¿NÉNAJTSÏ eranhaskasïni Jurhiatikuani enga Tata Diosï Jusgarpiaka? Uánikuaksï eratsisïndi eska miioni kʼuiripuechaksï jauaka Tata Diosïni japarini, para ima mándani arhiani jusgariani. Ístu eratsinhasïndi eskaksï máru auandarhu niuaka ka máteruecha ma nani engaksï kómu nitamakuarhiaka para méntkisï. Peru Biblia xarhatasïndi eska ima jurhiatikua ménderueniuaka: ima tiempu no jindeuati parachi chéni, sino para ambakiti ambe erokuarhini ka para iámindu ambe sési niántani.

Apostuli Juanu karasti Jaŋaskuecharhu (o Apocalipsis) 20:11, 12, ima Jurhiatikueri ambe enga Tata Diosï Jusgarpiaka: “Ka exeskani ma kʼéri uaxantsïkua urapitini ka ístu imani enga jima uaxakatini japka, ka imani japarini, késtakukuarhisti parhakpini ka auanda ka nóteruksï méni xarhantasti. Ka exeaskani imechani engaksï uarhikia, kʼératichani ka sapirhatichani, Diosïri orhepani jimboksï anhaxurhitini jarhani. Ka pʼirakunhastiksï libruecha ka ístu pʼirakunhasti máteru libru enga jindepka libru tsípikueri, ka luejkuksï jusgarinhasti uarhiricha indeni ambe jimbo enga karakata japka libruecharhu, eskaksï námindu jukanchapka imecheri úkuechani jimbo”.

Jeoba jindesti Sánderu Kʼéri Juesi. Peru máteru nemani erakusti para jusgarpini. Apostuli Pablu uandasti jima Ukuecha 17:31 jimbo, eska Tata Diosï “erakutixaka ma jurhiatikua para jimajkani jurhimbitku jusgariani iámindu parhakpini anapuechani, imani mísmu achatini jimbo enga ima erakuka”. Ka i Juesi jindesti Jesukristu (Juanu 5:22). Peru ¿káni uéna Jurhiatikua enga Tata Diosï Jusgarpiaka ka na xáni tiempueua?

 Jaŋaskuecheri libru uandasïndi eska Jurhiatikua enga Tata Diosï Jusgarpiaka, jiáni uénakuarhiaka enga nitamakia Armajedoniri uarhiperakua, jimboka ísï jindeuaka, enga kʼamajkuaka Satanasiri parhakpinini (Jaŋaskuecha 16:14, 16; 19:19–20:3). * Enga nitamaakia Armajedoni, Satanasi ka imeri demoniuecha, ónhanhaatiksï mili uéxurhini kʼéri posu ma jimbo. I tiempuni jimbo, ima 144,000 engaksï auandarhu niuaka, jusgariauatiksï kʼuiripuechani ka “juramu[atiksï] mili uéxurhini Kristuni jingoni” (Jaŋaskuecha 14:1-3; 20:1-4; Roma 8:17). Eskachi na exejka, ima Jurhiatikua enga Jusgarpinhaaka no jindeuati májku jurhiatikua enga beintikuatru ora jukaka, sino mili uéxurhiniuati.

Ini mili uéxurhini jimbo, Jesukristu “jusgariaua[ti] tsípitichani ka uarhirichani” (2 Timoteo 4:1). Inde uandakua “tsípitichani”, imani “uánikua kʼuiripuechani” arhikuekaasïndi engaksï tsípiti pakaraaka Armajedonirhu (Jaŋaskuecha 7:9-17). Apostuli Juanu ístu exeasti “imechani engaksï uarhikia, [...] Diosïri orhepatini jimboksï anhaxurhitini jarhani” nani enga ima jusgarpijka. Eska na eiatspika Jesusi, “imecha engaksï inchatsikurini jaka, kurhaa[ti] [Kristueri] uandakuani, [...] ka tsíntaatiksï” (Juanu 5:28, 29; Ukuecha 24:15). Peru ¿nénaksï jusgarinhaa kʼuiripuecha?

Apostuli Juanu exespti eska “pʼirakunhas[ka] libruecha” ka “luejkuksï jusgarinhasti uarhiricha indeni ambe jimbo enga karakata japka libruecharhu, eskaksï námindu jukanchapka imecheri úkuechani jimbo” (Jaŋaskuecha 20:12). ¿Jukanharhiskiksï inde libruecha iámindu ambe engaksï kʼuiripuecha úka? Nómbe. Nóksï jusgarinhaati inde ambe jimbo engaksï úka ante de uarhinksï. ¿Nénachi mítiski i ambe? Jimboka Biblia uandasïnga eska “ima enga uarhirini jakaia, puáminhantasïngia pekaduechani” (Romanos 6:7, TNM). Imecha engaksï tsíntaaka, nóteruksï miáminhantaatia pekaduechani. Ísï jimbo, libruecha enga Biblia uandajka, jindetiksï jimbanhi juramukuecha enga Jeoba íntspiauaka. Paraksï úni irekani  para méntkisï imecha engaksï tsíntaaka ka imecha engaksï tsípiti pakaraaka Armajedonirhu, jatsiatiksï para kurhajchaani Jeobaeri leichani, engaksï jakaia ka imechani enga Jeoba íntspiauaka imani mili uéxurhini jimbo. Ísï jimbo, iáminduechaksï jusgarinhaati imani ambe jimbo engaksï uáka imani mili uéxurhini jimbo.

Ima Jurhiatikuarhu enga Tata Diosï Jusgarpiaka, miioni kʼuiripuechaksï jiáni uénati mítini ambesï uékajki Tata Diosï ka uátiksï marhuakuni. Paraka i ambe ísï úkuarhiaka, iápuru ísï jorhenguarhikua ma jauati. Jo, “jurhimbikua ambeksï jorhenguarhi[ati] iáminduecha engaksï ambakiti echerini jimbo irekaaka” (Isaías 26:9). Peru no iáminduechaksï uékati úni ambe enga Tata Diosï uandaaka. Isaías 26:10 uandasïndi: “Nájkiruka no sési úri jarhuatanhaaka, no uékati jorhenguarhini jurhimbikua ambe úni. Jima enga jurhimbiti jánhaaka, ima no sési ambe uáti, ka no méni exeati na enga xáni kʼériika Jeoba”. I jásï kʼuiripu kʼamajkunhaati para méntkisï jiáni enga Tata Diosï Jusgarpiaka (Isaías 65:20).

Enga na kʼamaraakia ima Jurhiatikua enga Tata Diosï Jusgarpiaka, kʼuiripuechaksï jatsiati irekakuani engaksï Adani ka Eba tsïtapka (1 Korintu 15:24-28). Ka jauati últimu prueba ma, Satanasi kueratanhaati ka sésikua intsïnhaati para últimu uelta jámani tsïjpani kʼuiripuni (Jaŋaskuecha 20:3, 7-10). Kʼuiripuecha engaksï no kurhajchaaka Satanasini, exeatiksï na enga úkuarhiaka i ambe: “Echeri jurhimbiticheriuati, ka jimaksï irekaati para méntkisï” (Salmo 37:29). Jurhiatikua enga Tata Diosï Jusgarpiaka, kóntperata máeuati para iáminduecha engaksï méntkisï marhuakuaka Jeobani.

^ párr. 1 Parajtsï sánderu mítini Armajedoniri, exe je libruni Perspicacia para comprender las Escrituras, vol. 1, páj. 680, 681, 1086, 1087, engaksï Jeobaeri testiguecha úka.