Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

“Tata Diosïri xénchperakuarhu ja je”

 KAPITULU 5

Ambe arhikuekasïni no jindeni parhakpini anapu

Ambe arhikuekasïni no jindeni parhakpini anapu

“Chájtsï nóteru parhakpini anapueskia.” (JUANU 15:19.)

1. ¿Ambe xarhataspi Jesusi eska jukaparhakuespka ima últimu chúrikua enga Parhakpinirhu japka?

IMA chúrikua ante de uarhini, Jesusi xarhataspti eska uandanhiasïrenga ambe enga úkuarhipiringa sánderu orhepatini imeri disipuluecha jingoni. Jimbosï kómarhipti Tátembani imechani jimbo: “Nó[kini] kómarhisïnga eskari tʼu késtatauaka parhakpinirhu, sino eskari kuájpiauaka para noambakitini jingoni. Nóksï parhakpinirhu anapuesti májku jásï eskani ji na no parhakpinirhu anapueka” (Juanu 17:15, 16). Imani kómarhikuarhu, Jesusi xarhataspti na enga xáni uékauenga disipuluechani ka na engaksï xáni jukaparhakuepka ima uandakuecha enga ima chúri uandaapka, máru imechani japarini: “Chájtsï nóteru parhakpini anapueskia” (Juanu 15:19). Eskachi na exejka, para Jesusi kánikua jukaparhakuespti eskaksï imeri chúxapaticha méntkisï jarharitini japiringa parhakpinini.

2. ¿Ambe arhikuekaxapi Jesusi enga uandapka “parhakpini”?

2 Enga Jesusi úrapka ini uandakuani “parhakpini”, imani kʼuiripuni arhikuekaxapti enga jarharitini jaka Tata Diosïni, ka enga Satanasi juramukuajka ka engaksï imajkumindu eratsikuarhijka ka kʼéri pʼikuarheranksï ísï eska Satanasi (Juanu 14:30; Efesu 2:2; 1 Juanu 5:19). Kurhangusïngachi jiájkani andisï Biblia uandajki eska “sési pájperani parhakpini anapuechani jingoni, jindesïnga para ikiatani Diosïni” (Santiagu 4:4). Iáminduchi uékasïnga Tata Diosïri xénchperakuarhu jarhani, ísï jimbo, sésichi uáka engachi exeska nénachi uá no kuenta úkuarhini  ini parhakpini jingoni nájtukachi ixú irekaka. Ju je exeni iúmu ambe engajtsïni jarhuataaka: 1) no méni jurajkuni Tata Diosïri Reinuni ka no inchamukuni politikarhisï, 2) no jiókuarhini parhakpini anapu espirituni, 3) sési xukuparhani, 4) tsípini imani ambe jingontku engachi jatsikuarhika ka 5) méntkisï jukarini jarhani uarhipetarakuarhu anapu xukuparhakuani enga Tata Diosïrika.

NO JURAJKUNI TATA DIOSÏRI REINUNI KA NO INCHAMUKUNI POLITIKARHU

3. a) ¿Andisï Jesusi no uékapi politikarhisï inchamukuni? b) ¿Andisï Biblia arhiajka Kristueri erakukatechani eskaksï Jesusi jimbo axakateska? (Exe ístu notani.)

3 Jesusi no inchamukuspti politikarhisï, sánderu sési, aianhpisïrendi Tata Diosïri Reinueri ambe, auandarhu anapu juramukueri ma nani enga sánderu orhepatini ima Reipiringa (Daniel 7:13, 14; Lukasʌ 4:43). Jimbosï úpti arhini Ponsiu Pilatuni, Roma anapu juramutini: “Juchiti juramukua no ini parhakpini [anapuesti]” (Juanu 18:36). Ka jucha engachi imeri chúxapatiika, méntkisïchi májkueni úsïnga. ¿Néna? Méntkisï marhuakuparini Tata Diosïri Reinuni, ka juramutiri reinuni Jesukristuni, ka aianhpiparini ini gobiernueri ambe iámu parhakpinirhu (Mateu 24:14). Jimbosï apostuli Pablu karapti: “Jucha axakateska Kristueri nombri jimbo [...], juchaksïni kómarhisïnga Kristueri nombri jimbo: ‘Andarhienta je Diosïni’” (2 Korintu 5:20). *

4. ¿Néna ka nénaksï xarhataskia kristianu jurhimbiticha eskaksï sési apoiarisïnga Tata Diosïri Reinuni? (Exe je rekuadruni “ Primeru kristianuechaksï no nema jingoni úkuarhesïrendi.)

4 Imecha engaksï axanhajka ma paisi jimbo, representarisïndiksï ma juramutini o ma paisini máteru paisirhu.  Ka jimboksïsï no nema jingoni úkuarhijti ka nóksï nani inchamukusïndi imani paisini jimbo engaksï axanhajka. Peruksï kuájpisïndi imani paisiri gobiernuni engaksï representarijka. Kristianuechajtu engaksï erakukateka espiritu santu jimbo, ka engaksï “auandarhu anapue[kia]”, májkuenksï úsïndi (Filipusʌ 3:20). Íksï axakatecha, jánguarhintaxati eianhpini Reinuni, ka jimboksïsï úni jati eskaksï uánikua miioni kʼuiripuecha enga Biblia arhiajka “máteru karichicha” Kristueri, andarhientaaka Tata Diosïni (Juanu 10:16; Mateu 25:31-40). Jesusiri erakukatechani jimbo, ima kristianuecha engaksï jindeka “máteru karichicha”, ístuksï niárasïndi axakateni Kristuni jimbo. Íksï tsimani grupuecha, májku grupuesti engaksï márku eianhpijka Mesiasiri Reinueri ambe ka engaksï méntku no jámajka inchamukuni politikarhisï ini parhakpinirhu (arhinta je Isaías 2:2-4).

5. ¿Andiksïsï kristianuecha no nema jingoni úkuarhijki?

5 Ma ambe jimbo engaksï no inchamukujka politikarhisï kristianuecha, jindesti jimbokaksï apoiarisïnga Kristuni, peru ístu, jindesti jimbokaksï juchari erachicha iámu parhakpini jimbo jarhaska (Mateu 28:19; 1 Pedru 5:9). Ísï jimbo, ¿ambe úkuarhipirini engachi partiduni ma apoiaripiringa? Eskachi úpiringa no sési úkuni juchari pájperakua erachichani jingoni, ka eskachi nóteru úpiringia agustu eianguani Tata Diosïri Reinueri ambe iámindu jásï kʼuiripuni (1 Korintu 1:10). Ístu, enga guerra ma japiringa, uarhiperanchi japiringa juchari erachichani jingoni, engaksï májkueni jakajkujka eska jucha, ka engachi arhinhaka eskachi jatsiska para uékaani (Juanu 13:34, 35; 1 Juanu 3:10-12). ¡Jimbosï jiájkani Jesusi arhiapti imeri disipuluechani eskaksï no jámapiringa armechani jupikaani ka eskaksï uékaapiringa imeri ikiatspitichani! (Mateu 5:44; 26:52; exe je rekuadruni “ ¿No nemani jingoni úkuarhisïni ji?”.)

6. Jimbokachi aiakukuarheskia Tata Diosïni, ¿nénachi exesïni jucha Sésarini?

 6 Ístu, kristianu jurhimbiticha, aiakustiksïa Tata Diosïni imeri tsípikuani, ka no ma kʼuiripuni, kʼuiripuecheri kúnguarhikuani o paisini ma. Jimbosï 1 Korintu 6:19, 20  uandajti eskaksï ima ‘nóteru juramukuarhisïngia, jimbokaksï piántskata jarhaska kánikua jimbo’. Ísï jimbo, nájkirukaksï íntskujka “Sésarini” ambe enga imerika —respetu, impuestuechani ka kurhajchanksï asta nani engaksï jamberi uáka—, sánderuksï jukaparharasïndi íntskuni “[Tata] Diosïni ambe enga [Tata] Diosïrika” (Markusʌ 12:17; Roma 13:1-7). Ka “ambe enga [Tata] Diosïrika”, jindesti kómarhikua, uékperakua mintsita jingoni, kurhandikua, sési marhuakuni ka tsípekua jamberi íntspeni, enga  uétarhipiringa ísï úni (Lukasʌ 4:8; 10:27; arhinta je Ukuecha 5:29; Roma 14:8).

NO JIÓKUARHINI “PARHAKPINI ANAPU ESPIRITUNI”

7, 8. ¿Ambeski “parhakpini anapu espiritu”, ka néna ánchikuarhisïni kʼuiripuecharhu?

7 Ístuchi xarhatasïnga eskachi no parhakpini anapueska, engachi no jiókuarhijka parhakpini anapu espirituni. Pablu karasti eskachi no pʼiraska “parhakpini anapu espirituni sino Diosïri espirituni” (1 Korintu 2:12). Ka Éfesu anapu kristianuechani arhiaspti eskaksï “jámaxapka ióntki, terokukuantsparini parhakpini anapuechani eskaksïni na arhistachienga ima juramuti enga tarhiatarhisï juramujka. Ka ima jindesti espiritu enga iásï ánchikuarhini jaka imecheri mintsitarhu engaksï no janhanharhijka Diosïni” (Efesu 2:2, 3).

8 ¿Ambeski “tarhiata” o parhakpini anapu espiritu? Uinhapikua máesti enga no xarharajka, ka enga újka eskaksï kʼuiripuecha no sési ambe uáka. ¿Néna? Úparini eskaksï no kurhajchaaka Tata Diosïni ka úparini eskaksï uáka ambe “enga mintsita tamapu tsitijka, ka engaksï kʼuiripuecha xáni exenchajka” (1 Juanu 2:16; 1 Timoteo 6:9, 10). ¿Andisï “juramukua” o uinhapikua jatsi i espiritu kʼuiripuechani jingoni? Jimboka úsïnga eskaksï uáka pekaduechani engaksï kʼuiripuecha xáni tsitijka, kasi no nema úsïndi kuenta íntskukuarhini, no kuatantasïndi ka ísï eska tarhiata, iápurisï jarhasti. ¿Ka néna “ánchikuarhi[sïni]” kʼuiripuecharhu? Úparini eskaksï sánhani arhiaka tsitini ambe enga Tata Diosï no jeiapanhintajka, komueska no uandanhiani máteruechani jimbo, kʼéri exekuarhini, tsitini tuminani ka máteru ambe, ísku jándikua ambe úni ka no kurhandini. * Jo, úsïndi eska sánhani arhiaka inchaakuni kʼuiripuecheri mintsitarhu  ima ambe enga Noambakiti tsitijka (Juanu 8:44; Ukuecha 13:10; 1 Juanu 3:8, 10).

9. ¿Néna inchasïni eratsikuarhu ka mintsitarhu i parhakpini anapu espiritu?

9 ¿Uá parhakpini anapu espiritu kʼéni juchari eratsikuarhu ka juchari mintsitarhu? Jo, peru engachi jurajkutakuarhiska (arhinta je Proverbios 4:23). Orheta, úpiringachi no kuenta íntskukuarhini. I espiritu, úpiringachi kérekuarhini pámpirichani jimbo engaksï ísï xarharapiringa enajkiksï ambakiti kʼuiripue, peru engaksï no uékajka Jeobani (Proverbios 13:20; 1 Korintu 15:33). Ístujtsïni úpirindi janocheni no ambarhati publikasionichani jimbo, Internetirhu anapu pájinechani jimbo engaksï pornografia xarhatajka o engaksï imecha uájka engaksï ióntki Jeobaeri testiguepka, tsípikuarhitecha engaksï no marhuajka, chʼanakuecha engaksï andaperakuerijka, ka iámindu ima kʼuiripu o ima ambe enga úrpijka ambe enga Satanasiirika ka imeri parhakpiniiri.

10. ¿Nénachi no jiókuarhia parhakpini anapu espirituni?

10 ¿Nénachi no jiókuarhia i no sési jásï espirituni enga parhakpinirhu jaka ka parachi seguirini Tata Diosïri uékperakuarhu jarhani? Sési úraparini iámindu ambe engajtsïni Jeoba íntskuni jaka parachi úni andarherani ka méntkisï kurhakuni jarhani eskajtsïni íntskuaka imeri espiritu  santuni. Nájkiruka Noambakiti ka imeri parhakpini kánikuaksï uinhapika, Tata Diosï kánikua sánderu uinhapisti (Santiagu 4:7). Jimbosï kánikua jukaparhakueti méntkisï kómarhini parachi no méni jarharini.

SÉSI XUKUPARHANI

11. ¿Néna manataasïni i parhakpini anapu espiritu na enga ma xukuparhaaka?

11 Ima espiritu enga manatajka kʼuiripuni para úni ambe ma, uánikua ambe jimbo xarharasïndi. Ma ambe jindesti na engaksï arreglarikuarhijka, na engaksï mórhekuarhijka ka na engaksï jásï jámajka. Peru, uánikua paisichani jimbo kʼuiripu néna uéjkiterku xukuparhasïndia. Asta kʼuiripu ma enga telebisionirhu ánchikuarhijka niáraspti uandani, eska no ióni jimbo, nóteru ambe ma pakaraakia paraksï ísku jándicha xukuparhani ka paraksï  úni mítinhantani. Ka periodiku ma niárasti uandani íri ambe, “sántku xukuparhani ka no sáni kʼuratseni”, ka exesïngachi eska asta nanaka sapirhatichaksï jamberi ísï xukuparhasïnga, engaksï nótki jamberi niárajka uátsïni. Ístu nóteru no sési exenhasïndia ikichakueni xukuparhani, engaksï jimbo xarhatajka eskaksï no kurhandisïnga, eskaksï no respetarikuarhisïnga ka ni uékakuarhini.

12, 13. ¿Náki prinsipiuechajtsïni jarhuataa parachi mítini néna arreglarikuarhini?

12 Jimbokachi Jeobani marhuakusïnga, jimbochisï uékajka sési xukuparhani, sési xarharani, jupakata ambe jukantani o na enga uétarhiaka parachi nirani nani. Méntkisïchi jatsiska para ‘sési xukuparhani [...] ka ambakiti eratsikua’ jingoni, i ambe ka ‘ambakiti úkuecha’, jatsistiksï para xarhatani néskiksï ima “engaksï uandajka eskaksï janhanharhisïnga Diosïni”. Ambe engachi jirinhajka no jindesti na engachi exenhaaka sino eskachi ‘Tata Diosïri xénchperakuarhu jauaka’ (1 Timoteo 2:9, 10; Júdasïri 21, TDU). Ísï jimbo, ima ambe enga uáka eskachi sánderu sési xarharaaka jindesti “mintsita enga no exenhajka, [...] inde ambe jindes[ti] enga sánderu sési jásïika Diosïni japarini” (1 Pedru 3:3, 4).

13 Ístuchi jatsiska para miáni eska na engachi xukuparhaaka ka na engachi areglarikuarhiaka uáka eskaksï kʼuiripuecha sési exeaka relijioni jurhimbitini o eskaksï no sési exeaka. Uandakua “sési xukuparha[ni]” griegu jimbo, xarhatakuekasïndi na enga jámajka ma, ka ístu arhikuekasïndi eskachi jatsiska para respetarini na engaksï eratsijka máteruecha ka na engaksï pʼikuarherajka. Ísï jimbo, sésichi úsïnga engachi uandanhiajka máteruecheri konsiensia jimbo nájkirukachi jucha no májkueni eratsiaka. Ambe enga sánderu jukaparhakueka para jucha, jindesti sési pakatani Jeobani ka imeri iretani ka eskaksï máteruecha exeaka eskachi marhuakusïnga Tata Diosïni. Ísïsti, uékasïngachi úni “iámindu ambe para eska Diosï  kʼéri ambe arhinhaaka” (1 Korintu 4:9; 10:31; 2 Korintu 6:3, 4; 7:1).

¿Sési pakatasïni Jeobani na engani xarharajka?

14. ¿Ambe sési japirini kurhamarhikuarhini na engachi xukuparhajka ka na engachi jásï jámajka?

14 Kánikua jukaparhakuesti eskachi sési jásï ka sési xukuparhatini niuaka eianhpini ka tánguarhikuecharhu. Jimbochisï jatsika para kurhamarhikuarhini: “¿Ískujtsïni pakarasïni exeni juchiti xukuparhakua jimbo o jimbokani jáxetini jámasïnga? ¿Kʼuratsesïnksï máteruecha jindeni jimbo? ¿Ambe sánderuni jukaparharasïni: arreglarikuarhini na engani ji uékaaka, o úni jatsiani pribilegiuechani kúnguarhikuarhu?” (Salmo 68:6; Filipusʌ 2:4; 1 Pedru 5:6).

15. ¿Andisï Jeoba no jurajku Bibliarhu lista ma na engachi jatsika para xukuparhani, arreglarikuarhini ka na engachi jásï jámaaka?

15 Jeoba no jurajkusti Bibliarhu, lista ma, na engachi jatsika para xukuparhani, arreglarikuarhini ka na engachi jásï jámaaka. ¿Andi? Jimboka uékasïnga eskachi jucha jandiajku erakukuarheaka ka eratsikuarhini. Uékasïndi eskachi jindeuaka ima kristianuecha engachi sési eratsiaka ka eskachi úrauaka prinsipiuechani engaksï Bibliarhu jaka, engachi uékaaka ambe ma úni, jo, kristianuecha engaksï “eratsikua jukaaka jimbokaksï pʼindeskia eratsini paraksï úni mítini ambe enga jindeka ambakiti ambe ka ambe enga no sésika” (Ebreu 5:14). Ambe enga sánderu uékajka, jindesti eskachi xarhataaka na engachi xáni uékajka Tata Diosïni ka ístu kʼuiripuechani (arhinta je Markusʌ 12:30, 31). Nájkirukajtsïni ixú arhijkia na engachi jatsika para eratsini, útasï uánikua ambe jarhasti parachi erakuni ambe jukani ka néna arreglarikuarhini. Nomasi uétarhisïndi nirani kʼéri tánguarhikuarhu ma jimbo engaksï Jeobaeri testiguecha jatsijka náki uéjki paisi jimbo, parachi úni exeni na engaksï xáni uáni kolorichani jukaajka ka na engaksï xáni tsípikuarhita jingoni jámajka imecha engaksï nirajka.

 ARISKU SÁNI IREKUARHINI

16. ¿Ambe jimbo no májkueniski i parhakpini anapu espiritu, Jesusiri jorhentperakuechani jingoni, ka náki kurhamarhikuechanchi jatsiski para úkuarhiani?

16 I parhakpini anapu espiritu kánikua enganiarpisïndi. Ka uánikua miioni kʼuiripuni manatasïndi para tsípikuarhitani, tuminarhu jirinhani ka jatsikuarhikuecharhu. Peru Jesusi uandasti eska, “no jatsikuarhikua ambe jimbosï uáka ma kʼuiripu tsípikua jatsini” (Lukasʌ 12:15). Jesusi no uandaspti eska ma no uétarhinchasïrenga tumina o jatsikuarhikua ambe. Peru kʼóru jorhentpesti eskaksï uáka ambakiti tsípikua ma jatsini ka pʼímutantskua, imecha engaksï arisku jásï irekuarhijka, jo, “engaksï kurhandijka Diosïri uandakuani ka únksï eska na arhijka” (Lukasʌ 11:28; Mateu 6:22). Jimbosï uétarhijti kurhamarhikuarhini: “¿Meru jakajkusïni ambe enga Jesusi jorhentpika, o jurajkuxaki eskarini ‘tátemba chkuanderaricheri’ támisï jánhastaaka?” (Juanu 8:44). “¿Ambeksï xarhatasïni juchiti uandakuecha, ambe engani uékajka úni, ambe engani úni jaka ka na engani irekajka?” (Lukasʌ 6:45; 21:34-36; 2 Juanu 6.)

17. Uandanta je náki kóntperatechanksï jatsiasïni imecha engaksï arisku sáni irekuarhijka.

17 Bibliajtsïni arhisïndi “u je eska Diosïri karakata na arhijka” (Santiagu 1:22). Ima engaksï arisku jásï irekuarhijka sésiksï pʼikuarherasïndi Tata Diosïri Reinuni marhuakuni (Mateu 11:29, 30). Ístu, nóksï xáni uandanhiasïndi ka niksï no sési pʼikuarherajki (arhinta je 1 Timoteo 6:9, 10). Sánderuksï tiempu jatsisïndi paraksï familia jingoni jarhani ka erachicha jingoni, jimbokaksï sési pʼikuarherasïnga imani ambejku jatsini engaksï uétarhinchajka. Ka sánderuksï sési kʼuísïndi (Eclesiastés 5:12). Ambakiti irekakuaksï ma jatsisïndi, jimbokaksï úrasïnga máteruecha jingoni tiempuni ka ambe engaksï jatsikuarhejka (Ukuecha 20:35). Ístuksï ‘ambakiti ambe erokuarhisïndi’ ka sésiksï pʼikuarhinhikua ma jatsini (Roma 15: 13; Mateu 6:31, 32). No ma ambe jarhasti enga sánderu jukaparhakueka eska i kóntperatecha.

MÉNTKISÏ JUKARINI JARHANI “UARHIPETARAKUARHU ANAPU XUKUPARHAKUANI”

18. ¿Ambe uandasïni Biblia juchari ikiatspiticheri ambe, nénajtsïni uékasïni no sési úcheni ka nénachi uarhiperaxaki imecha jingoni?

18 Engachi Tata Diosïri uékperakuarhu jauaka, ístuchi kuájchakukata jauaka Noambakiti jingoni parachi no jurajkuni Tata Diosïni, jimboka Noambakiti uékasïnga eskachi no sési irekuarhiaka ka eskachi tsïtaaka tsípikua para méntkisï (1 Pedru 5:8). Pablu uandaspti eskachi jatsiska ‘uarhiperakua ma’, peru “[no] kʼuiripuechani jingoni, sino sánderu kʼérati ambeechani ka uinhapitichani jingoni, ka ístu imecha jingoni engaksï dueniu úkuarhijka i parhakpiniri, ka imechani jingoni engaksï kápindikuarhu juramujka, ka ístu noambakitiri espirituechani jingoni engaksï auandarhu ísï jámajka” (Efesu 6:12). Uandakua griegu enga úrakuarhijka “uarhiperani” arhikuekasïndi jupiperani ka no iauani jatini kʼuanirperani. Apostuli Pablu i ambe uandaspti ima espirituecheri engaksï juchari ikiatspitiika, uandaspti “kʼérati ambechani”, “uinhapitichani” ka “engaksï dueniu úkuarhijka i parhakpiniri”. ¿Ambeksï arhikuekasïni i ambe? Eskaksï demoniuecha sési organisadu jarhaska ka eskaksï sési eratsikuntasïnga parajtsïni no sési úcheni.

19. Uandanta je ambe ka ambe jukaski uarhipetarakuarhu anapu xukuparhakua kristianueri.

19 Nájkirukachi kʼuiripueka engachi no újka iámindu ambe sési úni ka nájkirukachi no kánikua uinhapikua jatsika, uákachi andani. ¿Néna? Jukantaparini “uarhipetarakuarhu anapu xukuparhakuani enga Diosïrika” (Efesu 6:13). Efesu 6:14-18 uandasïndi néna jásïski i xukuparhakua: “Jimajkani uinhamu anhaxurhitini ja je ka uinhapikuarhintantsï indeni ambe jimbo enga ísïka, ka enga ísï terokuntajka komueska ma jónguarhikua, ka ú je indeni ambe enga ambakitika enga ísï terokuntajka komueska kamisa  tiámueri jukarini jarhani, ka ambakiti eianhperakuani jimbo enga pínandikua íntspijka, listujtsï jarhani komueska sési sapatu jukantstini. Ka enga sánderu uétarhijka, jindesti eskajtsï sési jimbo mintsikaaka Diosïni enga ísï terokuntajka eska tarhatakuarhini ma kuájpikuarhitarakua engajtsï jimbo uáka parhukuani noambakitiri lansechani engaksï chpiririika. Ka jukanta je kájtsïkua tiámuerini enga jindeka [erokani jarhani] pʼímutantskua, ka ístu tarhata je Espiritu[eri] [...] espadani enga jindeka Diosïri uandakua, méntkisï kómarhiparini ka kurhajkuarhiparini iámindu ambe Espiritu [...] jimbo”.

20. ¿Ambe jimbochi no májkueniski eskaksï i parhakpini anapu sondaduecha?

20 Uarhipetarakuarhu anapu xukuparhakua méntkisï marhuauati, jimboka Tata Diosïjtsïnisï íntskujka. Peru kʼóru uétarhisïndi pauani pauani úrani. ¿Andi? Jimbokachi jucha no ísïska eska sondaduecha, imaksï nirasïndi uarhipeni ma tiempu ka tátsekuaksï ióni mintsikuarhini, peru jucha engachi kristianueka uarhipenchi jarhasïnga juchari tsípekua jimbo pauani pauani. Ka i uarhiperakua jiáni kʼamakurhiati enga Tata Diosï kʼamajkuaka Noambakitiri parhakpinini ka enga ónhauaka posurhu ma Noambakitini ka imeri espirituechani (Jaŋaskuecha 12:17; 20:1-3). Engajtsï cha iásï no úni jaka andani no sési járhati tsitikuechani o úkuechani, asï kuatanta je. Iáminduchi jatsiska para ‘kastigarini’ juchari kuerpuni, pori ísï arhikuekani, parachi úni sési marhuakuni Jeobani (1 Korintu 9:27). Ambe enga kʼóru no sési japiringa jindesti engachi no jánguarhintani japiringa.

21. ¿Nénajkuchisï uá andani uarhiperakuani engachi jatsika no ambarhati espirituechani jingoni?

21 Peru ísïsti, nochi méni uáka andani juchari uinhapikua jimbo. Jimbojtsïnisï Pablu miátantajti eskachi jatsiska para kómarhini Jeobani “méntkisï [...] Espiritu [...] jimbo”. Ka ístuchi jatsiska para kurhaani ambe engajtsïni Jeoba arhijka. ¿Nénachi úsïni i ambe? Engachi jorhenguarhijka imeri Karakatani ka engachi jánguarhintajka tánguarhini juchari  erachichani jingoni engaksï ístu uarhipeni jaka. Eskachi na exejka jiájkani, nochi jandiajku jarhaska (Filemoni 2; Ebreu 10:24, 25). Engachi méntkisï ísï úska ini ambe, andaakachi uarhiperatani peru ístu uákachi pauani pauani kuájpini imani ambe engachi jakajkujka engajtsïni nema uékaaka máteru ambe jakajkutarani.

LISTUCHI JAUAKA PARACHI KUÁJPINI JUCHARI JAKAJKUKUANI

22, 23. a) ¿Andichisï jatsi para méntkisï listu jarhani para kuájpini juchari jakajkukuani, ka ambe sési japirini kurhamarhikuarhini? b) ¿Ambechi exea máteru kapitulurhu?

22 Jesusi uandaspti: “chájtsï nóteru parhakpini anapueskia[...], jimboksïni[sï] parhakpini anapuecha no exenchajti” (Juanu 15:19). Mítiparini i ambe, kristianuechachi jatsiska para méntkisï listu jarhani para kuájpini ambe engachi jakajkujka, peru respetu jingoni ka iatsitakuarhu (arhinta je 1 Pedru 3:15). Jimbosï uétarhijti kurhamarhikuarhini: “¿Kurhangusïni andichisï Jeobaeri testiguecha újki ambe ma nájkirukaksï kʼuiripuecha no jaiapanhintaaka?”. “Méntkisï engani jatsiaka para ini ambe úni, ¿seguru jarhaski eska jurhimbitiska ambe enga Biblia uandajka ka jántspiri enga mintsinharhikueka?” (Mateu 24:45; Juanu 17:17.) “Ka engani jatsika para kuájpini Jeobani, ¿xarhatasïni eskani listu jarhaska parani no májkuenini eska máteruecha ka eskani kánikua sési pʼikuarherasïnga ísïini?” (Salmos 34:2; Mateu 10:32, 33.)

23 Peru Noambakitijtu uánikua ambe úrasïndi enga ísï xarharajka enajki no no sési ambee ka enga sési marhuakujka para jánguarhintani úni eskachi jucha ini parhakpini jingoni úkuarhiaka. Ménisï, eskachi na exekia, para i ambe úni úraasïndi no ambarhati tsípekuarhitechani. ¿Ambejtsïni jarhuataa parachi jucha sési erakuni tsípikuarhitani enga ambakitiuaka, engajtsïni uinhaperantaaka ka engajtsïni no no sési pʼikuastachiaka konsiensiani? Ini ambechi máteru kapitulurhu exeaka.

^ párr. 3 Desde Pentekostesirhu, uéxurhini 33 jimbo, Kristu juramukuaxatiia kristianu erakukatechani engaksï ixú parhakpinirhu jaka (Kolosasi 1:13). Ka 1914 jimbo, intsïnhasti juramukua para juramukuni ‘ini parhakpinini’. Ísï jimbo, kristianu erakukatechaksï iásï, marhuasïndi eska Mesiasiri Reinueri axakatecha (Jaŋaskuecha 11:15).

^ párr. 8 Exe je libruni Razonamiento a partir de las Escrituras, páj. 140-144, engaksï Jeobaeri testiguecha úka.