Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Mókuntskuecha para 10 kurhamarhikuecha tumbiicheri

 KURHAMARHIKUA 6

¿Ambe uá engajtsïni afuersa uékaaka úrani ambe ma?

¿Ambe uá engajtsïni afuersa uékaaka úrani ambe ma?

ANDISÏ JUKAPARHAKUE

Engari jorhenguarhiska kuájpini ambe engari jakajkujka, tʼuri erakuaka ambe úni chíti tsípikua jingoni ka no máteruecha.

¿AMBERI ÚPIRINI TʼU?

Eranhaska arini ambe: Braiani matsaani ísï pʼikuarherasïndi enga exejka eskaksï tsimani kompanieruecha andarheraxaka. I semana, tsimani xanhariksï aiakusti itsutani. Ka ini jingoni tanimueuatia.

Máechakua arhisïndi:

“¿Ménderuri jandiajku jarhaski? I, parari no kuatantani jarhani”.

Pʼitajtarhasïndi ambe ma ka nínharhikuparini, aiakusïndi Braianini.

Braiani erajkusïndi tumbini eska sigarru ma kámaxaka ka sánderu no sési pʼikuarherasïndi.

“Nómbe, diosmeiamu, arhiskakinia eskani ji no...”.

Máteru tumbi seguirisïndi arhini: “¿Amberi úsïni? ¿Nori tekasïni?”.

Braiani nomasi arhisïndi: “Nómbe, no inde ambesti”.

Jimajkani tumbi kamajchakusïndi ka arhini: “Iáta, sigarrujku máesti”.

Primeru kompanieru exerasïndi sigarruni ka sïpasïpamiparini arhisïndi: “Nochi nemani aianguaka. Juchajkuchisï mítiaka”.

¿Amberi úpirini engari Braianipiringa?

 EROKA KA ERATSINTA

¿Exesïniri eskaksï Braianiri kompanieruecha mítika ambe engaksï újka? ¿Exesïniri eskaksï imecha erakukuarheka ambe úni? Peringa nómbe. Jamberiksï újti ini ambe jimbokaksï máteruecha ísï úsïnga. Uékasïndiksï eskaksï máteruecha jiókuarhiauaka ka jimboksïsï jurajkujti eskaksï máteruecha arhiauaka ambe úni.

Engari ini ambe nitamakuarhini japiringa, ¿uékapiriniri ménderueni jámani ka no jurajkuni eskaksïni máteruecha arhipiringa ambe úni?

  1. PREPARARIKUARHI

    Biblia arhisïndi: “Mímixeti exesïndi no sési jásï ambe, ka máteru nani ísï nirasïndi; no jánhaskati seguirisïndi ka no sési uéranchasïndi” (Proverbios 22:3).

    Sáno méntkisï, ma úsïndi tʼuini exeania problemechani. Eranhaska eskari xanharapaxaka ka exendi ma grupu tumbiicheri engaksï itsutani jaka. Engari eratsintaska antesi, sánderuri preparadu jauaka parari úni orhepani uérani.

  2. ERATSINTA

    Biblia arhisïndi: “Jánguarhi je ambakiti konsiensia ma jatsini” (1 Pedru 3:16, TNM).

    Kurhamarhikuarhi: “¿Néna pʼikuarheraa engani úska imani ambe engaksï iáminduecha újka?”. Seguru eskaksïni chíti kompanieruecha klaseri jiókuarhiaka, peru ma tiempujku. Peru ¿nénari pʼikuarheraa tátsekua? ¿Uékasïniri mirikuarhiani chíti jakajkukuechani ka ambe engari jorhendanhaka nomasi parari sési pájperani kompanieruecha jingoni? (Éxodo 23:2).

  3. ERAKU AMBERI UÁ

    Biblia arhisïndi: “Ima enga mímixetika chésïndi ka kéndikukusïndi no sési ambeni” (Proverbios 14:16).

    Ma jurhiani, iáminduchi jatsiska para erakuni ambe úni ka jiókuarhini ambe enga úkuarhiaka. Biblia uandasïndi achaticheri engaksï sési erakupka, komu Jose, Jobu ka Jesusi, peru ístu uandasïndi imecheri engaksï no sési erakupka, komu Kaini, Esau ka Judasï. ¿Amberi uá tʼu?

Biblia uandasïndi eskachi jatsiska para “jurhimbitku” ambe úni (Salmo 37:3). Engari exekia ambe enga uáka úkuarhini chíti úkuecha jimbo ka engari erakukia ambe úni, uandani ambe engari eratsijka, uáti no xáni úkua jukani eskari na eranhaskajka. Ka marhuachiatikini.

Asï uandanhia, nori jatsiska para xáni uánikua ambe arhiani chíti kompanieruechani. Nomasi arhia eska nómbe. Ísturi uáka arhiani eskari no mójtakuaka chíti eratsikua, arhipariani:

  • “Asïrini mintsikani ja”.

  • “Ji no úsïnga indeni ambe”.

  • “Mítiskaria ambe engani eratsijka”.

Ambe engakini jarhuataaka jindesti seguru jarhani ka jirejiresï mókukuani. Engari ísï úska, jamberikini ísku pakataati na engaksïni xáni sóntku chíti kompanieruecha ísku exeaka.

 ¿AMBE UÁ ÚNI ENGAJTSÏNI TERESMARHUAKA?

Engari jurajkuska paraksïni chíti kompanieruecha arhini ambe úni, ísïksïni kámaati komueska robotini ma.

Jamberiksïni kompanieruecha kʼuratsetaati, arhiparinksïni: “¿Amberi úsïni? ¡Asï xáni chémsï!”. Imecha engaksï ísï kámpijka, úraasïndiksï xarhati uandakuechani. ¿Amberi uá úni? Tsimani opsioniri jatsiaska:

  • Asï kasu úkua. Úpiringari nomasi arhiani: “Ísïsti, chésïnga”. Tátsekua, arhia andi.

  • Arhianta ambe ma. Explikari andirisï no ísï újki ka arhi: “Kʼuiripu intelijente ma komueska tʼu no itsutapirindi”.

Engaksïni seguirini jauaka molestarini, kéndiku. Miá: engari sánderu tiempu pakaraska, sánderuksïni afuersa úraati ambe ma. Engari kéndikukuaska, xarhataakari eskari tʼu erakusïnga ambe úni.

Uétarhisïndi kurhanguni eskachi no uáka úni eskajtsïni no ísï kámaaka. Peruri uáka erakuni ambe úni, mátirku arhiani ambe engari eratsijka ka tʼu úni ambe ma. Jimbokari tʼusï jatsika para erakuni ambe úni (Josué 24:15).