Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

¿Ambemindusï jorhentpejki Biblia?

 APENDISI

¿Ambeski “Kʼéri Babilonia”?

¿Ambeski “Kʼéri Babilonia”?

KARAKATA enga arhinhajka Jaŋaskuecha o Apokalipsisi, jukanharhiasti uandakuechani engaksï no jatsika para ísï kurhangukuarhini eskaksï na karakata jaka (Jaŋaskuecha 1:1). Exe je ejemplu ma, ini librurhu, uandanhasïndi uarhiiti ísku jándiri ma enga tserhukuarhu jukarhutini jaka ini nombrini “Kʼéri Babilonia”. Ka arhisïndi eska i uarhiiti “uánikua kʼuiripuecha ka nasionicha” jimbo uaxakatixaka (Jaŋaskuecha 17:1, 5, 15). Jimboka no ma uarhiiti úpiringa úni inde ambe, Kʼéri Babilonia no uarhiiti máesti, máteru ambe arhikuekajti. Peru jiájkani: ¿ambe arhikuekasïni i uarhiiti ísku jándi?

Jaŋaskuecha 17:18 aiangusïndijtsïni eska jindeska “kʼéri ireta enga juramukua jatsika para iámindu reichani jingoni engaksï parhakpinirhu jaka”. I uandakua “kʼéri ireta”, eratsitarasïndijtsïni eska jindeska ma grupu kʼuiripuecheri engaksï sési kúnguarhitini jaka. Ístu, i “kʼéri ireta” juramukuasïndi “reichani [...] engaksï parhakpinirhu jaka”. Ísï jimbo, Kʼéri Babilonia kúnguarhikua máeti enga kánikua juramukua o uinhapikua jatsika iámu parhakpinirhu. I kúnguarhikua relijioniri ambesti ka no politiku ka ni komersiueri ambe. Ju je exeni andi.

Mítiskachi eska Kʼéri Babilonia no politikani arhikuekasïnga, jimboka Biblia uandasïnga eskaksï “parhakpinirhu anapu reicha” [o parhakpinirhu anapu juramuticha] imani jingonisïksï ísku jándi úkuarheti”. Ísku jándikua úkuarhisïndi, jimboka márku ánchikuarhixaka parhakpinirhu anapu juramutichani jingoni ka úsïndi ambe enga uétarhiaka para úni juramukuani imechani ka para úni úni ambe enga uékaaka. Jimbochisï újka kurhanguni andisï Biblia arhijki “kʼéri ísku jándi” (Jaŋaskuecha 17:1, 2; Santiagu 4:4).

Biblia uandasïndi eska enga i uarhiiti kʼamajkunhaaka, lástimaksï uáka “iámindu komersianticha” o iámindu imecha engaksï ánchitani jaka kʼérati negosiuechani parhakpinirhu. Ísï jimbo, Kʼéri Babilonia nóksï jindesti grupuecha engaksï kʼérati negosiuechani ánchitaajka parhakpinirhu. Ka i ambe ísïsti, jimbokaksï máru textuecha uandasïnga eskaksï reicha ka komersianticha “iauani” jatinksï pakaraaka exeni (Jaŋaskuecha 18:3, 9, 10, 15-17). Ísï jimbo, úsïngachi jánhaskani jiájkani eska Kʼéri  Babilonia no politikaeri ambeska, ka ni negosiuecheri ambe, sánderu sési relijioniri ambesti.

Jarhasti máteru ambe enga xarhatajka eska Kʼéri Babilonia relijioniri ambeska: Bibliajtsïni, sési eiangusïndi eska Kʼéri Babilonia enganiariasïnga iámu nasionichani inderi “sïkuamiku[echa] jimbo” (Jaŋaskuecha 18:23). Iámindu ambe enga sïkuamikueri ambeeka, demoniuecheristi. Jimbochisï újka kurhanguni andisï Biblia arhijki eska Kʼéri Babiloniani, jindeska “ma kʼumanchikua Noambakitiri espirituecheri” (Jaŋaskuecha 18:2; Deuteronomio 18:10-12). Ka ístuchi exesïnga eska i kúnguarhikua no jurhimbiti relijionicheri, kánikua ikiakuaasïnga imechani engaksï jurhimbiti relijionini kámajka, jimbosï xáni no sési kaajti “uandajtsïkpitich[ani]” ka “Diosïri erakukatech[ani]” (Jaŋaskuecha 18:24). Xáni kurhunhisïndi jurhimbiti relijionini, enga niárajka jamberi no sési kaani “Jesusiri testiguechani” ka niárasïndi asta uándikuani (Revelación 17:6, TNM). Ísï jimbo, Kʼéri Babilonia, iámindu relijioni no jurhimbitichestiksï engaksï parhakpinirhu jaka ka engaksï no jiókuarhijka Jeobani komueska imecheri Tata Diosï.