Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

“Tata Diosïri xénchperakuarhu ja je”

 APENDISI

Banderani saludarini, botarini ka serbisiu sibili úni

Banderani saludarini, botarini ka serbisiu sibili úni

Banderani saludarini. Jeobaeri testiguechachi exesïnga eska kʼéri ambe arhini banderani, saludariparini ka éjpu tʼenksataparini, enga jamberi imnu ma pirenhani jarhajka, jindeska ambe enga jimbo kʼéri ambe arhinhani jarhajka ka enga jimbo ma uandani jarhajka eska pʼímutantskua patria ka juramuticha jimbo jurhasïnga ka no Tata Diosïni jimbo (Isaías 43:11; 1 Korintu 10:14; 1 Juanu 5:21). Juramuti ma enga ísï jásï kʼéri ambe arhinhapka jindespti Nabukodonosori rei Babilonia anapu. Ima uékaspti xarhatakuni imeri iretani, na enga xáni kʼéripka ka eska diosïni jásï máespka, ka jimbosï kʼéri monumentu ma úpti, ka juramuspti eskaksï iáminduecha tinguixurhikupiringa imani monumentuni enga jamberi pirenhani japiringa imno ma. Peru tanimu ebreuechaksï, Sadraki, Mesaki ka Abednegu, nóksï uékaspti tinguixurhikuni, nájkirukaksï i ambe jimbo úpiringa uándikunhani (Daniel, kapitulu 3).

¿Ka ambechi uá uandani iásï? Libru ma jimbo, Carlton Hayes achati ma enga istorieri ambe exejka, uandasïndi: “Ini jurhiatikuechani jimbo, bandera jindesti ‘ambe ma enga kómarhinhajka’. [...] Kʼuiripu pʼíntasïndi kájtsïkuani enga jimesïsï nitamajka; poetechaksï poesia ambe arhikusïndi; ka sapiichaksï imnoechani pirekuasïndi”. Ístu uandasïndi eska nasionijtu jatsikuarhiaska “jurhiatikuecha para kʼuínchini”, komueska 16 de septiembrini, enga jindeka Día de la Independencia de México, ka ístu “santuechani o eruechani” ka “templuechani” o nani engaksï kʼéri ambe arhijka ini simboluechani. Ístu México anapu Diario Oficial de la Federación uandasïndi eska “Eskudu, Bandera ka Imno Nasionalicha, jindeskaksï Simboluecha Patriarhu anapu” ka uandasïndi eska ma jatsiska para “kómarhini simboluechani engaksï nasionirhu anapueka”. Ka sáni iónistia enga ma libru para inbestigarini uandapka eska “bandera, májkueni eska krusi, sagradeska” (The Encyclopedia Americana).

Ka iásï no ióni, inde mísmu libru uandasti eska imnu nasionalicha jindeskaksï “ambe enga ma pʼikuarherajka imeri paisini  jimbo, ka enga jimbo ma kurhakujka Tata Diosïni para ima xanhatatani ka kuájchakuni iretani ka imechani engaksï orhejtsïkujka”. Ísï jimbo, Jeobaeri testiguechachi no jukari jamberi jatsikusïnga engachi uandajka eska banderani saludarini ka imnoni pireni májkueniska eska ambe enga relijioni ma újka. Imeri libru ma jimbo enga arhinhajka Genio y figura del norteamericano, maestru D. W. Brogan uandaspti máru juesicheri engaksï jimbo máru sapiicha jusgarinhani japka engaksï Jeobaeri testigueka, jimbokaksï no uékaspka Estados Unidos anapu banderani saludarini ka níjtuksï omenaje a la banderani arhini, maestru i ambe uandaspti: “Suprema Corte uandastia iásï kʼóru [uánikua sentensiechani jimbo] eskaksï inde jásï pʼindekuecha májkueniskaksï eska relijionirhu anapu ambe”.

Jeobaeri testiguechachi sési mítitixaka eskachi no jatsiska para indeni ambe úni jámani, jimbokachi mítiska eska ambe máeska enga Biblia no jeiapanhintajka, peruchi ístu mítiska eskaksï kʼuiripuecha uáka úni ambe engaksï imecha uékaaka. Ístuchi respetarisïnga banderani engaksï jindeeka paisirhu anapu simboluecha, ka kurhajchasïngachi gobiernuechani engaksï erakunhajka, jimbokaksï ima “juramukua jatsi[s]ka” ka engaksï iámindu márku jindeeka komueska ‘Diosïni marhuakuni jarhani’ (Roma 13:1-4). Ístuchi úsïnga ambe engachi arhinhaka, eskachi “kómarhijpikua[ka] reichani ka iámindu juramutichani”. Peruchi úsïnga i ambe, parakachi “jucha uáka sési irekani ka pínandikua jatsinchi Diosïni janhanharhiparini” (1 Timoteo 2:2).

Botarini politikarhu. Kristianu jurhimbitichachi mítiska eskaksï máteruecha uáka botariini engaksï uékaska. Nochi jámasïnga kampania úni paraksï kʼuiripuecha no botariini, ka kurhajchasïngachi juramutichani engaksï erakunhajka. Peruchi sési eratsitixakaia méntku no jámani politikarisï inchamukuni (Mateu 22:21; 1 Pedru 3:16). Peru ¿enga imeri paisirhu juramuticha uandajka eska afuersaeska nirani botarini o engaksï no sési kánhajka imecha engaksï no nirajka botarini? Enga imeri konsiensia jurajkuaka, kristianu uáti nirani jima enga botarinhajka. Ísï, májkueni úni jauati eska Sadraki, Mesaki ka Abednegu, engaksï sáni májkueni nitamakuarhipka, engaksï  nípka nomasi para jima jarhani Dura anapu pákuarhu. Peru kʼóru, kristianu jatsisti para ini seisi prinsipiuechani no mirikurhiani enga uékaaka erakuni ambe úni:

  1. Jesusiri chúxapatichachi “nóteru parhakpini anapueskia” (Juanu 15:19).

  2. Jesusiri chúxapatichachi tata Jesukristunchi jingoniiska ka imeri Reinu jingoni (Juanu 18:36; 2 Korintu 5:20).

  3. Iámindu kúnguarhikuarhu anapuecha májku ambechi jakajkusïnga ka iáminduchi uékperasïnga (1 Korintu 1:10; Kolosasi 3:14).

  4. Ima enga botarijka nemani jimbo, ístu responsablisïndi imani ambe jimbo enga ima újka enga jimbo botariika (exe je prinsipiuechani engaksï ixú marhuajka, ixú 1 Samuel 8:5, 10-18 ka 1 Timoteo 5:22).

  5. Engaksï israelitecha kurhajkuarhipka juramutini, Jeoba uandaspti eskaksï no jiókuarhixapka Jeobani komueska imecheri Juramuti (1 Samuel 8:7).

  6. Kristianuechachi uékasïnga no ma kʼamanharhintskua jingoni uandantani Tata Diosïri Reinueri ambe, iáminduechani no arhiparini náki uéjki politikunksï apoiarini (Mateu 24:14; 28:19, 20; Ebreu 13:18).

Serbisiu sibili. Jarhastiksï máru paisicha engaksï juramujka eska imecha engaksï no uékajka serbisiu militari úni, jatsiskaksï para ma tiempu serbisiu sibili úni. Ménisï jindesïndi posu ambe uáni, karreterechani uáni, eskuelechani ka ospitalichani. ¿Ambechi uá engachi juramuminhaska parachi ini ambe úni? Kómarhini Jeobani, ka sési inbestigarini, jamberichi uáka ini ambe úni kurhamarhiparini erachini ma enga ióni marhuakukia Jeobani. Ísïchi uáka sési úrani juchari konsiensiani parachi mítini ambe úni (Proverbios 2:1-5).

Tata Diosïri Karakatajtsïni arhisïndi eskachi jatsiska para “janhanharhi[ni] gobiernuni ka juramutichani” ka eskachi “listu jauaka para iámindu ambakiti úkua” ka eskachi ‘kaxumbitiuaka’ (Titu 3:1, 2). Engachi ini ambe eratsiaka, jatsiskachi para kurhamarhikuarhini ambe úkuarhia engachi jiókuarhiska úni serbisiu sibili: “¿Engani i ambe uáka uá xarhatani útasï eskani ji  no nema jingoni úkuarhisïnga, o apoiarini japirini relijioni no jurhimbitini?” (Miqueas 4:3, 5; 2 Korintu 6:16, 17). “¿Úkuarini jukachia o nóteruni uáia úni ambe enga kristianu ma jatsika para úni?” (Mateu 28:19, 20; Efesu 6:4; Ebreu 10:24, 25.) “O sánderu sési, ¿sánderuni tiempu jatsia para Jeobaeri ánchikuarhitani úni, ka asta jamberi sánderu tiempu míndani parani Jeobani marhuakuni?” (Ebreu 6:11, 12.)

Enga kristianueri konsiensia jurajkuaka para serbisiu sibili úni para no ónhanhani, imeri erachichaksï no ma ambe jatsisti para arhini (Romanos 14:10, TNM). Ka májkuenksï uáti enga erachi erakuska no úni serbisiu sibilini (1 Korintu 10:29; 2 Korintu 1:24).