Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Mókuntskuecha para 10 kurhamarhikuecha tumbiicheri

 KURHAMARHIKUA 8

¿Ambe jatsiski parani mítini akoso sexualiri ambe?

¿Ambe jatsiski parani mítini akoso sexualiri ambe?

ANDISÏ JUKAPARHAKUE

Mándani uéxurhini, miioni kʼuiripuechaksï —sánderu uátsïcha ka tumbiicha— niárasïndi no sési kánhani sexualmente ka biolarinhani. *

¿AMBERI ÚPIRINI TʼU?

Ima enga Annettini no sési úkupka, kuaskuspti ante de ima kuenta íntskukuarhini ambesï úkuarhini japi. Annette uandasïndi: “Jánguarhintaspka kuájpikuarhini na engani xáni úpka. Jánguarhispka uinhachani, peru no úsïrenga. Pʼákchakuspka, tʼauarhispka, ataspka ka katsïrheni... astakarini kuchiiu ma jimbo atapka. Nóteru jánhaskaspkia ambe úni ka nóteruni úspkia kuájpikuarhini”.

¿Amberi úpirini engari ini ambe nitamanchani japiringa?

EROKA KA ERATSINTA

Nájkirukari jingontku jámaaka —ejemplu ma, engari chúrikua uéraaka—, uákari no sési ambe úkuarhinchani. Biblia uandasïndi eska ménisï ima engaksï sánderu uirijka nóksï andasïnga karrerani ka eska mímixetichani no méntkisï sési nikuasïnga jimboka repentku “úkuarhisïnga o jarhasïnga ambe ma enga ma no erokuarhijka” (Eclesiastés 9:11).

Annette no mítispti imani enga no sési úkupka. Peru ménisïksï imechesïndi engaksï mítiajka o asta parienti ma. Noelia 10 uéxurhintkusï jatiripti enga tumbi ma enga jimesï irekapka biolaripka. Noelia uandasïndi: “Xáni chéxapka ka kʼuratseni engani no nemani uékaenga eianguni”.

 NORI TʼU KULPA JATSISKA

Annette útasï kulpabli pʼikuarherasïndi imani ambe jimbo enga nitamaka. Uandasïndi: “Méntku úndasïnga miántani ambe enga úkuarhipka ima chúri, eratsisïnga eskateruni úpiringa kuájpikuarhini. Ísïsti, nóteruni úspkia manakuarhini engarini na atapkia kuchiiu jimbo, peruni eratsisïnga eskani úpiringa sánderu ambe úni”.

Noeliajtu jánguarhintaxati nóteru kulpabli pʼikuarherania. Uandasïndi: “No jatsispka parani xáni konfiarikuarhini. Juchiti tátichajtsïni jiántkusï jurajkuendi uérakua chʼanani engani juchiti ermana jingoni jámani jarhaenga, peruni no kurhajchaaspka. Peekani fásili jurajkukupka besinuni. Juchiti familia no sési pʼikuarheraspti, ka kulpabli pʼikuarherasïnga ini ambe jimbo. I amberinisï sánderu no sési pʼikuastajti”.

Engari ísï pʼikuarherajka eska Annette ka Noelia, miá eska biolasioni ma méntkisï úkuarhisïnga nájkiruka ma no uékaaka. Máruksï no xáni no sési exesïndi ini ambe, uandaparini eska ima jirinhakuarhiska. Peru no nema jatsisti para xáni no sési jásï ambe nitamani. Engari tʼu ini ambe úkuarhinchaka, uákari seguru jarhani eska no chíti kulpeska.

Ísïsti, uandani fásilisti peru jakajkuni nómbe. Máru engaksï ini ambe úkuarhinchaka, nóksï uandantasïndi, kulpabliksï pʼikuarherasïndi ka imani ambeksï eratsisïndi enga no sési pʼikuastaajka. Peru ¿néni marhuakua no uandantani? ¿Tʼungini o no sési úrini? ¿No sánderu sésii jirinhani jarhuajperata?

UANDANTA AMBE ENGA ÚKUARHIKA

Biblia arhisïndi eska Jobu ini ambe uandaspka enga kómu nitamani japka: “¡Uandaaka, jo, engani no sési nitamakuarhini jaka!” (Job 10:1). Jamberikini marhuachiati májkueni úni. Aianguni nemani engari mintsinharhijka, jarhuataatikini jiókuarhini ambe engari nitamaka ka sési pʼikuarherantani.

¿Andirisï no aiangujki nemani engakini uáka jarhuatani? Inde ambe engari pʼikuarhinhijka, uáti jukari ambeni parari tʼujku mítini.

Annette ísï úspti, ka marhuakuspti. Uandasïndi: “Uandaxespka amiga ma jingoni ka pʼímarhisptirini parani aianguani tsimani orhejtsïkutichani. Sési pʼikuarheraspka ísï úni. Uánikua ueltajtsïni uandaxechespti ka arhisptijtsïni ambe engani uétarhinchani japka kurhani: eskani no ji kulpa jatsispka”.

Noelia aianguaspti imeri tátichani ambe enga úkuarhinchapka. Uandasïndi: “Kánikuajtsïni apoiarispti. Pʼímarhisptijtsïni imani amberi uandaxeni ka ima amberini jarhuataspti no xáni ikiani ni kómu pʼikuarherani”.

Noeliani ístu sési pʼikuastantaspti kómarhini. Uandasïndi: “Jarhuatasptirini Tata Diosï jingoni uandaxeni, ka sánderu jiáni engani ísï pʼikuarheraenga enajkini no nema jingoni uéni uandaxeni íri ambe. Engani kómarhijka Tata Diosïni, úsïnga arhini na engani pʼikuarherajka ka sési pʼikuarherantasïnga”.

Tʼujturi exeaka eska jarhaska ma “tiempu para sési pʼikuarherantani” (Eclesiastés 3:3). Kuidari chíti kuerpuni, na engari pʼikuarherajka ka mintsikuarhi na engari xáni uétarhinchajka. Peru ambe enga sánderu jukaparhakueka jindesti eskari andarheraaka Jeobani, Tata Diosïni enga uinhaperpintajka (2 Korintu 1:3, 4).

 ¿JATIRISKIRIA PARARI MÍTPERANI NEMA JINGONI?

Enga chíti nobiu afuersa uékaaka parari ísku jándikua ambe úni, mátirku arhi: “¡Asïrini pʼárhi”! o “¡Asï ú indeni ambe!”. Asï ísku pakara, nájkirukari ísï pʼikuarheraaka enajkikini jurajkua. Engakini jurajkuska, jindesti jimbokakini no jukaparharasïnga. Tʼuri jukaparhakua ambe jukanchaska: nemani enga respetariauaka chíti jakajkukuechani ka tʼungini.

¿AKOSO SEXUALI I AMBE?

“Engani 13 o 14 ísï jatiripka, eskuelarhu anapu tumbiichajtsïni tátsepanisï jupikachesïrendi brasierini ka ikichakueni jásï ambejtsïni arhisïrendi komu: ‘Exeakari na engari tsípikuarhiaka engari jíndini jingoni jauaka’” (Coretta).

¿Uandapirindi eskaksï i tumbiicha...

  1. ... chʼanaraxapka?

  2. ... koketearikuxapka?

  3. ... ísku ambe ma úkuxapka?

“Autobusirhu, tumbirini ma uénaspti no sési jásï ambe arhini ka p’arhini. Ji pasarkuspka ka arhispka eskarini kéndikuchepiringa. Ísïrini eratispti enajkini loka japi” (Candice).

¿Uandapirindi eska i tumbi...

  1. ... chʼanaraxapka?

  2. ... koketearikuxapka?

  3. ... ísku ambe ma úkuxapka?

“Tumbirini ma interu uéxurhini arhispti eskarini xénchasïrenga ka eska uékasïrenga eskachi mítperapiringa. Ji méntkisï arhisïrenga eska nómbe. Ménisïrini pʼarhixukusïrendi. Ji arhisïrenga eska ísku japiringa, peru ima seguirisïrendi. Ma jurhiani, engani jónduntani japka, imarini pasarchukuspti” (Bethany).

¿Uandapirindi eska i tumbi...

  1. ... chʼanaraxapka?

  2. ... koketearikuxapka?

  3. ... ísku ambe ma úkuxapka?

Tanipuru anapu mókuntskua jindesti opsioni C.

¿Andisï no májkueni, ísku ambe ma útspini ka eska koketearini o chʼanani?

Akoso sexuali no sési pʼikuastasïndi imani enga ísï kánhajka. Problema seguirisïndi nájkiruka kʼuiripu arhiakia imani enga ísï kámajka eska ísku exeaka.

Akoso no chʼanakua máesti: úpirindi fásili xéjperakuarhu niárerani.

^ párr. 4 Nájkiruka informasioni sánderu jindeka para uátsïcha, ístu marhuakuauati tumbiichani.