Римлыларга 8:1—39

8  Шуңа күрә Мәсих Гайсә белән бердәмлектә торучыларда гаеп юк. 2  Чөнки Мәсих Гайсә белән бердәмлектә торучыларга тормыш бирүче рухның кануны сине гөнаһ һәм үлем кануныннан азат итте. 3  Гөнаһлы тәннең көчсезлеге аркасында Канун башкара алмаганны Аллаһы башкарды. Ул гөнаһны юк итәр өчен, үз Улын гөнаһлы кешеләргә охшаш итеп җибәрде һәм шулай итеп гөнаһлы тәнне җәзага хөкем итте. 4  Аллаһы моны без — гөнаһлы тән теләкләре буенча түгел, ә рух буенча яшәүчеләр — Канунның гадел таләпләрен үтәсен өчен эшләде. 5  Чөнки гөнаһлы тән теләкләре буенча яшәүчеләр шул теләкләр турында уйлап, ә рух буенча яшәүчеләр Аллаһы рухы хуплаган нәрсәләр турында уйлап яшиләр. 6  Гөнаһлы тән теләкләре турында уйлап яшәү — үлем, ә Аллаһы рухы хуплаган нәрсәләр турында уйлап яшәү тормыш һәм тынычлык китерә, 7  чөнки, гөнаһлы тән Аллаһы канунына буйсынмаганга һәм, асылда, буйсына да алмаганга, гөнаһлы тән теләкләре турында уйлап яшәү Аллаһыга дошман итә. 8  Шулай итеп, гөнаһлы тән теләкләре буенча яшәүчеләр Аллаһы хуплавына ирешә алмыйлар. 9  Ләкин сездә Аллаһы рухы чыннан да яши икән, димәк, сез гөнаһлы тән теләкләре буенча түгел, ә рух буенча яшисез. Әмма берәрсендә Мәсих рухы юк икән, димәк, ул Мәсихнеке түгел. 10  Ә инде Мәсих сезнең белән бердәмлектә тора икән, тәнегез гөнаһ аркасында үле булса да, рух, сез тәкъва дип игълан ителгәнгә, сезгә тормыш бирә. 11  Әгәр Гайсәне үледән терелткән Аллаһының рухы сездә яши икән, ул чакта Мәсих Гайсәне үледән терелткән Аллаһы сезнең фани тәнегезне дә сездә яшәүче үз рухы белән терелтәчәк. 12  Шулай итеп, кардәшләр, без бурычлы булсак та, гөнаһлы тән теләкләре буенча яшәү бурычыбыз юк, 13  чөнки гөнаһлы тән теләкләре буенча яшәсәгез, сез һичшиксез үләчәксез, ә тән эшләрен рух белән үтерсәгез, яшәячәксез. 14  Аллаһының рухы йөрткән кешеләрнең барысы — Аллаһы балалары. 15  Чөнки сез үзегезне кабат куркуга төшерүче коллык рухын түгел, ә уллык рухын алдыгыз, һәм шул рух ярдәмендә без: «А́бба*, Әти!» — дип кычкырабыз. 16  Шул рух үзе, безнең рухыбыз белән бергә, Аллаһы балалары булуыбызны раслый. 17  Ә инде без балалар икәнбез, ул чакта без варислар да, әйе, Аллаһының варислары, ә Мәсих белән бергә, аның данын уртаклашыр өчен, газап чигәбез икән, без аның варисташлары. 18  Шуңа күрә мин, хәзерге газаплар, безнең аша ачылачак дан белән чагыштырганда, бернигә дә тормый, дип саныйм. 19  Барлыкка китерелгән бар нәрсә Аллаһы балаларының анык билгеле булачак вакытын түземсезлек белән көтә, 20  чөнки барлыкка китерелгән нәрсәләр буш тормыш кичерүгә буйсындырылган булган. Бу аларның ихтыяры буенча түгел, ә буйсындыручының ихтыяры буенча башкарылган, әмма аларга мондый өмет бирелгән булган: 21  алар, черү коллыгыннан азат ителеп, Аллаһы балаларының шөһрәтле азатлыгын алачаклар. 22  Чөнки без беләбез, барлыкка китерелгәннең һәммәсе әле дә ыңгыраша һәм җәфа чигә. 23  Өстәвенә, без үзебез дә, беренче җимешләргә, ягъни рухка, ия кешеләр, эчтән ыңгырашып, уллыкка алынуыбызны, йолым ярдәмендә тәннәребездән азат ителүебезне түземсезлек белән көтеп яшибез. 24  Шул өмет ярдәмендә без коткарылдык та, әмма күзгә күренеп торган өмет — өмет түгел, чөнки кеше берәр нәрсәне күреп торса, әллә ул аңа өметләнәме? 25  Ә инде күзгә күренмәгән нәрсәгә өметләнәбез икән, ул чакта моны чыдамлылык белән көтеп яшибез. 26  Өстәвенә, кайвакыт мондый хәл була: безгә дога кылырга кирәк, ә көчсез булганга, нәрсә турында әйтергә икәнен белмибез. Андый чакларда, күңелебездәге ыңгырашуларны әйтеп бирер өчен сүзләребез булмаса да, безгә рух булыша. 27  Һәм бу изгеләр хакына Аллаһы ихтыяры буенча башкарыла, шуңа күрә йөрәкләрне тикшерүче Аллаһы рух аша әйтелгәннәрне аңлый. 28  Безгә шул билгеле: Аллаһы бар эшләрен үзен яратучы, үз нияте буенча чакырган кешеләргә файда китерерлек итеп башкара. 29  Чөнки ул алдан шуны билгеләп куйган: ул үзе башлангычта хуплаган кешеләр аның Улының чагылышы булачак. Ул моны Улы күп кенә кардәшләр арасында беренче угыл булсын өчен башкарган. 30  Ә кемнәрне алдан билгеләгән булса, шуларны чакырган да; кемнәрне чакырган булса, шуларны тәкъва дип игълан иткән дә; һәм, ниһаять, кемнәрне тәкъва дип игълан иткән булса, шуларны данлыклы иткән дә. 31  Моның барысы турында нәрсә әйтик соң? Аллаһы безнең яклы икән, кем безгә каршы торыр? 32  Аллаһы үз Улын безнең һәммәбез өчен кызганмыйча биргән. Алайса, ул һәм аның Улы безгә калганын да бүләк итмәсме? 33  Аллаһының сайланганнарын кем гаепләр? Аллаһы үзе аларны тәкъва дип игълан итә бит. 34  Аларны кем хөкем итәр? Үлгән, әмма үледән терелтелгән һәм Аллаһының уң ягында утыручы Мәсих Гайсә безне яклап тора бит. 35  Мәсих мәхәббәтеннән безне нәрсә аера алыр? Газаплармы, я михнәтме, я эзәрлекләүләрме, я ачлыкмы, я ялангачлыкмы, я хәвефме, я кылычмы? 36  «Синең хакка безне көне буе үлемгә тапшыралар, суеласы сарыкларга саныйлар»,— дип язылган бит. 37  Әмма без боларның һәммәсен безгә мәхәббәт күрсәткән Зат ярдәмендә тулысынча җиңеп чыгабыз. 38  Чөнки мин шуңа инанам: үлем дә, тормыш та, фәрештәләр дә, хөкүмәтләр дә, хәзерге һәм киләчәктәге нәрсәләр дә, көчләр дә, 39  биеклек тә, тирәнлек тә, барлыкка китерелгән башка һичбер нәрсә дә безне Аллаһының Хуҗабыз Мәсих Гайсә аша күрсәткән мәхәббәтеннән аера алмаячак.

Искәрмәләр

Мк 14:36 дагы искәрмәне к.