Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

“Tata Diosïri xénchperakuarhu ja je”

 KAPITULU 7

¿Ísïchi jukaparharasïni tsípikuani eska Tata Diosï?

¿Ísïchi jukaparharasïni tsípikuani eska Tata Diosï?

“Tʼurisï íntspijka tsípikuani.” (SALMO 36:9.)

1, 2. ¿Náki Tata Diosïri intsïmperakua kánikua jukaparhakueski ka andi?

JUCHARI Táti enga auandarhu jaka ambakiti regalujtsïni ma íntskusti: ústijtsïni parachi úni eratsini, ka parachi ísï jámani eska ima na jámajka (Génesis 1:27). Ini ambe jimbo, jucha úsïnga eratsiantani prinsipiuechani engaksï Bibliarhu jaka ka úraani. Engachi jánguarhintaska méntkisï ísï úni, uákachi sánderu andarherani. Jindeuakachi kʼuiripuecha engachi uékaaka Jeobani ka jánhastini, “jimboka[chi] pʼindeskia eratsini para[chi] úni mítini ambe enga jindeka ambakiti ambe ka ambe enga no sésika” (Ebreu 5:14).

2 Iásï kánikua jukaparhakuesti mítini néna úraani Bibliarhu anapu prinsipiuechani. Ini parhakpini jimbo, uánikua ambe jarhasïndi, jimbosï no ma lei újti marhuani para iámindu ambe enga jauaka. Ka ju je exeni ejemplu ma medisinarhu, ka exeakachi ambe, néna ka nani úrakuarhisïni iurhiri. Ini ambe mítini, kánikua jukaparhakuesti para jucha engachi uékajka kurhajchani Jeobani. Enga iurhiriri ambeuaka, ¿nénachi uá úni imani ambe engajtsïni sési pʼikuastachiaka konsiensiani ka engajtsïni jarhuataaka parachi Tata Diosïri uékperakuarhu jarhani? Sési kurhanguparini Bibliarhu anapu prinsipiuechani engaksï íri ambe uandajka (Proverbios 2:6-11). Ju je exeani máru.

TSÍPIKUA KA IURHIRI TATA DIOSÏRISTIKSÏ

3, 4. ¿Káni jindeski primeru uelta enga Biblia uandajka eska jatsiska para kánikua respetarinhani iurhiri, ka náki prinsipiu jimbo uaxastakata jarhaski i ambe?

3 Jeoba sáno májkueni exesïndi tsípikuani ka iurhirini,  ka uandasïndi eskachi jatsiska para kánikua respetu xarhatakuani ini tsimani ambeni. Primeru uelta enga xarhatapka ini ambe, jindespti sánisï tátsekua enga Kaini uándikupka Abelini. Tata Diosï arhispti Kainini: “¡Kurhaa! Chíti ermanutiiri iurhiri, uinhachaparirini uandajpaxati echerirhu uératini” (Génesis 4:10). Para Jeoba, Abeliri iurhiri, imeri tsípikuani arhikuekasïrendi, enga xáni no sési uándikunhapka. Ísïspti enajki Abeliri iurhiri kurhakuni japi Tata Diosïni eska imeri uarhikua no ísku pakarapiringa (Ebreu 12:24).

4 Enga na nitamapkia Dilubiu, Tata Diosï uandaspti eska kʼuiripu úpiringa animaliri kʼuiripitani arhani, peru i ambe juramuspti: “Peru kʼuiripita imeri tsípikua jingoni —imeri iurhiri— nójtsï jámaaka arhani. Jimbokaksïni kuenta kurhachintaaka imecheri iurhiri jimbo” (Génesis 9:4, 5). Iáminduchi Noeri uájpeska, ka asta iásï jamberi, iáminduchi jatsiska para kurhajchani ini juramukuani, ka i juramukua xarhatasïndi eska ísïska ima ambe enga Tata Diosï uandapkia jiáni enga Kaini jingoni uandontskuarhipka. Orheta, xarhatasïndi prinsipiuni enga arhikuekajka eska tsípikua —alma— iámindu amberi enga tsípiti jaka, imeri iurhirini arhikuekasïnga. Ka tátsekua xarhatasïndi eska Jeoba, enga tsípikua íntspejka, kuenta kurhakuantauaka imechani engaksï no respetarijka tsípikuani ka ni iurhirini (Salmo 36:9).

5, 6. ¿Néna xarhataspti Moisesiri Lei eska iurhiri jatsiska para respetarinhani ka eska kánikua jukaparhakueska? (Exe je rekuadruni “ Ju je respetarini animalicheri tsípikuani”.)

5 Moisesiri Lei, xarhatasïrendi eska iurhiri, tsípikuani arhikuekasïrenga ka eska iurhiri jatsiska para respetarinhani. Levítico 17:10, 11 jimbo, Jeoba uandasïndi: “Enga kʼuiripu ma [...] auaka náki uéjki jásï iurhiri. Ji no sési exeaka imani kʼuiripuni enga iurhiri arhani jauaka, ka uándikuaka imeri iretarhu. Jimboka tsípikua kʼuiripitaeri iurhirirhu jarhaska, ka jíksïni mísmu íntskuska altarirhu parajtsï puáminhantani, jimboka iurhirisï újka eska puáminhantaaka imani tsípikua jimbo enga jima jaka” (exe je rekuadruni   Iurhiri uáti úni eskachi puáminhantaaka pekaduechani”.) *

6 Enga iurhiri no úrakuarhepiringa altarirhu, jatsispti para echerirhu tsïtanhani. Ísïspti enajkiksï ísï íntskunteni tsípikuani imani enga Dueniuepka (Deuteronomio 12:16; Ezequiel 18:4). Peru sési jarhasti mítini eskaksï israelitecha no jatsispka para ambe ma úni, paraka animali ma, meru nóteru sáni iurhiri jukarapiringa. Nomasiksï jatsispti para kachujchakuni ka sóntkusï tsïtakuni iurhirini, ka ísïksï úsïrendia arhani ka konsiensia no no sési pʼikuastaasïrendi, jimbokaksï xarhatakuspkia eskaksï janhanharhisïrenga imani enga tsípikua Íntspijka.

7. ¿Néna xarhataspti Dabidi eska respetarisïrenga na enga xáni jukaparhakuepka iurhiri?

7 Achamasï ma enga sési kurhanguapka prinsipiuechani engaksï jimbo uaxastakata jaka juramukua enga Tata Diosï íntspipka iurhiriri ambe, jindespti Dabidi, “ma achati enga [...] [Tata Diosï] jaiapanhint[enga]” (Ukuecha 13:22). Ma uelta uandaspti eska uarhixapkia kʼarhichani. Engaksï kurhaapka ini ambe, tanimu imeri sondaduecha, uarhipeparinksï inchaspti jima engaksï imeri ikiatspiticha japka, ka itsïksï pʼitaspti posurhu ma ka pákusptiksï Dabidini. ¿Ambe úspi Dabidi? Uandaspti: “¿Itsïmaa ji i achaticheri iurhirini engaksï nika, ka engaksï úpiringa tsïtakuarhini imecheri tsípikuani?”. Para Dabidi, ima itsï ísïspti eska iurhiri o eska tsípikua imecheri engaksï nípka itsï pʼitani. Jimbosï “Jeobani tsïtakupti” nájkiruka uarhini japka kʼarhichani (2 Samuel 23:15-17).

8, 9. Enga uaxastanhapka Kristueri kúnguarhikua, ¿mójtakurhispi na enga exeanga Tata Diosï tsípikuani ka iurhirini? Uandanta je.

8 Uánikua uéxurhini tátsekua, tánguarhisptiksï ima engaksï  orhejtsïkuenga primeru siglurhu anapu kristianuechani: Grupu enga Orhejtsïkuenga iámindu kúnguarhikuechani. Dosmili kuatrosientu uéxurhini ísï nitamasptia enga Noe arhinhapka eskaksï no jámapiringa arhani iurhirini, ka mili kinientu uéxurhini ísï enga uaxastanhapka paktu Leiri. Peru imani tánguarhikuarhu, Jeoba úspti eska Grupu enga Orhejtsïkuenga iámindu kúnguarhikuechani i ambe karapiringa: “Jimboka Espiritu Santu ka ístu jucha sési exeska nóksïni juramuchini másteru ambe enga úkua jukaka, sino solu indeni ambe engamindu uétarhijka. Ka i jindeesti: eskajtsï no auaka idoluecheri kéjtsïtakuani, ka ni iurhirini, ka níjtujtsï auantaani animalichani engaksï pirajchakukateaka, ka nójtujtsï ísku jándi úkuarhini” (Ukuecha 15:28, 29).

9 Xarharasïndi eska Grupu enga Orhejtsïkuenga iámindu kúnguarhikuechani primeru siglurhu, kurhangusïrenga eskaksï jatsispka para respetarini iurhirini ka eska kʼéri pekadu máespka enga nema no sési úrapiringa iurhirini, eska sáno májkuenispka eska idoluechani kómarhiani o ísku jándikua ambe úni. Ka iásïjtuchi jucha májkueni eratsisïnga. Enga jarhajka ambe ma nani enga uétarhiaka iurhirini úrani, juchachi Bibliarhu anapu prinsipiuechani exeasïnga parachi úni ambe enga Tata Diosï jaiapanhintaaka.

IURHIRI MEDISINARHU

¿Néna eiangupirini ji doktorini ma na engaksï úraaka jíndeni jingoni imani sapichu ambe iurhiriri?

10, 11. a) ¿Jiókuarhisïnchi Jeobaeri testiguecha jatantani iurhiri o ima tʼámu ambe enga uérajka enga iurhiri arhukunhajka? b) ¿Ambe ka ambechi uá jucha mísmu eratsikuarhini jiókuarhini o nómbe enga iurhiriri ambeuaka?

10 Jeobaeri testiguechachi no íntspesïnga iurhiri, nichi jatantajki, ka nichi patsajki para tátsekua ménderu jatantani, jimbokachi respetarisïnga juramukuani enga uandajka “eska[chi] no auaka [...] iurhirini”. Enga iurhiri arhukunhajka, ari tʼámu ambe uérasïndi: glóbulos rojos, glóbulos blancos, plaquetas ka plasma ka íchantuchi no jiókuarhiasïnga.

11 Peru iásï, mítinhastia útasï sánderu arhukuani ini  tʼámu ambeni, ka mámaru jásïksï úrasïndi. ¿Uandapirinchi eska útasï i ambe “iurhiriska”? ¿Uáchi jiókuarhiani? Mándanchi jatsiska para eratsikuarhini. Ka jatsiskachi para eratsikuarhini ambe úni hemodiálisis, hemodilución ka recuperación de sangre jingoni, peru solu jiáni enga juchari iurhiri úrakuarhiaka ka enga no patsakata jauaka (exe je apendisini, “Sapichu ambe enga iurhirirhu petanhajka, ka enga uétarhiaka operasioni ma”).

12. Enga jindeuaka para konsiensiani úrani, ¿ambechi jatsiski para úni ka ambejtsïni jarhuataa parachi mítini ambe úni?

 12 ¿No jukaparharasïni Jeoba ini ambe engachi jucha mísmu eratsikuarhiaka jiókuarhini o nómbe? Jo, kánikua jukaparharasïndi mítini ambechi eratsisïni íri ambe, ka andichisï erakujki ma ambe úni o máteru ambe (arhinta je Proverbios 17:3; 24:12). Jimajkani, ¿ambechi jatsiski para úni ante de jiókuarhini o no jiókuarhini ambe ma o na engajtsïni ambakerantaaka doktori ma? Orheta, kómarhini Tata Diosïni, inbestigarini indeni ambe, ka tátsekua úni ambe engajtsïni arhiaka juchari konsiensia enga jorhendakata jaka Bibliani jimbo (Roma 14:2, 22, 23). Nochi jatsiska para úni ambe engajtsïni máteruecha arhiaka, o kurhanguarhini jámani: “¿Chájtsï ambe úpirini?”. Ini ambe jingoni, “mándani arhini, [Tata] Diosïni japarini uandakuarhintaaka[chi] na enga[chi] jámajka” (Roma 14:12; exe je rekuadruni “ ¿Respetarisïni ji iurhirini?”). *

JEOBAERI LEICHAKSÏ XARHATASÏNDI IMERI UÉKPERAKUANI

13. ¿Ambeksï xarhatasïni Jeobaeri ambe leicha ka prinsipiuecha engaksï Bibliarhu jaka? Íntspi je ejemplu ma.

13 Leicha ka prinsipiuecha engaksï Bibliarhu jaka, xarhatasïndiksï eska Jeoba ambakiti juramuti máeska ka Táti uékpiti ma enga uandanhiajka imeri uájpechani jimbo (Salmo 19:7-11). Jeoba juramuspti eskachi no apiringa iurhiri jimbokachi jatsiska para respetarini. Peru no arhani iurhiri ístu marhuasïndi para máteru ambe jimbo. Kuájchakusïndijtsïni parachi no ima no sési jásï ambe úkuarhinchani engaksï úkuarhinchajka ima engaksï iurhiri jatantajka (Ukuecha 15:20). Uánikuecha engaksï sési mítikuka íri ambe, uandasïndiksï eska sési japiringa enga iásï nóteru operarperanhapiringia iurhiri jingoni. Jucha engachi jurhimbiti kristianueka, exesïngachi ménderu eska Jeoba Táti uékpiti  máeska ka eska kánikua mímixetiska (arhinta je Isaías 55:9; Juanu 14:21, 23).

14, 15. a) ¿Náki leichaksï xarhataspi Tata Diosïri uékperakuani imeri iretani jimbo? b) ¿Nénachi uá úraani prinsipiuechani engaksï jimbo uaxastakata jaka juramukuecha engaksï uandajka ambe engachi jatsika para úni parachi no ma ambe úkuarhinchani?

14 Tata Diosï méntkisï uandanhiasïndi paraka imeri ireta sési jauaka. Ísïksï xarhatasïndi uánikua ima juramukuecha enga Jeoba israelitechani íntsaapka. Arhiaspti eskaksï barda sapirhatichani jatsikuapiringa asoteaecharhu. Asoteachaksï kánikua úrakuarhisïrendi, ka i juramukua úsïrendi eska no nema úkuarhinchapiringa ambe ma (Deuteronomio 22:8; 1 Samuel 9:25, 26; Nehemías 8:16; Ukuecha 10:9). Ístu arhiaspti eskaksï sési patsaapiringa ueechani engaksï jámaenga atajpini (Éxodo 21:28, 29). Ima enga no kurhajchaenga  ini juramukuechani no sési úsïrendi, ka úpirindi ima kulpa jatsini enga nema uarhipiringa.

15 ¿Nénachi uá úraani ini prinsipiuechani engaksï jimbo uaxastakata jaka i juramukuecha? Engachi jingontku jauaka paraka juchari troka sési jauaka, engachi sési manejariuaka, enga sési jauaka juchari kʼumanchikua, enga sési jauaka jima engachi ánchikuarhijka, engachi jingontku jauaka animalichani jingoni engachi kʼumanchikuarhu jatsiajka, ka engachi sési erakuaka na engachi tsípikuarhijka. Máru paisichani jimbo, ambe engaksï jimbo sánderu uarhijka tumbicha, jindesti jimbokaksï no sési manejarisïnga o jimbokaksï jukari uinhamu jámasïnga. Ísï jimbo, ima tumbi enga uékajka Tata Diosïri uékperakuarhu jarhani, ka enga jukaparharajka tsípikuani, no tsípikuarhisïndi imani ambe jingoni enga uáka uándikuni. No ísï pʼikuarherasïndi enajki no ma ambe úkuarhinchaa. Ka jimboka no ísku jatini arriesgarikuarhisïnga, sánderu sési irekuarhisïndi (Eclesiastés 11:9, 10).

16. ¿Ambe prinsipiu úrakuarhisïni parachi abortueri ambe exeni? (Exe je ístu notani.)

16 Tata Diosï kánikua jukaparharasïndi kʼuiripueri tsípikuani, asta ima charhakuecheri jamberi engaksï útasï amamberi matrisirhu jarhajka. Moisesiri Leirhu, Tata Diosï uandaspti ambe enga jatsipka para úkuarhini enga nema atapiringa uarhiitini ma enga embarasada japiringa. Enga uarhiiti o sapi uarhipiringa, ima enga atapka, uándikpiti úkuarhesïrendi ka jatsispti para uándikunhani, “tsípikua, tsípikua jimbo” (arhinta je Éxodo 21:22, 23). * Iásï, uánikua miioni uátsïcha ka uarhiitichaksï nirasïndi abortarini nomasi jimbokaksï no uékasïnga kʼuiriperaani. Uánikuaksï eratsisïndi i ambe úni, jimbokaksï ísku irekasïnga o uánikuecha jingoni jámani ka uékasïndiksï májkueni jásï seguirini irekani. Enga Jeoba ini ambe exejka, kánikua no sési pʼikuarherasïndi.

17. ¿Nénachi uá sési pʼikuastaani imechani engaksï abortarika ante de jorhenguarhinksï Jeobaeri ambe?

 17 Peru ¿enga nema abortaripiringa ante de Jeobaeri ambe jorhenguarhini? ¿Eratsia eska Tata Diosï no méni puákuntaaka? No jatsisti para ísï eratsini. Iámindu imecha engaksï mintsita jingoni moantajka, uátiksï seguru jarhani eska Jeoba puákuntauaka tata Jesukristueri iurhirini jimbo (Salmo 103:8-14; Efesu 1:7). Tata Jesukristu mísmu uandaspti eska “no jurhas[pka] ioarhiani ambarhatichani sino pekadorichani” paraksï arrepentirikuarhini (Lukasʌ 5:32).

JU JE NO JÁMANI ERATSINI NO SÉSI AMBE ÚTSPINI

18. ¿Néna xarhatasïni Biblia ambesï újki eska uánikua kʼuiripuecha uándikunhaaka?

18 Peru Jeoba no indentku uékasïndi, eskachi no no sési úkuauaka máteruechani. Ima uékasïndi eskachi kénditaaka juchari mintsitarhu uératini ikiatapuni, ini pʼikuarhinhikuani enga úkia eska uánikua kʼuiripu uándikunhaaka. Apostuli Juanu jimbojtsïni arhisïndi: “Ima enga ikiajka exeni ermanuembani, uándikpitisti” (1 Juanu 3:15). Peru ísïsti, no nomasi jindesti ikiakuni nemani, sino uékani eska uarhiaka. I ambe pʼikuarherani, úpirindi úni eska nema ikichakueni jásï chkuanderakua ambe uandapiringa máteru nemaeri o uandani eska ima, imani ambe úska enga jimbo Tata Diosï nemani kastigaripiringa (Levítico 19:16; Deuteronomio 19:18-21; Mateo 5:22, TNM). Ísï jimbo, kánikua jukaparhakuesti eskachi jánguarhintaaka kénditani mintsitarhu uératini eratsikuechani engajtsïni eratsitarapiringa no sési úkuni nemani (Santiagu 1:14, 15; 4:1-3).

19. ¿Ambe jorhenguarhisïni ima enga úraajka Bibliarhu anapu prinsipiuechani imeri tsípikuarhu i textuecheri Salmo 11:5 ka Filipusʌ 4:8, 9?

19 Engachi májkueni jukaparharajka tsípikuani ísï eska Tata Diosï, ka engachi uékajka imeri xénchperakuarhu jarhani, nochi jámaaka no sési útspini. Salmo 11:5 uandasïndi eska Jeoba “ikimchasïnga né uéjkini enga atajperakua  ambe tsitijka”. I textu xarhatasïndi na enga eratsijka Tata Diosï, peru ístujtsïni jarhuatasïndi parachi mítini Bibliarhu anapu prinsipiuni ma engajtsïni jarhuataaka juchari tsípikuarhu: engachi uékajka Tata Diosïni, nochi jámaaka  imani ambe jingoni tsípikuarhini enga atajperakua ambe tsitirpiaka. Ístu, engachi arhintajka eska Jeoba jindeska Tata Diosï ma “enga pínandikua íntspijka”, jorhenguarhisïngachi jatsirani juchari mintsitarhu ka eratsikuarhu, imani ambe enga sési arhikatejka, enga sési jásï ambejka, enga sési exenhajka ka enga uáka eska pínandikua jauaka (arhinta je Filipusʌ 4:8, 9).

KÚNGUARHIKUECHA ENGAKSÏ IURHIRI JÁXETINI JAKA

20-22. ¿Ambeksï jimbo no májkueniski kristianuecha i parhakpini jingoni, ka andi?

20 Para Tata Diosïri orhepatini, Satanasiri parhakpini iurhiri jáxetixati imecheri engaksï no ma kulpa jatsika. Imecheri gobiernuecha, enga Biblia arhiajka eskaksï no sési jásï animali máeska, uánikua miioni kʼuiripuechanksï uándikuastia, ka uánikua íchani engaksï uándikuaka, Jeobanksï marhuakusïrendi (Daniel 8:3, 4, 20-22; Jaŋaskuecha 13:1, 2, 7, 8). Uánikua imecha engaksï kʼérati negosiuechani ánchitaajka, ka ima kúnguarhikuecha nani engaksï sientifikuecha ánchikuarhijka, jarhuataasïndiksï kʼérati gobiernuechani paraksï armechani uáni engaksï jimbo uánikuechani uándikuajka ka engaksï jimbo kánikua tumina andajka. Xarharasïndi jiájkani “eskaksï iámindu parhakpini anapuecha Noambakitiri juramukua jimbo jarhaska” (1 Juanu 5:19).

21 Peru Jesusiri chúxapaticha, mándani ka grupu jimbo, úsïndiksï agustu irekani jimbokaksï mítiska eskaksï no ma uarhiri jimbo kulpa jatsiska. ¿Andi? Jimbokaksï “nóteru parhakpini anapueskia” ka jimboksïsï no ma gobiernu jingoni úkuarhijti ka niksï guerrecharhisï inchamukuni (Juanu 15:19; 17:16). * Ístu engaksï no sési kánhajka, májkuenksï jámasïndi eska tata Jesukristu ka nóksï no sési úkuantaasïndi imecheri ikiatspitichani, sánderu sési, uékperakua jingonksï  kaasïndi ka asta kómarhijpikuani (Mateu 5:44; Roma 12:17-21).

22 Kristianu jurhimbitichaksï no ma ambe jatsisti “kʼéri ireta Babilonia” jingoni —iámindu relijioni no jurhimbiticha engaksï parhakpinirhu jaka— kúnguarhikua enga sánderu kulpa jatsika engaksï kʼuiripuecha uándikunhajka. Biblia uandasïndi eska jima “exenhantas[ka] iurhiri uandajtsïkpiticheri ka Diosïri erakukatecheri ka iáminduecheri engaksï parhakpinirhu uándikunhaka”. Ka jimbojtsïnisï Tata Diosï arhijti: “Juchiti kʼuiripuecha, uéakunta je” (Jaŋaskuecha 17:6; 18:2, 4, 24).

23. ¿Ístu ambe arhikuekasïni uéakuntani Kʼéri Babilonia uératini?

23 Ima enga kurhaajka juramukuani enga uandajka eska jatsiska para uéakuntani Kʼéri Babilonia uératini, kurhajkuarhisïndi eskaksï nóteru kuenta uáka imani kúnguarhikua jingoni. Peru ístu máteru ambe úsïndi. Ikichaasïndi imani no sési járhati úkuechani enga relijioni no jurhimbiti jiáratpejka o enga niárajka jamberi uandani eskaksï  sési jarhaska, komueska ísku jándikua ambe, politikarhu inchamukuni, ka uékani kánikua riku úkuarhini (arhinta je Salmo 97:10; Jaŋaskuecha 18:7, 9, 11-17). ¡Uánikua kʼuiripu uarhistia imani jánguechani jimbo enga Kʼéri Babilonia uájka!

24, 25. a) ¿Ambe úrasïni Jeoba para úni pʼamojkuani imechani engaksï kulpa jatsika enga nema uarhika peru engaksï moantajka? b) ¿Ambe arreglu jarhaspi jini Israeli enga xarhataenga ini ambe?

24 Ante de aiakukuarhenchi Jeobani ka itsï atakuarhini, iáminduchi apoiarisïrenga Noambakitiri parhakpinini. Ísï jimbo, juchajtuchi sánisï kulpa jatsispka. Peruchi erakuska máteru ambe úni, jakajkuskachi tata Jesukristueri uarhikuani ka aiakuskachi juchari tsípikuani Tata Diosïni. Ísïchi úsïnga jatsini imeri pʼamojkukuani ka kuájchakusïndijtsïni parachi no méni jurajkuni (Ukuecha 3:19). Eskachi na exeaka iáiasï, i kuájchakukua xarhatanhasptia imani iretechani jimbo nani enga uénga kuájchakukuarhini ima kʼuiripu enga no uékaparini uándikuenga nemani (Números 35:11-15; Deuteronomio 21:1-9).

25 ¿Para ambeksï marhuasïreni inde iretecha? Para kuájchakukuarhini ima israelita enga no uékaparini uándikuenga nemani para no uándikunhani. Enga niárenga ma i jásï iretarhu, juramutichaksï jusgarisïrendi ka jatsisïrendi para jima irekani astaka na kʼéri saserdoti uarhipiringa, ka tátsekua úsïrendi mótsini nani enga uékapiringa. I jásï iretechaksï xarhatasïrendi eska Tata Diosï kánikua pʼamojpitiska ka eska kánikua jukaparharasïnga tsípikuani. ¿Ambeksï xarhatakuekaski i jásï iretecha? Inde ambe enga Jeoba uaxastaka parajtsïni kuájchakuni iásï. ¿Ambeski inde ambe? Jeoba úrasïndi tata Jesukristueri uarhikuani, parachi no úkuarhinchani ambe engachi jatsipka para úkuarhinchani, uarhini, jimbokachi no uékaparini nochi kurhajchaasïnga indeni juramukuechani enga Tata Diosï íntspiaka engaksï uandajka eskachi jatsiska para respetarini iurhirini ka tsípikuani. ¿Ka nénachi xarhatasïni eskachi jukaparharasïnga ini ambe? Ma ambe jimbo engachi  uáka ísï xarhatani, jindesti engachi pʼímarhiska kʼuiripuni paraksï jiókuarhini Tata Diosïri kuájchakukuani. Sánderu uétarhisïndi iásï i ambe úni, jimboka “kʼéri mískuarhita” axuterku jarhaskia (Mateu 24:21; 2 Korintu 6:1, 2).

XARHATA JE ESKAJTSÏ JUKAPARHARASÏNGA TSÍPIKUANI EIANHPIPARINI REINUERI AMBE

26-28. ¿Nénachi sáno májkueni jarhaski eska profeta Esequieli, ka nénachi uá Tata Diosïri xénchperakuarhu jarhani?

26 Tata Diosïri ireta, iásï sáno májkueni jarhasti eska Esequieli, ióntki anapu profeta ma, enga Jeoba pérapka para jarhuataani israelitechani paraksï andarherani Tata Diosïni. Ima i ambe arhinhaspti: “Engari kurhaauaka juchiti penchumikuarhu uandakua ma, jatsiskari para eianguani”. Enga Esequieli no uékapiringa úni i ambe, ima kulpa jatsipirindi imecha jimbo engaksï uarhipiringa jiáni enga Tata Diosï kuenta kurhakuantaapiringa Jerusaleni anapuechani (Ezequiel 33:7-9). Peru eskachi na mítikia, profeta úspti imeri ánchikuarhitani, jimbosï no kulpa jatsipti imecha jimbo engaksï uarhipka.

27 Nóteru ióndania, Satanasiri parhakpini kʼamakurhiati. Jimbochisï Jeobaeri testiguecha kánikua tsípikua jingoni jiókuarhijka nirani aianhpini imani “jurhiatikuani enga Tata Diosï bengarikuarhiaka” ka uandantani imeri Reinueri ambe (Isaías 61:2; Mateu 24:14). ¿Tsípikua jingonchi úsïni ini xáni ambakiti ánchikuarhitani? Pablu ísï úspti ka jimbosï úpti uandani: “Ji nómbe kʼamanharhintskua jatsiaka enga nema tsïnchiaka, jimbokani ji no méni kuerataska eiangunksïni iámindu ambe enga Tata Diosï tantiarika” (Ukuecha 20:26, 27). Ambakiti ejemplu ma parachi májkueni úni.

28 Peru ísïsti, parachi juchari Tátiri xénchperakuarhu jarhani no indejku uétarhisïndi, májkueni jukaparharani eska Tata Diosï tsípikuani ka iurhirini. Eskachi na exeaka máteru kapitulurhu, uétarhisïndi eskachi pímbinhasï jauaka imeri orhepatini.

^ párr. 5 Rebista ma enga arhinhajka Investigación y Ciencia ini ambe uandasïndi i uandakuecheri ambe “tsípikua kʼuiripitaeri iurhirirhu jarhas[ti]”: “Mítiskachi eska enga uandanhajka eska tsípikua iurhirirhu jarhaska, ambe ma arhikuekasïnga. Peru ístu i ambe meru ísïsti: iámindu jásï sélulaecha engaksï iurhirirhu jaka jukaparhakuestiksï para nema tsípiti jarhani”.

^ párr. 12 Exe je rebistani ¡Despertad! agostueri 2006, páj. 3-12, engaksï Jeobaeri testiguecha úka.

^ párr. 16 Ístu uétarhisïndi exeni, eska Biblia no uandasïnga eska Jeobaeri kastigu mójtakukuarhipiringa seguni eska na xáni páni japiringia uarhiiti embarasada.