Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

¿Ambemindusï jorhentpejki Biblia?

 KAPITULU 11

¿Andisï jurajkujki Tata Diosï eska kómu nitamanhaaka?

¿Andisï jurajkujki Tata Diosï eska kómu nitamanhaaka?
  • ¿Tata Diosïsï újki eska no sési jánhaskuarheaka?

  • ¿Ambeksï uandakua jauatakuspi Tata Diosïni Edenirhu?

  • ¿Néna sési péntaa Tata Diosï kómu nitamakuani?

1, 2. ¿Ambejtsïnisï no sési pʼikuastajki, ka ambeksï kurhamarhikuarhisïni uánikuecha?

PAISI ma jimbo enga no sési jánhaskuarhepka guerra ma jimbo, uarhiperata ma jarhaspti, ka jimaksï uánikua uarhiiticha ka sapiicha uarhispti. Iáminduksï márku jatsinhantaspti kʼéri posu ma jimbo, ka uirhipandani, krusichanksï inchaskuaspti, ka krusicharhuksï i ambe karaspti: “¿Andi?”. I ambesï sánderu kurhamarhikuarhijti kʼuiripu enga no sési ambe úkuarhinchajka. Kómu pʼikuarherakua jingoni, i ambeksï kurhamarhikuarhisïndi enga guerra, pʼamenchakua, jenchekua o iorhentperakua ma o enga máteru no sési jásï ambe uándikujka imeri parientini ma, o enga xerendurhintajka imeri kʼumanchikuechani, o enga máteru ambe jimbo no sési ambe úkuajka. Uékasïndiksï mítini andiksïsï ísï nitamanchajki.

2 ¿Andisï jurajkujki Tata Diosï Jeoba eskachi kómu nitamakuarhiaka? Enga ima kánikua uinhapitika, uékpitini, mímixetini ka jurhimbitini, ¿andisï xáni no sési kámberanhajki ka andisï xáni no jurhimbikua jingoni jámajki kʼuiripu? ¿Niáraskijtsï ménisï i ambe kurhamarhikuarhini?

3, 4. a) ¿Náki ejemplu xarhatasïni eska no no sésiska kurhanguarhini andisï Tata Diosï jurajkujki eska kómu nitamakuarhinhaaka? b) ¿Néna exesïni Jeoba no sési járhati úkuechani ka kómu pʼikuarherakuani?

3 ¿No sési jaki kurhanguarhini andisï Tata Diosï jurajkujki  eska xáni kómu nitamakuarhinhaaka? Máruksï uandasïndi eska i ambe kurhanguarhini, xarhatasïnga eska ma no mintsikasïnga Tata Diosïni o eska no janhanharhisïnga. Peru engajtsï arhintaaka Bibliani, exeakajtsï eskaksï máru engaksï marhuakuka Tata Diosïni, i ambeksï kurhamarhikuarhispka. Ma uelta, profeta Abakuki arhispti Jeobani: “¿Andirisï újki eskani exeaka no sési jásï ambeni? Ka ¿andirisï tekaantajki no sési kámpikuani? ¿Andisï jaki kʼamajperakua ka no sési jásï kámberakua juchiti orhepatini? Ka ¿andiksïsï puru arhijperakuecha ka uarhiperakuechani jaki?” (Habacuc 1:3).

Jeoba kʼamajkuati iámu kómu nitamakuani

4 ¿Xukaspi Jeoba ini profetani jimboka i ambe kurhanguarhispka? Nómbe. Sánderu sési, Jeoba úspti eska Bibliarhu karakuarhipiringa ambe enga profeta pʼikuarhinhenga. Ka Jeoba jarhuataspti Abakukini paraka kurhangupiringa inde ambe enga kurhanguarhipka, ka paraka sánderu mintsikapiringa Jeobani. Ka Jeoba májkueni uékasïndi úni chánksïni jingoni. Miá je eska Biblia uandasïnga eska Jeoba “pendienti pásïnga” juchantsïni jimbo (1 Pedru 5:7). Tata Diosïsï sánderu kurhunhiajti no sési járhati úkuechani, ka kómu pʼikuarherakuani enga jurhajka no sési jarhati úkuechani jimbo (Isaías 55:8, 9). Jimajkani, ¿andisï xáni kómu nitamakua ambe jaki?

 ¿ANDISÏ XÁNI KÓMU NITAMAKUA AMBE JAKI?

5. ¿Ambeksï uandasïni máru, eskachi ambe jimbosï kómu nitamakuarhejka, peru Biblia ambe jorhentpisïni?

5 Uánikuecha engaksï mámaru jásï relijioni jimbo jaka, kurhamarhiasïndiksï imeri orhejtsïkutichani ka imeri jorhentpirichani andichisï xáni kómu nitamakuarhejki. Ka imaksï arhiasïndi eska Tata Diosïsï ísï uékajka, ka eska ima, desde ióntki uandarixakaia ambe enga nitamaaka, asta ima no sési jásï ambeni enga úkuarhijka. Uánikuechanksï arhiasïndi eskaksï no uáka kurhanguni andisï Tata Diosï újki ambe ma, o eska imasï pákuarhiantajka kʼuiripuechani ka asta sapiichani jamberi paraksï imani jingoni jarhani auandarhu. Peru eskajtsï na jorhenguarhikia, Jeoba no méni no sési jásï ambe úsïndi. Biblia uandasïndi: “¡Asï tekaa je ni sikiera eratsini eska Tata Diosï enga jurhimbitiika úsïnga no sési jásï ambe, ka ni ikichakueni jásï ambe újki ima enga Sánderu Kʼéri ambeeka!” (Job 34:10).

6. ¿Andiksïsï uánikua uandajki eska Tata Diosï kulpa jatsiska iámu kómu nitamakuechani jimbo?

6 Uánikuaksï uandasïndi eska Tata Diosïsï kulpa jatsika kómu nitamakuechani jimbo. ¿Mítiskijtsï cha andiksïsï niárajki ísï no sési eratsini? Ménisï jindesïndi jimbokaksï eratsisïnga eska Tata Diosïsï juramuni jaka parhakpinirhu. Nóksï mítisti ma ambe enga Biblia jorhentpijka ka enga kánikua jukaparhakueka, engajtsï cha exekia kapitulu 3 jimbo. Jo, eska Satanasisï juramuni jaka parhakpinirhu.

7, 8. a) ¿Néna xarhatasïni parhakpini eska májkueniska eska imecheri juramuti? b) ¿Andisï ma xáni kómu nitamakuarhejki pekaduni jimbo ka jimboka “úkuarhisïnga o jarhasïnga ambe ma enga nema no erokuarhijka”?

7 Biblia, sésimindusï uandajti eska “iámindu parhakpini anapuecha Noambakitiri juramukua jimbo jarhaska” (1 Juanu 5:19). ¿A no eskachi iásï kʼóru uánikua ambe kurhangusïngia? Kʼuiripu, ísï jámasïndi eska Noambakiti na jámajka, enga “kʼarhaani ja[ka] [támisï jánhastaani] iámindu parhakpini anapuechani” (Jaŋaskuecha [Apocalipsis] 12:9). Noambakiti, kánikua enganiarpisïndi, kurhunhpisïndi ka no sáni pʼamojpisïndi. Ka jimboka ini parhakpinirhu Noambakiti juramusïnga, ísï jimboksïsï  kʼuiripuecha xáni enganiarpijti, kurhunhpijti, ka nóksï sáni pʼamojpini. I jindesti ma ambe jimbo enga xáni kómu nitamakuarhenhajka.

8 Eskachi na exekia kapitulu 3 jimbo, máteru ambe jimbo enga xáni kómu nitamakuarhenhajka, jindesti jimboka desdekaksï Adani ka Eba nóteru uékapkia kurhajchani Jeobani, jima uératini kʼuiripuechaksï nóteru úsïndia sési úni ambe ma ka pekaduksï jukarasti. Jimboksïsï xáni tsitijti juramukua jatsini, ka jánguarhintasïndiksï ísï úni, jimboksïsï úkuarhijti guerrecha, kʼuiripu no sési kánhasïndi, ka kánikua kómu nitamakua jarhasïndi (Eclesiastés 4:1; 8:9). Ambe engachi jimbojtu kómu nitamakuarhejka, imani ambe jimboesti enga Biblia arhijka eska ma repentku “úkuarhisïnga o jarhasïnga ambe ma enga ma no erokuarhijka” (arhinta je Eclesiastés 9:11). Jeoba no juramuxati ini parhakpinirhu, jimbosï no kuájchakujti. Kʼuiripu úkuarhinchasïndi ambe ma, jimboka no mítiparini, jimesïsï jarhasïnga enga no sési jásï ambe úkuarhejka.

9. ¿Andichisï uá seguru jarhani eska Jeoba ambe ma jimbosï jurajkuni jaka eskachi kómu nitamakuarhiaka?

9 Kánikuajtsïni sési pʼikuastasïndi mítini eska no Jeobasï újka eskachi no sési nitamakuarhiaka. No imasï újti eskaksï jauaka guerrecha, uándikperakuecha, no sési kámberakuecha ka ni jenchekuecha o máteru ambe enga újka eskachi kómu nitamakuarhiaka. Peru útasïchi jatsiska para mókuntani andisï jurajkujki eskachi no sési nitamakuarhiaka. Mítiskachi eska no nema sánderu uinhapitiska eska Tata Diosï, ísï jimbo, ima jatsisti uinhapikua para kʼamajkuni iámindu no sési jásï ambeni. Jiájkani, ¿andisï no ísï újki? Mítiskachia Jeobani, ka exeskachia eska kánikua uékpitiska, ísï jimbo, jati ambe ma enga jimbo Jeoba útasï jurajkuni jaka eskachi kómu nitamakuarhiaka (1 Juanu 4:8).

KʼÉRIKSÏ MA UANDAKUA JAUATAKUSÏNDI

10. ¿Ambe no sési jásï ambe uandaspi Satanasi, Jeobaeri ambe ka néna ísï úspi?

10 Parachi mítini andisï Tata Diosï jurajkujki eska xáni kómu nitamakua ambe jauaka, uétarhisïndi eskachi miántaaka ima  jurhiatikuani engaksï uénaka jarhani uandanhiatecha. Enga Satanasi úpka eskaksï Adani ka Eba nóteru kurhajchapiringa Jeobani, ístu no sési jásï ambe uandaspti Jeobaeri ambe. Satanasi no ma ambe uandaspti Jeobaeri uinhapikueri ambe, jimboka mítiska eska no nema sánderu uinhapiska eska Jeoba. Peru uandaspti eska Jeoba no jatsiska parajtsïni juramuchini. Enga Satanasi uandapka eska Tata Diosï chkuanderasïnga ka eska no jurajkuasïnga eskaksï imeri jántspiricha sési nitamakuarhiaka, i ambe jingoni, Noambakiti uandaxapti eska Jeoba no jindeska ambakiti juramuti ma (arhinta je Génesis 3:2-5). Ístu arhikuekaxapti eska sánderu sési japiringa kʼuiripu enga Jeoba no juramukuapiringa. Ini ambe jimbo, Noambakiti uandaxapti eskajtsïni Jeoba no jatsiska para juramuchini.

11. ¿Andisï Jeoba no kʼamajkuapi no kurhandichani jardini de Edenirhu?

11 Engaksï Adani ka Eba nóteru uékapkia kurhajchani Jeobani, ísïspti enajkiksï uandapi: “Nochi uétarhinchasïnga eskajtsïni Tata Diosï juramuchiaka. Jucha uáka erakukuarheni ambe sésiski ka ambe no sésiski”. ¿Ambe úpirini Jeoba? ¿Néna úpirini xarhatakuani ánjilichani ka kʼuiripuni eskaksï no kurhandicha chkuanderaxapka ka eska sánderu sésiska na enga Jeoba újka ambe ma? Máruksï uandasïndi eska sánderu sésipiringa enga Tata Diosï jimajku kʼamajkuapiringa  no kurhandichani ka eska jimbanhi temungurhiri ma kueraapiringa. Peru Tata Diosï uandasptia eska Parhakpini paraisu ma úkuarhintapiringa ka eska Adani ka Ebaeri uájpechaksï irekapiringa ixú (Génesis 1:28). Ka Jeoba méntkisï úsïndi ambe enga uandajka (Isaías 55:10, 11). Ka enga Jeoba jimajku kʼamajkuapiringa no kurhandichani, no úpirindi xarhatani eska imajkusï uáka juramutiini.

12, 13. ¿Ambe ejemplu xarhatasïni andisï Jeoba jurajkujki eska Noambakiti juramukuaka kʼuiripuni ka eska kʼuiripu jandiajku juramukuarhiaka?

12 Parachi úni kurhanguni, ju je exeni ambe ma. Eranhaska je eska maestru ma, jorhendaaxaka alumnuechani néna úni kuenta ma matematikaeri enga kánikua úkua jukaka. Ma repentku, alumnu ma enga jánhastika peru enga no kurhandijka, uandasïndi eska no sési jarhaska na enga maestru úni jaka kuentani, ka indeni jimbo, arhikuekaxati eska maestru no jorhenaska jorhentpini. Tumbi seguirisïndi uandani eska ima sánderu sési mítiska úni kuentani. Máru alumnuechajtuksï jakajkukusïndi ka ístuksï nóteru uékasïndia kurhajchani maestruni. ¿Ambe úpirini maestru? Úpirindi petaantani salonirhu uératini alumnuechani engaksï nóteru kurhandijkia, peru ¿náksï eratsipirini máteru alumnuecha? Úpirindiksï eratsini eska ísïspka eska na uandani japka alumnu no kurhandi, ka imecha engaksï imani jingoni úkuarhipka. Úpirindiksï nóteru janhanharhini maestruni ka eratsinksï eska chésïnga eskaksï xarhatakuaka eska no jorhenaska jorhentpini. Peru iásï eranhaska je eska maestru jurajkusïnga eska alumnu no kurhandi, xarhatakuauaka máteru alumnuechani néna úntapirini ima, indeni kuentani.

¿Sánderu sési jorhenaski jorhentpini alumnu eska maestru?

13 Jeoba sáno májkueni ústi eska inde maestru. Miánta je eska jiáni engaksï no kurhandicha nóteru kurhajchapkia Jeobani, eskaksï no imechajkusï japka. Uánikua miioni ánjilichaksï exexapti ambe enga úkuarhipka jardini de Edenirhu (Job 38:7; Daniel 7:10). Na enga mókuntapiringa Jeoba ini ambe, kánikua marhuakuapirindi ánjilichani ka sánderu orhepatini iámindu kʼuiripuechani engaksï  andajpenupiringa. Ísï jimbo, ¿ambe úski Jeoba? Jurajkuxati para Satanasi xarhatani néna juramukua kʼuiripuni. Ka ístu, jurajkuxati paraka kʼuiripu jandiajku juramukuarhiaka Satanasini kurhajchaparini.

14. ¿Andisï kánikua sésii enga Jeoba jurajkuka eska kʼuiripu jandiajku juramukurhiaka?

14 Maestru engachi uandani japka, mítisti eska tumbi ka alumnuecha engaksï apoiarijka, nóksï mítiska néna úni kuentani. Peru ístu mítisti eska sésiuaka para iámindu alumnuecha, enga jurajkuaska eskaksï jámaaka kuenta úntani. Jo, engaksï alumnu no kurhandicha no uáka úntani kuentani, máteru alumnuechaksï exeati eska maestrujkusï uáka jorhentpini. Ka ístuksï uáti kurhanguni, andisï maestru petaantajki salonirhu uératini alumnu no kurhandichani. Májkueni, Jeoba mítisti eska iámindu ánjilichani ka ístu kʼuiripuechani, kánikua marhuakuauaka engaksï exeaka eska Satanasi ka imeri demoniuecha, chkuanderaxakaksï ka eska kʼuiripu no úsïnga jandiajku juramukuarhini. Mítiatiksï eska ísïska eska na uandapka profeta Jeremiasi: “Ji sési mítitixaka oh Jeoba, eska kʼuiripu no sésikua jatsiska para jandiajku juramukuarhini. No jamberi sésikua jatsisti para xanharakuarhini” (Jeremías 10:23).

¿PERU ANDI XÁNI IÓNI?

15, 16. a) ¿Andisï xáni ióni jurajkuni jaki Jeoba eskachi kómu nitamakuarhiaka? b) ¿Andisï jurajkujki Tata Diosï eska jauaka atajperakuecha ka no sési járhati nitamakuecha?

15 Peru ¿andisï xáni ióni jurajkuni jaki Jeoba eskachi kómu nitamanchaaka? ¿Ka andisï no ma ambe újki para ma no kómu nitamakuarhini? Tsimani ambechi exeaka enga maestru no úpiringa. Ma ambe, no ma ambe arhipirindi alumnuni enga ima uékapiringa xarhatani néna úni kuentani, ka ístu no jarhuatapirindi kuentani úntani. Ístu Jeoba, tsimani ambe no úxati. Ma ambe jindesti, no ma ambe arhixati Noambakitini ka imechani engaksï apoiarijka engaksï uékajka xarhatani eska sánderu sésiuaka para kʼuiripu engaksï no kurhajchaska Jeobani. Ka para i ambe úkuarheni, uétarhisïndi  eska tiempu nitamaaka. Desdeka kʼuiripu kueraanhaka asta iásï jamberi, mámaru járhati juramukuechanksï tsʼéjkuastia ka kʼuiripuechaksï pauani pauani sánderu jánhaskasïndi ambe ma, ka ambakiti medisina ka ambakiti mákinechanksï uásïndi, ka uánikua máteru ambe. Peru nájkiruka i ambe ísïka, kʼuiripu pauani pauani sánderu kómu nitamakuarhisïndi, no sési kánhasïndi, no jamberi jatsikuarhesïndi para tʼireni, kánikua no sési jánhasïndi ka sánderuksï guerrecha jarhasïndi. I ambe jimbo, xarharasïndi eska méntku no sáni marhuasïnga kʼuiripuecheri juramukua.

16 Ka ístu Jeoba no jarhuataxati Satanasini para juramuni ixú parhakpinirhu. Enga Jeoba kénditapiringa iámindu no sési járhati atajperakuechani ka ima ambe engajtsïni no sési pʼikuastajka, ¿nójtsï ísï exesïni eska ísïpiringa komueska Jeoba jarhuatani jarhani Satanasini ka no kurhandichani? ¿A no eskachi úpiringa eratsini eskachi jucha úsïnga jandiajku juramukuarhini, ka eskajtsïni sési uérachisïnga iámindu ambe? Ka i ambesï uékajti Noambakiti eskachi eratsiaka. Peru i ambe, chkuanderakua máesti. Ka Jeoba no méni apoiaripirindi chkuanderakua ma, jimboka Tata “Diosï nómindu ú[sïnga] chkuanderani” (Ebreu 6:18).

17, 18. ¿Ambe uá Jeoba imani no sési jásï ambe jingoni enga úkuarhikia parhakpinirhu, gobiernuecha jimbo, ka Noambakiti jimbo?

17 ¿Ka ambe úkuarhia iámu no sési jásï ambe jingoni enga úkuarhikia parhakpinirhu, desde jiáni uératini enga Satanasi ka kʼuiripu nóteruksï kurhajchakia Jeobani? Ju je miántani eska Jeoba iámindu ambe úsïnga úni. Ísï jimbo, Jeoba uáti iámindu ambe sési peentani ka ísï uáti. Eskachi na jorhenguarhikia, nájkiruka kʼuiripu kánikua no sési jántskakia parhakpinini, i parhakpini  sési jándentaati ka paraisu ma úkuarhintaati. Jakajkuni tata Jesukristueri uarhikuani, marhuachiatijtsïni parajtsïni kénditachiani kómu nitamakuechani engaksï pekaduni jimbo juka. Ka imecha engaksï uarhirini jaka, tsíntaatiksï. Tata Diosï ísï úraati tata Jesukristuni “para xereantani Noambakitiri úkuechani” (1 Juanu 3:8). Ini ambe, Jeoba jiáni uáti enga ima uékaaka ísï úni. Ka sésichi pʼikuarherasïnga enga Jeoba nótki ísï úni jaka, jimboka imeri tekantskuani jimbo, jucha intsïnhasïnga sésikua para jorhenguarhini jurhimbikua Bibliaeri ambe ka parachi marhuakuni (arhinta je 2 Pedru 3:9). Peru jiánisï, Tata Diosï jirinhaaxati imechani engaksï meru uékajka marhuakuni ka jarhuataasïndi paraksï orhepani uérakuani kómu nitamakuechani engaksï jaka parhakpinirhu (Juanu 4:23; 1 Korintu 10:13).

18 Jamberiksï máru eratsijti, eskachi no kómu nitamakuarhini japiringa iásï, enga Tata Diosï kueraapiringa Adani ka Ebani parakaksï méntkisï kurhajchapiringa. Parachi úni mítini andisï no ísï úpi, miánta je ambakiti regaluni ma engajtsïni Jeoba íntskuka.

¿NÉNAJTSÏ ÚRAA TATA DIOSÏRI REGALUNI?

Jeobaksïni jarhuataati parajtsï orhepani uérakuani kómu nitamakuechani

19. ¿Ambe ambakiti regalujtsïni íntskuski Jeoba ka andisï uétarhijki jukaparharani?

19 Eskachi na exekia kapitulu 5 jimbo, jucha kueraanhaska libre albedriuni jingoni, i ambe arhikuekasïndi eskachi úsïnga erakukuarheni ambe úni. Kánikua jukaparhakuesti i regalu, ¿no ísïski? Tata Diosï uánikua animalichani kueraauasti, peruksï ima no úsïndi mítini ambe sésiski ka ambe no sésiski (Proverbios 30:24). Ka ístuksï uánikua trokecha únhastia, peruksï i trokecha no úsïndi jandiajku xanharani, jimajkisïksï nirasïndi nani enga choferi páuaka. ¿Sésichi pʼikuarherapirini engajtsïni Tata Diosï ísï kueraapiringa eska animali ma o eska troka ma? Nómbe. Ísï jimbo, kánikuachi sési pʼikuarherasïnga jimbokachi úsïnga erakukuarheni uánikua ambe, úsïngachi erakuni na jásï kʼuiripueni, néna irekani, ka néni jingoni kúnguarhini. Kánikuajtsïni sési pʼikuastasïndi úni  erakuni ambe úni, ka Tata Diosï uékasïndi eskachi jatsiaka indeni sésikuani.

20, 21. ¿Chájtsï néna uá sési úrani inde ambakiti regaluni, libre albedriuni, engajtsïni Jeoba íntskuka ka andisï sési jaki ísï úni?

20 Jeoba no uékasïndi eskachi afuersa marhuakuaka (2 Korintu 9:7). ¿Táti ka nándi ma, ambe sánderu tsitipirini: eska uájpa arhipiringa “Diosmeiamu”, jimboka nema arhisïnga eska ísï arhiauaka o jimboka ima mintsitarhu uénhisïnga? Iásï uétarhisïndi eskajtsï kurhamarhikuarhiaka: “¿Néna úraa ji libre albedriuni engarini Jeoba íntskuka?”. Satanasi, Adani ka Eba, nóksï sési úrasti, jimbokaksï erakukuarheska no kurhajchani Jeobani. ¿Ka cha? ¿Ambejtsï uá?

21 Chájtsï uáka erakuni sési úrani inde ambakiti regaluni, libre albedriuni, engajtsïni Jeoba íntskuka. Uákajtsï Jeobani jingoni úkuarheni, ísï eskaksï na úkia uánikua miioni kʼuiripuecha engaksï marhuakuni jakaia. I kʼuiripuechaksï kánikua sési pʼikuastasïndi Tata Diosïni jimbokaksï xarhatasïnga eska Noambakiti chkuandera máeska, ka eska méntku no jorhenaska juramuni (Proverbios 27:11). Chájtujtsï uáka ísï úni, engajtsï erakuska imani irekakuani enga sánderu ambakitika. Máteru kapituluni jimbo, exeakachi nákiski i irekakua.

PARAJTSÏ SÁNDERU MÍTINI

BIBLIAERI JORHENGUARHIKUA

¿Andisï uétarhijki jorhenguarhini Bibliaeri ambe?

Uánikua miioni kʼuiripuechaksï iámu parhakpinirhu, exeantastiksïa Bibliarhu, mókuntskuechani ima kurhamarhikuecheri engaksï xáni jirinhaani japka. ¿Uékapirintsï chájtu ísï úni?