Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

¿Ambemindusï jorhentpejki Biblia?

 APENDISI

Tateeri Sena: miántskua ma enga sési pʼikuastajka Tata Diosïni

Tateeri Sena: miántskua ma enga sési pʼikuastajka Tata Diosïni

KRISTIANUECHAKSÏ juramuminhasti miántani Jesusiri uarhikuani, enga ístu arhinhajka “Tateeri sena” (1 Korintu 11:20). ¿Andisï xáni jukaparhakue i miántskua? ¿Káni ka néna jatsiski para úkuarhini?

Jesukristu uaxastasti ini miántskuani uéxurhini 33 ima chúrikua enga judiuecha Paskua úntaenga. Paskua, kʼuínchikua máespti enga mándani uéxurhini únhantaenga 14 de nisani  kalendariu judiurhu. I kutsï nisani, uénasïrendi enga na kʼamarengia primeru semana marsueri enga luna úndenga xarharani. Jima uératini judiuechaksï trese jurhiatikua miiusïrendi paraksï úntani Paskuani enga Jurhiata na inchajtsïkuengia.

Ima chúrikua, Jesusi úntasti Paskuani imeri apostulichani jingoni, ka enga na arhipka Judasï Iskariotini eska uéntapiringa, uaxastasti ini miántskuani enga mítikateka eska Tateeri Sena. Iásï i miántskua úkuarhipirindia ka nóteru Paskua engaksï judiuecha uáenga, jimbosï mándani uéxurhintku jatsiti para únhantani.

Mateu uandantasïndi ambe enga úkuarhipka: “Jesusi kurhinda ma jupikaspti, ka enga na kómarhipkia, kʼepekuspti ka íntsaaspti imeri jorhenguarhitichani, ka arhiaspti: ‘I je ka a je. I, arhikuekasïndi juchiti kuerpu’. Ístu jupikaspti kopa ma, ka enga kómarhipkia Tata Diosïni, íntsaaspti arhiaparini: ‘Itsïma je iáminduecha, jimboka i, arhikuekasïnga juchiti “iurhiri pakatperakueri”, enga tsïtanhaaka uánikuechani jimbo paraksï puáminhantani pekaduechani’” (Mateo 26:26-28, TNM).

Máruksï uandasïndi eska kurhinda Jesusiri kʼuiripita úkuarhintaspka, ka binu Jesusiri iurhiri. Peru Jesusi útasï tsípiti jarhaspti enga íntsaapka kurhindani. ¿Niáraskiksï jiájkani apostulicha arhani Jesusiri kʼuiripitani ka imeri iurhirini? Nómbe, jimboka inde arhikuekapiringa no kurhajchani Tata Diosïri juramukuani ka jindepirindi kʼuiripueri kʼuiripetani arhani (Génesis 9:3, 4; Levítico 17:10). Jesukristu uandaspti: “I kopa arhikuekasïndi jimbanhi paktu enga juchiti iurhiri jimbo úkata jaka, ka enga chánksïni jimbo tsïtanhaaka” (Lucas 22:20TNM). ¿Niáraspi kopa, “jimbanhi paktu” ma úkuarhini? Nómbe, jimboka paktu pakatperakua máeska, ma ambe enga ma no újka exeni ni pʼárhini.

Ísï jimbo, kurhinda ka binu arhikuekasïndiksï ambe ma. Kurhinda arhikuekasïndi Kristueri pímbinhasï kuerpuni. I kurhinda enga Jesusi úrapka, Paskueri pakarakatespti, ka no jukaspti xarhiperakua (Éxodo 12:8). Biblia mémindu úrasïndi xarhiperakuani para pekaduni arhikuekani o no sési ambeni. Ísï jimbo, kurhinda Jesusiri pímbinhasï kuerpuni arhikuekasïndi, kuerpu enga Jesusi íntspika no ma pekadu jingoni (Mateu 16:11, 12; 1 Korintu 5:6, 7; 1 Pedru 2:22; 1 Juanu 2:1, 2).

 Binu charhapiti Jesusiri iurhirini arhikuekasïndi, ka i iurhirisï újti eska marhuauaka jimbanhi pakatperakua. Jesusi uandaspti eska tsïtapiringa iurhirini para kʼuiripu “puáminhantani pekaduechani”. Jesusiri iurhiri jimbo, Jeoba pímbinhasï exeasïndi máru kʼuiripuechani ka íksï úsïndi jimbanhi pakatperakuarhu jarhani imani jingoni (Ebreu 9:14; 10:16, 17). I pakatperakua úsïndi eska 144,000 kʼuiripu niuaka auandarhu irekani. Ka jiniksï juramutiuati ka saserdotini paraksï iámindu kʼuiripuni jarhuatani (Génesis 22:18; Jeremías 31: 31-33; 1 Pedru 2:9; Jaŋaskuecha [Apocalipsis] 5: 9, 10; 14:1-3).

¿Néksï úsïni arhani kurhindani ka binuni Jesusiri Miántskuarhu? Imechajkuksïsï újti arhani engaksï jimbanhi pakatperakuarhu jaka ka engaksï auandarhu irekaaka. Tata Diosïri espiritu santusï pʼikuastaajti eskaksï juramutiuaka auandarhu (Roma 8:16). Ka ístu íchaksï inchasïndi indeni pakatperakuarhu paraksï juramuni Jesusini jingoni (Lucas 22:29, TNM).

Ka ¿ambeksï úsïni imecha engaksï Echerirhu irekaaka para méntkisï enga paraisu máeuakia? Ísï eska Jesusi na juramuka, nirasïndiksï miántani Jesusiri uarhikuani ka nájkirukaksï no arhajka kurhindani ni binuni, jima jarhani, xarhatasïndi eskaksï jukaparharasïnga ini miántskuani. Jeobaeri testiguechaksï, mándani uéxurhini miántasïndi Jesusiri uarhikuani, jurhiatikua 14 de nisani enga na Jurhiata inchajtsïkujkia, jimboka jiáni uénasïnga i jurhiatikua. Nájkirukaksï iámu parhakpinirhu namunitkueka engaksï auandarhu niuaka irekani, i miántskua kánikua jukaparhakuesti para iámindu kristianuecha. Jimbokaksï ísï úsïnga eratsintani na enga xáni uékpijka Tata Diosï ka tata Jesukristu (Juanu 3:16).

 

PARAJTSÏ SÁNDERU MÍTINI

MIÁNTSKUA

Ju je miántani tata Jesukristueri uarhikuani

Kánikua tsípikua jingonksïni pʼímarhisïnga parajtsïni pámbitani ini tánguarhikuarhu enga xáni jukaparhakueka. Ini tánguarhikuarhu, jorhenguarhiakajtsï nénaksïni uá marhuachini tata Jesukristueri tsípikua ka uarhikua.

KURHAMARHIKUECHA ENGAKSÏ SÁNDERU ÚKUARHIJKA

¿Andiksïsï Jeobaeri testiguecha no májkueni úntajki Tateeri Senani ka eska máteru relijionicha?

Tata Jesukristueri uarhikueri miántskua o enga ístu mítikateka komueska Tateeri Sena, kánikua jukaparhakuesti para Jeobaeri testiguecha. Exe je ambe enga uandajka Biblia ini jurhiatikueri ambe.