Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

“Tata Diosïri xénchperakuarhu ja je”

 KAPITULU 9

“Késtakuku je ísku jánguani”

“Késtakuku je ísku jánguani”

“Ú je eska uarhiaka [...] ambe enga chári mintsitecharhu jaka, enga jindeka [...] para ísku jándi úkuarhini, ka nánterkueni eratsini, ka jurajkutakuarhini para nánterkueni jámani, ka ikichakueni jásï ambe únhchani, jatsikuarhinchakuekani enga ísïka komueska idoluechani kómarhiani.” (KOLOSASI 3:5.)

1, 2. ¿Ambe eratsispi úni Balaami para no sési úkuni Jeobaeri iretani?

IMA enga uékajka animalini ma jupikani, orheta exesïndi ambe arhasïni ima animali. Enga na mítijkia i ambe, imani ambe jatsikusïndi tramparhu. Enga animali nirajkia tʼireni, tramparhu atarhutakuarhisïndi, ka ima enga jatsikujka trampani, kánikua sési pʼikuarherasïndi jimboka jatsikuska ambe enga animali arhajka ka jimboka úska jupikani.

2 I ambejtsïni miátantasïndi ambe enga ióntki úkuarhipka, sáno 3,500 uéxurhini ísïstia enga achati ma jingontku erakupka ambe úrani para jupiani, peru no animalichani. Balaami arhinhasïrendi ka ima uékasïrendi eska Tata Diosïri ireta, enga Moabiri pákuarhu japka, engaksï inchani jámaengia Echerini jimbo engaksï Aiaminhapka, tsitipiringa ambe enga ima jatsikukuapka. Nájkiruka uékenga xarharani komueska Jeobaeri profeta ma, chkuandera máespti enga tuminantku tsitienga, ka engaksï kontrataripka para kurhajkuarhini eskaksï no sési úkuarhinchapiringa israelitecha. Ikiaxapti, jimboka Jeoba no jurajkuspka eska i ambe úpiringa, ka jimbo úspka eska Balaami kurhajkuarhipiringa eska Israeli újchakuranhapiringa. Peru Balaami, no kuatantaspti, sánderu eratsispti tuminani enga meiamunhapiringa. Eratsispti eska enga  úpiringa eskaksï israelitecha kʼéri ma pekadu úpiringa, Tata Diosï mísmu úpiringa eskaksï no sési úkuarhinchapiringa. ¿Ambe úrapirini para ini ambe úni? Úrapirindi Moabi anapu sési járhati uátsïchani (Números 22:1-7; 31:15, 16; Jaŋaskuecha 2:14).

3. ¿Na xáni marhuaspi Balaamiri trampa?

3 ¿Marhuaspi trampa? Jo, sési marhuaspti, uánikua israelitechaksï no úspti pʼíngukuarhini ka “[niárasptiksï] Moabiri uájpechani jingoni apondini”. Niárasptiksï jamberi Moabiri diosïchani kómarhiani, ma diosï Moabiri jindespti Baali de Peori, engaksï kómarhienga apondeparini máteruechani jingoni. Íksï kastigarinhaspti, ka 24,000 achatichaksï uarhispti meru jima ante de inchanksï Echerirhu engaksï Aiaminhapka. ¡Xáni no sési jásï ambe! (Números 25:1-9.)

4. ¿Andiksïsï ísku jándikua ambe úpi uánikua israelitecha?

4 ¿Ambe úspi eska i xáni no sési jásï ambe úkuarhipiringa? Na engaksï jásï mintsita jatapka uánikua israelitecha. No sési jásï ambe úndasptiksï úni, jimbokaksï úndaspka jarharini Jeobani, nóksï miáspti ambe enga Jeoba úpka imechani jimbo: eska petaantaspka Ejiptu uératini, eska tʼireraaspka desierturhu ka eska kuidariauaspka ka eskaksï sési niáraspka asta jima jamberi engaksï inchani jámaengia imani Echerini jimbo engaksï Aiaminhapka (Ebreu 3:12). Apostuli Pablu miántaspti ini ambe enga karapka: “Ka jaue no jámani ísku jándi úkuarhini komueska máruksï na úpka,  ka ma jurhiatikua jimboksï uarhini beintitresi mili” (1 Korintu 10:8). *

5, 6. ¿Nénajtsïni jarhuatasïni uandantskua, israelitecheri engaksï pekadu úpka Moabiri pákuarhu?

5 Jucha engachi iásï marhuakuni jaka Tata Diosïni, sánochi májkueni jarhaska eska ima israelitecha enga Númerusiri libru uandaajka. Juchajtuchi kasi puertarhu jarhaskia imani Echerirhu engachi Aiaminhaka, peru i iauani sánderu sésisti (1 Korintu 10:11). Parhakpinirhuchi ma irekaska nani enga kʼuiripu ísku jándikua ambe tsitijka, ísï eska moabitecha, peru iauani sánderu. Ka ístu, ima ambe enga úpka eskaksï uánikua israelitecha uarhipiringa ióntki, ísku jándikua, inde ambesï újti iásï eskaksï mándani uéxurhini uánikua kristianuecha indeni ambe niátaaka (2 Korintu 2:11). Ka ísï eska na úpka Simri, enga no sáni kʼuratsekua jukapka ka enga pápka madianitani ma israelitecheri iretarhu, ka incharani nani enga ima irekapka, márujtuksï iásï no sési úraasïndi máteruechani Jeobaeri kúnguarhikuarhu (Números 25:6, 14; Judasʌ 4).

6 Ju je kurhamarhikuarhini: “¿Exekuarhisïni ji iásï anapu ‘Moabiri pákuarhu’? ¿Eraaxakiia ji imani intsïmperakuani engachi intsïnhaaka, jimbanhi parhakpinini?”. Enga ísïka, ju je jánguarhintani méntkisï Tata Diosïri uékperakuarhu jarhani, kurhajchaparini ini juramukuani: “Késtakuku je ísku jánguani” (1 Korintu 6:18).

Na enga xarharajka Moabiri pákua

¿AMBESKI ÍSKU JÁNDIKUA?

7, 8. ¿Bibliarhu, ambe ka ambeski inmoralidad sexuali o ísku jándikua, ka ambe problemechanksï jatsiasïni imecha engaksï ini ambe niátajka?

7 Inde uandakua utusï jimbo inmoralidad sexual (griegu jimbo pornéia), pʼurhe jimboksï tradusiristi ísku jándikua. ¿Ambe arhikuekasïni Biblia enga úrajka ini uandakuani “inmoralidad sexual”? Uánikua pʼurhechaksï kʼuratsesïndi íri  ambe uandontskuarhini, peruchi jatsiska para sési explikarini ini ambe, para kʼuiripu no úni imani ambe enga Jeoba no jeiapanhintajka. Enga Biblia ísku jándikueri ambe uandajka, arhikuekasïndi iámindu imani ambe enga ma kʼuiripu újka relasioni sexualiri ambe, enga no tembuchatini jarhajka ísï eska Tata Diosï na jeiapanhintajka. Arhikuekasïndi enga tembuchati ma apondijka imani jingoni enga no témbaeuaka o uámbeni, ka ístu iámindu imani ambe engaksï sexueri ambe újka tsimani kʼuiripuecha engaksï no tembuperatini jauaka, o engaksï i ambe uáka nemani jingoni enga prostitutaeni ánchikuarhijka. O úrani penchumikuani paraksï relasioni sexuali jatsini, o engaksï relasioni sexuali jatsijka tátsepanisï nemani jingoni enga no témbaeuaka o uámbaeni, o engaksï pʼájchukperani jarhajka, i ambejtu ísku jándikua ambesti o inmoralidad sexual. Ka májkuenisti engaksï újka ini ambe, tataka ma, tataka ma jingoni, o nanaka ma, nanaka ma jingoni, o engaksï animalini ma jingoni újka. *

8 Biblia jurhimbitku uandasïndi eska: imecha engaksï ísku jándikua ambe niátajka nóksï intsïnhaaka tsípikua para méntkisï (1 Korintu 6:9; Jaŋaskuecha 22:15). Peru ístuksï iásï uánikua problemechani jatsiauati. Ma jindesti eskaksï petanhantasïnga kúnguarhikuarhu uératini. Sáno méntkisï, no solu no sési pʼikuastaasïndi imecheri konsiensiani, sino ístu nóteruksï respetarikuarhisïndia ka nóteruksï mintsikanhasïndi, peru ístu, uarhiperataksï ambe jatsisïndi temungurhiri, embarasadaksï pakarasïndi no uékaparini, pʼamenchakuecha engaksï úkuarhijka ísku jándikua ambe jimbo ka ménisïksï niárani jamberi uarhini (arhinta je Galasia 6:7, 8). ¿Sési japirini ini ambe úni engajtsïni xáni no sési pʼikuastaaka? Peruksï uánikuecha no eratsisïndi ini ambe, engaksï úndajka imani ambe úni enga páuaka paraksï ísku jándikua ambe úni, ka i ambe jindesti pornografia exeni.

 PORNOGRAFIA: ANTE DE ÍSKU JÁNDIKUA AMBE ÚNI

9. ¿Pornografia no xáni no sésiski eskaksï máru na uandajka? Uandanta je andijtsïsï ísï mókuntajki.

9 Uánikua paisicharhu, pornografia iápurisï xarharasïndi: nani enga íntspikuarhinhajka rebistecha, pirekuecharhu, telebisionirhu ka uánikua miioni pájinecharhu Internetirhu. * ¿I ambe no xáni no sési jásï ambeski, eskaksï na uandajka  máru? No ísïsti. Imecha engaksï ini ambe exejka, uátiksï pʼindeni masturbarikuarhini ka úndanksï tsitini imani ambe enga ‘kʼuratsekueni jásï ambeeka’. Ka úpirindiksï pʼindeni, tsitintku jarhani relasioni sexuali jatsini, uékani jarhani ikichakueni jásï ambe úni nemani jingoni, problema jatsiani temungurhiri o niáranksï jamberi diborsiarikuarhini (Roma 1:24-27; Efesu 4:19). * Seguni achati ma enga kánikua mítikuka íri ambe, enga nema pʼindejka tsitintku jarhani relasioni sexuali jatsini, eska i ambe ísïska komueska kánseri: “Pauani pauani sánderu kánesïndi, kasi no méni menosi úkuarhisïndi, ka kánikua úkua jukasïndi tsinakuarhini ka kénditani”.

Kánikua jukaparhakuesti eskaksï táticha kuidadu paaka ambe engaksï exejka uájpecha

10. ¿Nénachi uá úni ambe enga uandajka Santiagu 1:14, 15? (Exe je ístu rekuadruni “ Uinhapikuarhintani para pímbinhasï jarhani”.)

10 Uétarhisïndi no mirikurhini i ambe enga Santiagu 1:14, 15 jimbo jaka: “Enga ma kʼuiripu terongutanhajka, jindesïndi jimboka imeri mísmu eratsikuecha engaksï no jurhimbitika, pájtamasïnga ka kʼarhanksï. Jimajkani no sési járhati eratsikuecha jindesti engaksï pekadu úrpijka, ka tátsekua enga pekadu kánikuejkia, jurhasïndi uarhikua”. Paraka i ambe no úkuarhiaka, ¿ambechi jatsiski para úni engachi eratsini jauaka no sési jásï ambe úni? Sóntku úni ambe ma, ka no jámani indeni ambe eratsini. Exe je, engachi ma repentku no uékaparini exeska fotu ma enga sexueri ambeuaka, ¿ambechi uá? Sóntku, máteru nanisï eraani, pátani komputadorani o mójtakuni kanalini telebisionirhu. Ambe uéjki engachi uáka úni, parakaksï no pakaraaka no sési járhati eratsikuecha juchari mintsitarhu ka tátsekuajtsïni no sési jásï ambe úrani (arhinta je Mateo 5:29, 30, TNM).

11. Engachi eratsini jauaka no sési ambe úni, ¿nénachi uá xarhatani eskachi mintsikasïnga Jeobani?

11 Jeobajtsïni sánderu sési mítisti eska jucha mísmu. Jimbojtsïnisï kurhachijti: “Ú je eska uarhiaka [...] ambe enga chári mintsitecharhu jaka, enga jindeka [...] para ísku jándi  úkuarhini, ka nánterkueni eratsini, ka jurajkutakuarhini para nánterkueni jámani, ka ikichakueni jásï ambe únhchani, ka jatsikuarhinchakuekani enga ísïka komueska idoluechani kómarhiani” (Kolosasi 3:5). Peru ísïsti, no fásilisti úni pʼíngukuarhini. Peru juchari Táti auandarhu anapu engajtsïni uékajka ka enga xáni pʼamojpitika, jarhuataatijtsïni (Salmo 68:19). Ísï jimbo, méntkisï engachi no sési jásï ambe eratsini jauaka, jatsiskachi para sóntku kómarhini Jeobani, ka arhini eskajtsïni íntskuaka “uinhapikua enga xáni kʼéri ambeeka”, ka ju je jánguarhintani parachi no no sési jásï ambe eratsini jarhani, sino mejori máteru ambe eratsini (2 Korintu 4:7; 1 Korintu 9:27; exe je rekuadruni “ ¿Néna uá jurajkuni bisiuni ma?”).

12. ¿Ambeski “mintsita”, ka andichisï jatsi para kuájchakuni?

12 Mímixeti Salomonijtsïni arhisïndi: “Sánderu eska máteru ambe [...] kuájchaku chíti mintsitani, jimboka jiminisï jaka tsípikua” (Proverbios 4:23). ¿Ambeski “mintsita” engachi jatsika para kuájchakuni? Na engachi jindeeka incharinisï,  na engachi jásïika Tata Diosïni japarini. Ka inde ambesï uáti eskachi jatsiaka tsípikua para méntkisï, ambe enga Jeoba exejka “mintsitarhu” ka no eskajtsïni na exejka máteruecha. Xántkisï ka xáni kʼéri ambe. Parachi úni kuájchakuni mintsitani, jatsiskachi para indeni ambe úni enga Jobu úpka, enga pakatperakua ma úpka imeri éskuecha jingoni para no jámani máteru uarhiitini exeni ísku ambe eratsiparini (Job 31:1). Májkueni eska salmista, jatsiskachi para ísï kómarhini  Tata Diosïni: “Ú eskaksï juchiti éskuecha no exeaka indeni ambe enga ísku ambeeka” (Salmo 119:37).

DINA NO SÉSI AMBE ERAKUSPTI

13. ¿Néspi Dina, ka andiksïsï no ambarhati amiguepi enga ima erakuapka?

13 Eskachi na exekia kapitulu 3 jimbo, né engachi jingoni kúnguarhijka manatasïndijtsïni parachi sési o no sési ambe úni (Proverbios 13:20; arhinta je 1 Korintu 15:33). Ísï xarhatasïndi Dinaeri ejemplu, enga Jakobu uájpepka. Ambakiti familia ma jimbo kʼuiripespti, peru no sési eratsispti ka úndaspti kúnguarhini Kanaani anapu uátsïchani jingoni, Kanaani, ireta máespti enga mítikatepka eska tsitisïrenga májkuenini eska Moabi, ísku jándikua ambe úni (Levítico 18:6-25). Ísï jimbo, ¿ambe eratsipirini tumbi Kanaani anapu ma enga exepiringa Dinani? Eska imajtu uékapiringa ísku jándikua ambe úni májkueni eska Kanaani anapu uátsïcha. Ka Sikemi, enga “jindepka enga sánderu janhanharhinhenga imeri tátiri kʼumanchikuarhu”, ísï eratsispti (Génesis 34:18, 19).

14. ¿Ambe no sési jásï ambe úkuarhispi jimboka Dina no úspka sési jásï ambe erakuni?

14 Sánderu orhepatini, Dina mítispti Sikemini. Jamberi Dina no méni eratsipti imani jingoni apondini. Peru Sikemi kʼóru. Ma jurhiatikua Sikemi, uékaxapti nemani jingoni apondini, ka úspti ambe enga náki uéjki Kanaani anapu ma úpiringa: no uandanhiaspti nájkiruka uátsï no uékapiringa, “jupikasti” ka “afuersa apondispti imani jingoni”. Sánderu tátsekua, niáraspti “xénchani” uátsïni, peru i ambe no mójtakuspti ambe enga Sikemi úkupka Dinani (arhinta je Génesis 34:1-4). Ka no Dinajkusï no sési úkuarhinchapti, enga Dina ísï no sési erakupka né jingoni kúnguarhini, úspti eska iámu imeri familia úndapiringa kʼérati problemechani jatsiani, enga no sési pʼikuastaapka ka no sési pakataani (Génesis 34:7, 25-31; Galasia 6:7, 8).

15, 16. ¿Nénachi uá ambakiti jánhaskakua jatsini? (Exe je rekuadruni “ Textuecha para eratsintani”.)

15 Jamberi Dina ambakiti ambe jorhenguarhipti, peru  no sési jásï jimbo. Peru jucha no jatsiska ísï jorhenguarhini. Uékasïngachi Jeobani, ka jimbochisï kurhandijka ambe engajtsïni juramuchijka, komueska i ambe, “[jámani] mímixetichani jingoni” (Proverbios 13:20a). Engachi méntkisï kurhajchaaka Tata Diosïni, niáraakachi mítini nákisï jindee ambakiti xanharu, “xanharu [...] enga ambakiti ambeerika” ka nochi xáni uánikua problemechani jatsiauaka (Proverbios 2:6-9; Salmo 1:1-3).

16 Jo ísïsti, Tata Diosï íntsaasïndi jánhaskakua iáminduechani engaksï uékajka. Parachi úni jatsini jánhaskakua, jatsiskachi para kómarhini, estudiarini Bibliani ka publikasionichani enga íntspeajka jántspiri enga mintsinharhikueka (Mateu 24:45; Santiagu 1:5). Ka ístu, uétarhisïndi kaxumbitiini ka jiókuarhini ambe engajtsïni Biblia arhijka (2 Reyes 22:18, 19). Parachi kurhanguni ini ambe, ju je ini ambe eratsini. Seguruchi jarhaska, eskachi iámindu mítitixaka eska mintsita no mintsinharhikueska ka eska sóntku uékasïnga ambe ma úni (Jeremías 17:9). Peru engajtsïni nema no chéparini íntskujka konseju ma ka engajtsïni uékajka uékperakua jingoni jarhuatani, ¿kaxumbitisïnchi ka jiókuarhisïnchi, ochi jurajkusïni eskajtsïni mintsita támisï jánhastaaka?

17. ¿Ambe úpirini nitamanchani táti ma, uájpa jingoni, ka néna úpirini táti eratsitarani uájpani?

17 Eranhaska je arini ambe: ma táti no jurajkusïndi uájpani eska jandiajku uéraaka tumbi ma jingoni enga kristianueka,  solu enga nema pámbetauaka. Uátsï arhisïndi tátembani: “Peru papa, ¿andi norini mintsikasïni? ¡Nochi no sési jásï ambe uáka!”. Jo, uátsï uékasïndi Jeobani ka no uékasïndi no sési jásï ambe úni, ¿peruchi uandapirini eska “[Tata Diosïri] jánhaskakua jingoni jámaxaka” ka eska “[kéndikukuxaka] ísku jánguani”? ¿Ochi eratsipirini eska sánderu “mintsikaxaka imeri mintsitani”? (Proverbios 28:26.) Ka seguruchi jarhaska eskajtsï eratsixaka máteru textuechani engaksï jarhuataaka tátini para úni eratsitarani uájpani íri ambe (exe je Proverbios 22:3; Mateu 6:13; 26:41).

JOSE KÉNDIKUKUSPTI ÍSKU JÁNDIKUANI

18, 19. ¿Ambe tsʼéjkukua jatsispi Jose, ka ambe úspi?

18 Jarhasti ambakiti ejemplu ma, tumbiri ma enga kánikua uékaenga Tata Diosïni ka enga úpka kéndikukuni ísku jándikuani. Joseristi, Dinaeri ermanuemba, jimbokaksï tsimarhani Jakobueri uájpespka (Génesis 30:20-24). Enga sapichuepka, exespti na enga xáni no sési úkuarhipka jimboka Dina no sési eratsispka imani ambe enga úpka. Miántani ini ambe, ka uékani Tata Diosïri xénchperakuarhu jarhani, kuájchakuspti sánderu orhepatini, enga jántspiripka Ejiptu, ka enga imeri patroniri témba, “pauani pauani” uékenga imani jingoni apondini. Jántspiri máespti, ka no úsïrendi ísku jurajkuni imeri ánchikuarhitani ka níntani. Jatsispti para uinhapikuarhintani ka mímixekua jingoni orhepani uérakuni ini problemani. Ka ísï úspti, no méni jiókuarhispti ambe enga ima uarhiiti arhienga, ka últimu Jose sïpakuarhikuspti (arhinta je Génesis 39:7-12).

19 Ju je eratsintani sáni: ¿úpirini no niátani indeni ambe, enga pauani pauani eranhaskani japiringa uarhiitini, o enga méntku ísku jándikua ambe eranhaskani japiringa? Nómbe. Jose no jámasïrendi ísku jándikua ambe eratsini, ka kánikua jukaparharasïrendi sési pájperani Jeobani jingoni. Ísï xarhataspti enga Potifariri témbani arhipka: “Juchiti patroni [...] iámindu amberini íntskusti, menosi tʼunguini, jimbokari tʼu  imeri témbaeska. Ísï jimbo, ¿néna úpirini ji ini ambe úni, ka ini ambe jimbo kʼéri pekadu ma úni Tata Diosïri orhepatini?” (Génesis 39:8, 9).

20. ¿Ambe úspi Jeoba, Joseni jimbo?

20 ¡Kánikua sési pʼikuarherapti Jeoba, enga exepka eska Jose, pauani pauani úsïrenga ambe enga Jeoba uékaenga, nájtuka imeri familia iauani japka! (Proverbios 27:11.) Tátsekua, Jose ónhanhaspti, peru Jeoba úspti eska petanhantapiringa ka eska sáno májkueni kʼéri ambeepiringa eska Ejiptu anapu juramuti, ka eska ima exepiringa tʼirekuani iámu Ejiptu (Génesis 41:39-49). Ambe enga nitamanchapka, xarhatasïndi eska ísïska eska na uandajka Salmo 97:10: “O, cha engajtsï uékajka Jeobani, kurhunhi je indeni ambe enga no sésiika. Ima kuájchakuxati imecheri tsípikuani engaksï méntkisï marhuakujka, paraksï no ma ambe úkuani imecha engaksï uékajka no sési úkuani”.

21. ¿Néna xarhataspi tumbi ma África anapu eska janhanharhisïrenga ambe enga jakajkuenga?

21 Ísï eska Jose, iásï uánikua kristianuechaksï kurhajchasïndi juramukuani enga uandajka: “Asïmindu ja ma je jiókuarhini indeni ambe enga no sésiika, sino jeiapanhinta je solu indeni ambe enga ambakitika” (Roma 12:9). África anapu tumbi ma, uandantasïndi eska uátsï ma eskuelarhu, arhispka eska apondipiringa imani jingoni enga jarhuatapiringa mókuntskuecha jingoni eksaminirhu ma enga matematikeripka. Tumbi uandasïndi: “Méntkuni no jiókuarhispka. Engani úpka ambe engani jakajkujka, xarhataspka eskani respetarikuarhisïnga, ka respetarikuarhini para ji, sánderu jukaparhakuesti eska iámu parhakpinirhu anapu oru”. Jo ísïsti, ma úpirindi ‘ma ratu tsípikuarhini pekaduni jingoni’, peru ma tiempujkuesti, ka tátsekua puru uandanhiata ambesï juajti (Ebreu 11:25). Ístu, nochi ambe ma jingoni uáka terokutantani imani tsípikuarhitani engajtsïni Jeoba íntskuaka (Proverbios 10:22).

 JARHUAJPERATA TÁTIRI ENGAJTSÏNI PʼAMOJKUJKA

22, 23. a) ¿Andichisï újki uandani eska enga nema kʼéri pekadu ma újka no jima kʼamakurhisïnga iámindu ambe? b) ¿Na jásï jarhuajperata jatsiski ima enga pekadu újka?

22 Iáminduchi pekadoriska, jimbochisï jatsika para jánguarhintani para no indeni ambe eratsini enga no sési ambeeka, ka parachi úni ambe engajtsïni Tata Diosï kurhachijka (Roma 7:21-25). Jeoba mítisti i ambe, jimboka “miásïnga eskachi tʼupuriska” (Salmo 103:14). Peru ¿ka engachi niáraska kʼéri ma pekadu úni? ¿Nóteruchi ambe ma uáia úni? Nómbe. Ísïsti, úpiringachi no sési ambe nitamakuarhini indeni pekaduni jimbo, ísï eska na úkuarhinchapka rei Dabidi. Peru, Tata Diosï méntkisï “listu jarhasïndi para[jtsïni] puáchentani”, engachi arrepentirikuarhiska ka engachi “uandantaska ka no ójchakuraani juchari pekaduechani” (Salmo 86:5; Santiago 5:16, TNM; arhinta je Proverbios 28:13).

23 Ka kúnguarhikuarhu, ambakiti jarhuajperatechaksï jarhasti enga Jeoba íntspiaka: “achamasïcha engaksï intsïmperakua máeka”, orhejtsïkuticha engaksï kánikua jánhastika ka engaksï listu jarhajka parajtsïni jarhuatani ka engajtsïni meru uékajka jarhuatani (Efesios 4:8, 12, TNM; Santiagu 5:14, 15). Engachi pekadu úka, i orhejtsïkutichajtsïni jarhuataati para uinhapintani juchari pájperakua Jeoba jingoni, ka parachi úni imani ambe engajtsïni jarhuataaka parachi nóteru jámania úni imani pekaduni. ¿Ambechi uá? “Jánhaskakua jatsini.” (Proverbios 15:32.) ¿Néna úkuarhisïni i ambe?

¿NÉNA ÚSÏNI MA “AMBAKITI ERATSIKUA JATSINI”?

24, 25. a) ¿Néna xarhataspti tumbi enga Proverbios 7:6-23 uandajka eska “no ambakiti eratsikua jatsispka”? b) ¿Néna “jánhaskakua jatsisïni” ma?

24 Biblia uandasïndi ma kʼuiripueri enga “no ambakiti eratsikua jatsipka” ka máterueri enga “jánhaskakua jatsipka” (Proverbios 7:7). ¿Néski ima kʼuiripu enga “no ambakiti eratsikua jatsipka”? Ima enga no kánikua jánhaskajka ka enga no újka sési eratsini, sea jimboka no kánikua  jánhaskasïnga Tata Diosïri ambe, o jimboka nótki ióni marhuakusïnga Tata Diosïni. Ísï jimbosï sánderu fásiliti para ima kʼéri pekadu ma úni, komueska ima tumbi enga Proverbios 7:6-23 uandajka. ¿Ka néski ima kʼuiripu enga “jánhaskakua jatsipka”? Ima enga uandanhiajka na enga jásïika incharinisï, ka jimbosï pauani pauani estudiarijti Bibliani ka ístu kómarhini. Mítiparini eska pekadoriska, jánguarhintasïndi para andani pekaduni, ka ambe enga eratsijka, enga tsitijka, enga pʼikuarherajka, ka ambe enga uékajka úni, méntkisï sési pʼikuastaati Jeobani. Ísï xarhatasïndi eska “ima mísmu uékakuarhisïnga” ka eska uékasïnga “ambakiti ambe exentani” (Proverbios 19:8).

25 Sési japirindi kurhamarhikuarhini: “¿Seguru jarhaski eska no ma ambe jarhaska enga sánderu sésiika ka eska Tata Diosïri juramukuecha, ka eskani kánikua sési pʼikuarheraaka engani ísï úska?” (Salmo 19:7-10; Isaías 48:17, 18). Engachi sánisï no seguru jauaka, ¿ambechi uá? Eratsintani na engachi no sési nitamakuarhiaka engachi no kurhajchaska ambe enga Tata Diosï juramujka. Ístu kánikua uétarhisïndi eskachi “míti[aka] ka exeni eska Jeoba ambakitiska”, irekaparini ísï eska na uandajka Tata Diosï, ka eratsiparini imani ambe enga sési jásï ambeeka, enga jurhimbitika, enga pímbinhasïka, enga sési xarharajka ka enga sési arhikateka (Salmo 34:8; Filipusʌ 4:8, 9). Engachi jánguarhintaska, sánderuchi uékaaka Tata Diosïni, ka sánderuchi uékaaka imani ambe enga ima uékajka, ka sánderuchi ikimchaaka imani ambe enga ima ikimchajka. Ju je miántani Joseni. Imajtu ísïspti eska jucha, peru úspti “[kéndikukuni] ísku jánguani”. ¿Andi? Jimboka jurajkutakuarhespka eska Jeoba pauani pauani jurhimberantapiringa para ima ambakiti eratsikua ma jukani. Ka juchajtuchi jatsiska para májkueni úni (Isaías 64:8).

26. ¿Ambe jukaparhakua ambechi exeni jaua iáiasï?

26 Nochi méni jatsiska para mirikurhini eska nanakeri parti ka tatakeri parti nóksï chʼanarakua ambeska o ambe ma engaksï úrakuarhijka para nomasi nema sési pʼikuarherani.  Jindestiksï ambe enga Jeoba temungurhirichani íntsaajka paraksï úni kánguarhiani sapiichani ka paraksï úni temungurhiri sési pʼikuarherani engaksï relasioni sexuali jatsijka (Proverbios 5:18). Máteru tsimani kapituluechani jimbo, exenchi jauaka na enga exejka Tata Diosï temungurhikuani.

^ párr. 4 Númerusiri libru, kúndantaasïndi imechani “engaksï iretani orhejtsïkuenga” ka engaksï juesicha uándikuapka, engaksï mili ísïpka, imecha jingoni enga Jeoba uándikuapka (Números 25:4, 5).

^ párr. 7 La Atalaya 15 de juliu 2006 jimbo, indeni parti jimbo enga arhinhajka “Preguntas de los lectores” engaksï Jeobaeri testiguecha úka, uandantasïndi ambe ka ambeski inmundisia ka úkuecha engaksï no kʼuratsekua jingoni úkuarhijka.

^ párr. 9 Inde uandakua jingoni enga jindeka pornografia, arhikuekaxakachi imani (enga ma exejka, enga arhintajka o enga kurhaajka) exekuecha engaksï úrakuarhijka para nema tsitini relasioni sexuali jatsini. Ka úpirindi fotu máeni, nani enga nema ísï xarharajka enajki uékajki relasioni sexuali jatsini, ka asta imani ikichakueni jásï ambe engaksï tsimani o sánderu kʼuiripuecha úni jarhajka.

^ párr. 9 Para mítini ambe enga ma kʼuiripu uáka para nóteru masturbarikuarhinia exe je apendisini, “Ambe úni para nóteru masturbarikuarhinia”.