Exeni ambe enga jataka

Índisi jimbo nirani

Jeobaeri testiguecha

Erakuni idiomani Purépecha

 KURHAMARHIKUA 5

¿Ambe uá úni engajtsïni no sési kámajka eskuela?

¿Ambe uá úni engajtsïni no sési kámajka eskuela?

ANDISÏ JUKAPARHAKUE

Ambe engari uáka, uáti sési péntani ambe ma o úni eska sánderu no sési úkuarhiaka.

¿AMBERI ÚPIRINI TʼU?

Eranhaska arini ambe: Tomasi no uékasïndi nirani eskuela iásï. Ni pauani, ni nóteru ménia. Tanimu kutsïstia enga i ambe uénaka, jiáni engaksï imeri kompanieruecha chkuanderakua ambe arhiapka iáminduechani imeri ambe. Tátsekua, uénasptiksï apoduechani jatsikuani. Ménisï, nema uékantku pʼimasïrendi ka uéjkutaraani libruechani ka ísï jámani enajki no uékantku ísï uéni. Ka ma repentku, nema enga grupu ma jingoni jámani jarhaenga, tátsepani uératini pʼákchakusïrendi ka enga ima pʼirhikuarhinga, iáminduechaksï ísï jámasïrendi enajkiksï no imechepi. Uitsindekua sánderu no sési ambe úkuarhistia: Tomasini amenasa ma niárakusti Interneti jimbo...

¿Amberi úpirini engari Tomasipiringa?

EROKA KA ERATSINTA

Uákari úni ambe ma. Uákari kuájpikuarhini no nemani ataparini. ¿Néna?

  •   ASÏ KASU ÚKUA. Biblia arhisïndi: “Ima enga tontueka sóntku xarhatasïndi iámu imeri ikiatani, peru ima enga mímixetika pʼíngukuarhisïndi eska xáni uáka” (Proverbios 29:11). Engari jánguarhintaska no ikiani o no xarhatakuani, jamberi uáti eska ima engaksïni molestarijka kuatantaaka ka ískuksïni exenia.

  • ASÏ BENGARIKUARHI. Biblia arhisïndi: “Asï jáma je no sési úkuntani imani engaksïni no sési úchiaka” (Roma 12:17). Sánderu no sésiuati engari bengarikuarhiska.

  • KÉNDIKUKU PROBLEMANI. Biblia arhisïndi: “Mímixeti exesïndi no sési jásï ambe ka máteru nani ísï nirasïndi” (Proverbios 22:3). Méntkisï engari uáka, asï ní jimesïsï engaksïni úpiringa no sési úcheni ka sïpakuarhi.

  • ÍSKU PAKATAA CHÍTI MÓKUNTSKUA JINGONI. Biblia arhisïndi: “Enga mókuntskua tekantskua jingonijka, kénditasïndi ikiatapuni” (Proverbios 15:1). Jamberiri uáka terekuarhiparini mókukuantani. Ejemplu ma, engakini nema arhiska eskari tepaska, úpiringari nomasi arhini: “Jo a no, sési japirindi eskani tsʼauapintapiringa sáni”.

  • KÉNDIKUKUA. Nora, enga 19 jatirika, uandasïndi: “Nómbe ma arhiani ka kéndikuni, xarhatasïndi eskari jánhaskatiska, eskari uinhapiska ka eskari jorhenaska pʼíngukuarhini, ma ambe engaksï no újka úni ima engaksï no sési kámpijka” (2 Timoteo 2:24).

  • ASÏ JÁMA CHÉRHIANI. Ima engaksï molestarpijka, kuenta íntskukuarhisïndiksï né chésïni ka né no kuájpikuarhia. Peru, engaksï exeska eskari no jurajkutakuarhisïnga, uánikuaksïni jamberi no ma ambe úchiati.

  • EIANGU NEMANI. Nema enga maestrepka, uandasïndi: “Juchiti konseju jindesti eska ima enga molestarinhajka, uandakuantauaka imechani engaksï no sési kámpijka. Indeni ambesï uétarhijti úni paraksï máteruecha no májkueni nitamakuarhini”.

Engari no chérhiaska, jatsiakari uinhapikua, ambe ma engaksï no jatsika imecha engaksï no sési kámpijka.