Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

¿Ambemindusï jorhentpejki Biblia?

 KAPITULU 5

Euajpintskua, sánderu ambakiti regalu Tata Diosïri

Euajpintskua, sánderu ambakiti regalu Tata Diosïri
  • ¿Ambeski euajpintskua?

  • ¿Néna íntspeski Tata Diosï?

  • ¿Nénaksïni marhuachisïni?

  • ¿Nénajtsï xarhataa eskajtsï jukaparharasïnga?

1, 2. a) Para cha, ¿ambe úsïni eska regalu ma ambakitiuaka? b) ¿Andisï euajpintskua jindee sánderu ambakiti regalu engachi intsïnhaka?

¿NÁKISKI sánderu ambakiti regalu engajtsï intsïnhaka? Ambakiti regalu ma, no imaesti enga kánikua tumina jukaparhaka. Imasï ambakiti regalu máejti engaksïni sési pʼikuastajka ka engajtsï iátiru uétarhinchaenga.

2 Úpiringajtsï uánikua regalu intsïnhaani, peru jarhasti ma enga sánderu ambakitika eska náki uéjki. Ka imaesti enga Tata Diosï íntsaaka kʼuiripuechani. Ísïsti, Jeoba uánikua ambejtsïni íntskustia, peru sánderu ambakiti ambe engajtsïni íntskuka, jindesti euajpintskua: enga jurajkuka eska imeri Uájpa Jesukristu, uarhipiringa juchantsïni jimbo (arhinta je Mateu 20:28). Eskachi na exeaka ini kapitulurhu, euajpintskua jindesti sánderu ambakiti regalu engachi intsïnhaka, jimbokajtsïni kánikua sési pʼikuastasïnga ka íntskusïndijtsïni ambe engachi uétarhinchajka.  Ka ini jimbo, Jeobajtsïni xarhatachisïndi na engajtsïni xáni uékajka.

¿AMBESKI EUAJPINTSKUA?

3. ¿Ambeski euajpintskua, ka ambejtsïni jarhuataa kurhanguni na xáni jukaparhakueski?

3 Euajpintskua, jindesti ambe enga Jeoba úrajka para kʼuiripu nóteru pekadu jukarania ka paraksï nóteru uarhini (Efesu 1:7). Peru parachi sési kurhanguni ambeski euajpintskua, uétarhisïndi exeni ambe úkuarhispi jardini de Edenirhu. Engachi kurhanguaka ambesï tsïtapi Adani enga pekaripka, uákachi jánhaskani na enga xáni jukaparhakueka euajpintskua para jucha.

4. ¿Ambe arhikuekasïreni para Adani jatsini tsípikua ma no ma pekadu jingoni?

4 Enga Jeoba kueraapka Adanini, íntskuspti ma ambe enga kánikua jukaparhakuepka: tsípikua ma no ma pekadu jingoni. Eranhaska je ambe enga arhikuekaenga i ambe para Adani. Xásï kuerpu ma jingoni ka xásï eratsitarakua ma jingoni, no pʼamenchapirindi, no tʼarhepipirindi ka no uarhipirindi. Adani kánikua sési pájperasïrendi Jeobani jingoni. Biblia uandasïndi eska Adani, “Diosïri uájpa[espka]” (Lukasʌ 3:38). Tata Diosï ka Adani ísïksï pájperasïrendi eska ma táti uékpiti, na sési pájperajka uájpani jingoni. Ísïsti, Tata Kueraajpiri íntskusïrendi Adanini ánchikuarhita enga sési pʼikuastapiringa ka ístu arhisïrendi ambe úpirini úni ka ambe nómbe (Génesis 1:28-30; 2:16, 17).

5. ¿Ambe arhikuekasïni Biblia enga uandajka eska Adani “májkueni jásïsp[ka] eska Tata Diosï”?

5 Adani “májkueni jásïspti eska Tata Diosï” (Génesis  1:27, Santiagu 3:9). ¿Ambe arhikuekasïni i ambe? Eskachi na jorhenguarhikia i librurhu kapitulu 1 jimbo, Jeoba Espiritu máesti ka nochi úsïnga exeni (Juanu 4:24). Ima no kʼuiripetaeristi ka ni úniiri. Ísï jimbo, Adani májkuenispti eska Tata Diosï máteru ambe jimbo, jindesti jimboka Tata Diosï kueraaspka Adanini ima pʼikuarhinhikuechani jingoni enga ima jatsiaka, Adani úpirindi xarhatani: uékperakua, jánhaskakua, jurhimbikua, uinhapikua ka ístu máteru jásï pʼikuarhinhikuechani. Peru jarhaspti máteru ambe enga jimbo májkuenipka: intsïnhaspti libre albedriu, i arhikuekasïrendi eska ima úpiringa erakukuarheni ambe úni. Adani no mákina máespti, enga imantku ambe úpiringa úni engaksï arhipiringa. Sánderu sési, ima úpirindi jandiajku erakuni sési jásï ambe úni o no sési jásï ambe. Enga erakupiringa kurhajchani Tata Diosïni, úpirindi irekani Paraisurhu para méntkisï.

6. ¿Ambe tsïtaspi Adani enga no kurhajchapka Tata Diosïni, ka ini jimbo, ambechi úkuarhinchasïni jucha?

6 Exesïngachi eska kánikua no sési úkuarhinchaspka Adani, enga ísï no kurhajchapka Tata Diosïni jimboka tsïtaspka ima ambakiti irekakuani ka uarhisti (Génesis 3:17-19). Peru no Adanijku uarhipirindi sino ístu imecha engaksï tátsekua andajpenupiringa. Biblia uandasïndi: “Ísï jimbo eska pekadu na juka parhakpinirhu, máechakua kʼuiripuni jimbo [Adani] ka pekaduni jimbo uarhikua, ka ísï uarhikua pakarani para iámindu kʼuiripuecha jimbokaksï iáminduecha pekadu úska” (Roma 5:12). Ísïsti, iámindu jucha kérekuarhiska Adaniri pekaduni. Jimbosï Biblia uandajti eskajtsïni Adani májku  kʼéri imani jingoni “íntspikuarhiska” parachi jántspiriini pekadueri ka uarhikueri (Roma 7:14). Para Adani ka Eba nóteru ma erokuarhikua jarhasptia, jimbokaksï ima jandiajku erakuspka nóteru kurhajchani Tata Diosïni. Peru, ¿ambe úkuarhipirini juchantsïni jingoni?

7, 8. ¿Ambe tsimani ambeski euajpintskua ma?

7 Jeoba pʼímutantasti kʼuiripuni euajpintskuani úraparini. Peru ¿ambeski euajpintskua ma? Tsimani ambesti. Orheta, jindesti meiampikua para úni intsïnhantani ambe ma o para jurajkunhani ma kʼuiripu. Tsimani, Bibliarhu, jindesti meiampini ambe ma jimbo. Enga nema no sési úkujka máteruni, jatsisti para meiampini iámu ambe enga úka.

8 Eskachi na exekia, Adani ústi eskachi kánikua jukaparhakua ambe tsïtapiringa. ¿Néna úpirini meiampinhani i ambe parachi nóteru pekadu jukarania ka níteruchi uarhini? Ju je exeni euajpintskuani enga Jeoba íntspika, ka exeakachi nénaksïni uá marhuachini chánksïni.

¿NÉNA ÍNTSPESKI JEOBA EUAJPINTSKUANI?

9. ¿Na jásï euajpintskua uétarhisïreni?

9 Adani pímbinhasï tsípikua ma tsïtasti. Ísï jimbo, parachi úni ménderu pímbinhasï tsípikua ma jatsini, no úpirindi íntspinhani na uéjki jásï ma tsípikua (Salmo 49:7, 8). Uétarhisïrendi tsípikua ma enga májkueni jukaparhapiringa eska ima enga tsïnchipka. Tata Diosïri Karakata uandasïndi eska “ma tsípikua [...] jimbo, máteru tsípikua íntspinhapiringa” (Deuteronomio 19:21). Ísï jimbo,  ¿néna meiampinhapirini ima pímbinhasï tsípikua enga Adani tsïtapka? Uétarhisïrendi máteru pímbinhasï “tsípikua” íntspini (1 Timoteo 2:6).

10. ¿Néna íntspeski Jeoba euajpintskuani?

10 ¿Néna íntspeski Jeoba euajpintskuani? Axaspti Echerirhu, imeri pímbinhasï uájpani ma enga auandarhu irekapka. Peru no né uéjkini axasti, sino imani enga sánderu uékaenga: imeri máechakua Uájpani (arhinta je 1 Juanu 4:9, 10). I, kánikua tsípikua jingoni jurajkuspti irekakuani auandarhu (Filipusʌ 2:7). Eskachi na exekia máteru kapitulurhu, Jeoba milagru ma jimbo peeraspti imeri Uájperi tsípikuani Mariaeri matrisirhu. Tata Diosïri espiritu santuni jimbo, Jesusi pímbinhasï andajpenuspti ka no ma pekadu jukaraspti (Lukasʌ 1:35).

Jeoba íntspesti imeri máechakua Uájpani parajtsïni euajpintani

11. ¿Néna úski májku kʼuiripu uánikua miioni kʼuiripuechani euajpiantaani?

11 Peru ¿néna úpirini ma kʼuiripu uánikua miioni kʼuiripuechani euajpiantani? Miánta je i ambe, ¿nénaksï niáraski iámindu pekadu jukarani? Miánta je eska Adani pekadu úspka, ka ísï tsïtaspti ambe ma enga kánikua jukaparhakuepka, ma ambe enga nóteru úpkia íntskuani uájpechani: tsípikua pímbinhasï ma. Iásï, pekadu ka uarhikuajkusï úpirindi íntsaani. Biblia arhisïndi Jesusini “máteru Adani” ka i kʼóru pímbinhasï tsípikua ma jatsispti ka no méni pekadu úspti (1 Korintu 15:45). Ísïspti enajki Jesusi, Adaniri lugari jimbo niárapi parajtsïni úni euajpintani. Jesusi méntkisï kurhajchasti Tátembani, ka íntspespti imeri pímbinhasï tsípikuani. Ísï meiampisti Adaniri pekaduni ka erokuarhikuajtsïni ma íntskusti (Roma 5:19; 1 Korintu 15:21, 22).

12. ¿Ambe xarhataspi Jesusi enga ísï iámindu ambe tekaantapka?

 12 Biblia uandasïndi iámindu no sési jásï ambe enga Jesusi nitamanchapka ante de uarhini. Kánikuaksï no sési kámasti atani ka chkarirhu ma jimboksï cháparhatasti, ka kánikuaksï no sési uándikusti (Juan 19:1, 16-18, 30, TNM; exe je apendisini, “¿Sési jaki eskaksï kristianuecha úraaka krusini?”). ¿Andisï jatsipi para xáni no sési nitamakuarhini? Eskachi na exeaka sánderu orhepatini, Satanasi uandasïndi eska no ma kʼuiripu seguiriuaka marhuakuni Jeobani enga no sési nitamakuarhini jauaka. Peru Jesusi xarhatakusti Satanasini eska no ísïspka eska ima na uandaenga, jimboka Jesusi no méni jurajkuspka Jeobani nájkiruka no sési nitamakuarhipka. Jesusi xarhatasti eska kʼuiripu ma enga no pekadu jukaraka, ka enga libre albedriu intsïnhaka, úsïnga méntkisï marhuakuni Jeobani nájkiruka Noambakiti úni jauaka eska no sési nitamakuarhiaka. ¡Na xáni tsípipi Tata Diosï enga exepka eska imeri Uájpa enga ima xáni uékajka, no méni jurajkuspka! (Proverbios 27:11.)

13. ¿Néna meiampinhaski euajpintskua?

13 ¿Néna meiampinhaski euajpintskua? Judiuecheri kutsï jimbo, 14 de nisani uéxurhini 33, Tata Diosï jurajkuspti eska imeri Uájpa enga no ma pekadu jukarapka, uándikunhapiringa. Ísï Jesusi íntspesti imeri tsípekua pímbinhasïni “solu ma ueltajku” para méntkisï (Ebreu 10:10). Tanimu jurhiatikua tátsekua enga Jesusi uarhipkia, Jeoba tsítantasti komueska espiritu ma. Jini auandarhu, imeri Tátemba japarini, Jesusi xarhataspti eska íntspespkia imeri pímbinhasï tsípikuani komueska kéjtsïtakua ma, para euajpiantani Adaniri uájpechani (Ebreu 9:24).  Jeoba jiókuarhisti Jesusiri kéjtsïtakuani, ka ísï Jesusiri uarhikua marhuasti para euajpiantani kʼuiripuechani pekadurhu ka uarhikuarhu (arhinta je Roma 3:23, 24).

¿NÉNAKSÏNI UÁ MARHUACHINI EUAJPINTSKUA?

14, 15. ¿Ambechi uá, parachi “puá[minhantani] juchari pekaduechani”?

14 Jesusiri uarhikuani jimbo, úsïngachi uánikua kóntperatechani jatsiani nájkirukachi pekadorika. Ju je exeni nénajtsïni marhuachia iásï ka sánderu orhepatini, i sánderu ambakiti regalu engajtsïni Tata Diosï íntskuka.

15 Puáminhantani pekaduechani. Jimbokachi pekadoriska, kánikua úkua jukasïndi sési jásï ambe úni. Iáminduchi pekarisïnga, uandakua o úkuechani jimbo. Peru Jesusiri uarhikuani jimbo, uákachi “puá[minhantani] juchari pekaduechani” (Kolosasi 1:13, 14). Peru parachi puáminhantani, jatsiskachi para mintsita jingoni moantani. Ka jatsiskachi para kánikua kaxumbikua jingoni kurhakuni Jeobani eskajtsïni puáchentaaka juchari pekaduechani jimbokachi jakajkusïnga Jesusiri uarhikuani (arhinta je 1 Juanu 1:8, 9).

16. ¿Andichisï uá marhuakuni Tata Diosïni pʼikuarheraparini eskajtsïni jeiapanhintasïnga, ka nénajtsïni marhuachisïni i ambe?

16 Pʼikuarherani eskajtsïni Tata Diosï jeiapanhintasïnga ka no eskajtsïni no jeiapanhintasïnga. Pʼikuarherani eskachi no sési jarhaska Tata Diosïni jingoni, no sésijtsïni pʼikuastasïndi ka ísïjtsïni pʼikuastasïndi enajkichi nómbe ma jukaparha. Peru  euajpintskuani jimbo, Jeobajtsïni puáchentasïndi ka jurajkusïndi eskachi marhuakuaka pʼikuarheraparini eskajtsïni jeiapanhintasïnga nájkirukachi pekadorika (Ebreu 9:13, 14). Mítiparini eskajtsïni Jeoba jeiapanhintasïnga, úsïngachi no sáni chéparini eiangukuarhini iámindu ambe juchari kómarhikuecharhu (Ebreu 4:14-16). Engachi méntkisï sési jauaka Tata Diosïni jingoni, uákachi kánikua sési pʼikuarherani ka úni sési irekani.

17. ¿Náki kóntperatechanchi jatsiaua Jesusiri uarhikuani jimbo?

17 Irekani para méntkisï paraisu ma jimbo echerirhu. Roma 6:23 uandasïndi: “Meiampikua pekadueri jindes[ti] uarhikua”. Ka i mísmu bersikulu uandasïndi: “Pero Diosïri intsïmperakua jindesti tsípikua para méntkisï juchari tata Jesukristuni jimbo”. Ini librurhu, kapitulu 3 jimbo exeaskachi kóntperatechani engaksï jauaka ima Paraisurhu enga janoni jakaia (Jaŋaskuecha [Apocalipsis] 21:3, 4). Iámindu i kóntperatecha, ka ístu ima enga jindeka, irekani para méntkisï no ma pʼamenchakua jingoni,  úkuarhiatiksï jimboka Jesusi uarhiska juchantsïni jimbo. Parachi intsïnhaani ini kóntperatechani jatsiskachi para xarhatani eskachi jukaparharasïnga ini regaluni: euajpintskuani.

¿NÉNAJTSÏ UÁ XARHATANI ESKAJTSÏ JUKAPARHARASÏNGA?

18. ¿Andichisï jatsi para agradeserikuni Jeobani euajpintskuani jimbo?

18 ¿Andichisï jatsi para kánikua agradesidu jarhani Jeoba jingoni euajpintskuani jimbo? Regalu ma sánderu jukaparhasïndi, enga nema úrajka tiempu, uinhapikua o tumina parajtsïni úni íntskuni. Ka sésijtsïni pʼikuastasïndi jimbokachi ísï mítisïnga eskajtsïni uékasïnga. Ísï jimbo, euajpintskua jindesti sánderu ambakiti regalu enga jaka, jimbokajtsïni Tata Diosï íntskuska ima sánderu ambakiti ambe enga jatsipka. Juanu 3:16 uandasïndi: “Diosï xáni uéasti parhakpini anapuechani, ísï jimbosï íntspiti imeri máechakua Uájpani”. I ambejtsïni xarhatachisïndi na engajtsïni xáni uékajka Jeoba, ka ístu Jesusi, jimboka uékaska íntspini imeri tsípikuani juchantsïni jimbo (arhinta je Juanu 15:13). Jo i regalu enga jindeeka euajpintskua, jatsisti parajtsïni sánderu jakajkutarani eska Jeoba ka Jesusi kánikuajtsïni uékasïnga mándani arhini juchantsïni (Galasia 2:20).

Jánguarhintani sési mítini Jeobani, xarhataati eskajtsï agradeserisïnga Tata Diosïri regaluni

19, 20. ¿Nénajtsï uá xarhatani eskajtsï agradeserisïnga Tata Diosïri regaluni?

19 Jiájkani, ¿nénajtsï uá xarhatani eskajtsï agradeserisïnga Tata Diosïri regaluni? Orheta, sánderu sési míti je Jeobani, Imani enga íntspika ini regaluni (Juanu 17:3). Uákajtsï ísï úni, jorhenguarhiparini  Bibliani ini libruni jimbo. Eskajtsï na mítipani jauaka Jeobani, sánderujtsï uékaaka. Ka engajtsï sánderu uékaaka Jeobani, sánderujtsï tsitiaka úni ambe enga ima uékajka (1 Juanu 5:3).

20 Jakajku je euajpintskuani. Biblia ísï uandasïndi Jesusiri ambe: “Ima enga jakajkujka Diosïri Uájpani jatsisti tsípikua para méntkisï” (Juanu 3:36). ¿Nénachi uá xarhatani eskachi jakajkusïnga Jesusini? No uandakua jimbojku. Eska na uandajka Santiagu 2:26, “jakajkukua no jindesïn[di] jakajkukua enga nómbe úkuechani jingoniijka”. Ísïsti, ambakiti jakajkukua úkuechani jingoni xarharasïndi. Ma ambe engachi jimbo uáka xarhatani eskachi jakajkusïnga Jesusini, jindesti jánguarhintani ísïini eska ima, uandakua jimbo ka úkuechani jimbo (Juanu 13:15).

21, 22. a) ¿Andisïchi jatsi para jarhani mándani uéxurhini Tateeri Senani jimbo? b) ¿Ambechi exea kapituluecharhu 6 ka 7 jimbo?

21 Jarhani Jesukristueri uarhikueri Miántskuani jimbo mándani uéxurhini. Chúrikua 14 de nisani uéxurhini 33 jimbo, Jesusi uaxastasti ini miántskuani enga Biblia arhijka “Tateeri sena” (1 Korintu 11:20; Mateo 26:26-28, TNM). Enga ístu mítikuarhika komueska tata Jesukristueri uarhikueri Miántskua. Jesusi uaxastasti ini miántskuani parakaksï imeri apostulicha ka ambakiti kristianuecha miántapiringa ma ambe enga kánikua jukaparhakueka: eska enga uarhipka, ísï íntspiska imeri tsípekua pímbinhasïni parajtsïni euajpintani. Jesusi ini miántskuanisï arhikuekaendi enga juramupka: “Ú je ini ambe jíntsïni miántsparini” (Lukasʌ 22:19).  I Miántskua miátantasïndijtsïni eska Jeoba ka Jesusi kánikuajtsïni uékasïnga jimbokajtsïni euajpintaska. Engachi jarhajka ini miántskuarhu enga mándani uéxurhini úkuarhijka, xarhatasïngachi eskachi agradeserisïnga euajpintskuani. *

22 No ma regalu jarhasti enga xáni jukaparhaka eska i euajpintskua engajtsïni Jeoba íntskuka (2 Korintu 9:14, 15). Ka i, imechani jamberi marhuakuauati engaksï uarhikia, eskachi na exeaka kapituluecharhu 6 ka 7 jimbo.

^ párr. 21 Uaakajtsï mítini ambe arhikuekasïni Tateeri Sena, apendisirhu “Tateeri Sena: miántskua ma enga sési pʼikuastajka Tata Diosïni”.