезнең өчен бертуктаусыз рәхмәтләр укып торам. Сезне догаларымда өзлексез искә алам 17  һәм Хуҗабыз Гайсә Мәсихнең Аллаһысы, данлыклы Ата, сез аның турында төгәл белем алганда сезгә зирәклек рухы һәм ул үзе ачкан нәрсәләрне аңларга сәләт бирсен дип сорыйм. 18  Ул күңел күзләрегезне алар ачык күрсен өчен ачты, шуңа күрә мин аның сезне нинди өметкә чакырганын, изгеләргә мирас итеп нинди шөһрәтле байлык саклаганын 19  һәм безгә, иман итүчеләргә, карата күрсәткән аның бөек кодрәте никадәр гаҗәеп икәнен сез белсен дип дога кылам. Бу кодрәтнең бөеклеге аның куәтле көченең эш итүеннән күренеп тора, 20  һәм ул бу көчен Мәсихне үледән терелтеп һәм күкләрдә үзенең уң ягына утыртып кулланды. 21  Ул аны бу дөнья төзелешендә һәркайсы хөкүмәт, хакимият, кодрәт, хакимлек һәм һәркайсы исемнән югарырак утыртты, һәм бу киләчәк төзелештә дә шулай калачак. 22  Ул шулай ук аның аяк астына һәр нәрсәне салып буйсындырды һәм аны җыелышка кагылышлы һәр нәрсә өстеннән баш итеп куйды, 23  ә җыелыш — аның тәне, һәм аны ул аның сыйфатлары белән тулы; Мәсих һәрнәрсәдә барысын тулыландыра.

Искәрмәләр