Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

“Tata Diosïri xénchperakuarhu ja je”

 KAPITULU 2

¿Nénajtsï uá ambakiti konsiensia ma jatsini?

¿Nénajtsï uá ambakiti konsiensia ma jatsini?

“Jánguarhi je ambakiti konsiensia ma jatsini.” (1 PEDRO 3:16, TNM.)

1, 2. ¿Andisï xáni jukaparhakue eska ma kʼuiripu kámaaka lámpara ma enga pápjandikuarhu xanharaaka, ka i néna sáno májkueni terokuntasïni juchari konsiensia jingoni?

ERANHASKA je eska kʼuiripu ma xanharani jarhasïnga pápjandu. ¿Ambe jatsiski para páni para no kuarhatseni ka ambe ma úkuarhinchani? Kánikua jukaparhakuesti eska lámpara ma kámaaka para úni exeni nanisïsï xanharaa.

2 Engajtsï cha no kámaaka lámpara ma, nójtsï uáka exeni nanisïsï xanharani, ka úpiringajtsï kuarhatseni ka no sési úkuarhinchani. Lámpara ma jingontsï úsïnga exeni nanisïsï xanharani ka uákajtsï kuájchakuni chári tsípikuani. Jeobajtsïni íntskusti regalu ma enga ísïka eska lámpara ma (Santiagu 1:17). Konsiensiesti. Engachi no jukapiringa indeni, nochi jánhaskapiringa ambe úni. Engachi sési úrajka, jarhuatasïndijtsïni parachi sési úni ka parachi jurhimbitku jámani. Exesïngachi jiájkani eska ambakiti regalu máeska. Jimbosï uétarhijti mítini ambeski konsiensia ka néna ánchikuarhisïni, ka tátsekuachi exeaka arini ambe: 1) nénachi jorhendasïni konsiensiani; 2) andichisï jatsi para kuenta úni máteruecheri konsiensiani, ka 3) ambe kóntperatechanchi jatsiaua engachi ambakiti konsiensia ma jatsiaka.

 AMBESKI KONSIENSIA KA NÉNA MARHUASÏNI

3. ¿Ambe arhikuekasïni uandakua enga griegu jimbo jindeka “konsiensia”, ka ambe jarhuatasïni úni kʼuiripuni?

3 Biblia enga pʼurhe jimbo jaka úrasïndi uandakuechani “mintsita” “eratsikua” “sési jámani” “nómbe kʼamanharhintskua exekuarhini” para “konsiensiani” arhikuekani. Ka Bibliarhu, uandakua griegu enga jindeka “konsiensia” arhikuekasïndi, “na enga xáni mítikuarhika ma”. I ambe arhikuekasïndi eskachi jucha jukaska ambe ma incharini parachi mítikuarhini nénachi jásïski. No jarhasti máteru kueraakata ixú Echerirhu enga Tata Diosï íntskuka ini ambe. Ini jimbochi úsïnga uérakua jatini exekuarhini ka únchi exeni si enga sési jaki ambe engachi újka. Konsiensia juchari testiguesti ka jusgarisïndi imani ambe engachi újka ka ambe engajtsïni manatajka úni. Jarhuatasïndijtsïni engachi uékaaka ambe ma úni ka arhisïndijtsïni sésiski ima ambe engachi erakuni jaka úni o nómbe. Engachi sési erakujka, sésijtsïni pʼikuastasïndi, peru enga nómbe, no sésijtsïni pʼikuastasïndi.

4, 5. a) ¿Nénachi mítiski eskaksï Adani ka Eba jukaspka konsiensia? Engaksï ísï no kurhajchapka Tata Diosïni, ¿ambeksï úkuarhispi? b) ¿Náki ejempluechaksï jarhaski Karakata Ebreaecharhu kʼuiripuecheri engaksï kurhajchapka konsiensiani?

4 Primeru achati ka uarhiiti, Adani ka Eba, ístuksï intsïnhaspti konsiensia ma engaksï kueraanhapka, ísï xarharasïndi jimbokaksï kʼuratsespka engaksï na pekadu úpkia (Génesis 3:7, 8). Inde ambe engaksï úpka, nóteru kánikua marhuakuapirindia enga konsiensia no sési pʼikuastaapiringa. ¿Andi? Jimbokaksï mítiparini no kurhajchaspka Tata Diosïni. Imaksï no ma pekadu jukaraspti, ísï jimbo, engaksï erakupka no kurhajchani Jeobani ka imeri ikiatspitiksï úkuarhini, sésiksï mítitixapti ambe engaksï úni japka. Ísï jimbo, nóteru ambe ma jarhasptia para úni.

5 Uánikuechaksï kurhajchasïndi imeri konsiensiani, nájkirukaksï pekadorika ka no ísï eskaksï Adani ka Eba  na úpka. Ma jindespti ambakiti achamasï Jobu, enga uandapka: “Seguiriuaka jurhimbitku jámani para méntkisï, juchiti mintsita norini méni no sési pʼikuastaati” (Job 27:6). * Jobu jingontku kurhajchasïrendi imeri konsiensiani ante de úni ambe ma o eratsini ambe ma úni. Jimbosï uéndi uandani eska imeri konsiensia no no sési pʼikuastasïrenga; no kʼuratsekua jingoni irekuarhisïrendi o no sési pʼikuarheraparini. Peru no májkueni úkuarhispti Dabidini jingoni. Imani kʼóru niáraspti konsiensia no sési pʼikuastani. Biblia uandasïndi eska “tátsekua Dabidiri mintsita [méntku úndaxapka] no sési pʼikuastani” ísï tátsekua enga no janhanharhipka Saulini, rei enga Tata Diosï erakupka (1 Samuel 24:5). Kánikua jarhuataspti na enga konsiensia pʼikuastapka, jimboka jarhuataspka para sánderu janhanharpini.

6. ¿Ambe xarhatasïni eskachi iáminduecha intsïnhaska konsiensia?

6 Nóksï Jeobaeri marhuarichajkusï jukati konsiensia. Apostuli Pablu uandaspti: “Ka enga imecha engaksï no Israel anapueka ka engaksï no jatsika Diosïri leini, jámajka eska lei na uandajka imecheri mísmu eratsikua jimbo, xarharasïndi eskaksï jánhaskasïnga ambe enga sésika para úni nájkirukaksï no jatsika Diosïri leini. Ka ima xarhatasïndi eska inde ambe enga Diosïri lei uandajka, karakata jarhaska imecheri mintsitecharhu, jimboka imeri mísmu eratsikuecha testigu úkuarhisïnga engaksï ménichanisï kʼamanharhintskua exekuarhijka ka ménichanisï nómbe” (Roma 2:14, 15). Ménichanisï, konsiensia úsïndi  eskaksï kʼuiripuecha imani ambe uáka engaksï Tata Diosïri prinsipiuecha uandajka, nájkirukaksï no mítiaka Jeobaeri leichani.

7. ¿Andisï ménisï konsiensia no sési marhuajki?

7 Peru konsiensia no méntkisï ísï marhuasïndi eska na uétarhijka. Parachi sánderu sési kurhanguni, eranhaska je ilustrasioni lámpareri, engaksï pilecha nóteru kánikua marhuajkia, ístujtsïni nóteru uátia erajkutarani. Májkueni úkuarhisïndi juchari konsiensia jingoni, engachi no jorhenguarhiaka Tata Diosïri Karakateri ambe, nochi uáka exeni ambe sésiski ka ambe nómbe. Sáno májkueni, engachi jurajkuska eskajtsïni juchari mintsitaeri tsitikuecha arhiaka ambe úni, juchari konsiensia uátijtsïni támisï páni. Ístuchi uétarhinchasïnga espiritu santueri jarhuajperatani, paraka konsiensia sési marhuauaka. Eska na uandapka Pablu: “Ka mísmu juchiti mintsita Espiritu Santuni jingoni testiguesti” (Roma 9:1). Peru, ¿nénachi uá seguru jarhani eska juchari konsiensia jiókuarhisïnga espiritu santueri jarhuajperatani? Eskachi na exeaka, uétarhisïndi sési jorhendani.

NÉNA JORHENDANI KONSIENSIANI

8. a) ¿Néna uá mintsita támisï páni juchari konsiensiani? Engachi eratsini jauaka ambe ma úni, ¿ambe jatsiski para sánderu jukaparhakueni? b) ¿Andisï no nomasi uétarhijki eska konsiensia sési jauaka? (Exe je notani.)

8 ¿Néna jatsiski para úrakuarhini konsiensia engachi eratsini jauaka ambe ma úni? Uánikuechaksï eratsisïndi eska nomasi uétarhisïnga kurhajchani mintsitani. Ka tátsekuaksï uandasïndi: “Juchiti konsiensiarini jurajkusïndi ini ambe úni”. Peru nochi mirikurhiaka eska mintsitarhu anapu tsitikuecha, kánikuaksï uinhapitiska ka uátiksï támisï páni konsiensiani. Ísï uandasïndi Biblia: “Mintsita sánderu enganiarpisïndi eska ambe uéjki, ka sóntku uékasïndi ambe ma. ¿Né uá mítini?” (Jeremías 17:9).  Jimbosï, para jucha sánderu jukaparhakueti sési pʼikuastani Jeobani ka no juchari mintsitani. *

9. Janhanharhini Tata Diosïni, ¿néna úsïni eskachi eratsintaaka para ambe ma úni?

9 Enga ma kʼuiripu eratsiaka ambe ma úni, ka sési jorhendakata jatsini konsiensiani, no uáti imani ambejku enga ima tsitiaka. Sánderu sési, janhanharhisïndi Tata Diosïni, jo, no uékasïndi no sési pʼikuastani. Ísï xarhatasïndi Neemiasiri ejemplu. Ima gobernadorispti Jerusaleni, ka juramukua jatsispti para arhini kʼuiripuni eskaksï meiampiapiringa impuestuechani. Peru no ísï úspti. ¿Andi? Ima mísmu uandaspti: “[Jimbokani] janhanharhisïrenga Tata Diosïni” (Nehemías 5:15). No uékasïrendi no sési pʼikuastani Tata Diosïni no sési kámaparini iretani. Jimbosï jukaparhakueti eskachi juchajtu inde mísmu janhanharhikua jatsiaka, i ambe uáti eskachi méntkisï orheta Bibliani exeaka engachi eratsini jauaka ambe ma úni.

10, 11. ¿Náki Bibliarhu anapu prinsipiuechajtsïni jarhuatasïni parachi mítini auachi alkoli, ka ambechi uá parajtsïni Tata Diosï jarhuatani úraani ini prinsipiuechani?

10 Exeakachi ejemplu kauikueri. Jatsiskachi para erakukuarheni sinchi aua o nómbe engachi jimesïsï jámaaka enga kauikua anhani jauaka. Parachi sési erakuni, jatsiskachi para sési jorhendani juchari konsiensiani Bibliarhu anapu prinsipiuechani jingoni. Biblia uandasïndi  eskajtsïni Tata Diosï íntskuska binuni parachi tsípikuarhini (Salmo 104:14, 15). Peru ima no sési exesïndi enga nema kauijka o enga kúnguarhinhaaka para kauinhani ka no sési tsípikuarhini (Lukasʌ 21:34; Roma 13:13). Asta uandasïndi eska kauini sáno májkueni no sési ambeska eska ísku jándikua ambe úni (1 Korintu 6:9, 10). *

11 Kristianu ma jorhendasïndi imeri konsiensiani enga úraajka ini prinsipiuechani imeri tsípikuarhu. Ka ísï, imeri konsiensia úsïndi arhini ambe sésiski ka ambe nómbe. Ísï engachi pʼímarhinhaska para tánguarhini máteruecha jingoni ka kánhani alkoli, jatsiskachi para kurhamarhikuarhini: “¿Néna jánhaskuarhea? ¿Úpirini no sési jánhani ka niárani jamberi no sési jásï ma kʼuínchikua úkuarhini? ¿Ka jiia? ¿Meruni anhenchasïni? ¿Pʼindeskia alkoli arhani? ¿Uétarhinchasïni alkoli arhani parani mirikurhiani juchiti problemechani? ¿Uá uandani eskani nóteruni uékasïngia?”. Engachi exeajka prinsipiuechani engaksï Bibliarhu jaka o engachi uékaaka mítini néna úraani, uétarhisïndi kómarhini Jeobani (arhinta je Salmo 139:23, 24). Ini ambe úparini, arhisïngachi Jeobani eskajtsïni xanhatataaka imeri espiritu santu jimbo ka ístu jorhendasïngachi konsiensiani paraka uáka ambe enga Tata Diosï uandajka. Peru jarhasti máteru ambe engachi jatsika para exeni engachi uékaaka ambe ma úni.

ANDISÏ UÉTARHIJKI EXENI MÁTERUECHERI KONSIENSIANI

Juchari konsiensia enga Biblia jimbo jorhendakata jaka jarhuataatijtsïni exeni sinchi aua alkoli o nómbe

12, 13. ¿Andiksïsï no májkueni járhatii erachicheri konsiensiecha, ka nénachi jatsiski para exeni ini ambe?

12 Úpiringachi ísku pakarani engachi exejka eskaksï no májkueni járhatiska konsiensiecha kúnguarhikuarhu.  Ménisï kristianu ma úpirindi uandani eska ambe ma no sési jarhaska ka máteru eska sési jarhaska. Exe je ejemplu ma, ju je ménderu alkoliri ambe exeni, máruksï tsitisïndi tánguarhini imeri amiguechani jingoni ka sánisï alkoli ambe arhani, peru máteruechaksï no sési exesïndi ini ambe. ¿Andisï i ambe úkuarhijki ka ambechi jatsiski para eratsini engachi uékaaka úni ambe ma?

13 Uánikua ambe jimbochi no májkueni eratsisïnga. Ma ambe jindesti eskachi ióntki no májkueni irekuarhispka, nochi iámindu májkueni kʼuiripeska. Máru kristianuechaksï miásïndi ambe ka ambe úkua jukakuaspi jurajkuni ka na engaksï jánguarhintaka paraksï úni jurajkuani (1 Reyes 8:38, 39). Eranhaska je eskajtsïni pʼorhembisïnga erachi ma enga ióntki kauichepka ka enga no sési exejka enga alkoli ambe kánhaaka. Engachi jucha pʼímarhipiringa para arhani sáni, jamberi imeri konsiensia úpirindi eska no jiókuarhipiringa. ¿Ikiapirinchi? ¿Afuersachi íntskupirini? Méntku nómbe. Jimbokachi uékasïnga juchari erachini, ka janhanharhisïngachi na enga ima eratsijka, ka i ambechi úsïnga nájkirukajtsïni eianguaka o nómbe andisï no uékajki arhani.

14, 15. ¿Ambe uandanhiata jarhaspi primeru siglurhu indeni ambe jimbo engaksï mámaru járhati konsiensiecha japka, ka ambe arhiaspi Pablu eskaksï úpiringa úni?

14 Primeru siglurhu, apostuli Pablu exespti eskaksï mámaru járhati konsiensiecha jarhaspka kúnguarhikuarhu. Exe je ejemplu ma, máru kristianuechaksï no uékasïrendi arhani tʼirekuani engaksï idoluechani kéjtsïtakuauenga ka engaksï tátsekua merkadurhu atarantaenga (1 Korintu 10:25). Peru apostuli Pablu jiókuarhisïrendi ini tʼirekuani. Para ima, idoluechaksï no ma ambe máespti, jimboka tʼirekua no imecherispka, sino Jeobaeri, enga kueraaka tʼirekuani. Peru Pablu mítispti eskaksï no iáminduecha  májkueni eratsisïrenga. Máruksï ante de kristianu úkuarhini idoluechanksï kómarhiasïrendi, ka jimboksïsï ikichaendi iámindu imani ambe enga idoluecheripka. ¿Ambe úpirini úkuarhini?

15 Apostuli Pablu uandaspti: “Uétarhisïndi eska jucha engachi sánderu uinhapitiika, tekantskua jatsiaka para iámindu inde ambe engaksï újka ima engaksï nótki jánhaskajka, ka eskaksï no uáka ambe enga juchajkumindu jeiapanhintajka. Jimboka Kristu jamberi no méni úska ambe enga jindepka para imajkumindu sési pʼikuarherani” (Roma 15:1, 3). I ambe arhikuekasïndi, eskachi jatsiska para orheta uandanhiani juchari erachichani jimbo ka tátsekua juchantsïni jimbo, ísï eska na úpka tata Jesukristu. Ístu máteru uandantskua jimbo, Pablu uandaspti eska sánderu sésispka para ima no arhani kʼuiripita, para  no pekadu úraani kʼuiripuechani, enga jimbo tata Jesukristu íntspipka tsípikuani (arhinta je 1 Korintu 8:13; 10:23, 24, 31-33).

16. ¿Andichisï no jatsi para jusgariuani imechani engaksï újka imani ambe engajtsïni juchari konsiensia arhijka eska no sési jarhaska?

16 Engaksï máteru erachicha uáka ambe ma ka juchari konsiensiajtsïni arhini eska no sési jarhaska, nochi jatsiska para ambe ma arhiani, jimbokaksï no iáminduecha májkueni eratsisïnga inderi ambe enga ma jatsika para jandiajku erakukuarheni (arhinta je Roma 14:10). Jimboka konsiensia jindeska para juchantsïni jusgarini ka no máteruechani. Nochi mirikurhiaka eska Jesusi uandaspka: “Asï jáma je jusgarpini paraka chájtu no jusgarinhantaaka” (Mateu 7:1). No ma erachi kúnguarhikuarhu anapu jatsisti para arhiani ambe ma máteruechani enga  jindeuaka para konsiensiani úrani. Nochi jatsiska para chkerperani, sino uinhaperperantani uékperakua jingoni, parachi iámindu márku jarhani (Roma 14:19).

KÓNTPERATECHAKSÏ JAUATI ENGACHI AMBAKITI KONSIENSIA JATSIAKA

Ambakiti konsiensia ma xanhatatasïndijtsïni, sésijtsïni pʼikuastasïndi ka pínandikuajtsïni íntskusïndi

17. ¿Ambe úkuarhiskia uánikuecheri konsiensia jingoni?

17 Apostuli Pedru arhiaspti kristianuechani: “Jánguarhi je ambakiti konsiensia ma jatsini” (1 Pedro 3:16, TNM). Sáno iáminduechaksï no jatsisti indeni kóntperatani enga jindeka sési jásï ma konsiensia jatsini Jeobaeri orhepatini. Eska na uandapka Pablu, “jimboka imecheri mintsita ísï chopeaka komueska tiámu jimbo kurhirakatepiringa” (1 Timoteo 4:2). Engaksï uákasïchani tiámu jimbo marka jatsikuajka, imecheri sïkuiri kurhisïndi ka sikatrisi ma úkuarhisïndi ka nóteru ambe ma pʼikuarherasïndia. Májkueni, uánikuecheri konsiensia ístu uarhirini jarhasïndi. Nóksï ambe ma pʼikuarherasïndi. Jimboksïsï no ma ambe ma pʼikuarherajti engaksï no sési ambe újka, no ma ambe pʼikuastaasïndi ka niksï kʼuratseni, niksï no sési pʼikuarherani. Indeksï nóteru kʼuratsekua jukasïndia ka jimboksïsï nóteru ambe ma jimbo uandanhiajti.

18, 19. a) ¿Nénajtsïni uá marhuachini engachi no sési pʼikuarheraaka ka kʼuratseni? b) ¿Ambechi uá engajtsïni útasï no sési pʼikuastani jauaka juchari konsiensia nájkirukachi moantaakia?

18 Uánikua uelta no sésijtsïni pʼikuastasïndi konsiensia, parajtsïni xarhatacheni eskachi no sési úska. Engachi kurhajchaska ka moantani, puáminhantaakachi pekaduechani nájkirukaksï kʼératiuaka. Ísï úkuarhispti rei Dabidini jingoni. Ima kʼérati pekaduechani uáspti, peru Tata Diosï puákuantaspti jimboka mintsita jingoni moantaspka. Jo, niáraspti ikimchani imani no sési jásï ambeni enga úpka ka aiakukuarhespti eska méntkisï kurhajchapiringa Tata Diosïri leichani; jimbosï úpti mítini eska Jeoba ‘ambakitiska ka eska jingontku jarhaska para puátspintani’ (Salmo  51:1-19; 86:5). Peru ménisï nájkirukachi moantajkia ka puáminhantani, útasïchi no sési pʼikuarherasïnga ka kʼuratseni. ¿Ambechi uá enga i ambe úkuarhiaka?

19 Engachi na moantajkia, nóteru ambe ma jimbo marhuasïndia eskajtsïni juchari konsiensia no sési pʼikuastaaka. Engajtsïni mintsita no sési pʼikuastani jauaka, jatsiskachi para ‘uinhaperantani’, jo, jatsiskachi para jakajkutarani eska Jeoba sánderu kʼériska eska ima ambe engachi pʼikuarherajka. Jamberichi jatsiaka para imani ambe úni engachi máteruechani arhiajka eskaksï uáka: “Jatsiskari para miáni eskakini Jeoba uékasïnga ka jiókuarhiniri eskakini puáchentaskia” (arhinta je 1 Juanu 3:19, 20). Engachi pímbinhasï jatsiakia konsiensiani, agustuchi pʼikuarheraaka ka pínandikua jingoni, sésichi pʼikuarheraaka, ma ambe engaksï parhakpinirhu anapuecha no újka úni. Uánikuecha engaksï kʼérati pekaduechani uápka, ústiksïa sési pʼikuarherantani, ka iásïksï ambakiti konsiensia ma jingoni marhuakuxatia Jeobani (1 Korintu 6:11).

20, 21. a) ¿Para ambejtsïni jarhuataa i libru? b) ¿Ambe sésikua íntskusïni Tata Diosï kristianuechani, ka nénachi jatsiski para úrani?

20 I libru úkata jarhasti parajtsïni jarhuatani sési pʼikuarherani ka parachi ambakiti konsiensia ma jatsini engachi jamberi jánguarhintani jauaka ini parhakpini jimbo enga Noambakitirika, ini últimu jurhiatikuechani jimbo. Jo ísïsti, ixuchi no uáka exeani iámindu leichani ka prinsipiuechani engachi uáka úraani juchari irekuarhu. Ka enga konsiensiaeri ambejka, ístu no jatasti lista ma enga uandaaka juramukua ma para mándani ambe. Sánderu sési, xarhatasïndi néna úrani ambe engajtsïni Tata Diosïri Karakata jorhendajka, ka ísïjtsïni jarhuatasïndi parachi úni jorhendani konsiensiani ka para úni marhuani. Nochi mirikurhiaka eska Moisesiri mandamientuechaksï kánikua jukaparharasïrenga leichani, peru “Kristueri mandamientu”, sánderu jukaparharasïndi enga ma úrajka  konsiensiani ka prinsipiuechani engaksï Bibliarhu jaka (Galasia 6:2). Jo ísïsti, Jeobajtsïni kánikua sésikua íntskusïndi. Perujtsïni Biblia arhisïndi eskachi no méni jámaaka úrani indeni sésikuani parachi “tantiari[ni] no sési úni”, sánderu sési, parachi xarhatakuni Jeobani na engachi xáni uékajka (1 Pedru 2:16).

21 Engajtsï cha úndaka mítini Jeobani, úndaskajtsï indeni xanharu jimbo jámani enga tsípikuarhu pájpijka. Parajtsï seguirini jima jámani, kánikua jukaparhakuesti eskajtsï exeaka kómarhikua jingoni, néna úrani Bibliarhu anapu prinsipiuechani, ka tátsekua ísï úni. Ísïjtsï uáka ‘eratsikua jukani’ jimbokajtsï “pʼindeskia eratsini parajtsï úni mítini” (Ebreu 5:14). Enga chári konsiensia sési jorhendakata jauakia Bibliarhu anapu prinsipiuechani jingoni, kánikuaksïni marhuachiati. Ísï eskaksïni lámpara ma na újka erajkutarani, konsiensiajtuksïni jarhuataati ka uáti úni eskajtsï imani ambe uáka enga Tata Diosï jeiapanhintajka. Ka seguruchi jarhaska eskaksïni ístu jarhuataaka Tata Diosïri xénchperakuarhu jarhani.

^ párr. 5 Karakata Ebreaecha, nóksï úrasïndi uandakua ma enga meru jindeuaka “konsiensia”, peru i járhati ejempluechani jimbo xarharasïndi eska konsiensianksïsï arhikuekajka. Nájkiruka ménichanisï mintsita arhikuekajka na engamindu jindeka kʼuiripu ma, ini ka máteru bersikuluecharhu, xarharasïndi eska arhikuekasïnga ambe ma kʼuiripueri incharini: imeri konsiensia. Karakata Griegaechaksï kʼóru jatsisti uandakua ma para “konsiensia”, ka treinta ueltisï jukanharhisti i uandakua.

^ párr. 8 Biblia jorhentpesïndi eska no nomasi uétarhisïnga eska konsiensia sési jauaka. Pablu uandaspti: “Jimboka nájkirukani ji nómbe kʼamanharhintskua exekuarhijka, no ísï jimbo úsïngani uandani eskani nómbe kʼamanharhintskua jatsiska, jimboka juchari Tata jindeska engarini jusgarijka” (1 Korintu 4:4). Ísï jimbo, sánderu jukaparhakua ambe no jindesti eskachi eratsiaka eskachi pímbinhasï ma konsiensia jatsiska. Máruksï no sési kaasïndi kristianuechani —komueska Pablu ante de kristianu úkuarhini— ka útasï imecheri konsiensia no no sési pʼikuastaasïndi, jimbokaksï eratsisïnga eskaksï úxaka ambe enga Tata Diosï uékajka. Ísï jimbo, ambe enga sánderu jukaparhakueka jindesti sési jásï ma konsiensia jatsini Tata Diosïri orhepatini (Ukuecha 23:1; 2 Timoteo 1:3).

^ párr. 10 Uánikua doktorichaksï uandasïndi eska ima enga kauichepka no úsïnga ni sántku alkoli arhani ka sánderu sésiistinha eska méntku no sáni jámaaka arhani.