Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

¿Ambemindusï jorhentpejki Biblia?

 KAPITULU 1

¿Néna jásïski Tata Diosï?

¿Néna jásïski Tata Diosï?
  • ¿Uandanhiajki Tata Diosï chánksïni jimbo?

  • ¿Néna jásïski Tata Diosï? ¿Néna arhinhasïni?

  • ¿Uá ma andarherani imani?

1, 2. Ménichani, ¿andisï jukaparhakue kurhanguarhini ambe ma?

UÁNIKUA ambeksï kurhanguarhisïndi sapiicha engaksï úndajka uandani, ¿no ísïski? Eska i sapi, eratpisïndiksï ka uandani: “¿Né uaaski tsïtsïkichani?”, “¿Andisï janijki?” o “¿Andiksïsï tʼarhechuecha pirejki?”. Nájkirukachi jánguarhintajka eianguani, ménichanchi no mítisïnga ambe arhiani. Ka engachi aianguajkia, ménderuksï uandasïndi: “¿Ka andi?”.

2 Peru no sapiichajkuksïsï pʼindeti kurhanguarhini. Engachi na kʼépajka, seguirisïngachi kurhanguarhini ambe ma, ménisï parachi mítini néna niárani nani, parachi no úkuarhinchani ambe ma o parachi mítini ambe ma. Peru uánikuaksï nóteru kurhanguarhisïndia ka sánderu imani ambe enga kánikua jukaparhakueka. O nóteruksï jánguarhisïndia mítini.

3. ¿Andiksïsï uánikua nóteru jánguarhintajkia jirinhaani mókuntskuechani engaksï jukaparhakueka?

 3 Eratsi je kurhamarhikuani enga i libru jukaparhaka, ístu indechani engaksï pájina tresi ka seisirhu jaka ka engaksï uénakuarhu jaka ini kapitulurhu. Indeksï jindesti máru kurhamarhikuecha enga ma uáka úkuarhiani ka engaksï kánikua jukaparhakueka. Peru uánikuechaksï nóteru jirinhantasïndia mókuntskuechani. ¿Andi? ¿Uá ma Bibliarhu exeantaani? Máruksï uandasïndi eska úkua jukasïnga kurhanguani mókuntskuechani enga Biblia íntspeajka. Máruksï no tekaasïndi kurhanguarhini jimbokaksï chésïnga eskaksï kʼuratsitanhaaka. Máteruksï uandasïndi eska inde ambe sánderu sésiska para relijioniri orhejtsïkutichani jurajkukuani. ¿Nájtsï exesïni cha?

4, 5. ¿Nákiskiksï máru kurhamarhikuecha engaksï jukaparhakueka, ka andichisï jatsi para jirinhantaani mókuntskuechani?

4 Jamberijtsï uékajka mítini irekakueri ambe. Jamberijtsï ménisï kurhamarhikuarhika: “¿Para ambechi úni andajpenuski? ¿I ambejkueski ini tsípikuarhu? ¿Na jásïski Tata Diosï?”. Sési jarhasti ini ambe eratsintani, ka jukaparhakuesti no kuatantani astakajtsï mítiauaka mókuntskuechani engaksï mintsinharhikueuaka. Tata Jesukristu, ambakiti jorhentpiri, uandasti: “Kurhajkuarhi je ka intsïnhaakajtsï. Jirinha je ka exentaakajtsï. Tentenasta je ka uéraminhaakajtsï” (Mateu 7:7).

5 Engajtsï ‘seguiriska jirinhantaani’ mókuntskuechani i kurhamarhikuecheri, exeakajtsï eska no ískueska (Proverbios 2:1-5). Nájkirukaksïni kʼuiripuecha máteru ambe arhika, mókuntskuechaksï jarhasti ka uákajtsï mítiani. Bibliarhuksï jarhasti ka no úkua jukasti para kurhanguani. Ka ístu, íntskusïndijtsïni  erokuarhikua ma ka tsípikuarhita ka jarhuatasïndijtsïni parachi úni sési irekani. Ju je uénani kurhamarhikua ma jingoni engaksï uánikuecha úkuarhijka.

¿PʼAMOJPISÏNI TATA DIOSÏ?

6. ¿Andiksïsï uánikuecha eratsijki eska Tata Diosï no pʼamojpisïnga?

6 Uánikuaksï uandasïndi eska nómbe. Uandasïndiksï eska ménderuenipiringa ambe ma, engajtsïni Tata Diosï pʼamojkupiringa. Irekaxakachi parhakpinirhu ma enga uánikua guerrecha, kurhunhperakua ka uandanhiatecha jaka. Pʼamenchasïngachi, no sésichi nitamakuarhisïnga ka uarhiranchasïngachi nemani. Jimboksïsï máru uandajti: “Engajtsïni Tata Diosï pʼamojkupiringa, ¿nójtsïni kénditachiapirinia uandanhiatechani?”.

7. a) ¿Andichisï uandajki eskaksï uánikua relijioniri orhejtsïkuticha, eratsitarasïnga kʼuiripuni eska Tata Diosï no pʼamojpisïnga? b) ¿Ambemindusï jorhentpejki Biblia kómu nitamakueri ambe?

7 Ístu, uánikua relijioniri orhejtsïkutichaksï eratsitarasïndi kʼuiripuni eska Tata Diosï no pʼamojpisïnga. Enga ambe ma úkuarhijka, uandasïndiksï eska Tata Diosï ísï uékaska. Ísïksï uandaparini, Tata Diosïnksï kulparini jarhasïndi no sési jásï nitamakuechani jimbo. Peru ¿ísïski? ¿Ambemindusï jorhentpejki Biblia? Santiagu 1:13 uandasïndi: “Enga nema [tsʼéjkunhani] jarhajka, asï tantiarie eska Diosïsï [tsʼéjkujka], jimboka Diosï no úsïnga [tsʼéjkunhani] para no sési úni, ka níjtu ima újki [tsʼéjpini]”. Ísï jimbo, no Tata Diosïsï újti eska no sési jásï ambe jauaka (arhinta je Job 34:10-12). Ima jurajkusïndi eska úkuarhiaka no sési jásï ambe, peru no májkuenisti úni ambe ma ka jurajkuni eska úkuarhiaka.

8, 9. a) ¿Ambe ejemplu jimbojtsï uá uandantani eska no májkueniska úni no sési jásï ambe ka jurajkuni eska úkuarhiaka? b) ¿Andisï no sési japirini Tata Diosïni kulparini enga jurajkuni jaka kʼuiripuni para no sési ambe úni?

 8 Eranhaska je ma táti jánhaskati ka uékpitini, enga uájpa kʼérini ma kámajka. I nóteru uékasïndia kurhandini ka nirasïndi támisï irekani, ka tátemba no pʼíngusïndi. Tátsekua, uájpa no sési ambe úsïndi ka uandanhiatechani jatsiasïndi. ¿Uandapirintsï cha eska tátemba kulpa jatsiska? Nómbe (Lukasʌ 15:11-13). Májkueni, Tata Diosï no pʼínguasïndi kʼuiripuechani engaksï uékajka no sési jásï ambe úni, peru i ambe no arhikuekasïndi eska imasï újka eskaksï no sési nitamakuarhiaka, jimboka imaksïsï jirinhakuarhijka. Ísï jimbo, no sési japirindi Tata Diosïni kulparini no sési jásï ambe jimbo enga úkuarhini jaka.

9 Tata Diosï, ambakiti ambe jimbo jurajkuaxati kʼuiripuechani eskaksï seguiriaka imecheri no sési jásï xanharuni. Ima kánikua mímixetisti ka imajtsïni kueraasti, ísï jimbo, ima no jatsisti parajtsïni aianguni andisï újki ambe ma. Perujtsïni aiangusïndi jimbokajtsïni uékasïnga. Kapitulu 11 jimbo, exeakachi andisï ísï újki. Perujtsï uáka seguru jarhani eska Tata Diosï no kulpa jatsiska juchari uandanhiatechani jimbo. Sánderu sési, Tata Diosïjkusï uáti sési peentani iámindu ambe (Isaías 33:2).

10. ¿Andichisï uá mintsikani eska Tata Diosï kʼamajkuaka iámu ambeni engajtsïni no sési pʼikuastajka?

10 Tata Diosï pímbinhasïsti (Jaŋaskuecha [Apocalipsis] 4:8). I arhikuekasïndi eska nómbe ma no sési jásï ambe jarhaska imani jingoni. Ísï jimbo, uákachi kánikua mintsikani imani, ma ambe engachi no újka úni  kʼuiripuni jingoni, jimbokaksï méni no sési jásï ambe úsïnga. Ka ni ima juramuti enga jurhimbiti ánchikuarhijka jatsi uinhapikua para sési peentani imani ambe engaksï no sési úricha újka. Peru no nema sánderu uinhapitisti eska Tata Diosï. Ima kʼóru uáti kénditani iámu kómu nitamakuani ka no sési jásï ambeni enga úkuarhini jaka, ka ísï uáti. Enga ima kʼamajkuaka no sési jásï ambeni, jindeuati para méntkisï (arhinta je Salmo 37:9-11).

¿NÉNA PʼIKUARHERASÏNI TATA DIOSÏ ENGACHI NO SÉSI KÁNHAJKA?

11. a) ¿Néna exesïni Tata Diosï enga nema no sési kánhajka? b) ¿Néna pʼikuarherasïni engachi kómu nitamakuarhejka?

11 ¿Néna pʼikuarherasïni Tata Diosï inde ambe jimbo enga úkuarhini jaka parhakpinirhu ka juchantsïni jingoni? Biblia jorhentpesïndi eska ima “uékasïnga jurhimbikuani” (Salmo 37:28). Ima méntkisï exeni jarhasïndi ambe sési úkuarhisïni ka ambe nómbe, ka no tsitisïndi enga nema no sési kánhajka. Biblia uandasïndi eska Tata Diosïri “mintsita kómu pʼikuarheraspka” enga ióntki parhakpinirhu uinipka no sési jásï ambe (Génesis 6:5, 6). Ka Tata Diosï útasï májkuenisti (Santiagu 1:17). Útasï kurhunhisïndi no sési jásï ambeni ka pʼamojkuasïndi imechani engaksï kómu nitamakuarhejka. Bibliajtsïni arhisïndi: “Ima pendienti pásïn[di] chánksïni jimbo” (arhinta je 1 Pedru 5: 7).

Engajtsï uékajka eskaksïni nema mítiaka aiangusïngajtsï chári arhinhakuani, ¿no ísïski? Bibliarhu, Tata Diosïjtsïni arhisïndi na enga arhinhajka

12, 13. a) ¿Andichisï uékpijki, ka ini uékperakua jimbo, nénachi exesïni no sési jásï ambeni enga úkuarhini jaka? b) ¿Andichisï seguru jaki eska Tata Diosï kʼamajkuaka no sési jásï ambeni?

12 ¿Andichisï seguru jaki eska Tata Diosï no sési pʼikuarherasïnga engachi no sési nitamakuarhejka?  Ju je exeni máteru ambe engajtsïni exerajka eska ísïska. Biblia jorhentpesïndi eska Tata Diosï májkueni jásï kueraaska kʼuiripuni eska ima (Génesis 1:26). Ísï jimbo, engachi újka xarhatani ambakiti pʼikuarherakuechani, jindesti jimboka Tata Diosïjtu xarhataasïnga. Ka exe je, ¿pʼamojkuasïntsï ambakiti kʼuiripuechani engaksï no sési nitamakuarhejka? Engajtsï ísï újka, uákajtsï seguru jarhani eska Tata Diosï sánderu no sési pʼikuarherasïnga.

13 Ma ambakiti ambe enga újka kʼuiripu, jindeesti uékpini. Ini jimbojtuchi májkueniska eska Tata Diosï, jimboka Biblia jorhentpesïnga eska Tata “Diosï jindeska uékperakua” (1 Juanu 4:8). Jucha uékpesïnga jimboka Tata Diosï uékpesïnga. Engajtsï jatsipiringa uinhapikua para kʼamajkuni iámindu no sési jásï ambeni ka no sési kámpikuani, ¿kʼamajkupirintsï? Chári uékperakua jimbo, ¿nójtsï ísï úpirini? ¡Jo, ísïjtsï úpiringa! Ísï jimbo, uákajtsï mintsikani eska Tata Diosï kʼamajkuauaka iámu uandanhiatechani engaksï ini parhakpini jimbo jaka. Eiatsperakuecha engaksï uénakuarhu jaka ini librurhu, nóksï ískuesti: Tata Diosï uaasti ka niáraatiksï ísï úkuarhini. Peru parachi jakajkuani, uétarhisïndi mítini imani Tata Diosïni enga eiatspika i ambe.

TATA DIOSÏ UÉKASÏNDI ESKAJTSÏ MÍTIAKA

Biblia jorhentpesïndi eska Jeoba kueraaska iámindu ambe

14. ¿Nákiski Tata Diosïri arhinhakua, ka andichisï jatsi para úrani?

14 ¿Ambejtsï úsïni engajtsï uékajka eskaksïni nema mítiaka? Arhintsï chári arhinhakuani, ¿no ísïski? Peru Tata Diosï, ¿na arhinhasïni? Uánikua relijionichaksï jorhentpesïndi eska ima, “Diosï” o “Tata” arhinhasïnga, peruksï inde no arhinhakuesti. Xántku  ísïsti eska nemani arhini, “rei” o “presidenti”. Biblia uandasïndi eskaksï Tata Diosïni mámaru uandajpasïnga, ménichani “Diosï” o “Tata”. Peru ístu jorhentpesïndi eska Tata Diosï jatsikuarheska arhinhakua ma: Jeoba. Salmo 83:18 uandasïndi: “Tʼu, engari arhinhajka Jeoba, tʼujkuri jindeska enga Sánderu Kʼéri ambeeka iámu parhakpinirhu”. Enga chári Biblia no jukanharhika i arhinhakua, pʼímarhisïngaksïni parajtsï mítini andi, ini librurhu, apendisirhu “Tata Diosïri arhinhakua: na enga úranhajka ka ambe enga arhikuekajka”. Karakata orijinalicha jimbo, siete mili ueltisï jukanharhisti inde arhinhakua. Ísï jimbo, Jeoba uékasïndi eskajtsï mítiaka imeri arhinhakuani ka eskajtsï úraaka. Úpiringachi uandani eska Tata Diosï, Bibliani úrasïnga parajtsï cha úni mítini.

15. ¿Ambe arhikuekasïni Jeobaeri arhinhakua?

15 Inde arhinhakua Jeoba, enga Tata Diosï erakukuarheka, ambakiti ambe arhikuekasïndi. Arhikuekasïndi eska Tata Diosï úsïnga iámindu ambe enga eiatspijka ka eska uáka úni iámindu ambe enga uékajka. * Tata Diosïri arhinhakua májkuesti ka imajkusï újti ísï arhinhani. No nema jarhasti enga májkuenika eska Jeoba. Ju je exeni andi.

16, 17. ¿Ambejtsïni jorhendasïni Jeobaeri ambe enga arhinhajka: a) “Engari iámindu ambe újka úni”? b) “Ima enga méntkisï jindeeka Rei”? c) “Tʼu kueraaska iámindu ambe”?

 16 Exeskachia eska Salmo 83:18 uandasïnga Jeobaeri ambe: “Tʼujkuri jindeska enga Sánderu Kʼéri ambeeka”. Ístu, Jeobajkusï arhinhajti “Engari iámindu ambe újka úni”. Jaŋaskuecha 15:3 uandasïndi: “Juchari Tata Diosï engari iámindu ambe újka úni, ka engari jindeka Rei chíti erakukatecheri, chíti úkuecha sési jimbo kʼéri ambesti ka chérpikueni járhanksï, ka chíti xanharuecha jurhimbitkuesti ka sési jimboenksï”. Enga arhinhajka  eska “iámindu ambe ú[sïnga] úni” arhikuekasïndi eska no jarhaska nema sánderu uinhapiti eska Jeoba. No ma uinhapikua terokuntasïndi Jeobaeri jingoni. Ka 1 Timoteo 1:17 arhisïndi Jeobani: “Ima enga méntkisï jindeeka Rei”, i uandakuechajtsïni miátantasïndi máteru ambe: eska imajku jindeska enga méntkisï jaka. Jaŋaskuecha 1:8 uandasïndi: “Juchari Tata enga méntkisï jindeeka ka enga jindeepka ka enga méntkisï jindeaka”. Eratsintani i ambe ískujtsïni pakatasïndi, ¿no ísïski?

17 No nema jarhasti enga májkuenika eska Jeoba: jimboka imajku Kueraajpiriska. Jaŋaskuecha 4:11 uandasïndi: “Tʼu juchari Tata, jukanchaskari tʼíntskua intsïnhani ka arhinhani eskari kʼéri ambeeska ka uinhapikua jatsindi, jimboka tʼu kueraaska iámindu ambe,  ka jimbokari tʼu ísï uékaska, ísï jimbosïksï jarhani jati ka kueraakatenksï”. Jeoba kueraasti iámindu ambe enga jaka: ánjilichani engaksï auandarhu jaka, jóskuechani, frutechani, kuruchechani engaksï marirhu ka riuecharhu jaka, ka uánikua máteru ambe.

¿UAAJTSÏ ANDARHERANI JEOBANI?

18. ¿Andiksïsï máru uandajki eskaksï no méni uáka andarherani Tata Diosïni, peru ambe jorhentpisïni Biblia?

18 Jarhastiksï máru engaksï chéni pʼikuarherajka mítini na enga jindeeka Jeoba. Exesïndiksï eska Tata Diosï jukari iauani jarhaska paraksï úni andarherani, ka máruksï eratsisïndi eska ima no jamberi miáuasïnga. ¿Sési jaki ísï eratsini? Biblia ménderueni jorhentpesïndi, uandasïndi eska Jeoba “no iauani ja[rhas]ka chánksïni jingoni” (Ukuecha 17:27). Ístujtsïni arhisïndi: “Andarhiera je Diosïni, ka imajtuksïni andarhierati chánksïni” (Santiagu 4:8).

19. a) ¿Nénachi uá andarherani Tata Diosïni, ka nákichi kóntperata intsïnhaa? b) ¿Ambejtsï sánderu tsitisïni Tata Diosïri ambe?

19 ¿Nénajtsï uá andarherani Tata Kueraajpirini? Para uénani, asï jurajku je úni ambe engajtsï úni jaka iáiasï: jánguarhintsï je mítini uánikua ambe Tata Diosïri. Jesusi uandasti: “I jindesti tsípikua para méntkisï, eskaksïni mítiaka tʼunksïni engari tʼujku jindeeka Diosï engari sési jimboeka, ka ístu Jesukristuni engari tʼu axaka” (Juanu 17:3). Ísïsti, Biblia jorhentpesïndi eska mítini Jeobaeri ka Jesusiri ambe uáti eskachi jatsiaka “tsípikua para méntkisï”. Exeskachia eska Tata “Diosï jindes[ka] uékperakua” (1 Juanu 4:16). Peru ístu Jeoba uánikua máteru ambakiti ambe xarhatasïndi, i ambe úsïndi eskachi uékaaka andarherani. Biblia uandasïndi eska  “uékpitiska ka pʼamojpitini, eska ióndasïnga ikiani ka eska para méntkisï uékpesïnga ka eska jurhimbitiska” (Éxodo 34:6). Tata Diosï “sési kámpisïndi ka [...] jingontku jarhasïndi para puátspintani” (Salmo 86:5). Tekantskua jatsisti (2 Pedru 3:9). Mintsinharhikuesti (Ebreu 10:23). Engajtsï na arhintapani jauaka Bibliani, exeakajtsï eska Jeoba xarhatasïnga ini ambe ka uánikua máteru ambe.

20-22. a) ¿Uáchi andarherani Tata Diosïni nájkirukachi no exejka? Uandanta je. b) ¿Ambeksïni úpirini arhini máru kʼuiripuecha, peru ambejtsï jatsiski para úni?

20 Ísïsti, nochi úsïnga exeni Tata Diosïni, jimboka ima Espiritu máeska (Juanu 1:18; 4:24; 1 Timoteo 1:17). Peru Biblia uandasïndi na jásïski Tata Diosï. Eska na uandapka salmista, cha uáka exeni “na enga xáni sési kámpijka Jeoba” (Salmo 27:4; Roma 1:20). Engajtsï sánderu mítiska imeri ambe, sánderujtsï jakajkuaka, uékaaka ka andarheraaka.

Uékperakua engajtsïni Tata Diosï xarhatachijka, sánderu kʼéristi eska uékperakua enga ma táti uékpiti xarhatakujka uájpani

21 Sánhani arhiakajtsï kurhanguni andisï Biblia uandajki eskachi ísï exeaka eska juchari Táti (Mateu 6:9). Imajtsïni íntskusti tsípikuani ka ístu uékasïndi eskachi sési irekaaka, ísï eska ma táti uékpiti na uékajka eskaksï irekaaka imeri uájpecha (Salmo 36:9). Bibliajtujtsïni arhisïndi eskachi uáka Jeobaeri amigueni (Santiagu 2:23). ¡Eranhaska je: chájtsï uáka Tata Kueraajpiriri amigueni!

22 Engajtsï sánderu jorhenguarhini jauakia Bibliaeri ambe, jauatiksï máru kʼuiripuecha engaksïni arhiaka eskajtsï nóteru jorhenguarhiakia. Jamberiksïni ísï arhiati jimbokaksï uandanhiajka eskajtsï mójtakuaka chári relijionini. Peru asï jurajku je eskaksïni nema pʼínguaka parajtsï cha nóteru únia Tata Diosïri  amigueni, jimboka i jindeska sánderu ambakiti pájperakua engajtsï uáka jatsini.

23, 24. a) ¿Andijtsïsï no jatsi para kʼuratseni kurhanguarhini ambe engajtsï jorhenguarhini jaka? b) ¿Ambechi jorhenguarhia máteru kapitulurhu?

23 Jauati máru ambe engajtsï no kurhanguaka uénakuarhu. Peru asï kʼuratsi je jarhuajperata kurhajkuarhini. Jesusi uandasti eska sésiska kaxumbitiini ísï eska sapi ma (Mateu 18:2-4). Ka mítiskachia eskaksï sapiicha méntku kurhanguarhini jarhasïnga ambe ma. Tata Diosï uékasïndi eskajtsï mítiauaka mókuntskuechani. Biblia sési uandasïndi máru ióntki anapu kʼuiripuecheri engaksï uékaenga mítini Tata Diosïni. Ísï jimbo, jánguarhintasptiksï sési jorhenguarhini Karakatechani paraksï mítini abersieka ísïpka ambe engaksï jorhenguarhini japka (arhinta je Ukuecha 17:11).

24 Parachi úni sánderu sési mítini Jeobani, uétarhisïndi arhintani Bibliani, libru ma enga no májkuenika eska máteruecha. ¿Andisï no májkueni? Ini ambechi máteru kapitulurhu exeaka.

^ párr. 15 Uákajtsï mítini ambe sánderu arhikuekasïni ka na enga jatsika para úrakuarhini Tata Diosïri arhinhakua, apendisirhu “Tata Diosïri arhinhakua: na enga úranhajka ka ambe enga arhikuekajka”.