Exeni ambe enga jataka

Segundu menu jimbo nirani

Índisi jimbo nirani

Jeobaeri testiguecha

Purépecha

Biblia ka ambe engajtsïni aiangujka

 ARHUKUKATA 14

Profetecha: Tata Diosïri uandakua páricha

Profetecha: Tata Diosïri uandakua páricha

Jeoba profetechani erakuasïndi paraksï uandantani Mesiasiri ambe ka jurhimbiti kómarhikueri ambe

IMANI jurhiatikuechani jimbo engaksï japka juramuticha Israeli ka Juda, uénasptiksï kánikua mítikuarhini achaticha máru: profetecha. Iámindu i achaticha tsʼiuekuaksï uétarhinchasïrendi ka uinhapiti jakajkukua ma paraksï úni eianhpini ambe enga Tata Diosï uandaenga. Uánikua ambe engaksï ima eianhpiaenga, ari ambesti:

1. Jerusaleniri kʼamajkukua. Tata Diosïri profetecha —komueska Isaiasi ka Jeremiasi— uánikua uéxurhini ante deka úkuarhipiringa, uandantasptiksï eska Jerusaleni kʼamajkunhapiringa ka eska nóteru nema irekapiringia jima. Ístuksï uandantaspti andisï ima ireta xáni no sési ikiatapi Tata Diosïni. Nájkirukaksï uandaenga eskaksï Jeobaeri iretespka, imecheri no sési jásï kómarhikua, imecheri no sési jarhati úkuecha, ka engaksï kánikua no sési káuenga máteruechani, xarhatasïrendiksï na engaksï jásï kʼuiripuepka (2 Reyes 21:10-15; Isaías 3:1-8, 16-26; Jeremías 2:1–3:13).

2. Jurhimbiti kómarhikua ménderu uéntasïndi. Enga Tata Diosïri ireta andangutapiringia setenta uéxurhini jini Babilonia, kʼuanhatsintapirindiksï ménderu imecheri echerini jimbo, sésiksï jántskantapirindi templuni enga Jerusaleni japka ka jurhimbiti kómarhikua ménderu uénakuarhipirindi (Jeremías 46:27; Amós 9:13-15). Dosientu uéxurhini isï enga nótki úkuarhenga i ambe, Isaiasi uandaspti eska achati ma enga arhinhapiringa Siru, inchapiringa Babilonia ka petatantapirindi Tata Diosïri iretani. Ka jamberi uandaspti néna úpirini Siru i ambe (Isaías 44:24–45:3).

3. Mesiasiri janokua ka imeri nitamakuecha. Mesiasi andajpenupirindi ireta ma jimbo enga arhinhaenga Beleni (Miqueas 5:2). Kaxumbiti kʼuiripu máepirindi ka burru jatarini inchaakupirindi Jerusaleni (Zacarías 9:9). Nájkiruka sési ka uékperakua jingoni kápiringa kʼuiripuechani, kʼuiripuecha nóksï sési kámapirindi (Isaías 42:1-3; 53:1, 3). Ka niárapirindiksï iatiru no sési kámani paraksï uándikuni. ¿Arhikuekapirini i ambe eska jima kʼamajkunhapiringa Mesiasi? Nombe, jimboka tsíntapiringa para íntspeni imeri kéjtsïtakuani ka isï úni eska iámindu kʼuiripuecha puáminhantapiringa pekaduechani (Isaías 53:4, 5, 9-12).

4. Mesiasiri juramukua. Iámindu kʼuiripuecha pekadoristiksï ka nóksï úkata jarhasti para juramuni, joperu Juramuti Mesiasi kʼóru. Mesiasi niárapirindi arhinhani Juramuti Pínandikueri (Isaías 9:6, 7; Jeremías 10:23). Enga juramuni jauakia Parhakpinirhu, pínandikua jauati iápurhu isï, ka kʼuiripu ka animalicha márkuksï irekati (Isaías 11:3-7). Nóteru ma pʼamenchakua jauatia (Isaías 33:24). Uarhikua jamberi nóteru jauatia (Isaías 25:8). Ka, miioni jimbo kʼuiripuecha tsíntati paraksï ménderu irentani ixú echerirhu (Daniel 12:13).

(Pʼitakata jarhasti libruecharhu Isaías, Jeremías, Daniel, Amós, Miqueas ka Zacarías.)