Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

“Tata Diosïri xénchperakuarhu ja je”

 KAPITULU 3

Uékauakachi imechani enga Tata Diosï uékaajka

Uékauakachi imechani enga Tata Diosï uékaajka

“Ima enga mímixetichani jingoni jámani jaka, mímixeti úkuarhiati.” (PROVERBIOS 13:20.)

1, 2. ¿Ambe uandasïni Biblia enga meru ísïka?

JUCHACHI ísïska eska esponja ma: uánikua ambechi antsitasïnga ima amberi engajtsïni uirhipandajka. Uánikua uelta, ménisï no jamberi kuenta íntskukuarhiparini, antsitaasïngachi jánguechani, úkuechani, sési jánguechani ka asta imecheri no sési úkuechani engachi jingoni kúnguarhijka.

2 Biblia uandasïndi ma ambe enga meru ísïka: “Ima enga mímixetichani jingoni jámani jaka, mímixeti úkuarhiati, peru ima enga no ambarhatichani jingoni jámajka no sési nikuati” (Proverbios 13:20). Inde uandakua enga ixú úrakuarhijka (“jámani jaka”) no arhikuekasïndi ménisïjku kúnguarhini, sino méntkisï imani jingoni kúnguarhini. * Karakata ma enga Bibliaeri ambe uandajka i ambe uandasïndi i textueri: “Jámani nemani jingoni arhikuekasïndi sési pʼikuarherani imani jingoni kúnguarhini”. ¿A no eskachi tsitisïnga ísï jámani eska imecha engachi uéajka? Jo, enga jucha sánderu kúnguarhijka nemani jingoni ima sánderujtsïni manatasïndi parachi úni ambe ma, sea sési ambe o no sési ambe.

3. ¿Ambechi jatsiski para úni parachi ambarhati amiguechani jatsiani?

 3 Engachi jucha uékaaka Tata Diosïri uékperakuarhu jarhani, kánikua jukaparhakuesti eskachi ambarhati pámpirichani jirinhauaka. ¿Nénachi uá exeantaani? Uékaani imechani enga Tata Diosï uékaajka ka imani amiguechani jatsiani engaksï Tata Diosïri amigueka. Eratsi je ini ambe: i kʼuiripuechaksï ísï jámasïndi eska Jeoba na kurhakuajka imeri amiguechani. ¿Jakiksï máteru sánderu ambarhati pámpiricha? Iásïchi exeaka nénaksï jámasïni i kʼuiripuecha. Engachi kurhanguaka ambesï kurhakuajki Jeoba imeri amiguechani, listuchi jauakia parachi ambakiti amiguechani erakuani.

TATA DIOSÏRI AMIGUECHA

4. ¿Andisï Jeobajku újki uandani né jindeua imeri amigu, ka andisï arhipi Abraanini “juchiti amigu”?

4 Jeoba no né uéjkini erakusïndi para imeri amigueni. Ima úsïndi uandani né uá jindeeni imeri amigu, jimboka ima jindeska Juramuti iámu parhakpinirhu, no ma sánderu kʼéri kóntperata jarhasti ka eska imeri amigueni. Jiájkani, ¿néni erakusïni para imeri amigueni? Jeoba imechankusï erakuajti engaksï meru mintsikajka imani. Ma i jásï kʼuiripu jindesti Abraani, enga meru mítikatepka imeri jakajkukua jimbo. Ima juramuminhaspti eska uándikupiringa uájpani. * ¿Jaki sánderu kʼéri tsʼéjkukua ma para ma táti xarhatani eska mintsikasïnga Tata Diosïni? Abraani sáno “kéjtsïtakua úspti Isaakini”, mintsikaparini “eska Diosï uinhapitispka para tsítantani [Isaakini] nájkiruka uarhirini japiringia” (Ebreu 11:17-19). Ka jimboka  ima xarhataspka ambakiti jakajkukua ma ka jimboka kurhajchaspka, Jeoba uékperakua jingoni arhispti “juchiti amigu” (Isaías 41:8; Santiagu 2:21-23).

5. ¿Néna exeasïni Jeoba imechani engaksï méntkisï kurhajchajka?

5 Jeoba kánikua jukaparharasïndi imechani engaksï no méni jurajkujka ka engaksï kurhajchajka. Kánikua uékaasïndi imechani engaksï no méni jurajkujka ambe uéjkiksï nitamakuarhini (arhinta je 2 Samuel 22:26). Eskachi na exeka kapitulu 1 jimbo, ima uékaasïndi imechani engaksï kurhajchajka jimbokaksï xénchasïnga. Ka ístu Proverbios 3:32 uandasïndi eska ima “pájperasïnga” solu “jurhimbiticha jingoni”, jo, imechani jingontku engaksï kurhajchaajka Jeobaeri juramukuechani. Ini kʼuiripuechani engaksï jurhimbitika, Jeoba pʼímarhiasïndi paraksï inchani imeri “tiendarhu”, i ambe arhikuekasïndi eskaksï uáka marhuakuni ka eska sésikua íntskuasïnga paraksï kómarhini na engaksï jatini uékaaka (Salmo 15:1-5).

6. ¿Nénachi xarhatasïni eskachi xénchasïnga Jesusini, ka néna pʼikuarherasïni Jeoba enga exejka eskachi xénchasïnga imeri Uájpani?

6 Jeoba xénchaasïndi imechani engaksï uékajka Jesusini. Ísï xarhataspti tata Jesukristu enga uandapka: “Ima engarini uékajka, janhanharhiati juchiti uandakuani, ka juchiti Táti uékaati imani, ka juchiti Táti ka ji juuakachi imani jingoni jarhani ka imani jingonchi irekaaka” (Juanu 14:23). Seguni i textu, ¿nénachi xarhatasïni eskachi xénchasïnga Jesusini? Janhanharhiparini imeri uandakuani, i ambe arhikuekasïndi eskachi jatsiska para úni ambe enga ima juramuka ka ma ambe jindesti nirani eianhpini jimbanhi eianhperakua ka disipulu uáni (Mateu 28:19, 20; Juanu 14:15, 21). Máteru ambe parachi xarhatani eskachi xénchasïnga Jesusini, jindesti ‘ísï jámani eska ima na jámaenga’ (1 Pedru 2:21). Ka nájkirukachi pekadorika, jánguarhintasïngachi na engachi xáni uáka  juchari uandakuechani jimbo ka juchari úkuechani jimbo parachi ísï jámani eska Jesusi na jámaenga. Ka Jeoba kánikua sési pʼikuarherasïndi enga exejka eskachi jánguarhintasïnga sési irekani, jimbokachi xénchasïnga imeri Uájpani.

7. ¿Andisï jukaparhakue eskachi imechani jingoni kúnguarhiaka engaksï Jeobaeri amigueka?

7 Eskachi na exekia, Jeoba kurhajkuarhisïndi eskaksï imeri amiguecha jatsiaka jakajkukua, eskaksï no méni jurajkuaka, eskaksï kurhajchaaka, eskaksï uékaaka Jesusini ka eskaksï ísï irekaaka eska Jesusi na jorhentpika. Jimbosï uétarhijti kurhamarhikuarhini: “¿Ambe uá ji uandani juchiti amiguecheri? ¿Ísïskiksï juchiti amiguecha ka ísïksï irekaxaki? ¿Meruksï Jeobaeri amigueski?”. Kánikua jukaparhakuesti eskachi imechani jingoni kúnguarhiaka engaksï ísï irekajka eska tata Jesukristu na jorhentpika ka engaksï jánguarhintajka eianhpini Tata Diosïri Reinueri ambe. Imaksï ambakiti amiguesïndi, jimbokajtsïni jarhuatasïnga parachi úni sési pʼikuastani Tata Diosïni (exe je rekuadruni “ ¿Né jindeski ambakiti amigu ma?”).

 

AMBAKITI MA JORHENGUARHIKUA PÁJPERAKUERI

8. ¿Ambejtsï sánderu tsitiski na engaksï pájperaenga a) Noemi ka Ruti? b) tanimu tumbi ebreuecha? c) Pablu ka Timoteu?

8 Bibliarhuksï jarhasti uánikua ejempluecha imecheri engaksï marhuakuenga Tata Diosïni ka enga sési nikuapka jimbokaksï ambakiti amiguechani erakuaspka. Úsïngachi exeni uandantskua Noemiri ka Rutiri, tanimu tumbi ebreuecheri engaksï méntkisï marhuakupka Tata Diosïni jini Babilonia ka Pablueri ka Timoteueri ejempluni (Rut 1:16; Daniel 3:17, 18; 1 Korintu 4:17; Filipusʌ 2:20-22). Peruchi jorhenguarhiaka ambakiti ejemplu ma: na engaksï pájperapka Dabidi ka Jonatani.

9, 10. ¿Ambesï uéni eskaksï Dabidi ka Jonatani sési pájperapiringa?

 9 Enga Dabidi uándikupka Goliatini, Biblia uandasïndi eska “Jonatani ka Dabidi úndaspkaksï ambakiti pájperakua ma jatsini. Ka Jonatani úndaspti ísï uékani Dabidini eska ima mísmu na uékakuarhienga” (1 Samuel 18:1). Ísïksï úndaspti ambakiti pájperakua ma jatsini, nájkirukaksï no májkueni jatiripka, ka enga jiáni kʼamakurhipka engaksï uándikupka Jonatanini guerrarhu ma (2 Samuel 1:26). * ¿Andiksïsï xáni sési pájperaeni?

10 Ambe enga uénga eska Dabidi ka Jonatani sésiksï pájperapiringa jindespti eskaksï tsimarhani xénchasïrenga Tata Diosïni ka eskaksï uékasïrenga méntkisï marhuakuni. Kánikuaksï jukaparharasïrendi Tata Diosïri ambe. Ístuksï janhanharperasïrendi imecheri ambarhati úkuechani jimbo. Jonatani respetarisïrendi na enga Dabidi no chénga ka na enga xáni tsitienga marhuakuni Tata Diosïni ka na enga i ambe jimbo no sáni chéparini kuájpienga Jeobaeri arhinhakuani. Ka Dabidi kánikua jukaparharasïrendi Jonatanini jimboka exesïrenga eska nájkiruka jatiripkia, tsitisïrenga marhuakuni Jeobani ka kurhajchani imeri juramukuechani, ka eska sánderu uandanhiasïrenga imeri amiguni jimbo ka eska ima mísmu jimbo. Ísï xarhatasïndi ambe enga úpka enga Dabidi kánikua no sési nitamakuarhini japka, enga no ambakiti rei Sauli uékaenga uándikuni (Jonataniri táti) ka enga Dabidi puru sïpakuarhini jámaenga. Jonatani xáni uékasïrendi Dabidini enga jamberi ‘nípka jima enga Dabidi japka ka jarhuataspti paraka mintsikapiringa Jeobani’ (1 Samuel  23:16). ¡Kánikua sési pʼikuarherapti Dabidi enga exepka eska imeri amigu niraspka uinhaperantani! *

11. ¿Ambejtsïni jorhendasïni Jonatani ka Dabidiri uandantskua na engaksï pájperaenga?

 11 ¿Ambechi jorhenguarhisïni Jonatani ka Dabidiri uandantskuani jimbo? Eska kánikua jukaparhakueska ísï irekani eska Jeoba na uandajka para ma úni sési pájperani. Kánikua sésisti imechani jingoni kúnguarhini engaksï májkueni ambe jakajkujka eska jucha, engaksï ambakiti jángua ma jatsijka ka uékanksï méntkisï marhuakuni Tata Diosïni. Ka i ambejtsïni jarhuatasïndi parachi uinhaperperantani ka jarhuajperanchi juchari uandakuechani jimbo, pʼikuarhinhikuechani ka nitamakuechani jimbo (arhinta je Roma 1:11, 12). Ka inde járhati pájperakuechanchi exeantasïnga juchari erachichani jingoni. Peru, ¿arhikuekasïni i ambe eskaksï  iámindu ima engaksï nirajka Kʼumanchikua Reinueri ma jimbo ambakiti pámpiriska? No méntkisï.

NÉNA ERAKUANI JUCHARI AMIGUECHANI

12, 13. a) ¿Andichisï jatsi para sési erakuani juchari amiguechani kúnguarhikuarhu? b) ¿Ambeksï nitamakuarhexapi primeru siglurhu anapu kúnguarhikuecha, ka ambe arhiaspi Pablu?

12 Jatsiskachi para sési erakuani juchari amiguechani, jimbokaksï no iámindu kúnguarhikuarhu anapuecha uákajtsïni uinhaperantani Tata Diosïri ambe jimbo. ¿Ískujtsïni pakataa i ambe? Nómbe. Ísï eskaksï na jaka frutecha engaksï ióndajka ninini anhatapurhu, ístuksï jarhasti erachicha engaksï ióndajka kʼuiriperani jakajkukuani. Jimbochisï exeajka kúnguarhikuecharhu mámaru járhati kʼuiripuechani engaksï mámaru kʼuiripejka Tata Diosïri ambe jimbo (Ebreu 5:12–6:3). Ísï jimbo, jatsiskachi para tekaantani jimbanhechani jimbo ka imechani jimbo engaksï no uinhapitini jaka ka uékperakua xarhatakuani, jimbokachi ísï uaaka jarhuataani paraksï sóntku kʼuiripeni (Roma 14:1; 15:1).

13 Úpirindi ambe ma jarhani engachi jimbo jatsipiringa para sánderu jingontku jámani kúnguarhikuarhu anapu pámpirichani jingoni. Máruksï úpirindi no sési jámani, o ikianksï kúnguarhikuani jingoni ka úndanksï uandauandamini o máteruechani uandatsiani. Májkueni úkuarhispti primeru siglurhu. Nájkirukaksï sáno iámindu kristianuecha sési marhuani japka, máruksï no sési jámasïrendi. Máru Korintu anapuechaksï nóteru jakajkusïrendia máru jakajkukuechani ka jimbosï apostuli Pablu ini uandakuechani jingoni arhiapti eskaksï jingontku japiringa: “Asï jáme je kʼarhakuarhini, enga nema kúrhiaska no sési úrichani, ikichakua úkuarhiatiksï imeri ambarhati úkuecha” (1 Korintu 15:12, 33). Ístu, Pablu eianguspti Timoteuni eskaksï máru erachicha úpiringa nóteru  jurhimbitku jámania, ka eska jatsispka para jarhariani imechani, o nóteru xáni kúrhiania (arhinta je 2 Timoteo 2:20-22).

14. ¿Náki prinsipiu jarhaski ambe enga Pablu uandapka pámpiricheri ambe?

14 I ambe enga Pablu uandapka prinsipiu ma jatasti: enga nema no sési jámaaka, nájkiruka kúnguarhikuarhu anapueuaka, sánderu sésisti no kúnguarhini imani jingoni (2 Tesalonika 3:6, 7, 14). Jatsiskachi para kuájchakuni juchari sési pájperakuani Tata Diosïni jingoni. Nochi mirikurhiaka eskachi ísïska eska esponja ma ka eskachi antsitaasïnga imecheri úkuechani ka jánguechani engachi jingoni kúnguarhijka. Nochi uáka inchamani esponjani ma itsïrhu enga no sési jánharhiaka ka erokuarhinchi eska esponja no jáxeaka, ístuchi no uáka imecha jingoni kúnguarhini engaksï no sési ambe újka ka erokuarhini eskachi sési ambe uáka (1 Korintu 5:6).

Chári erachichaksï uáti ambakiti amigueni

15. ¿Ambechi uá parachi úni exeantani kúnguarhikuarhu amiguechani engaksï tsitijka Tata Diosïni marhuakuni?

15 Peru no úkua jukasti ambarhati amiguechani exeantani juchari erachichani jingoni engaksï marhuakuni jaka Tata Diosïni (Salmo 133:1). Peru, ¿nénachi uá exeantani? Jatsiskachi para ísï jámani ka ísï jásïini eskaksï na jásïika Tata Diosïri amiguecha. Ísï, ístu imecha engaksï ísïuaka uékaatiksï juchantsïni jingoni kúnguarhini. Peru ístu uétarhisïndi eskachi jucha uénaaka ísï jámani (exe je rekuadruni “ Na engachi niáraka ambarhati amiguechani jatsiani”). Uétarhisïndi imechani jirinhaani engaksï jámajka na engachi jucha uékajka jámani. Ístuchi jatsiska para miáni eska Biblia uandasïnga eskachi jatsiska para uékaani máteruechani. Jo, uékasïngachi sánderu amiguechani jatsiani no arhiati na engaksï jásï koloriuaka, na engaksï jásï pʼindekua jatsiaka o  nani uéjkisïksï anapueni juchari erachicha (2 Korintu 6:13; arhinta je 1 Pedru 2:17). Ístuchi no jatsiska para imechantku jirinhaani engaksï májkueni jatiriuaka eska jucha. ¿Andi no sánderu kʼérispi Jonatani eska Dabidi? Sáno méntkisï ima amiguecha engaksï sánderu kʼérika eska jucha uánikua ambejtsïni jorhendasïndi ka mímixekuajtsïni íntskusïndi.

ENGA ARHIRPERAKUA AMBE JAUAKA

16, 17. ¿Andichisï no jatsi para jurajkuni kúnguarhikuani engajtsïni erachi ma no sési pʼikuastaaka?

16 Ménisïchi jatsiasïnga arhirperakuechani erachichani jingoni, jimbokachi no iámindu májkueniska ka nochi májkueni kʼuiripeska. Jimbojtsïnisï ménisï erachicha no sési pʼikuastajti sea úkuechani jimbo o uandakuecha  jimbo, o nochi úni sési pájperani, nochi kurhangutsperani ka nójtuchi májkueni eratsini (Proverbios 12:18). ¿Ambechi uá enga i ambe úkuarhiaka? ¿Ikiauachi ini ambe jimbo ka jarhaparhakuachi kúnguarhikuarhu? Nómbe, jimbokachi uékasïnga Jeobani ka imeri amiguechani.

17 Jeoba kueraasti tsípekuani ka úsïndi eska tsípikua jauaka, ka jimbochisï imantku jatsika para uékperakua xarhatakuni ka imantku kómarhini (Jaŋaskuecha 4:11). Tata Diosï, kúnguarhikuani úrasïndi parajtsïni jarhuatani, jimbosï uétarhijti eskachi apoiariuaka ka sési marhuani (Ebreu 13:17). Eskachi na exekia, enga erachi ma uáka ambe ma engajtsïni no sési pʼikuastajka, nochi ikiasïnga ka seguirinchi jarharini kúnguarhikuani. Nochi ísï úsïnga, jimboka Jeoba no kulpa jatsiska. Sánderu sési: uékasïngachi Jeobani, ka nochi méni jurajkupiringa imani ka ni imeri kúnguarhikuani (arhinta je Salmo 119:165).

18. a) ¿Ambechi uá paraka pínandikua jauaka kúnguarhikuarhu? b) Engachi erakuska puákuantaani imechani engajtsïni no sési úchika, ¿náki kóntperatechanchi intsïnhaaua?

18 Uékperakua engachi pʼikuarherajka erachichani jimbo, úsïndi eskachi jánguarhintaaka iáminduecha jingoni sési pájperani kúnguarhikuarhu. Ka i ambe úsïndi eskachi puákuantauaka máteruechani, miántaparini eskachi iámindu pekadoriska ka eskachi juchajtu no úsïnga iámindu ambe sési úni (Proverbios 17:9; 1 Pedru 4:8). Jeoba no erokuarhisïndi eskaksï imeri amiguecha no pekadu jukaraaka, jiájkani, ¿andichisï jucha kʼóru ini ambe erokuarhipirini? Uékperakuajtsïni jarhuatasïndi parachi seguirini ‘tekatsperantani ka puátsperantani’ (Kolosasi 3:13). Peru no méntkisï fásilisïndi. Ménisï úpiringachi no kuenta íntskukuarhini eskachi jukari kasu úkuxaka na engachi pʼikuarhinhini jaka. Ikiata úpirindijtsïni  andani ka eratsitarantsïni eska engachi ikiakuska, uákachi no sési úkuni imani engajtsïni úchika ambe ma. Peru imasï sánderu no sési ambe úkuarhinchajti enga ikiajka. Engachi erakuaka puákuntani imani engajtsïni no sési úchika uánikua kóntperatechanchi intsïnhaauaka (Lukasʌ 17:3, 4). Ísïchi uáka sési jásï ma pʼikuarherakua jatsini jucha mísmu, kúnguarhikua jingoni ka enga sánderu jukaparhakueka, Jeobani jingoni (Mateu 6:14, 15; Roma 14:19).

ENGA UÉTARHIJKA NÓTERU UANDAJPANI NEMANI

19. ¿Káni uétarhisïni nóteru uandajpania nemani?

19 Ménisï uétarhiati nóteru kúnguarhinia imecha jingoni engaksï antesi Jeobaeri testiguepka. I ambe jiáni úkuarhisïndi enga ma kristianu no kurhajchajka Jeobaeri leichani, ka enga no uékaaka moantani ka jatsini para petanhantani kúnguarhikuarhu uératini. Ka ístu májkuenisïndi enga nema nóteru jakajkujkia ambe enga Biblia uandajka ka enga úndajka no jurhimbiti jorhenguarhikuechani jorhentpiani o enga uéntajka kúnguarhikuarhu uératini, jo, enga jandiajku uandajka eska nóteru uékasïngia Jeobaeri testigueni. Tata Diosïri Karakatajtsïni jurhimbitku arhisïndi: ‘Eskachi no kúnguarhiaka imechani jingoni’ (arhinta je 1 Korintu 5:11-13; 2 Juanu 9-11). * Ménisï úkua jukaati nóteru kúnguarhini imani jingoni, ka sánderu enga juchari parientiuaka o juchari amigu ma. Peru, ¿ambechi uá? ¿Jánguarhintaachi ísï úni, ka ísïchi xarhatani eskachi sánderu jukaparharasïnga Jeobani ka imeri juramukuechani eska máteru ambe? Miántaakachi eska Jeoba  kánikua jukaparharasïnga engachi kurhajchajka ka nochi méni jurajkuni.

20, 21. a) Enga pekadori ma petanhantajka kúnguarhikuarhu uératini, ¿andisï jinde uékperakua xarhatakuni? b) ¿Andisï xáni jukaparhakue sési erakuani juchari amiguechani?

20 Jeobajtsïni uékperakua xarhatachisïndi enga pekadori ma petanhantajka kúnguarhikuarhu uératini ka ístuchi jucha úsïnga xarhatani na engachi xáni uékajka Jeobani. ¿Andichisï ísï uandajki? Ma ambe jimbo, jimboka petantani pekadorini ma enga no moantajka, xarhatasïndi eskachi uékasïnga Jeobani, eskachi janhanharhisïnga imeri nombrini ka imeri mandamientuechani (1 Pedru 1:15, 16). Ístu, jimboka kuájpinhasïnga kúnguarhikua. Ima kʼuiripu enga no moantajka no úsïndi ambe ma úkuani imani erachichani engaksï sési marhuakujka Tata Diosïni. Ísïksï úsïndi agustu marhuakuni Tata Diosïni jimbokaksï mítiska eskaksï uáka sési jarhani kúnguarhikuarhu ini xáni no sési jásï parhakpini jimbo (1 Korintu 5:7; Ebreu 12:15, 16). Ka máteru ambe, jimboka uékperakua xarhatakuasïnga pekadorichani. Jimboka i ambe jindeska parakaksï ima eratsintaaka, eskaksï moantaaka ka eskaksï uáka ambe ma paraksï kʼuanhatsintani Jeobani jingoni (Ebreu 12:11).

21 Jo ísïsti, juchari amiguechajtsïni sési jásï ambe jorhendaati o no sési jásï ambe. Jimbosï xáni jukaparhakueti eskachi sési erakuauaka juchari amiguechani. Ambakiti amiguechanchi jatsiauaka engachi imechani erakuaska engaksï Jeobaeri amigueka ka engachi uékaaska imechani enga ima uékaajka. Imajtsïni jorhendaati uánikua ambakiti ambe engajtsïni jarhuataaka úni imani ambe engachi eratsikia, ísï irekani eska Jeoba na uékajka.

^ párr. 2 Uandakua ebreu jimbo enga tradusirikuarhijka “jámajka” ístu úpirindi jindeni “pájperani” o “kúnguarhini” (Jueces 14:20; Proverbios 22:24).

^ párr. 4 I tsʼéjkukua jindespti para xarhatani ambe enga Jeoba úpiringa sánderu orhepatini: íntspini imeri máechakua Uájpani (Juanu 3:16). Peru Abraani no uándikuspti Isaakini, jimboka Jeoba uandajpaspka ka karneruni ma íntskuspti paraka Abraani imani uándikupiringa (Génesis 22:1, 2, 9-13).

^ párr. 9 Enga Dabidi uándikupka Goliatini, sapichuespti, “tumbijku ma”, ka 30 uéxurhini ísï jatirisptia enga Jonatani uarhipka (1 Samuel 17:33; 31:2; 2 Samuel 5:4). Jonatani 60 uéxurhini ísï jatirispti enga uarhipka, jiájkani treinta uéxurhini ísï sánderu kʼérispti eska Dabidi.

^ párr. 10 Ixú 1 Samuel 23:17 jimbo, Jonatani sinku ambe arhispti Dabidini para uinhaperantani: 1) eska no jatsispka para chéni; 2) eska Sauli no ma ambe ma úpiringa úkuni; 3) eska Dabidi juramutipiringa ísï eska Tata Diosï na uandapka; 4) eska úpiringa méntkisï mintsikani imani, ka 5) eska Sauli mítispkia eska Jonatani no méni jurajkupiringa Dabidini.

^ párr. 19 Apendisirhu, “Néna kámani imani enga petanhantaka kúnguarhikuarhu”, exentaakajtsï sánderu informasioni parajtsï mítini néna kaani imechani engaksï petanhantaka kúnguarhikuarhu ka engaksï jandiajku uéntajka.