Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

¿Ambemindusï jorhentpejki Biblia?

 KAPITULU 16

Jurhimbiti relijioni jingoni úkuarhi je

Jurhimbiti relijioni jingoni úkuarhi je
  • ¿Ambe jorhentpisïni Biblia, diosï úkatecheri?

  • ¿Náksï exesïni Jesusiri chúxapaticha relijioniri kʼuínchikuechani?

  • ¿Nénajtsï uandantaa ambe engajtsï jakajkujka no nemani no sési pʼikuastaparini?

1, 2. ¿Náki kurhamarhikuantsï úkuarhia engajtsï jurajkukia relijioni no jurhimbitini, ka andisï jukaparhakue úkuarhini ini kurhamarhikuani?

ERANHASKA je eska nema no sési jánharhitaska itsïni engajtsï itsïmajka. Ka eska i itsï, uákaksïni pʼamenchatani ka asta uándikunksïni. ¿Ambejtsï úpirini? Nóteru arhania imani itsï. Peru nájkirukajtsï nóteru auakia, jatsiskajtsï para i ambe kurhamarhikuarhini: “¿No sésirini úchi ima itsï engani akaia?”.

2 Sáno májkuenisti relijioni no jurhimbiti jingoni. Biblia jorhentpesïndi eska relijioni no jurhimbiti jáxetixaka no jurhimbiti jakajkukuechani jingoni ka no sési járhati úkuechani jingoni (2 Korintu 6:17). Jimbosï xáni jukaparhakueti uéparhakuntani “Kʼéri ireta Babilonia” uératini, Kʼéri Babilonia, jindesti iámindu parhakpini anapu no jurhimbiti relijionicha engaksï no jiókuarhijka Jeobani komueska imecheri Tata Diosï (Jaŋaskuecha [Apocalipsis] 18:2, 4). ¿Uéparhakuntaskijtsïa? Engajtsï ísï úkia, kánikua sési jarhasti. Peru no solu uétarhisïndi jurajkuni relijioni no jurhimbitini, ka níjtu karakata ma axakuani nani engajtsï arhiauaka eskajtsï nóteru imecha jingoniskia. Ístu uétarhisïndi kurhamarhikuarhini: “¿Útasïni úxaki ambe ma enga no jurhimbiti relijionirhu anapueka?”. Exeakachi máru ejempluechani.

 DIOSÏ ÚKATECHANI KÓMARHIANI KA UARHIRICHANI KÉJTSÏTAKUANI

3. a) Uanda je ambe uandasïni Biblia para diosï úkatechani úraani ka andiksïsï máru úkua exejki jiókuarhini na enga Tata Diosï exeajka ini ambe. b) Enga cha jatsika ambe ma enga no jurhimbiti relijionirhu úranhajka, ¿ambejtsï jatsiski para úni indeni ambe jingoni?

3 Jarhastiksï kʼuiripuecha engaksï iónisï jatsikuarhiakia krusichani, diosï úkatechani ka máteru i jásï ambe. ¿Chájtujtsï jatsiaski? Enga ísïka, úpiringajtsï eratsini eska no sési jarhaska kómarhini Tata Diosïni no ma ambe úraparini. Jamberijtsï kánikua uékaajka indeni ambe engajtsï jatsikuarhika. Peru Tata Diosïsï uandajti na engachi jatsika para marhuakuni, Biblia jorhentpesïndi eska no jeiapanhintasïnga eskachi diosï úkatechani úrauaaka (arhinta je Éxodo 20:4, 5; Salmo 115:4-8; Isaías 42:8; 1 Juanu 5:21). Ísï jimbo, parajtsï úni jurhimbiti relijioni jingoni úkuarhini, jatsiskajtsï para tsïtani iámindu imani ambe enga no jurhimbiti relijioniri anapueka. Jánguarhi je ísï exeni ini ambe eska Jeoba na exejka: eska “ma ambe enga kánikua ikichakueni jásï ambeeka” (Deuteronomio 27:15).

4. a) ¿Andisï no ma ambe jimbo marhuajki uarhirichani kéjtsïtakuani? b) ¿Andisï Jeoba arhiapi Israelitechani eskaksï no ma jásï sïkuamikua jámapiringa niátani?

 4 Máteru ambejtu enga no jurhimbiti relijionicharhu únhajka, jindesti uarhirichani kéjtsïtakuani. Ante de jorhenguarhinksï jurhimbikua Bibliaeri ambe, máruksï jakajkusïrendi eskaksï uarhiricha nirasïrenga irekani ma nani ísï enga no xarharajka ka eskaksï úsïnga jarhuataani kʼuiripuechani o no sési úkuani. Jamberijtsï kánikua jánguarhintenga úni ambe ma, parakaksïni chári uarhiricha no ma ambe úchipiringa. Peru eskajtsï na jorhenguarhikia ini librurhu, kapitulu 6 jimbo, uarhirichaksï no nani tsípiti jarhasïndi. Jimbosï no ma ambe jimbo marhuajti uékani imecha jingoni uandontskuarhini. Iámindu ima ambe enga ísï xarharajka eska juchari uarhirisï úni jaka, demoniuechaksïsï úni jarhajti. Jimbosï Jeoba arhipti ireta Israelini eskaksï no jámapiringa uékani uarhirichani jingoni uandontskuarhini, ni máteru jásï sïkuamikua ambe niátani (arhinta je Deuteronomio 18:10-12).

5. ¿Ambejtsï uá cha engajtsï asta iásï jamberi útasï úraani jaka diosï úkatechani o engajtsï uarhirichani kéjtsïtakuani jaka?

5 ¿Ambejtsï uá enga ima relijioni engajtsï jimbo jámani jaka, úraajka diosï úkatechani o enga uarhirichani kéjtsïtakuajka? Iatsitakuarhu arhianta je Bibliarhu, indeni textuechani engaksï xarhatajka na enga exejka Tata Diosï indeni úkuechani. Pauani pauani kómarhi je Jeobani, ka arhi je eskajtsï uékasïnga jurhimbiti relijioni jingonini ka eskaksïni jarhuataaka parajtsï chájtu májkueni eratsini eska ima (Isaías 55:9).

ORHETA KRISTIANUECHAKSÏ NO ÚNTASÏRENDI NABIDADINI

6, 7. a) Uanda je seguni nénksï miántaparini úntasïni Nabidadini ka sienga primeru siglurhu anapu kristianuecha úntaeni. b) ¿Néna exenhasïreni kumpleaniuecha jiáni engaksï orheta Jesusiri chúxapaticha japka?

6 Engachi uaantaska kʼuínchikuechani engaksï meru pʼindenhaka únhantani, juchari marhuakukua Jeobani jimbo, úpirindi jeuekuarhini ka no sési jáxeni no jurhimbiti relijioni jimbo. Nabidadi, ejemplu máesti íri ambe. Uandanhasïndi eska i kʼuínchikua jindeska para tata Jesukristueri andajpenukuani  miántani, ka sáno iámindu relijionicha engaksï uandajka eskaksï Kristuni chúxapasïnga, úntasïndiksï ini kʼuínchikuani. Peru no ma ambe jarhasti enga xarhatajka eskaksï primeru siglurhu anapu Jesusiri chúxapaticha, úntasïrenga ini kʼuínchikuani. Libru ma enga arhinhajka Los orígenes sagrados de las cosas profundas arhisïndi: “Desdeka tata Jesukristu andajpenupka ka asta dosientu uéxurhini ísï tátsekua, no nema mítispti káni andajpenuspi tata Jesukristu ka kasi no nema interesi pásïrendi ini ambe jimbo”.

7 Ka nájkirukaksï Jesusiri jorhenguarhiticha mítipiringa káni andajpenuspi Jesusi, nóksï méni úntapirindi Jesusiri kumpleaniuni. ¿Andi? Jimbokaksï kristianuecha “ini kʼuínchikuechanksï ísï exeasïrenga [...] komueska pʼindekuecha engaksï imecheripka engaksï no jakajkuenga tata Jesukristuni” (Las cosas nuestras de cada día). Biblia tsimantku kumpleaniuechantkusï uandaajti ka íksï, tsimani juramuticherispti engaksï no marhuakuenga Jeobani (Génesis 40:20; Markusʌ 6:21). Engaksï no jakajkuenga tata Jesukristuni, ístuksï uaantasïrendi i járhati kʼuínchikuechani para imecheri no jurhimbiti diosïchani. Romanuechaksï 24 de maiuni, kumpleaniu úkuntasïrendi ma diosïni enga Diana arhinhaenga ka pauandikua, kumpleaniuksï úkuntasïrendi diosï Jurhiaterini enga Apolusi arhinhaenga. Ísï jimbo, kumpleaniuechaksï jindespti para no jurhimbiti diosïchani kómarhiani ka no jindespti ma ambe engaksï Kristueri chúxapaticha uáenga.

8. Uandanta je néna jókukuarhisïni kumpleaniuecha, no jurhimbiti jakajkukuechani jingoni.

8 Máteru ambe jimbo engaksï primeru siglurhu anapu kristianuecha no úntapiringa kʼuínchikua Jesusiri andajpenukuerini, jindespti: jimbokaksï jamberi mítipka eskaksï kumpleaniuecha no jurhimbiti jakajkukuechani jimbo uaxastakata jarhaspka. Uánikua ióntki anapu grieguecha ka romanuecha, jakajkusïrendiksï eska mándani kʼuiripu jatsikuarhisïrenga espiritu ma enga kuájchakuenga, ka enga jima japka enga ima sapi andajpenupka, ka eska i espiritu, kuájchakusïrenga xáni tiempu enga xáni irekapiringa. “I espiritu pájperata ma jatsipti imani diosïni jingoni enga uéxurhini  andangutenga ima mísmu jurhiatikua eska ima kʼuiripu.” (The Lore of Birthdays [Kumpleaniuecheri pʼindekua].) Jeoba no méni jaiapanhintapirindi kʼuínchikua ma enga tata Jesukristuni, no jurhimbiti jakajkukuechani jimbo inchajpapiringa (Isaías 65:11, 12). Iámindu i ambe exerini, ¿andisï jiáni xáni uánikuecha úntajki Nabidadini?

NANI UÉRASKI NABIDADI

9. ¿Andisï erakunhapi 25 de disiembrini para Jesusiri andajpenukuani miánhantani?

9 Tresientu uéxurhini ísï tátsekua enga Jesusi echerirhu jupka, erakunhasti 25 de disiembrini para Jesusiri andajpenukuani kʼuínchinhani. Peru Jesusi no disiembrini andajpenusti, * sino peringa oktubrini ísï. Jiájkani, ¿andisï 25 de disiembri erakunha? Jamberiksï erakupti ini jurhiatikuani jimbokaksï ima engaksï uandaenga eskaksï kristianuespka, uékasptiksï xásï ma kʼuínchikua úntani eska romanuecheri. Romanuechaksï 25 de disiembrini úntasïrendi kʼuínchikua Jurhiata andajpenukueri, ísï uandasïndi ma libru enga arhinhajka Enciclopedia de la Religión Católica. Imani jurhiatikuechani jimbo enga kánikua tsʼirakuarhenga, jiáni enga Jurhiata ísï xarharaenga enajki nóteru uinhanharhiengia, imecha engaksï no jakajkuenga tata Jesukristuni kʼuínchikuaksï uásïrendi, paraksï úni eska Jurhiata kʼuanhatsentapiringa jini iauani uératini enga jámaenga, paraka ménderu íntskuapiringa tsánda ka paraka jorheperantaapiringa. Jakajkunhasïrendi eska Jurhiata, 25 de disiembrini uénasïrenga kʼuanhatsintani. Relijioniri orhejtsïkutichaksï eratsiparini eskaksï ísï úpiringa no jakajkutichani, jakajkuti uaani, úndasptiksï jiókuarhini ini kʼuínchikuani ka jánguarhintasptiksï paraka ísï xarharapiringa enajki “kristianuecheripi”. *

10. ¿Andiksïsï ióntki máru kʼuiripuecha no úntaeni Nabidadini?

 10 Iónisï mítinhastia eska Nabidadi no Bibliarhu pʼitakateska. Ka jimboka Nabidadi no Bibliarhu pʼitakateska, uéxurhini 1600 ísï jimbo, jini Inglaterra ka máru koloniechani jimbo Estados Unidos, no nema jatsispti sésikua para úntani i kʼuínchikuani. Imecha engaksï no niraenga ánchikuarhini Nabidadi jimbo, multaksï ma meiampisïrendi. Peru no ióni jimbo, ménderuksï uénaspti uaani ini ióntki anapu pʼindekuechani ka sánderuksï ambe kúrhutasptia. Nabidadi ueentaspti ménderu kʼéri kʼuínchikua máeni ka uánikua paisichani jimbo, útasï kʼéri kʼuínchikua máesti. Peru imecha engaksï uékajka sési pʼikuastani Tata Diosïni, miántasïndiksï eska i kʼuínchikua relijioni no jurhimbitirhu uéraska, ka jimboksïsï no úntajti ni ini, ka níjtu máteru kʼuínchikuechani engaksï no Bibliarhu pʼitakatejka. *

¿JUKAPARHAKUESKI NANIKSÏ UÉRASKI?

11. Uandanta je andiksïsï máru uaantajki máru kʼuínchikuechani, peru ambe sánderu jukaparhakueski para jucha.

11 Máruksï mítisti eskaksï máru kʼuínchikuecha, komueska Nabidadi, nóksï Bibliarhu pʼitanhaska, peru nóksï no sési exesïndi uaantani. Uandasïndiksï eska iásï nóteru nema eratsisïngia eskaksï no jurhimbiti relijionirhu uéraska ka uandasïndiksï eska jiánisï újka iámu familia tánguarhini. ¿Chájtu ísï eratsisïni? Enga ísïka, seguruchi jarhaska eskaksïni úkua jukachixaka relijioni jurhimbiti jingoni úkuarhini, no jimbokajtsï xáni uékaaka relijioni no jurhimbitini, sino jimbokajtsï kánikua uékasïnga chári familiani. Uákajtsï seguru jarhani eska Jeoba, enga familiani kueraaka, uékasïnga eska cha sési pájperaaka chári parientichani jingoni. Ka uákajtsï ísï úni ka ístu sési pʼikuastani Tata Diosïni. Apostuli Pablu xarhatasti ambesï sánderu jukaparhakue para jucha: “Ísï jimbo, jeiapanhinta je solu indeni ambe enga juchari Tata jeiapanhintajka” (Efesu 5:10).

¿Kʼarhantapirintsï ka arhani paleta ma enga drenajirhu japiringa?

12. ¿Náki ejemplu xarhatasïni eskachi jatsiska para jarhariani pʼindekuechani ka kʼuínchikuechani engaksï ikichakueni jásï ambeeka?

 12 Chájtsï jamberi eratsijka eskaksï iásï i kʼuínchikuecha nóteru imani ambe jimboksï únhasïngia engaksï jimbo ióntki únhaenga. ¿Jukaparhakueski naniksï uéraski i kʼuínchikuecha? ¡Jo! Eranhaska je eskajtsï exesïnga paleta ma jima enga drenaji nitamajka. ¿Kʼarhantapirintsï para arhani? Méntku nómbe ¿a no? Jimboka no sési jáxetixaka. Májkueni eska inde paleta, máru kʼuínchikuechaksï úpirindi sési xarharani, peruksï ikichakueni jásï amberhu uérasti. Engachi uékajka jurhimbiti relijioni jingonini, jatsiskachi para kurhajchani imani ambe enga apostuli Pablu arhiapka jurhimbiti Tata Diosïri marhuatspirichani: “Ásteru jáma je pʼárhini no sési jásï ambe” (2 Korintu 6:17).

IATSITAKUARHU EIANHPI JE AMBE ENGAJTSÏ JAKAJKUJKA

13. ¿Ambe úpirini jarhani enga úkua jukaaka, jimbokajtsï nóteru uaasïnga máru kʼuínchikuechani?

13 Engajtsï uékaaka jurajkuani máru pʼindekuechani, úpirindi jarhani máru ambe enga úkua jukani jauaka. Exetkiri je arhini ambe, ¿ambejtsï úpirini enga ánchikuarhitarhu, chári kompanieruechaksï no kurhangupiringa andijtsïsï no jámajki máru kʼuínchikuecharhu? Ka ¿engaksïni Nabidadi jimbo nema regalu ma íntskuni japiringa? ¿No sési japirini jiókuarhini? ¿Nénajtsï jámapirini enga chári achati o chári uarhiiti no májkueni jakajkupiringa eska cha? ¿Ambejtsï uá parakaksï chári sapiicha no ísï pʼikuarheraaka eskaksï ambakiti ambe tsïtakuarhixaka engajtsï nóteru uájka máru kʼuínchikuechani?

14, 15. ¿Ambejtsï uá engaksïni nema arhiaka eskajtsï sési nitamakuarhiaka kʼuínchikua ma o engaksïni uékaaka regalu ma íntskuni?

 14 Uétarhisïndi sési eratsikuntani, para mítini ambe úni jiáni enga i jásï ambe juaaka. Exe je i ambe, engaksïni arhiaka eskajtsï sési nitamakuarhiaka ini kʼuínchikuecharhu, úpiringajtsï xántku arhiani: “diosmeiamu je”. Peru enga nemeuaka engajtsï someni exejka, komueska nema engajtsï jingoni ánchikuarhijka, jamberi uétarhiati sánderu ambe eianguni. Peru méntkisï iatsitakuarhu uanda je. Biblia uandasïndi: “Ú je eska chári uandakuecha méntkisï sési eratsikateuaka komueska ma tʼirekua enga sési ásperakata jarhajka itukua jimbo, parakajtsï mítiaka na enga terokuntajka eskajtsï mókukuaka nákinterku nemani” (Kolosasi 4:6). Eiangua je andisï cha ísï eratsijki, peru méntkisï iatsitakuarhu parajtsï no no sési pʼikuastaani máteruechani. Arhia je eskajtsï, no no sési exesïnga regaluechani intsïkuarpiani ka ni tánguarhini familia jingoni, peru eska sánderu sésiska para cha i ambe máteru jurhiatikua úni.

15¿Ka engaksïni nema uékaaka regalu ma íntskuni? Orheta uétarhiati exeni ambe jimboksïnisï uékajki íntskuni. Úpirindiksïni arhini: “Ji mítiskia eskari tʼu no úntasïnga ini kʼuínchikuani, perukini uékasïnga ini regaluni íntskuni”. Enga i ambe úkuarhiaka, jamberijtsï uékapirini jiókuarhini, eratsiparini eska jiókuarhini no arhikuekasïnga eskajtsï apoiarixaka kʼuínchikuani. Peru enga ima kʼuiripu no mítiaka ambe engajtsï jakajkujka, chájtsï úpiringa arhini eskajtsï no úntasïnga indeni kʼuínchikuani. Indeni jingoni kurhanguati andijtsïsï jiókuarhijki regaluni, ka andijtsïsï no íntskujki chájtu regalu ma. Peruksïni ístu úpirindi ambe ma íntskuni, nomasi paraksï xárhati eskajtsï cha no mintsita jingoni marhuakuxaka Tata Diosïni o para xarhatani eska jatsikuarhekua ma jimbo, chájtsï nóteru kurhajchaaka Tata Diosïni. Enga ísïuaka, jiájkani sési japirindi eskajtsï méntku no jiókuarhipiringa.

AMBEJTSÏ UÁ CHÁRI FAMILIA JINGONI

16. ¿Nénajtsï xarhataa eskajtsï sési eratsikuntaskia enga jauaka ambe ma enga kʼuínchikuecheri ambeuaka?

16 ¿Ambejtsï uá enga chári familia no májkueni jakajkuaka  eska cha? Ístujtsï jatsiska para sési eratsikuntani. Enga chári familia uékaaka kʼuínchikua ma úntani o pʼindekua ma chúxapani, chájtsï no jatsiska para méntku ma máru ambe arhiani jarhani. Respetari je na engaksï eratsijka, ísï eskajtsï cha na uékajka eskaksïni imecha respetariuaka (arhinta je Mateu 7:12). Peru asï ambe ma ú je, engaksïni paaka inchamukuni indeni kʼuínchikuani jimbo. Peru ístu, asï xáni no sési exe je imani ambe enga no xarhataaka eskajtsï apoiarixaka kʼuínchikuani. Peru méntkisï imani ambe ú je engaksïni sési pʼikuastaaka, parajtsï no tátsekua no sési pʼikuarherani jarhani cha mísmu ka Tata Diosïni jingoni (arhinta je 1 Timoteo 1:18, 19).

17. ¿Ambejtsï uá parakaksï chári sapiicha no eratsiaka eskaksï ambakiti ambe tsïtakuarhixaka engaksï exeajka máteruechani máru kʼuínchikuechani uaantani?

17 ¿Ambejtsï uá parakaksï chári sapiicha no ísï pʼikuarheraaka eskaksï ambakiti ambe tsïtakuarhixaka jimbokaksï nóteru uaantasïngia kʼuínchikuechani enga Biblia no jeiapanhintajka? Kánikua jarhuajpiati ambe engajtsï cha uáka máteru jurhiatikuecharhu. Máru tátichaksï jirinhasïndi kánksï úpirini uájpechani regalu ma íntsaani. Ma ambakiti regalu engaksï táticha uáka íntsaani uájpechani, jindesti uékperakua xarhatakuani ka imecha jingoni jarhani.

Ú JE AMBE ENGA TATA DIOSÏ JAIAPANHINTAJKA

Engajtsï marhuakuska Tata Diosïni eska na uandajka, kánikuajtsï sési pʼikuarheraaka

18. ¿Nénaksïni jarhuataa tánguarhikuecha parajtsï úni relijioni jurhimbiti jingonini?

18 Parakaksïni Tata Diosï jaiapanhintaaka, jatsiskajtsï para relijioni jurhimbiti jingonini ka nóteru jaiapanhintania relijioni no jurhimbitini. ¿Nénajtsï uá i ambe? Biblia uandasïndi: “Ka jaue jirinhatsperantani modu nani engaksï na uáka jarhuatperani paraksï úni uékperani ka ambakiti ambe úni. Ka jaue no kueratani siemprini tánguarhini, ka no ísï úni komueska máru engaksï no pʼindejka tánguarhini, sino jaue uinhaperperantani jarhani máteru ka máteruni jingoni, ka sánderu iásï engaksï exeni jaka eska juchari Tateeri jurhiatikua janoxamkia” (Ebreu 10:24, 25). Tánguarhikuecha engaksï Kristueri chúxapaticha jatsiajka, jindesti ma nani enga  kánikua sési pʼikuarherakuarhijka ka nani enga ma újka Tata Diosïni kómarhini ísï eska ima na jaiapanhintajka (Salmo 22:22; 122:1). I tánguarhikuechaksï jindesti parachi “uinhaperanhanta[ni] májku jásï” iámindu engachi Kristueri chúxapatiika (Roma 1:12).

19. ¿Andisï kánikua jukaparhakue eskajtsï eianguauaka máteruechani inde ambe engajtsï jorhenguarhikia Bibliarhu?

19 Máteru ambe engajtsï uáka, para xarhatani eskajtsï jurhimbiti relijioni jingoniskia, jindesti aianhpini ambe engajtsï jorhenguarhikia Bibliaeri ambe Jeobaeri testiguechani jingoni. Uánikuechaksï kánikua tekaantaxati ka asta uerani jamberi xáni no sési jásï ambe jimbo enga úkuarhini jaka parhakpinirhu. Jamberijtsï mítiaka kʼuiripuechani engaksï ísï pʼikuarherajka. ¿Andijtsïsï no eianguajki eska Biblia aiatspisïnga eska sánderu orhepatini ambakiti ambe jauaka? Méntkisï eianhpi je inde xáni ambakiti jorhenguarhikuechani engajtsï jorhenguarhikia Bibliarhu ka méntkisï tánguarhi je jurhimbiti kristianuechani jingoni. Engajtsï ísï úska, exeakajtsï eskajtsï sánhani arhiaka nóteru xáni tsitiani inde pʼindekuechani engaksï no jurhimbiti relijionirhu anapueka. Uákajtsï seguru jarhani eskajtsï kánikua sési irekaaka ka uánikua kóntperatechantsï jatsiauaka engajtsï ísï marhuakuska Tata Diosïni eska ima na jeiapanhintajka (Malaquías 3:10).

^ párr. 9 Kʼuínchikuecha engaksï arhinhaenga saturnalicha, ístuksï marhuaspti paraka 25 de disiembri erakunhapiringa. I kʼuínchikuechaksï úkuarhintasïrendi para roma anapu diosï tarheteri, ka únhantasïrendiksï desde 17 asta 24 de disiembrini. Ini kʼuínchikuecharhu, pʼindesïrendiksï kʼérati tʼirekuechani uáni, jiuakuarhinhasïrendi ka regalu ambe íntsperanhani.

^ párr. 10 Apendisirhu, “¿Sési jaki uántani kʼuínchikuechani?”, eiangusïndijtsïni na engaksï exeajka jurhimbiti kristianuecha, kʼuínchikuechani engaksï meru únhantajka.